1, 2. a) Ka labürühabei aban sásaamu tidan liliburun? b) kaba wakutiha lidan aturiahani le?

UGUÑE weyu, saragu míñunu gürigia ariñagatiña afiñe hamá luagu Hesusu gama lumoun, máhatiña lun larufudahan (2 Tim. 4:3, 4). Abürühati aban sásaamu tidan liliburun: “Lun hamuga anihein lan amu Hesusu waganagua uguñe weyu, lun lariñaguni katei kei meha lariñaguni Hesusu [...], wamahaduña hamuga san lun le unbei hamahada gürigia hagüra, bián milu irumu guentó? [...] Kaba hamuga wóunabagüle? Anha”.

² Lidan furumiñeti sígulu, gíbetiña gürigia aganba hamuti le larufudahabei Hesusu, ariha haméi adüga burí milaguru, lau sun lira máhatiña híchuguni hafiñen luagu. Ka uagu? Lidan aturiahani le lubaragiñebei le arihatiwa gádürü resun ka lan uagu, ani lidan le warihiba gádürü lanwoun. Ani wariha giñe ka lan uagu hamada gürigia houn lánigu Hesusu disipulugu uguñe weyu, luma kaba lan íderaguawa lun machugeragun wamá.

3. Ka san uagu hamahada besafu gürigia lun Hesusu?

³ Dan le ya lubéi Hesusu Ubouagu, óundaraguati meha hamá sun hawuyeri gürigia. Houti Hesusu hama rísitiña, hama gabafutiña, sügüti saragu dan hama gudemetiña dandu hama gürigia ha únbaña harufuda amu mabahüdǘni. Ani arufudati gudemehabu houn gürigia ha únbaña hagúahan gafigountiña. Chugeguatiña saragu gürigia ha anaagubaña houngua lau le ladügübei Hesusu. Aba hálügüdüniña lánigu disipulugu: “Ka san uagu héiginbei hama aguburahatiña liseinsuna gumadi luma  hama amu gafigountiña?”. Lariñaga Hesusu houn: “Ha magadiñebaña, memegeiruntiña surusia; ha sándibaña hagía mégeibaña surusia. Mama lubeiti niábiña áluaha gürigia richaguatiña, niábiña áluahaña ha gafigounbaña lun hasakürihaba lan” (Luk. 5:29-32).

4. Según le lariñagubei profeta Isaíasi, ka uagu moun lumuti lubéi yebe taweiridun hanigi huríu?

⁴ Ka tariñagubei Bíbülia? Saragu dan lubaragiñe liabin Mesíasi ya Ubouagu, ariñagaali meha profeta Isaíasi máhabei lan meha ubóu lun. Ariñagati: “Meberesenwati lau, barǘ hamuti kei ni kata. Aban bugaha wügüri buin umuti lau igarigu ligía, le héchuti luagu asufuriruni. Mabahüdün wamuti, barǘ wamuti kei gürigia le madünamati laríawagun, barǘ wamuti kei ni kata” (Isa. 53:3). Según profesía, le “mabahüdün habéi [meha] gürigia” Mesíasi, ligíati mama yebe lunti taweiridun hanigi huríu mabahüdǘniwa lan Hesusu.

5. Ka hasaminarunbei gürigia hawagu lubúeingu Hesusu uguñe weyu?

⁵ Ligiaméme san asuseredubei uguñe weyu? Anha. Añahein saragu alidihatiña relihión hínsiñeti houn heresibirun gürigia rísitiña, gürigia furendeitiña hama ha súdinitiña lidan hageira, lau háhabu daragu labu sun magundan lan Heowá lau ligaburi hawinwanduni habagari. Mínsiñetiña giñe lubúeingu Heowá houn alidihatiña relihión, ladüga heseriwidun lun Heowá lau saragu ugundani ani haruma ligía habagari. Kei lariñaguni Pábulu, anúadira laaña giñe Bungiu ha débilibaña según ubóu (1 Ko. 1:26-29). Lau sun lira, sun lubúeingu Heowá ha úaraguatiña gebegitiña lun.

