“Ganigibá [...], adügabéi wadagimanu!”
“Ganigibá deregüda buguyame, adügabéi wadagimanu! Mábürühala barüna manufude buguyame, lugundun búmabei Bungiu” (1 KRO. 28:20).
UREMU: 23, 29
1, 2. a) Ka meha buligasion súdiniti ichugúbei lun Salomón? b) Ka meha adiheridagüdübalin Dawidi?
ANÚADIRA lumuti Heowá Salomón lun ligía lan adundehei wadagimanu lánina tábunawagun ténpulu to Herusalénboun, aba lídangiñe wadagimanu le súdinitimabei lidan sun dan. Mosu meha wéiribei lan tubuidun ani laganbahóuba meha tuagu lidan sun fulasu “ubouagu”. Gama lumoun, le súdinitimabei tuguyaba meha “litenpulun Bungiu” (1 Kro. 22:1, 5, 9-11).
2 Afiñeti meha Dawidi líderagubei lan Heowá Salomón, gama lumoun, nidiheriti meha ladüga nibureingili lan ani míbegili meha lisubudin. Ganigibei meha san Salomón lun lánharun lun buligasion lánina tábunawagun ténpulu? Ábanbei meha san turóbuli lirumudiri luma lilouguan lisubudin? Mosu meha ganigi lan Salomón lun ladügüni wadagimanu ligía anhein busén lubéi lun buidu lan lidin lun.
3. Ka hénpulu lánina ganigi líchugubei Dawidi lun Salomón?
3 Chóuruti furendei lan Salomón saragu lídangiñe hénpulu le líchugubei Dawidi le lúguchi lun. Dan le meha nibureingili Dawidi, ageindaguati meha hama animaalu áraabuna ha áluahabaña héiginiña lilügüniña lúguchi mudún (1 Sam. 17:34, 35). Ageindaguati giñe luma aban hígandei gíriti Goliadi lau ganigi. Lau lídehan Heowá, áfara lumuti Dawidi wügüri gawuribuhati ligía lau aban dübü (1 Sam. 17:45, 49, 50).
4. Ka meha uagu mosu lubéi ganigi lan Salomón?
4 Chóuruti Dawidi lan meha gürigia le buídutimabei lun líchugun gurasu lun Salomón lun ganigi lan ani lun lábunagunu ténpulu (aliiha huméi 1 Krónikasi 28:20). Lun hamuga meha ígiraguagüda lan Salomón lungua lun anufudei, háfuga magumeserun lubéi lan hamuga luadigimari ani wuribatimabei hamuga lira sügǘ lau ladügüni wuriba.
5. Ka uagu megei wabéi lun ganigi wamá?
5 Ítara kei meha Salomón, mégeitiwa lun líderaguniwa Heowá lun ganigi wamá lun wadügüni wadagimanu le líchugubei woun. Lau saminaü le, akutiha waméi hénpulu hani fiú gürigia ha arufudubaña ganigi lidan dan le sügühalibei. Danme le wadügüñein lan, samina wamá ida luba lan ganigi wamá ani gúnfuli wameime le lunbei wadügüni.
HÉNPULU LÁNINA GANIGI
6. Ka aweiridagüdübalun hanigi luagu ganigi le larufudubei Hosé?
6 Samina wamá luagun ganigi le larufudubei Hosé dan le tálugunbei lani Potifarü weiriou tafosuruni lun larounrun tuma. Chóuruti subudi lani meha ládaraguba lan lungua lidoun turóbuli wéiriti anhein amahada ladügüni. Íbini ítara, arufudati ganigi ani madügün lumuti le tabusenrubei (Agu. 39:10, 12).
