1. Ka ladügübei Heowá luagu kada aban wádangiñe?

SAMINA wamá ida liña lan wachülürün lun aban wamá gefenti luagu Heowá. Furumiñe, ayanuharügütiña somu gürigia woun “luagu uganu buiti”, másiñati wagübürigu lan o aban lan wani paaná lidan wadagimanu o leskuelarugu o aban Gefenti le apurichihabei tidan burí muna (Mar. 13:10). Lárigiñe aba ladireirun somu íbiri saragu dan luma áfaaguni lun líchugun aturiahani woun tídangiñeti Bíbülia. Seremei arufudahani burí ligía, aba línsiñedun Heowá woun ani aba wafurendeirun hínsiñe wamá lun. Heowá achawahabaliwa lidoun inarüni, guentoti kei lani haadiwa lan Hesusu disipulugu, hemenigibadiwa lun wawinwandun lun (Huan 6:44). Chóuruti, seremei wamani Heowá tídangiñe sun wanigi lau layusurun aban íbiri lun larufudahani inarüni woun luma lau lígirun lun weseriwidun lun.

2. Kaba wariha lidan aturiahani le?

² Kei subudi wamaali lan inarüni, anihein aban lubuidun chansi wama lun wíderagun amu lun héibugun wamá lídangiñe üma le anügübei lidoun ibagari. Añahein íbirigu ménrengunti houn lun hapurichihan tidan burí muna, gama lumoun hénrenguti houn háluahan luma híchugun aturiahani tídangiñeti Bíbülia. Susereti san ligiaméme woun? Lidan kesi le chóuruti líderagubadiwa lan fiu adundehani le lídanbei aturiahani le. Warihiba ka lan ínchahabaliwa lidan dasi le lánina hadügǘn disipulugu. Ani warihibei giñe ida luba lan wabuiduragüdüni katei le hénrengubei woun háfuga ligía adügübei lun míchugun wamá aturiahani tídangiñeti Bíbülia. Ani furumiñe ariha waméi ka lan uagu mámarügü lubéi lunti wapurichihani uganu buiti, lunti giñe warufudahan.

3. Ka uagu wapurichiha?

³ Dan le meha ya lubéi Hesusu Ubouagu, ruti aban dasi le lídanbei bián fánreinti houn lani disipulugu. Furumiñe ariñagati houn  lun hapurichihani uganu buiti le luáguti Larúeihan Bungiu ani aba larufudahani houn ida luba lan hadügüni (Mat. 10:7; Luk. 8:1). Afuranguagüdati giñe houn ka lan lunbei hadügüni dan le hánharun gürigia lun uganu lánina Larúeiha Bungiu ani kaba lan giñe hadüga dan le maha hamá gürigia haganbuni (Luk. 9:2-5). Ariñagati giñe darí halíaba lan lébeda lapurichihóun uganu, chóurugüda lumuti giñe houn lasubudirúaba lan “lidan sun fulasu” (Mat. 24:14; Adü. 1:8). Meberesenga ligaburi hóunabun gürigia mosu meha hayanuhan houn luagu Larúeihan Bungiu luma luagu le lunbei ladügüni.

4. Según Matéu 28:18-20, ka lunbei wadügüni amu luéi wapurichihani uganu buiti lani Larúeiha Bungiu?

⁴ Ka libiamanbei fánreinti luáguti dasi le lariñagubei Hesusu houn lani disipulugu? Ariñagati houn lun harufudahan houn gürigia lun gaganbadi hamá lun sun le lariñagubei houn lun hadügün. Guentoti, lídanrügübei meha san furumiñeti sígulu ladügǘwa dasi lánina apurichihani luma larufudahóun, kei hariñaguni fiu gürigia? Uá, lugundun ariñagati Hesusu ladügǘba lan dasi súdiniti le chülǘ lumoun wadaani, “darime lagumuchun ubóu” (aliiha huméi Matéu 28:18-20). Genegeti ru lani Hesusu gumadi le dan le larufudagunbei lungua houn hóugiñe 500 lani disipulugu (1 Ko. 15:6). Ani lidan arufudúni le larufudubei lun Huan arufudati busén lan lun híderaguniña sun lani disipulugu amu gürigia lun hafurendeirun luagu Heowá (Aruf. 22:17).