6. Ka lariñagubei Hesusu lidan Matéu 11:25, 26, ani ida luba wafalaruni lani hénpulu?

⁶ Kaba íderaguaün lun machugeragun humá? (Aliiha huméi Matéu 11:25, 26). Mígiraguagüda humá hungua lun hadügün amu lun hachugeragun ladüga le hasaminarubei hawagu lánigu Heowá. Subudibei gürigiarügüñanu lan ha ǘnabugutiña layusura Heowá lun ladügüni lugundan (Sal. 138:6). Samina humá luagu sun le adüga láalibei Bungiu lau layusurun gürigia ha larihubaña ubóu kei ni kata, ani machú ligía hau.

7. Ka uagu lagúara Hesusu houn fariséugu biangua tigibu, ani ka hadügübei?

⁷ Sin ni murusun anufudei, ariñaga lumuti Hesusu houn alidihatiña relihión ha meha lídanbaña lidaani kátañanu lan. Kei hénpulu, wati houn fariséugu biangua tigibu, ladüga nidiheritima hamá luagu hachibuni háhabu sügǘ lau hetenirun houn hagübürigu (Mat. 15:1-11). Kei le aubei warihei, aba taweiridun hanigi lánigu Hesusu disipulugu darí lun hariñagun lun: “Subuditi san bun luagu wuriba lan lábürühan dimurei le bariñagubei houn fariséugu?”. Aba lóunabuniña Hesusu: “Furumiñeguarügü nadü to mama lábunun Núguchi Bungiu le siélubei, tahulúba lau sun tílagüle. Ígira humaña; marihintiña ha adundehatiña marihintiña háledi hagía. Ani anhein adundeha aban marihinti aban marihinti líledi, héiguaduba biángubei hagía lidoun aban huyu” (Mat. 15:12-14). Lau sun aba lan hasafaragun alidihatiña relihión luma Hesusu, mígirun lumuti lariñaguni inarüni houn.

8. Ida liña larufuduni Hesusu maha lan Bungiu lun sun tarufudaha relihión?

⁸ Ariñagati giñe Hesusu mama lan inarüni le harufudahabei. Mariñagunti anha lan Bungiu lun sun le tarufudahabei relihión. Lubaragiñe lira ariñagarügüti, gíbebaña lan ebelurutiña lídangiñe üma le tulé buribei le anügübaliña gürigia lidoun günringuaü, ani míbebaña ha lunbei hebelurun lídangiñe üma le bürüraübei le lunbei lanügüniña gürigia lidoun ibagari magumuchaditi (Mat. 7:13, 14).  Afuranguagüda lumuti hariñaguba lan fiu heseriwiduña lan lun Bungiu, lau sun mama lan ítara liña. Ligíati, líchugunbalin eweridihani le: “Góunigi humá hawéi profetagu yéetiña. Ha ñǘbuinbaña hun kei mudún bóugudigiñe habiti, anhein múnadagiñe, ítara haña kei animaalugu gáñitiña. Huguya, gayaraabei hasubudiruniña luagu le hadügübei” (Mat. 7:15-20).

9. Írida huma fiu arufudahani le mama inarüniti le mínsiñebei lun Hesusu.

⁹ Ka tariñagubei Bíbülia? Ariñagati aban profesía hanarimebei lan buga lemeidi Mesíasi tau luba Lúguchi (Sal. 69:9; Huan 2:14-17). Adügati ínsiñeni le lasandirubei Hesusu luagu Heowá lun lamahadun lun arufudahani luma échuni mama inarüniti. Kei hénpulu, afiñetiña fariséugu anuhein lan aban uani móunwedaditu hawagu gürigia, ani arufudahati Hesusu harumuguña lan hilaaña (Huan 11:11). Lau sun mafiñen hama meha saduséugu luagu águyuguni, saragüda lumuti Hesusu Lásaru le lumada lídangiñe óunweni (Huan 11:43, 44; Adü. 23:8). Afiñetiña meha fariséugu sun lan burí le asuseredubei ladüga lan sinu ani ladüga lan Bungiu. Gama lumoun, arufudahati Hesusu gayara lan hanúadirun gürigia anhein heseriwiduba lubéi lun Bungiu o meseriwidunbaña lan lun (Mat. 11:28).

