1, 2. Ka burí lénrengunga úmabei hagagibudagua saragu Gefentiña?

ÍNCHAHA lumuti apostolu Pábulu Timotéu, ínchaha lumutiña giñe amu íbirigu lun hagunfulirun sunsuinagubei luma hani ministeriu (2 Tim. 4:5). Sun wagía áfaaguatiwa lun wasigiruni adundehani le, gama lumoun hénrenguti. Añahein saragu hádangiñe wíbirigu mégeitiña ganigi lun háfuridun apurichiha (2 Tim. 4:2). Samina wamá, hawagu íbirigu ha awinwandubaña lidan fulasu le ñein lubéi máhawa lan lun wapurichiha. Sagü háfuridun íbirigu ha apurichiha híchuguñein habagari lidan denchaü.

² Gagibuguatiña lubúeingu Heowá luma burí ámuñegueinarügü turobuli le gayaraabei ladügün lun lábürühan harüna. Saragu hádangiñe nadagimeintiña sun weyu lúnrügü híchuguni létima hemegeirubei haduheñu. Hínsiñeti hamuga houn hadügün saragu lidan apurichihani, gama lumoun dan le lachülürün samudi luma dimaasu lóuguaali here. Añahein amu murusunrügüñein hayara adüga lidan heseriwidun lun Heowá ladüga sandi, ladüga aweiyaduni o siñá lan ni lun háfuridun hábiñegiñe. Ani añahein hádangiñe íbirigu ageindaguatiña luma luriban saminaü, aba hasaminarun meseriwín hama lun ni kata. Ariñagatu aban íbiri to lídangiñetu fulasu le ñéingiñe lubéi laboucha weyu to gíriboun Mary *: “Hanarimeti lueirin nageindagun luma luriban saminaü darí lun labuchadun nuagu. Lárigiñe aba nasandiragun nungua lau duru ladüga gidá lumuti nidaani luma nere le yebe lunbei leseriwidun nun lidan apurichihani”.

3. Kaba wariha lidan aturiahani le?

³ Meberesenga ka lan waturobulinbei, gayaraati líchugun Heowá erei woun lun wagagibudagun luma waturobulin ani sigí wagíame eseriwida lun darí ñein lumuti wayara. Lidan aturiahani le, warihiba ida liña lan líderaguniwa Heowá. Lubaragiñe lira ariha wamá ida liña lan líderaguni Pábulu luma Timotéu lun hagunfulirun lau hani ministeriu laganagua lénrengunga.

4. Ka burí lénrengunga úmabei lagagibudagua Pábulu?

⁴ Sügüti Pábulu lídangiñe saragu lénrengunga. Mégeiti meha erei dántima le hagayuahanbei luagu, hachamuragun dübü luagu luma dan le ladaürǘnbei (2 Ko. 11:23-25). Maturobulinti meha lun lánharun anihein lan burí dan ageindagua lan luma luriban saminaü (Rom. 7:18, 19, 24). Lau sun lira, ayumuraguati lun Bungiu lun lagidaruni hiiyu le charuñubei luagu, le adügübei lun lasufurirun (2 Ko. 12:7, 8).

5. Ka libihinbei Pábulu íbini laganagua lénrengunga?

⁵ Ruti Heowá erei lun Pábulu lun lagunfuliruni lani ministeriu íbini laganagua lénrengunga. Samina wamá luagu sun le ladügübei apostolu. Kei dan le, ladaürǘnbei lúbiñe uburugu Roma, ayanuhati lau ubebeni houn huríu wéirigutiña, ani másiñati ayanuha lan giñe houn fiu hádangiñe gumadimatiña (Adü. 28:17; Fili. 4:21, 22). Apurichihati giñe houn súdaragu ha óunigirubalin luma houn sun gürigia ha abisidahabalin (Adü. 28:30, 31; Fili. 1:13). Lidan dan ligía, layusurei Bungiu Pábulu lun lábürühan fiu gárada to ahuuduboun houn kristiánugu lúmagiñe dan ligía darí lumoun wadaani. Seremei lun lani hénpulu, sandiguatiña íbiri ha lídanbaña damuriguaü uburugu Roma derebuguñu ani arufudatiña “ragühaña lan anigi lun hapurichihanimeme uganu ligía manufudeuga” (Fili. 1:14). Íbini madügün lani le yebe labusenrunbei ladügün súnwandan ladügüni le liyaraabei ani ariñagati ídeha lan le gádanbalin lun gayara lan laburuchaguagüdüni uganu buiti (Fili. 1:12).

6. Según 2 Korintuna 12:9, 10, ka íderagubalin Pábulu agunfulira lau lani ministeriu?

⁶ Subudi lumuti meha Pábulu sun lan le ladügübei lidan leseriwidun lun Heowá mama lan lau lubafu guánarügü ladügei, seremei lan ubafu le líchugubei Bungiu lun. Ligía labürühabei, ubafu le líchugubei Bungiu arihúati “dántima le débili nan” (aliiha huméi 2 Korintuna 12:9, 10). Ruti Heowá sífiri sandu lun Pábulu lun líchugun erei lun lagunfuliruni lani ministeriu sunsuinagubei íbini laganagua éibaahouni, ladaürǘn luma burí amu turobuli.