5. Ida liña larufuduni Pábulu lidan 1 Korintuna 3:6-9 luagu úara lan apurichihani luma arufudahani?

⁵ Góubaguagüda lumuti apostolu Pábulu dasi lánina hadügǘn disipulugu lumoun ábunaguni, ani ítara liña larufuduni ua lan buídurügü lan lun bunarügün wamani ilaü o abun. Aba laritaguagüdüniña korintuna: “Au ábunagubei, Apolosu áturagua, [...] ítara hiña kei múa le luádigimaridubei Bungiu” (aliiha huméi 1 Korintuna 3:6-9). Lidan “múa le luádigimaridubei Bungiu” mama bunaguarügütiwa labu nadü o ilaü, tugua wamuti ani ténitiwa lun eibu labouchun (Huan 4:35). Gama lumoun, subudi wamuti Bungiu lan adügübei lun labouchun nadü.

6. Ka wadügübei lun warufudahan houn gürigia?

⁶ Áluaha wamutiña “ha lúntiñabaña ibagari le magumuchaditi” (Adü. 13:48). Lun aban hamá disipulugu lunti wíderaguniña 1) lun gunfuranda hamani le hafurendeirubei tídangiñe Bíbülia, 2) lun hánharun lun, luma 3) lun hawinwanduni (Huan 17:3; Kol. 2:6, 7; 1 Tesa. 2:13). Sun lílana damuriguaü gayaraati híderaguniña aturiahatiña lau harufudun ínsiñehabuni houn luma lau híchugun buiti achülürüni dan le hachülürün lidoun adamuridaguni (Huan 13:35). Másiñati megei lan máisturu saragu dan, erei lun líderaguniña aturiahatiña lun hígiruni binadu hafiñen o hechu (2 Ko. 10:4, 5). Lau wíderaguni somu gürigia adügei sun burí asansiruni le darí lumoun gayaraahali lanme habadiseirun másiñati lanügüba lan saragu dan, gama lumoun chouru waméi lanügüba lan saragu ugundani.

7. Ka uagu wapurichiha ani adüga wagía disipulugu?

⁷ Ka uagu wapurichiha ani adüga wagía disipulugu? Furumiñe, ladüga hínsiñe lan Heowá woun. Dan le wáfaagun saragu lun gaganbadi wamá lun gumadi lun wapurichihan luma lun wadügün disipulugu, arufuda wamuti línsiñe Bungiu woun (1 Huan 5:3). Samina waméi le: ínchaha laadiwa ínsiñeni le wasandirubei luagu Heowá lun woudin apurichiha tidan burí muna. Ménrengunti san lagunfulirun gumadi le? Másiñati hénrengu lan. Chóuruti adadagara wamá dan le wadaünhan luagu furumiñeti wéiyaasu luagu habenari gürigia. Gama lumoun, adüga wamuti ladüga anihán lan le labusenrunbei Hesusu lun wadügün. Gayaraati ménrengun hali lan woun wapurichihan, ida waña lidan líchugun aturiahani? Másiñati láurügü lan wasaminaruni aba lan wadadagarun. Ligíati ánhawa amuriaha  luma Heowá lun líderaguniwa lun madadagarun wamá luma lun líchugun ganigi woun lun wíchugun aturiahani tídangiñeti Bíbülia, gayaraabei líderaguniwa lun busén wamá lun wadügün disipulugu.