10. Ka uagu ladüga le warufudahabei lun hachugeragua saragu gürigia?

¹⁰ Ligiaméme san asuseredubei uguñe weyu? Anha. Chugeguatiña saragu gürigia ladüga le warufudahabei tídangiñe Bíbülia, arufuda tumuti iyeeni lan le tarufudahabei relihión mama inarünitu. Arufudahatiña alidihatiña relihión óunaha lániña Bungiu gürigia lidoun máfiougati, ítara liñati hakipuruniña gürigia lábugiñe habafu. Wagía le eseriwidubei lun Heowá, aban Bungiu hínsiñehabuti, íderagua wamutiña gürigia arihei mama lan inarüni arufudahani burí le. Arufudahatu giñe relihión móunwedadi tan uani. Lun hamuga inarüni lan le, memegeirúnwati hamuga águyuguni. Ánheinti wagía, arufudahatiwa mama lan tídangiñeti Bíbülia arufudahani le. Luagu le aban oubaü, afiñetiña saragu relihión bürüwaali lan le lunbei lasuseredun houn gürigia,  ánheinti wagía afiñetiwa gayara lan wanúadahan luma anhein weseriwidun lun Bungiu o meseriwidunbadiwa lan. Ida liñati hóunabun alidihatiña relihión? Libe agei dan aba hagañidun.

11. Según le lariñagubei Hesusu lidan Huan 8:45-47, ka lagurabubei Bungiu hámagiñe lubúeingu?

¹¹ Kaba íderaguaün lun machugeragun humá? Anhein hínsiñe lubéi inarüni hun, mosu hánharun lun le lariñagubei Bungiu (aliiha huméi Huan 8:45-47). Máyeiha huméi le ladügübei Satanási, madiseda humá luéi inarüni, úaragua humá lun inarüni ani maweiyasun humá adiseda luéi hafiñen (Huan 8:44). Agurabati Bungiu hasigiruni lubúeingu lani Hesusu hénpulu. Ani ligía lariñagubei houn: “Iyereegulá wuribani hun, falá huméi le buídubei” (Rom. 12:9; Ebü. 1:9).

12. Ka uagu hachugeragua saragu huríu ladüga ligaburi lounwen Hesusu?

¹² Ka amu resun adügübei lun hachugeragu huríu lidan lidaani Hesusu? Ariñagati Pábulu: “Anhein wagía, wapurichihan luagu Kristu le ádarawagubei luagu [wagabu], le ábanbei dübü achugeraguágülei houn huríu” (1 Ko. 1:23). Ka uagu hachugeragua saragu huríu? Lugundun adügati ligaburi lounwen Hesusu luagu aban wagabu lun hasaminarun saragu aban lan meha gürigia wuribati gafigounti ani mama lan meha ligía Mesíasibei (2 Lur. 21:22, 23).