7. Afuranguagüda huméi ida liña lan tarufudun Raabü ganigi (ariha huméi dibuhu le lídanbei lagumeseha arütíkulu).
7 Guentó ariha waméi hénpulu tani Raabü, to meha awinwanduboun Herikó. Dan le hóudinbei bián ísüraelina aríahatiña fulasu túbiñe, gayaraati hamuga meha ladügün anufudei lun míderagun tániña. Gama lumoun, kei afiñe tubéi luagu Heowá, ganigitu meha lun taramuduniña ani lun tíderaguniña lun hanurahan (Hos. 2:4, 5, 9, 12-16). Afiñetu meha luagu Heowá lan Búngiubei le inarüniti ani ladügüba lan somu katei lun líchuguni fulasu ligía houn ísüraelina. Ligía mígiraguagüdün tubéi tungua lun anufudei hawéi gürigia, kéiburi luéi lurúeite Herikó hama luwügüriña. Seremei tóuserun lau ganigi, séfutu hau sun tiduheñu (Hos. 6:22, 23).
8. Ida liña líderaguniña ganigi le larufudubei Hesusu lani apostolugu?
8 Arufudatiña giñe lani Hesusu apostolugu ha úaraguabaña ganigi. Ariha hamaali meha ganigi le larufudubei Hesusu ani ligía ínchahabaliña lun háyeihani (Mat. 8:28-32; Huan 2:13-17; 18:3-5). Dan le híchugunbei saduseugu gumadi houn lun mayanuhan hamá luagu Hesusu, máhatiña disipulugu hadügüni (Adü. 5:17, 18, 27-29).
9. Según 2 Timotéu 1:7, ka úmagiñe liabin ganigi le inarüniti?
9 Dandu Hosé, Raabü, Hesusu hama apostolugu desidírühaña meha hadügüni le buídubei. Ganigitiña meha ladüga afiñe hamá luagu Heowá, mama ladüga weiri lan hafiñerun hawougua. Danme le wagagibudagun luma sügǘ le ídanbei mosu lan warufudun ganigi, afiñe wamá luagu Heowá, mamalá wawougua wafiñera (aliiha huméi 2 Timotéu 1:7). Ariha wamá bián katei le ídanbei megei wamá ganigi: hadan waduheñu luma lidan damuriguaü.
SÜGǗ BURÍ LE ÍDANBEI MEGEI WAMÁ GANIGI
10. Ka uagu megei habéi nibureintiña kristiánugu ganigi?
10 Gagibuguatiña kristiánugu ha nibureingiña luma saragu sügǘ le ídanbei megei hamá ganigi lun úaragua hamá lun Heowá. Gayarati líderaguniña lani Salomón hénpulu saragu. Ganigiti meha lun desidírü lan buidu luma lun lagumuchuni tábunawagun ténpulu. Inarüni lunti lan hadundehaniña agübürigu hasaanigu. Gama lumoun, anihein katei súdiniti le lunti desidírü hamani nibureintiña houngua (Ari. 27:11). Mosu desidírü hamá kaba lan hamadagu, kaba lan isebáhari hanúadaha, kaba lan hadüga lun haruma lan habagari luma ídaba lan habadiseira. Mégeitiña ganigi lun desidírü hamá buidu, ladüga hadügüñein le mínsiñebei lun Satanási, le adügübei bula lau Bungiu luma lau lilurudun.
11, 12. a) Ida liña meha larufudun Moisesi ganigi? b) Ida luba gayara lan háyeihani nibureintiña lani Moisesi hénpulu?
Ebü. 11:24-26). Biní lumuti Heowá luagu katei le, ani lasigiruba abinirei ámuñegü.