8. Según Márükosu 6:34, ka amu resun wámabei lun warufudahani inarüni houn gürigia?

⁸ Libiaman, arufudaha wamuti inarüni ladüga hínsiñe hamá gürigia woun. Luagu aban dan, dandu Hesusu kei lani disipulugu buchá meha hawagu lárigiñe hapurichihan, ábati háluahan aban fulasu lun hemeraagun. Gama lumoun, hagurabahañein meha saragu gürigia. Aba hagudemedagun lun Hesusu, “aba lagumeserun arufudaha saragu katei houn” (aliiha huméi Márükosu 6:34). Ka san uéigiñe ladügei Hesusu lanarime áfaaguni le? Aba líchaagun lungua lidoun halugaarun gürigia hagía ani busenti meha líderaguniña. Ladüga subudi lani hasufuriruña lan saragu ani mégeitiña meha emenigini. Uguñe weyu mégeitiña giñe gürigia emenigini, íbini gunda lan harihin. Ítara haña kamá mudún feridiguaña ani móuniritiña lun hadundehóun. Ariñagati apostolu Pábulu ibidiñe lan Bungiu houn ani memenigin hamá (Efe. 2:12). Héibuguña luéigiñe “üma le anügübei gürigia lidoun féridiguaü” (Mat. 7:13). Lidan wasaminarun luagu le gádanbaliña gürigia ha awinwandubaña lidan fulasu le ñein lubéi wapurichiha luma ida liña haña lan ligibugiñe Bungiu, ínchaha lumutiwa ínsiñeni luma gudemehabu lun wíderaguniña. Ani létima buídubei lun wadügüni hawagu lun wíchugun aturiahani tídangiñeti Bíbülia houn.

9. Según Filipuna 2:13, ida luba líderaguniwa Heowá?

⁹ Háfuga manigi wamá lun wíchugun aturiahani tídangiñeti Bíbülia ladüga subudi wamani barǘ lan saragu dan. Anhein ítara liña lubéi, abahüdagua waméi lun Heowá ida liña lan wasandiragun woungua ani amuriaha wamá ídemuei luma lun busén wamá wadarirun somu gürigia le busenti laturiahanu Bíbülia wama (aliiha huméi Filipuna 2:13). Chóurugüda lumuti apostolu Huan woun lóunabubei lan Bungiu furíei le úarabei luma lugundan (1 Huan 5:14, 15). Ligíati gayaraati wachoururuni líderagubadiwa lan Heowá lun busén wamá wídehan lidan dasi le lánina hadügǘn disipulugu.

10, 11. Ka uagu manigi wabéi lun wíchugun aturiahani tídangiñeti Bíbülia?

¹⁰ Subudi wamuti súdini lan hadügǘn disipulugu, gama lumoun anihein ítaga katei le másiñati gayaraabei lan ladügün lun madügün wamani sun le wabusenrubei wadügün. Wariha fiu lídangiñe ani warihiba giñe ida luba lan waransehani.

¹¹ Genegeti woun siñá lan wadügün saragu ladüga le gádanbaliwa. Kéiburi, añahein íbirigu derebuguhaña o wuribati hátuadi. Anhein ligía lubéi asuseredubei woun, samina wamá luagu le arufudaha laalibei lidaani sandi le gíribei COVID-19 woun: gayara lan wíchugun aturiahani luéigiñe gágamuru o luéigiñe interneti. Ligíati másiñati gayaraabei lan wagumeserun íchiga aturiahani wábiñegiñe. Mámarügüñein le. Añahein gürigia busentiña haturiahanu Bíbülia, ani siñati haturiahan lidan lóurate hapurichihan wábirigu. Gayaraati san wíchugun aturiahani tídangiñeti Bíbülia lidan oura le buídutimabei houn, o binaafingiua o dan le aburigadeina lan? Arufudahati Hesusu lun Nikodému guñoun ladüga ítara liña lan labusenruni Nikodému (Huan 3:1, 2).

12. Anhein sandigua wabéi woungua genege lan siñaguagidiwa lan woungua lun warufudahan, ka ǘrüwa katei gayaraabei líderaguniwa lun wasandiragun woungua chóuruñu?