13. Ka mabusenrun habéi hasubudirun ha máhabaña lun Hesusu?

¹³ Huríu burí ha máhabaña lun Hesusu mabusenrúntiña meha hasubudirun madurun lan, rútiña lidurun ani hóusera haméi wuriba. Mébunati laguserawagüdün Hesusu. Ha lílana liñun-agei lúrudu huríu aba hóundaragun lau lóufudagun lun haguseragüdüni ani úati inebe lan lúrudu houn (Luk. 22:54; Huan 18:24). Lubaragiñe hamuga haganbuni ha aguseragüdübalin Hesusu, biángubei oubaü, áluaharügü hagía “lidurun Hesusu lau iyeeni lun gayara lan hasiadiruni lun lounwen”. Kei masali lan le habusenrunbei, áluahati fádiri le íñutimabei lun lariñagun Hesusu somu dimurei le adügüti lun gadurun lan.  Aban meha marichaü lira (Mat. 26:59; Mar. 14:55-64). Ani, lárigiñe láguyugun Hesusu, aba hafayeirun aguseragüdütiña marichatiña ha “saragu seinsu” houn súdaragu rómana ha óunigirubalin lumúaha Hesusu lun hariñagun iyeeni, ka lan uagu málaali lubéi umúahaü (Mat. 28:11-15).

14. Ka lariñagubei profesía luagu lounwen Mesíasi?

¹⁴ Ka tariñagubei Bíbülia? Íbini magurabun hama saragu huríu ha meha lídanbaña lidaani Hesusu lóunweba lan Mesíasi, ariha waméi le lariñagubei profesía: “Ladüga deregeguati lungua lun lounwen, abahüdǘwa ligía hadan wuribatiña, lau sun barǘ lani hafigoun saragu luougua amuriaha ligía hawagu gafigountiña” (Isa. 53:12). Ligíati mébunati hachugeragun huríu ladüga lounwen Hesusu.

15. Ka duru íchugubei hawagu gefentiña luagu Heowá le adügübei lun hachugeragun saragu gürigia?

¹⁵ Susereti san ligiaméme uguñe weyu? Anha. Ítara kei lasuseredun lun Hesusu, rúhaña hadurun gefentiña luagu Heowá ani siadi waña madurunga. Ariha wamá fiu hénpulu. Lidan burí irumu darandi luma bián wein, Meriga, lidan sígulu wein mosu meha woudin lidoun liñun-agei lúrudu saragu wéiyaasu lun wageindaguni waricha lun wáhuduragun lun Bungiu. Añahein meha aguseragüdütiña furanguti harufuduni mínsiñe wamá houn. Óundaraguatu ligilisi hama gumadimatiña ha Kebekübaña (Kanadá), lun hararamuni wapurichihan. Dáüwatiña saragu apurichihatiña ladüga hayanuha luagu Larúeihan Bungiu houn amu. Áfarawaguatiña saragu nibureintiña úaraguatiña lidan ageiraü Yámani lidan larúeihan Hitler. Lidan lagumuhóun burí irumu le, dáüwaaña saragu íbirigu ani siadi waña ladüga hayanuha tuagu Bíbülia Rusia. Aban katei le úagubei hariñaga gumadimatiña ha, deregüda lan walurudun, ani máhatiña tayusurún Traducción del Nuevo Mundo de las Santas Escrituras to lídanboun iñeñein rusu ladügarügü anihein lan liri Heowá tidan.

16. Ítara kei lariñaguni 1 Huan 4:1, ka uagu moun lumuti lubéi wígiraguagüdün woungua lun leyeeduniwa iyeeni le habahüdagubei gürigia hawagun lubúeingu Heowá?

¹⁶ Kaba íderaguaün lun machugeragun humá? Akutiha huméi le asuseredubei. Lidan Serumu luagu Wübü ariñagati Hesusu heyeehaba lan fiu gürigia ani hariñaguba lan “sun luwuyeri iyeeni” hawagu lánigu disipulugu (Mat. 5:11). Sun burí iyeeni le lúmagiñe Satanási liabin. Ligía adügübei lun haburuchaguagüdün iyeeni hawagu lubúeingu Bungiu ha hínsiñebei inarüni houn (Aruf. 12:9, 10). Maweiyasun humá ánhara lun iyeeni le ani mígira huma lun halouchun lun ledebilidagüdüni hafiñen (aliiha huméi 1 Huan 4:1).

