Ladügǘn le buídubei: Huguya lunbei hanúadiruni
Le wanúadirubei wadügün lidan wabagari, gayaraati lanügün buiti o wuribati woun. Kei subudi lubalin Heowá katei le, busenti lun wawinwandun según lilurudun.
Busenti Heowá lun buinñu lan wabagari lau darangilaü luma ugundani.
“Au Aburemeibei le Bubungiute; arufudaha numuti le buídubei bun, adundeha numutibu luéigiñe üma le lunbei bafalaruni. Adügaadibu hamuga gasu lau nererun! Aganwoundeina liña hamuga lubuidun dan bun kei duna éibaaguati, ítara liña hamuga bawanserun kei lugudi barana” (Isaíasi 48:17, 18).
Kei Heowá lubéi adügübaliwa, subudi lumuti létima buídutimabei woun lidan wabagari. Ligía lagunbirahanbadiwa lun wafalaruni ladundehan, ani ánhawa gaganbadi lun lilurudun buídubei lidin woun. Buídubei sun le lunbei wanúadiruni ani lanügüba darangilaü luma ugundani woun.
Ménrengunti le lamuriahabei Bungiu wama.
“Gumadi le níchugubei hun uguñe, mama katei wéiriti lénrengun hun, ani mama giñe katei le siñá humuti agunfulira” (2 Lúrudu 30:11).
Lun gayara lan wawinwandun según lilurudun Bungiu, háfuga mosu lan wadügün asansiruni lidan ligaburi wasaminan luma lidan ligaburi wóuserun. Mama aban katei hénrenguti le lamuriahabei Bungiu wama. Kei ligía lan Adügübaliwa, ligíatima asubudirubalin lébeha le gayara wabéi adüga. Eibu asubudireina wamani Heowá buidu, ábatima gunfuranda wamani “ménrenguti [lan] lagunfulirúniwa lugumadin” (1 Huan 5:3).
Ariñagati Heowá líderagubaña lan sun ha áfaagubaña hawinwandun según lilurudun.
“Lugundun au [Heowá] le Bubungiute, ragǘ naali búhabu; ani ariñagaadina bun: ‘Manufudedabá, íderagua numutibu’” (Isaíasi 41:13).
Gayaraati wawinwandun úara luma lilurudun Bungiu lugundun ariñagaali líderagubadiwa lan. Yusu lumutu Lererun lun líderaguniwa luma lun líchugun gurasu luma emenigini woun.
Furendeihaña saragu míñunu gürigia lidan sun ubóu, dan le lan hawinwandun según tariñaguni Bíbülia ábatima lan labuidurun habagari. Ka uagu masaga hubéi dan lun harihini le tariñagubei Bíbülia? Gayaraati hagumeserun lau hakutihanu garüdia Winwan humá lau ugundani. Hadariruboun lidan jw.org ani mama mosu hafayeihan tuagu. Tidan hadarirubei ǘrüwa arufudahani le:
-
Ida luba tíderagunün Lererun Bungiu?
-
Rutu Lererun Bungiu emenigini woun
-
Gayaraati san hafiñerun luagu le tariñagubei Lererun Bungiu?
Anhaün asagara dan lun hakutihanu Lererun Bungiu, hafurendeiruba gayaraagili lan lafiñerúniwa luagu le tarufudahabei “ladüga derebuguti lugumadin [Bungiu] darí lumoun leben dan” (Sálumu 111:8). Lau wafalaruni tadundehan Bíbülia lidan wabagari ligíatima igaburi le buídutimabei (2 Lúrudu 30:19, 20; Hosué 24:15). Lau sun lira, mafosurun lumutiwa Bungiu lun wafalaruni lilurudun, kada gürigia lunbei lanúadiruni kaba lan ladüga.