¹² Genegeti woun maranserun wamá lun wíchugun aturiahani tídangiñeti Bíbülia. Másiñati wasaminarun lougua lan wasubudin lun wíchugun aturiahani tídangiñeti Bíbülia o mosu wabuiduragüdüni ligaburi warufudahan. Meberesenga ka lan gádanbaliwa, samina wamá luagu ǘrüwa katei le gayaraabei líderaguniwa lun chouru lan wasandiragun woungua. Furumiñe,  subudi lumuti Heowá aranseñu waña lan lun warufudahan houn amu (2 Ko. 3:5). Libiaman, Hesusu óunahabaliwa arufudaha ani rúaali ubafu lun “sielu luma ubouagu” (Mat. 28:18). Ani lǘrüwan, mama wábuguarügüñadiwa. Ítara kei Hesusu, gayaraabei wachoururuni líderagubadiwa lan Heowá lun wasubudiruni kaba lan wariñaga (Huan 8:28; 12:49). Gayaraabei giñe wayanuhan luma íbiri le arihibei lau sétanu le lánina apurichihani, o wayanuhan luma aban prekursoru le chubaluguti lidan lapurichihan o wayanuhan luma aban íbiri le subudi hali saragu, lun líderaguniwa agumesera o íchiga aban aturiahani tídangiñeti Bíbülia. Ánhawa ñüdün hama íchiga aturiahani gayaraabei wafurendeirun arufudaha buidu.

13. Ka uagu buidu lubéi lun wéchudun luagu asansiruni?

¹³ Genegeti hénrengu lan woun wéchudun luagu iseri ligaburi líchugun aturiahani tídangiñeti Bíbülia luma tayusurun iseri agumeiraguagüdüni tótima wayusuruboun lidan wapurichiha. Sansi hali ligaburi líchugun aturiahani tídangiñeti Bíbülia. Agumeiraguagüdüni to wayusuruboun guentó, Winwan wamá lau ugundani, adügatu agumeiraguagüdüni to lúntima waranserun buidu lubá wíchugun aturiahani luma lun warufudahan lidan amu igaburi sügǘ luéi meha ligaburi warufudahan luagu aban dan. Lóuguaali párafu aliihouti, ani wéiritimahali layanuhóun hama aturiahatiña. Yusutimahandiwa saragu bidéu tuma burí agumeiraguagüdüni to lídanboun wani páhina, kei burí to lídanboun JW Library^®. Ánhawa ariha hénrengu lan woun wayusurunu agumeiraguagüdüni to lídanboun wani páhina amuriaha wamá hama somu íbirigu lun harufudahani woun ida liña lan tayusurun. Mama aban katei ménrengunti léchudun luagu asansiruni. Libe-agei dan himei wamagili wadügüni katei kei meha wadügüni luagu aban dan. Ligíati, lau lídehan Heowá luma hídehan wábirigu, ménrengunbei woun wéchudun ani gúndatimahadiwa lidan wíchugun aturiahani tídangiñe Bíbülia. Kei lubeibei aban prekursoru, iseri ligaburi arufudahani le ítara liña “kei láfurun garabali buiti dandu luagu máisturu kei luagu aturiahati”.

14. a) Ka lunbei wasaminaruni dan le wapurichihan lidan aban fulasu le hénrenguti hadarirun gürigia lun wíchugun aturiahani houn? b) Ida liña línchahaniwa 1 Korintuna 3:6, 7?