17. Ida liña ladügün katei burí le asuseredubei lubaragiñe lounwen Hesusu lun hachugeragun fiu gürigia?

¹⁷ Guñoun lubaragiñe lounwen Hesusu, aba laluguruni aban hádangiñe 12 apostolugu. Yéedagua ligía ábaya hádangiñe ǘrüwa wéiyaasu ibidiñe lan lun, ha híbiri aba hígiruni lábuguarügü (Mat. 26:14-16, 47, 56, 75). Lau sun lira maweiriduntu lanigi, ladüga ariñagaali buga lasusereduba lan sun le asuseredubei (Huan 6:64; 13:21, 26, 38; 16:32). Dan larihiniwa le, háfuga chugegua hama amu samina hagía: “Anhein le lubéi hadügübei lánigu Hesusu apostolugu mabusenrunhadina aban nan hádangiñe”.

18. Ka profesía agunfulirubei murusun dan lubaragiñe lounwen Hesusu?

¹⁸ Ka tariñagubei Bíbülia? Saragu sígulu lubaragiñe liabin Hesusu Ubouagu, ariñagaali Heowá tidan Lererun lalugurúba lan Mesíasi luagu 30 murusun pülata (Sak. 11:12, 13). Aban ban hádangiñe lumadagu alugurei (Sal. 41:9). Ariñagati giñe Sakaríasi: “Áfarabei  hóuniri mudún ábame hachagaragun mudún” (Sak. 13:7). Mígirun habéi gürigia haruma tanigi Hesusu ladügarügü katei le. Ábanrügü léredun hafiñen lau harihini lagunfulirun profesía.

19. Ka hasubudirubei gürigia haruma tanigi?

¹⁹ Ligiaméme san asuseredubei uguñe weyu? Anha. Fiu hádangiñe gefentiña luagu Heowá ha subudiwabaña ígira hamaali inarüni, aba hagarabaagun luagu Heowá ani álugatiña, lun hadügüni amu ligiaméme. Adügaña lun laburuchagun luriban burí ñunsu luma iyeeni hawagun gefentiña luagu Heowá tidan radiu, bigibigitu luma lidan Internet. Lau sun lira mígiraguagüdüntiña gürigia haruma tanigi houngua ladüga subudi hamuti ariñaga tan Bíbülia lasusereduba lan burí katei le (Mat. 24:24; 2 Fe. 2:18-22).

20. Kaba íderaguaün lun mígiraguagüdün humá hungua lun heyeedunün gürigia ha ígira hamaalibei inarüni? (2 Timotéu 4:4, 5).

²⁰ Kaba íderaguaün lun machugeragun humá? Kipu huméi hafiñen héreñu lau haturiaha sagü weyu, hafurieidun súnwandan luma lau hadügüni le lariñagubei Heowá hun lun wadügüni (aliiha huméi 2 Timotéu 4:4, 5). Anhein afiñe hubéi, manufudebadün danme haganbun ariñahani le mabuidunti (Isa. 28:16). Ínsiñeni le hasandirubei luagu Heowá, tuagu Lererun luma hawagu híbirigu líderagubadün lun mígiraguagüdün humá hungua lun heyeedunün gürigia ha ígira hamaalibei inarüni.

21. Ka gayaraabei wachoururuni íbini maha hamá hiibe-agei gürigia lun uganu le wapurichihabei?

²¹ Lida furumiñeti sígulu, saragu haña achugeragutiña ani maha hagía lun Hesusu. Lau sun lira gíbetiña ánharutiña lun. Haganagua anihein meha íbini aban hádangiñe lílana Sanedrín, íbini “saragu fádirigu huríu” (Adü. 6:7; Mat. 27:57-60; Mar. 15:43). Ítarameme, saragu míñunu anúadiraña hafalaruni Hesusu uguñe weyu. Ka uagu? Ladüga subudi hamani inarüni tídangiñeti Bíbülia ani hínsiñeti houn. Ariñagatu Lererun Bungiu: “Ha hínsiñehabubaña lun barufudahan, [...] úati lunti léiguadagüdüniña” (Sal. 119:165).