1. Maríei

Mama sun gürigia lun ligiaméme lan hasaminan luagu maríei, ani ámuñegueinarügüti hasaminarun hiibe-agei luagu le megei wabéi lun gunda hamá maríeitiña.

LE MINI LUBÉI: Bungiu adügübalin maríei, ligía asubudirubalin buidu le hemegeirubei maríeitiña lun gunda hamá (Márükosu 10:​6-9). Gúndaabaña maríeitiña ánhaña etenira lun le gayaraabei ladügüni kada aban lun hederebudagüdüni hamarieidun, lubaragiñe hetenirun lun le gayaraabei habihini lídangiñe. Wügüri maríeiti le hínsiñeboun lani weiriou lun, arufuda lumuti lau lóuserunu buidu luma lau lóunigirunu. Ani würi maríeitu to inebeti tani weiriei tun, arufuda tumuti lau ligaburi tayanuhan lun luma ligaburi tóuseruni.

BUITI ADUNDEHANI LE TÍCHUGUBEI BÍBÜLIA: Afiñeti meha Quang tuma Thi to lani weiriou, ha bietnamuna, siñabei lan gunda hamá lidan hamarieidun. Liibe-agei dan, furundeti meha Quang. Ariñagati: “Meberesegúntina meha lau le tasandirubei Thi ani agawagüda numutu meha busiganu saragu wéiyaasu”. Busentu meha Thi lun tígiruni. Ariñagatu: “Sanditina siñaali lan meha nafiñerun luagu mineben ligía nun”.

Lau lásügürün dan furendei lumuti Quang tuma Thi le tarufudahabei Bíbülia ani falá hamuti le lariñagubei Éfesuna 5:33 lidan hamarieidun. Ka buiti lanügübei lira houn? Ariñagati Quang: “Íderagua lumutina bérusu le lun níchugun fe lunti lan nóuserunu Thi buidu luma lun nadügün lun tasandirun hínsiñewa tan. Furendeitina giñe lunti lan nóunigirunu lau níchuguni le temegeirubei tun luma lun netenirun lun ligaburi tasandiragun tungua. Ariha numuti dan le lan nadügüni ítara, ábatima nínsiñedun tun inebe au tun”. Ariñagatu Thi: “Áfaaguatina súnwandan lun inebe lan nani weiriei nun kei lariñaguni Éfesuna 5:33. Adügati lun nasandiragun nungua lau darangilaü, hínsiñewa nan luma lau ichouruni”.

 2. Hanügagun hungua hama amu

Saragu dan gíbetiña gürigia óuserutiña amu wuriba ladüga ligaburi haríawagun, harasan, hageira, luagu le hasaminarubei luagu agamariduni o luagu hani relihión.

LE MINI LUBÉI: Marufudahantu Bíbülia lunti lan iyereegu hamá gürigia ha lídangiñetiña amu rasa o lílana amu ageiraü, ni ha agamaridubaña wügüriña o würiña háledigu woun. Lubaragiñe lira, arufudahatu lunti lan inebe hamá sun gürigia woun, meberesenga harasan, hageira, anhein risi habéi o gudeme hamá (Adügaü 10:34). Íbini anhein amu lubéi hafiñen wawéi o mínsiñe lan le hadügübei woun, lunti wóuseruniña buidu luma lau inebesei (Matéu 7:12).

BUITI ADUNDEHANI LE TÍCHUGUBEI BÍBÜLIA: Arufudahóuati meha lun Daniel dencha hamá gürigia asiana lun lageira. Ligíati, iyereegutiña meha gürigia asiana lun anabagua laña hadan gürigia. Ariñagati: “Saminatina yebe lau lan lira níderaguñein lan nageira. Masaminarungubeitina meha wuriba lan le nadügübei”.