¹⁴ Genegeti hénrengu lan lun wagumeserun íchiga aturiahani. Háfuga añahein lan gürigia meberesegúntiña lau uganu le wapurichihabei o magundan hamá lau wapurichihan. Kaba íderaguawa arufuda aban lubuidun igaburi? Haritagua waméi asansireina lan katei lidan ubóu le, gayaraati lasansirun le gádanbaliña gürigia sódini, ha meha meberesegúnbaña lau uganu másiñati aba lan híchugun fe megei hamá gamadagua hamá luma Bungiu (Mat. 5:3). Gürigia ha meha máhabaña tun wani agumeiraguagüdüni lau lásügürün dan aba hánharun lun líchugun aturiahani houn tídangiñeti Bíbülia. Ani subudi wamuti giñe Heowá lan Laburemebei alubahani (Mat. 9:38). Busenti Heowá lun wasigirun ábunagua luma áturagua, ani ligía arihibei lau laweiridun nadü (1 Ko. 3:6, 7). Luagu le aban oubaü, gúndaatiwa laritaguagüdüniwa íbini mama lan wíchuguña aturiahani tídangiñeti Bíbülia, ruti Heowá wafayeiruaha luagu áfaaguni le wadügübei, mama ladüga le ibiha wamaalibei. *

15. Ida liña lasandiragun Heowá lungua dan le lánharun aban gürigia lun aban aturiahani tídangiñeti Bíbülia ani rulei le lafurendeirubei lidan libagari?

¹⁵ Gúndaati Heowá saragu dan le lánharun aban gürigia lun arufudahani le tídanbei Bíbülia ani ayanuha ligía luagu houn amu (Ari. 23:15, 16). Chóuruti gunda lan saragu larihini le asuseredubei uguñe weyu. Kéiburi, íbini laganagua sandi le lídanbei irumu lánina eseriwiduni 2020,  rúwati 7.705.765 aturiahani tídangiñeti Bíbülia, le íderagubaliña 241.994 gürigia lun hederegeruni habagari lun Heowá luma lun habadiseirun. Ani iseri disipulugu ha híchuguba aturiahani tídangiñeti Bíbülia houn amu ani ladügüba lira lun haganwoundun disipulugu (Luk. 6:40). Chóuruti dan le lan wídehan lidan hadügǘn disipulugu gúndaagüda wamutu lanigi Heowá.

16. Ka lunbei wáfaagun lun wadügüni?

¹⁶ Larufudahóun lun aban gürigia lun línsiñedun Heowá lun barüti áfaaguni, gama lumoun lau lídehan Heowá gayaraati wídehan lidan dasi lánina hadügün disipulugu. Gayaraati san wáfaagun lun wagumeserun íchiga aturiahani tídangiñeti Bíbülia íbini aban? Anhein anihein lubéi chansi, gayaraati wínchahaniña sun gürigia ha únbaña wayanuha lun haturiahanu Bíbülia wama. Ánhawa adügei másiñati taweiridun wanigi luagu warihini ligaburi hóunabuniwa. Mabulieida waméi labinirubei lan Heowá wáfaagun.

17. Ida liña wasandiragun woungua ánhawa ibiha wíchugun íbini aban aturiahani tídangiñeti Bíbülia?

¹⁷ Aban lubuidun chansi wapurichihan luma warufudahani inarüni. Barüti dasi le aban óunwenbu ugundani woun. Íderaguati meha apostolu Pábulu saragu gürigia Tesalónika lun hadügagun houngua disipulugume, ítara liña lariñaguni le lasandirubei: “Ladüga huguya guánarügü íchugubalin ugundani woun; huguyaba arufudei lubuidun weseriwidun lun Wabureme Hesukrístu le uágubei gayara lan wemenigidun lun weresibiruni wafayeiruaha danme le lagiribudun, ani huguyaba wagundaaragüle danme le hararamun ligibugiñe. Huguya lébunabei wanaagun woungua luma wagundan” (1 Tesa. 2:19, 20; Adü. 17:1-4). Uguñe weyu gíbetiña kristiánugu sandí hamuti ligiaméme ugundani. Ariñagatu aban íbiri gíritu Stéphanie, to íderaguboun úara luma tani weiriei saragu aturiahatiña lun habadiseirun: “Úati ugundani wéiritimati kei híderawagun gürigia lun hederegeruni habagari lun Heowá”.