Furanguti houn saragu gürigia anihein lan katei le buídubei lumoun burí katei le wuribabei. Hiibe-agei gürigia wuribati harihin lun águraguni, áfarahani luma lañawarihóun houn irahüñü. Luéigiñe le aban oubaü, hiibe-agei gürigia gúndaatiña dan le harihin harufudun gürigia gamadóuni, híchaagun houngua lidan halugaarun amu luma dan le hadügün irichaü. Ágiati amu burí katei le lánina ibagari? Kéiburi katei le lánina agamariduni, anhein hariñagubei o mariñagun hubéi lan inarüni o ida luba lan hagüriahaniña hisaanigu? Saminatiña saragu ua lan aban óunabagülei le richati; furumiñeguarügü lan katei le hanúadirun hadügün buídubei lan. Ligíati, añahein lubéi saragu gürigia aba hadügüni le habusenrubei o aba hafalaruni le hariñagubei amu houn. Lau sun lira, buiti san saminaü le súnwandan?

Liibe-agei dan, lun wanúadiruni kaba lan wadüga, ígiratiwa lun ladundehaniwa wasaminan, ligía aban umalali wádangua le ariñagubalin woun anhein gadurun wabéi o madurun wamá (Rómana 2:​14, 15). Íbini irahüñü ñǘbürigiña subudi hamuti anhein richá lubéi o maricha lan aban katei ani anihein dan sandiguatiña houngua lau duru. Eibu aweirideina wamá, aba úaradeina lan wasaminan luma le geyegubei wau, kéiburi le hadügübei waduheñu, wapanaagu, máisturugu luma échuni le geyegubei wau luma relihión. Ligíati, dan le wanúadiruni le lunbei wadügüni ariñaga lumuti wasaminan woun anhein úara lubéi le wanúadirubei luma le wafurendeirubei.

Gayaraati línchahaniwa wasaminan lun wíchaagun woungua lidan halugaarun amu, lun geteingiradi wamá, lun wóuserun lau irichaü luma lau gudemehabu. Gayaraati giñe líderaguniwa wasaminan lun madügün wamá katei le adügati lun hasandiragun gürigia ha hínsiñebaña woun houngua wuriba o katei le gayaraabei ladügün lun wasandiragun woungua lau busiganu o lau duru.

Buiti san wafiñerun súnwandan luagu le lan wasaminarubei ligía lan buídubei? Dan le meha nibureingili Garrick, aba meha lanügüni libagari kei le aubei labusenra. Lau lásügürün dan, aba lasubudiruni manügün lani le lasaminarubei lidoun ni kata buiti. Lubaragiñe lira, aba lanügüni “lidoun magíaguni, tayusurún düroga, bacharuaü luma lidoun saragu anarimeni”.

Anihein dan aba wígirun lun ladundehaniwa wasaminan ani aba wáhüchürün luagu le hasaminarubei amu luagu le wadügübei. Le buídubei luagu katei le, gayaraati lan wafurendeirun lídangiñe hasubudin luma le hásügürübei amu. Dan le wadügüni le buídubei según hasaminan waduheñu, wamadagu luma hámagiñe gürigia ha geyegubaña wau, aba inebe wamá houn.

Buiti san wafiñerun súnwandan luagu le lan hasaminarubei amu ligía lan buídubei? Dan meha le nibureingiru Priscila, adüga tumuti meha lememe hadügübei tumadagu; maribanti meha harihini agamariduni mamarieidunga. Lau sun lira, aba tíchugun fe, manügün lan tadügüni le hasaminarubei amu ugundani tun. Ariñagatu: “Nadügüni le hadügübei sun gürigia madügünti lun nasandiragun nungua buidu. Ani aba lanügünina adüga katei le denchati luma lun nóuserun kei ibidiougua tau”.

Dan le wanúadiruni le buídubei lumoun le wuribabei, súdiniti le wasaminarubei luma le hasaminarubei amu. Gama lumoun, lunti gabaroun wamani amu burí katei lun buidu lan lidin woun. Anihein dan mabafutiwa lun warihini damichi le lunbei lanügüni le wanúadirubei woun luma houn amu (Ariñawagúni 14:12). Íbini anhein chouru wabalin buidu lan le wasaminarubei o le hasaminarubei gürigia ha geyegubaña wau, gayaraati chará wamá. Ibidiñeti woun anhein lasansiruba lan saminaü le lau lásügürün dan. Le linarün katei, anihein burí katei le meha wuribati harihini gürigia ani guentó, maribanhali harihini. Ani anihein giñe igaburi le meha maribanti larihíniwa ani guentó máhawali lun.

Anihein san aban adundehani le buídutimati o le gayaraati lafiñerúniwa luagu lun wasubudiruni le buídubei lumoun le wuribabei? Anihein san somu lúrudu lánina laruman ibagari le gayaraati leseriwidun woun lun wanúadiruni kaba lan wadüga ani lun masakürihan wamá lárigiñe?

Anihein adundehani lánina laruman ibagari le gayaraati lafiñerúniwa luagu ani súnwandan buídubei lan lidin woun dan le wafalaruni meberesenga kátawa lan o halía lan wawinwanda. Líderagubadiwa leweñegua ariñahani lun wadariruni adundehani le buídutimabei lun wadügüni le buídubei súnwandan lidan wabagari.