11 Anihein aban katei súdiniti le lunbei desidírü hamani nibureintiña, mosu desidírü hamá kaba lan hadüga ámuñegü. Lidan fiú ageiraü, adügǘwati erei hawagu nibureintiña lun houdin aturiaha tidan luban furendei íñuti lun hadarirun aban wadagimanu le fáyeiti. Lidan amu ageiraü, hénrenguti ibagari ani saminatiña nibureintiña mosu lan hawadigimaridun lun híderaguniña haduheñu. Anhein básügürüña lubéi lídangiñe aban lídangiñe turóbuli kei le, saminabá luagun lani Moisesi hénpulu. Kei le túbiñe lubéi liráü faraón laweirida, gayarati hamuga meha lálugun lun aban lan gürigia súdiniti ani le rísiti. Chóuruti here hamá liduheñu ehiptuna luagu, lumaisturungu hama ha íchugubaña adundehani. Gama lumoun, mígiraguagüdünti lungua, óuserati lau ganigi ani aba desidírü lan leseriwidun lun Bungiu. Lárigiñe láfuridun Ehiptugiñe ani ígiralei irisini, aba lárügüdün luagu Heowá (12 Dan le háyeihani nibureintiña lani Moisesi hénpulu ani aba hetenirun lun heseriwidun lun Bungiu luma lun híchuguni Larúeihan lidan furumiñeti lúgaaru, resibitiña saragu abinirúni. Líderagubaña Heowá ibihei katei le hemegeirubei houn haduheñu. Lidan furumiñeti sígulu, yusu lumuti meha Timotéu libagari lun leseriwidun lun Bungiu, ani gayarati giñe badügüni ligiaméme * (aliiha huméi Filipuna 2:19-22).
Desidírühadiwa san lun ganigi wamá lidan sun katei lidan wabagari? (Ariha huméi párafu 13 darí 17).
13. Ida liña líderagunun ganigi aban nibureintu kristiána?
13 Ariha waméi tikesin aban nibureintu to awinwanduboun Alabama (Meriga). Mégeitu meha ganigi lun desidírü tan teseriwidun lun Bungiu. Ariñagatu: “Hanufudegubeiñadina nayanuhan hagibugiñe gürigia. Hénrenguti meha nun nayanuhan hama gürigia tidan Luban Adamuridaguni. Ani hénrengutimati meha nun lidan apurichihani, ladüga hanufudetina meha nadaünhan luagu tubenari haban gürigia ha ibidiñetiña nun”. Lau hídehan tagübürigu hama amu íbirigu, aba gayara lan teseriwidun kei prekursora to adügütu 70 oura. Ariñagatu: “Ariñagati ubóu le lani Satanási bun buídutima lan baturiahan tidan luban furendei íñuti, lun subudiwa ban, lun gaseinsun ban ani ibiha buguyame saragu amu katei. Gama lumoun, mibihin hamuti hiibe-agei gürigia katei lira. Buínrügüti habagari lau saragu idiheri luma asufuriruni. Lidan nikesin, íderagua láadina neseriwidun lun Heowá lun gunda nan”.
14. Ka burí kesi ídanbei megei hamá agübürigu ganigi?
14 Mosu giñe ganigi hamá agübürigu kristiánugu. Kei hénpulu, gayarati lamuriahan hayubudiri hama súnwandan lun hawadigimaridun lóugiñe lóurate áfuriduni, lidan weyu le direi hamaalibei lun háhuduragun lun Heowá hama haduheñu, lidan lóurate apurichihani o adamuridaguni. Mégeitiña ganigi lun hariñagun uá saragu wéiyaasu. Ítara liña híchugun aban hénpulu buiti houn hasaanigu. Luagu amu oubaü, gayarati mígirun hamá lun hadügün hasaanigu somu katei le ígira hamutiña amu agübürigu hasaanigu lun hadügüni. Kaba san ladüga úguchili le anhein hálügüda íbirigu hagía ka lan lébunabei le desidírü lubéi? Mosu ganigi lan lun lafuranguagüdüni houn lau inebesei.
15. Ida luba líderaguniña Sálumu 37:25 luma Ebüréu 13:5 agübürigu?
15 Arufudatiña agübürigu ganigi dan le híderaguniña hasaanigu lun hasaminarun haganwoundagüdüni heseriwidun lun Heowá ani lun hadügüni. Háfuga machourun hamá íbirigu anhein lunti lubéi hínchahaniña hasaanigu lun heseriwidun kei prekursorugu, háguyun ñeinhin lubéi mégeiwa lan ídemuei lidan apurichihani, heseriwidun Betelirugu, hawadigimaridun lidan tábunawagun Luban Adamuridaguni o muna lun Adamurini Wéinamuti. Háfuga hanufude hamá luéi siñá lanme híderaguniña hasaanigu danme le haweiyadun. Gama Sálumu 37:25; Ebüréu 13:5). Dan le híchuguni agübürigu lubuidun hénpulu le, íderagua hamutiña hasaanigu lun ganigi hamá ani lun hafiñerun luagu Heowá (1 Sam. 1:27, 28; 2 Tim. 3:14, 15).
