Busenti Heowá lun hamarieidun bián gürigia lun gunda hamá, lun derebugu lan habagari keisi maríeitiña luma lun máhalachagun lan (Mat. 19:4-6). Anhein busén hubéi hamarieidun, ida luba hadarirun paaná buiti? Kei Heowá lubéi adügübaliwa, subudi lumuti le lunbei wadügüni lun buidu lan lidin woun lidan wadaradun luma lidan wabagari keisi maríeitiña. Dan le wafalaruni adundehani le tídanbei Bíbülia súnwandan barǘ lan buiti. Ariha wamá fiu lídangiñe adundehani le.

Furumiñe, lunti gunfuranda wamani aban igaburi le hawagubei sun gürigia: “Úati ni kata geyeedaguaditi ani salufuriti kei hanigi gürigia” (Her. 17:9). Dan le busén hamá bián gürigia lun hamarieidun, ani aba lagumeserun wügüri ebeluha tumoun ladari, gayaraabei ladügün le hasandirubei tidan hanigi lun marihin hamani katei kei lubudubu. Ánhaña amarieida ladüga le hasandirubei hámagua, gayaraabei lasuseredun katei le magurabun habéi (Ari. 28:26). Ligíati mabuidunti lun hayanuhan adarigu luagu lanarime ínsiñeni le hasandirubei hawougua lidan hagumeseha asubudiragua hámagua o hadügün füramasei lubaragiñe hasubudiragun hámagua buidu buidu.

Ariñagati Ariñawagúni 22:3: “Ha buídubaña ichügü harihini denchaü hegeyedun luéi, ánhañati ha ibidiouguabaña aau, ñǘdünrügütiña lubaroun ábati hasufuriruni damichi”. Ka san lídangiñe denchaü le úmabei hagagibudagua ha áluahabaña adari luéigiñe Interneti? Híruti añahein lan sügühaña lídangiñe sügǘ gífiti le, gürigia ha ibidiñetiña houn, ha hasubudirun luéigiñe Interneti barütiña chansi hawagu ani bulesei hamutu hanigi. Añahein giñe gürigia biangua tigibu daraaña burí páhina iyeeniti lun heyeeduniña gürigia luma lun híweruhani haseinsun. Anihein dan ha adügübalin katei le aba hariñagun gefentiña lan luagu Heowá hagía.

Ariha wamá ábaya denchaü. Anihein lídangiñe páhina le lídanbei Interneti katei tánina matemátika lébunabei, le nege adügübei lun hadarirun adari ha buídutimabaña. Gama lumoun, úati ni kata achoururagüdüti luagu inarüni lan lira. Larufuduña funa san lichú au lau wígirun lun aban lan programa le tani matemátika anúadira wawagu luagu aban katei le súdiniti kei maríei? Uá. Móubati adundehani le tídanbei Bíbülia ani siñati wagoubaguagüdüni adundehani le lumoun adundehani le lani programa le tani matemátika (Ari. 1:7; 3:5-7).

Daritiwa ámuya inarüni lidan Ariñawagúni 14:15, le ariñagubei: “Afiñetiña ha mabuidunbaña ichügü luagu sun le ariñawagúbei houn; ánhaña ha buídubaña ichügü, ariha hamuti buidu halía lan héibuga”.  Lubaragiñe wasaminarun buídubei lan wügüri le lun lamarieidúniwa luma o buíduboun lan würi to lun lamarieidun tuma, súdiniti lun hasubudiragun hámagua buidu buidu. Ani luéigiñe Interneti hénrenguti hasubudiragun gürigia hámagua buidu buidu. Íbini anhein híchiga sun ariñahani luagu ídatima haña lan ani sügǘ hagía saragu dan ayanuha luéigiñe Interneti, gayaraati san lariñawagún luagu subudigua hamá houngua buidu buidu? Añahein hagía saminatiña darí hamaña lan tagürüga hanigi wagatiña dan le lachülürün oura lun hadunragun.

Ariñagati aban abürühati sálumu: “Maganóuntina lidan aban hama yéetiña, móundaragun nuguya hama biangua tigibu” (Sal. 26:4). Saragu gürigia kamaniti heyeehan dan le habürüha hawouguoun luéigiñe Interneti lúnrügü haweiridagüdünu hanigi gürigia. Gayaraati haramuduni kátañatima hamá o marihin lan lueirin hariban lidan ariñahani le habürühabei hawougua. Másiñati ariñaga hamá hádangiñe, gefentiña lan luagu Heowá hagía, gama lumoun, inarüni san badisei hamá? Kristiánugu san ha derebugubei hafiñen hagía? Buiti san hamadagua luma Heowá? Inebetiña san houn lílana damuriguaü? O aban san gürigia mabuiduntiña hagía darí lun hagübüri hamá umadagu? (1 Ko. 15:33; 2 Tim. 2:20, 21). Ígiraguaaña san según adundehani le tídanbei Bíbülia lun gayaraaya lan hamarieidun? Anihán burí katei le lunbei lasubudiruniwa, gama lumoun hénrenguti lasubudiruniwa katei le anhein mayanuhan wagía hama amu íbirigu ha asubudirubaliña gürigia ha buidu (Ari. 15:22). Furanguti, maweiyasunbei lan aban lubúein Bungiu amarieida hama “gürigia ha mafiñentiña luagu” ni hamá ha mabadiseirungiña (2 Ko. 6:14; 1 Ko. 7:39).

Kei denchaü lubéi páhina lidan Interneti lun haluahóun adari, anihein san aban igaburi le buiti lun haluahóun adari luma lun hasubudirun gürigia ha buítiña lun lamarieidúniwa hama? Dan le gayaraagili meha waríagun woungua gachansintiwa meha lun wasubudirun amu Gefentiña lidan damuriguaü, lidan adamurini o lidan amu burí ókaasion libe burí le.

Dan le siñá lan wadamuridagun kei burí guentó, ladüga sandi le gíribei COVID-19, aba wayusurun Interneti lun wadamuridagun, ani ñein anihein chansi lun hasubudiragun amu gefentiña luagu Heowá ha mamarieidungiña. Ani lidan burí damuriguaü le gayaraati harihini luma haganbuni ida liña lan hafuranguagüdüni hafiñen lidan óunabagülei le híchugubei (1 Tim. 6:11, 12). Gayaraati giñe hayanuhan lidan burí lirahüñü sétanu le esetirubei lárigiñe damuriguaü. Ani ámuya chansi le buídubei lun hasubudiragun houngua dan le hóundaragun fiu íbirigu lidan Interneti lun hásügürün murusun dan úara. Ani lidan burí isebáhari le gayaraati harihini íbiri ligía o íbiri tuguya ida liña lan hóuserun amu gürigia lúmati kátima lan hagaburibei (1 Fe. 3:4). Eibu asubudireina humá húmagua biángubei huguya gayaraabei harihini anhein aban lubéi hisaminan o ligiaméme lan katei le hínsiñebei hun hadügün o anhein gayara lubéi hawinwandun úara.

Anhein tafalara aban gürigia mamarieidungiru adundehani le tídanbei Bíbülia lidan táluahan kaba lan uma tamarieida, chóurutimati gúndaaboun lan lidan tibagari keisi maríeitu. Kei lariñaguni Ariñawagúni, le ariñagubei ítara: “Hagamaridun gürigia, kéigubeirügü hadariruni lubuidun-agei katei; arufuda lumuti lira luagu buidu lan Bungiu hama gürigia” (Ari. 18:22).