Lau lásügürün dan, furendei lumuti Daniel le tarufudahabei Bíbülia. Ariñagati: “Mosu meha nasansiruni ligaburi nasaminarun sunsuinagubei. Aban habu sun gürigia lun Bungiu, meberesenga halíagiñe lan hayabin. Mosu meha nafurendeirun arihaña gürigia kei larihiniña Bungiu”. Ka lasaminarubei Daniel guentó dan le lasubudirun aban gürigia luagu furumiñeti wéiyaasu? Ariñagati: “Meberesegúntina halíagiñe lan liabin gürigia ligía. Hínsiñetiña sun gürigia nun ani gamadatina ha lídangiñetiña sun ubóu”.

 3. Seinsu

Áfaaguatiña saragu gürigia lun risi hamá lun gunda lan habagari luma lun buidu lan habagari ámuñegü.

LE MINI LUBÉI: Lau sun mégeiwa lan seinsu, úati mini lan ladügüba lan lun gunda wamá o ladügüba lan lun buidu lan wabagari ámuñegü (Ariñawagúni 18:11; 23:​4, 5). Le linarün katei, lun gunda wamá le tímatimaati luma lun buidu lan wabagari ámuñegü, lunti wafalaruni lubuidun adundehani le líchugubei Bungiu tidan Bíbülia (1 Timotéu 6:​17-19).

BUITI ADUNDEHANI LE TÍCHUGUBEI BÍBÜLIA: Áfaaguati aban wügüri indonésiana gíriti Cardo lun risi lan ani ibiha lumuti. Ariñagati: “Gayaraati meha naweiyasuha, nagañeiha burí katei séruti, karü burí, muna o amu katei. Ibiha numuti meha sun le hayumahabei hiibe-agei gürigia habihin”. Lau sun lira, málüti awinwanda ítara. Ariñagati: “Aba líweruhoun niseinsun, sun meha seinsu le uágubei náfaagua lun nibihin luagu saragu irumu, aba neferidiruni lidan magaradahan nan. Sügǘ numuti sun nibagari áfaagua lun risi nan, ani lárigiñe sun lira aba nerederun sin ni kata; magundantina meha, sandigua au nungua mouni nan”.

Falá lumuti Cardo adundehani le tíchugubei Bíbülia luáguti seinsu, ani guentó, lubaragiñe láfaagun lun risi lan, gufurumati lau lúmati. Ariñagati: “Furendeitina katei lan le lúmagiñeti Bungiu ligía lan irisinibei le gebegitimabei. Guentó magida lumuti ni kata nidabagu, ani gúndaatina le tímatimaati”.

 4. Agamariduni

Ámuñegueinarügüti le hasaminarubei gürigia luagu agamariduni.

LE MINI LUBÉI: Rutu Bíbülia adundehani lun gébeha lan katei le gayaraabei wadügüni lidan agamariduni. Dimurei “magíaguni”, layanuhaña hawagu gürigia ha agabarahabaliña hámarigu, ha ahoruhabaña, agamaridutiña mamarieidunga, magüsi luma hawagu gürigia ha agamaridubaña animaalu (1 Korintuna 6:​9, 10). Aban idewesei lúmagiñeti Bungiu gayara lan lagamaridun aban wügüri tuma aban würi dan le maríeihaña (Ariñawagúni 5:​18, 19).

BUITI ADUNDEHANI LE TÍCHUGUBEI BÍBÜLIA: Ariñagatu Kylie, to awinwanduboun Australia: “Dan meha le mamarieidungidina saminatina meha ánhana lan agamarida chóurubei lan nasandiragun nungua hínsiñewa nuguya. Lau sun lira, mama ligía asuseredubei. Aba labuinchun nibagari lau machouruni luma lau magundani”.

Lau lásügürün dan, aba tagumeserun Kylie aturiahoun Bíbülia, falatéi le tariñagubei Bíbülia luáguti agamariduni. Ariñagatu: “Guenlé, ariha naali nungua ru lan Bungiu adundehani woun lun masufurirun wamá. Kei nadügüñein lubéi katei kei labusenruni Heowá, chóuruti nasandiragun nungua hínsiñewa nuguya. Seremei adundehani le tídanbei Bíbülia, masandihadina tigari anigi”.