lumoun, anhein chu lubéi hau agübürigu, harufuduba ganigi ani hafiñeruba luagu lagunfulirubei lan Heowá lani füramasei (aliiha huméi16. a) Ka hadügübei fiú agübürigu lun híderaguniña hasaanigu asaminara haganwoundagüdüni heseriwidun lun Heowá? b) Ida liña líderaguniña katei le isaanigu?
16 Ariha waméi hénpulu hani aban feru maríeitiña Merigana ha íderagubaliña hasaanigu lun hasaminarun kaba lan hadüga lidan heseriwidun lun Heowá. Ariñagati úguchili: “Dan le meha mayanuhadigiña wasaanigu méibugun hagía, ayanuhaadiwa meha houn luagu ugundani le lanügübei eseriwidúni kei prekursoru luma líderawagun damuriguaü. Guentó ligía hasaminarubei hadügün. Íderagua lumutiña háfaagun lun hibihini katei le lun mábürühan hamá lidoun óuchawaguni lidan ubóu le lani Satanási luma lun hetenirun lun le súdinitimabei: heseriwidun lun Heowá”. Abürühati amu íbiri le biámabei isaanigu: “Fériditiña saragu agübürigu dan, seinsu luma erei lun hetenirun hasaanigu lun haturiahan, lun somu huraraü o lun somu isebáhari. Gama lumoun, buídutimati híderawagun isaanigu lun hadügün katei le lunti líderaguniña lun buidu lan hamadagua luma Heowá. Gúndaatiwa lau warihiniña wasaanigu asaminara luagun le habusenrubei hadügün lidan heseriwidun lun Heowá luma dan le ibiheina hamani”. Gayarati wachoururuni labinirubaña lan Bungiu agübürigu ha íderagubaliña hasaanigu lun hasaminarun haganwoundagüdüni heseriwidun lun Heowá.
ARUFUDA WAMÁ GANIGI LIDAN DAMURIGUAÜ
17. Írida humá fiú kesi le ídanbei mégeiwa lan ganigi lidan damuriguaü.
17 Mégeitiwa giñe warufudun ganigi lidan damuriguaü. Kéiburi wéiyaaña lidan afiñeni, mosu haransehan turóbuli lánina figóu wéinamuti o híderaguniña ha lídanbaña peliguru ladüga somu sandi le lunti letenirún lun lau lóufudagun. Añahein amu ñǘdüntiña furisunrugu íchiga aturiahani o adüga adamuridaguni. Luagu amu oubaü, guentó aniheinhali saragu chansi houn würiña ha mamarieidungiña lun haganwoundagüdüni heseriwidun lun Heowá. Gayarati heseriwidun kei prekursorugu, háguyun ñeinhin lubéi mégeiwa lan ídemuei lidan apurichihani, hídehan lidan Departamentu le arihibei lau tábunawagun luma tounigirún Luban Adamuridaguni
luma Adamurini luma habuinchagüdün gárada lun houdin tidan Leskuela houn Apurichihatiña Larúeihan Bungiu. Añahein giñe fiú gachansintiña lun houdin tidan Leskuela Galaadü.18. Ida liña gayara lan harufudun íbirigu würiña ha wéiyougaañabaña ganigi?
18 Súngubei wagía hínsiñetiña íbirigu würiña wéiyougaaña ha lídanbaña damuriguaü woun. Inarüni siñá lan hadügün fiú hádangiñe saragu lidan heseriwidun lun Bungiu kei meha furumiñe, gama lumoun, gayaragili harufudun ganigi ídeha hagíame lidan damuriguaü (aliiha huméi Titu 2:3-5). Kei hénpulu, ánhaña amuriaha wéiyaaña lidan afiñeni hama lun hayanuhan tuma somu nibureintu luagu súdini lan lun tasansiragun keisi lubudubu, mégeibaña ganigi lun hadügüni. Furanguti madeinhanbaña lan tun nibureintu tuguya, hóucharügübaña hínchahanu lun tasaminarun luagu ida liña lan gayara lan gani lan ligaburi tasansiragun efekütu hawagu amu (1 Tim. 2:9, 10). Barüti ínsiñeni le harufudubei íbirigu ha wéiyougaañaba buiti lun damuriguaü.
19. a) Ida luba harufudun wügüriña ha badiseihaña ganigi? b) Ida liña líderaguniña Filipuna 2:13 luma Isaíasi 12:2 wügüriña ha badiseihaña?
19 Mosu giñe ganigi hamá wügüriña ha badiseihañabaña ani mosu hawadigimaridun. Buiti léibugun katei lidan damuriguaü dan le aranseñu hamá lun hánharun lun amu burí buligasion le ichugúti houn (1 Tim. 3:1). Gama lumoun, háfuga añahein lan fiú ha machourun hamuti anhein lunti lubéi hídehan. Ka uagu? Háfuga adüga lan binadu hachara lun hasaminarun madüna hamá lun heseriwidun keisi ídehatiña lidan damuriguaü o keisi wéiyaaña lidan afiñeni. O háfuga samina hamá madügün habéi lan wadagimanu buidu. Anhein anihán lubéi hikesinbei, gayarati líderagunün Heowá (aliiha huméi Filipuna 2:13; Isaíasi 12:2). Haritagua huméi lani Moisesi hénpulu. Mabafuti meha giñe lasandiragun lungua lun lagunfuliruni le lariñagubei Bungiu lun (Afu. 3:11). Gama lumoun, íderagua lumuti Heowá lun ganigi lan luma lun lagunfulirun lau lani buligasion. Ligíati, anhein megei hubéi ganigi, ayumuragua humá lun Heowá lun líderagunün ani aliiha humóun Bíbülia sagü weyu. Lahuuduba giñe hun hasaminarun luagun hénpulu le híchugubei lubúeingu Bungiu ha lánina binadu dan ha meha arufudubaña ganigi. Gayarati giñe hamuriahan hama wéiyaaña lidan afiñeni lau ǘnabuguni lun harufudahan hun ani ariñaga hugíame houn gayara lan hídehan lidan le mégeiwabei. Ínchaha wamutiña sun íbirigu ha badiseihaña lun ganigi hamá ani lun hawadigimaridun saragu lidan damuriguaü.
ANIHEIN HEOWÁ BUMA
20, 21. a) Ka lachoururubei Dawidi lun Salomón? b) Ka lunbei wafiñeruni?
20 Haritaguagüda lumuti urúei Dawidi lun Salomón luagu líderagubei lan Heowá darí lagumuchun tábunawagun ténpulu (1 Kro. 28:20). Chóuruti samina lan Salomón buidu luagun le lariñagubei lúguchi lun ani mígirunti lun leredehani lirumudiri luma lilouguan lisubudin. Ganigiti ani adüga lumuti wadagimanu, ani lau lídehan Heowá gumú lumuti tadügǘn óunwenbu ténpulu tuguya lidan sedü irumu dimí.
21 Ítara kei meha líderaguni Heowá Salomón, gayarati giñe líderaguniwa lun ganigi wamá luma lun wagunfulirun lau wani buligasion hama waduheñu luma lidan damuriguaü (Isa. 41:10, 13). Ánhawa eseriwida lun Heowá lau ganigi, gayarati wafiñerun labinirubadiwa lan guentó luma ámuñegü. Ligíati, adüga waméi le lariñagubei Dawidi: “Ganigibá [...], adügabéi wadagimanu!”.
^ par. 12 Badariruba adundehani luagu ida luba lan desidírü ban beseriwidun lun Heowá ámuñegü lidan arütíkulu le gíribei “Fijémonos metas espirituales para glorificar al Creador”, le áfuachubei tidan La Atalaya to lánina 15 lidan sedü-hati irumu 2004.