7. Ka turobuli úmabei lagagibudagua Timotéu le adügübei lun hénrengu lan lun lagunfulirun lau lani ministeriu?

⁷ Megei lumuti giñe nibureinti Timotéu lubafu Bungiu lun lagunfulirun lau lani ministeriu. Kei hénpulu, ñǘdünti úara luma Pábulu lidan lidise laweiyasuhan kei misionéru. Óunaha lumuti giñe apostolu Pábulu, Timotéu abisidaha luma lun líchugun gurasu houn íbirigu lidan damuriguaü (1 Ko. 4:17). Háfuga sandigua lan  Timotéu lungua hénrengubei lan dasi le lun. Másiñati adüga lan lira lun lariñagun Pábulu lun: “Mígiraba lun banügǘniwa kei ni kata luéigiñe nibureingidibu lan” (1 Tim. 4:12). Luagu amu oubaü, lidan meha dan ligira, anihein meha giñe aban hiiyu charuñu lidan lǘgürügü Timotéu, ariñagatu Bíbülia gabügürügua lan meha lasandirun (1 Tim. 5:23). Lau sun lira subuditi meha lun Timotéu líchugubei lan sífiri sandu erei le meha lemegeirunbei lun lun lapurichihani uganu buiti luma lun leseriwidun houn líbirigu (2 Tim. 1:7).

8. Ida liña líderaguniwa Heowá uguñe weyu?

⁸ Uguñe weyu, ruti Heowá “óunwenbu ubafu” woun lun gayara lan wasigirun eseriwida lun lau úaraguni (2 Ko. 4:7). Akutiha wamá gádürü katei le líchugubei Heowá woun lun wéredagüdüni wamadagua luma, luma ida lubá lan líderaguniwa lun úaragua wamá lun: furíei, Bíbülia, wíbirigu luma wani ministeriu.

9. Ida liña líderaguniwa furíei?

⁹ Furíei. Ariñagati Pábulu lidan Éfesuna 6:18: “afurieida humá lun Bungiu súnwandan”. Anhein wadüga, líchuguba Bungiu erei woun. Sandí lumuti Jonnie, le awinwandubei Boliwia, lídehan Heowá dan le lásügürünbei lídangiñe saragu turobuli. Aba hasandirun lagübürigu tau sun lani weiriou, lidan aban. Hénrenguti meha lun lun lóunigiruniña ǘrüwagubei sanditiña ha. Aba tounwen lúguchu, ánhounti lani weiriou luma lúguchi barütiña meha saragu dan luba hareidagun. Ariñagati Jonnie: “Dan le gíbeya lan katei lun níchugun le íderagubalina, súnwandan níriduni kada aban lídangiñe niturobulin lidan furíei”. Ru lumuti Heowá erei le lemegeirubei lun lun lawandun. Lidan ligiaméme ageiraü, aba líchugun aban wéiyaali lidan afiñeni gíriti Ronald fe luagu anihein lan kánserü tuagu lúguchu, ani aba tounwen aban hati lárigiñe. Ka san íderagubalin lun lasigirun lubaruaguóun? Ariñagati: “Íderagua lumutina furíei lun nadararunu nanigi lun Heowá. Subudi numuti gunfurandatima lumutina lan, sügǘ nau”. Másiñati sandigua wamá woungua gíbeya lan katei lun wachügü o ibidiñe lan woun kaba lan wariñaga lidan wafurieidun, agunbiraha lumutiwa Heowá lun wayanuhan luma íbini hénrengu lan woun wadarirun dimurei lun wariñaguni le wasandirubei (Rom. 8:26, 27).

10. Según le lariñagubei Ebüréu 4:12, ka uagu súdini lubéi lun waliihanu Bíbülia ani samina wagía hulili luagu le waliihabei?

¹⁰ Bíbülia. Ítara kei Pábulu, gayaraati giñe waliihanu Lererun Bungiu lun tíchugun erei woun luma gurasu (Rom. 15:4). Dan le waliiha somu bérusu tídangiñe Bíbülia ani samina wagía hulili luagu, gayaraati layusuruni Heowá lani sífiri sandu lun líderaguniwa gunfurandei ida luba lan wíchuguni lidan wabagari (aliiha huméi Ebüréu 4:12). Ariñagati Ronald, le buga aubei wayanuha lidan párafu le ásügürübei: “Gúndaatina lau néchudun aliihoun Bíbülia sagü guñoun. Saminatina luagu ligaburi Heowá luma luagu ínsiñeni le larufudubei lidan lóuseruniña lubúeingu. Íderagua lumutina katei le lun narufudun erei”.

11. Ida liña tíderagunu Bíbülia aban íbiri to meha asufuriruboun?

¹¹ Dan le wasaminarun hulili luagu le lariñagubei Bungiu íderagua lumutiwa lun warihini waturobulin lau aba igaburi buiti. Ariha waméi tikesin aban íbiri to hilaalibei tani weiriei. Aba lariñagun aban wéiyaali lidan afiñeni tun líderaguboun lan taliihanu liliburun Hobu. Dan le tadügünbalin, furumiñeti katei le tadügübei, aba tayanuha luagu luriban ligaburi lasaminarun Hobu. Lidan tisaminan, aba tariñagun: “Hobu, mámarügü lan luagu bituróbulin basaminara!”. Aba tíchugun fe ítara liña lan  ligaburi tasaminarun kei Hobu. Íderagua lumutu katei le lun tasansiruni ligaburi tarihini katei ani ruti erei tun lun gayara lan tawanduni teferidiruni tani weiriei lidan óunweni.

12. Ida liña layusuruniña Heowá íbirigu lun híchugun erei woun?

¹² Wíbirigu. Yusu lumutiña giñe Heowá íbirigu lun híchugun erei woun. Abürühati giñe Pábulu ayumaha lan larihiniña líbirigu lidan afiñeni lun híchugun gurasu hámagua (Rom. 1:11, 12). Ariñagatu Mary, íbiri to uáguboun wayanuha lidan párafu 2, hínsiñe lan tun tásügürün dan hamá burí íbirigu. Ariñagatu: “Íderagua láadina Heowá lau layusurun íbirigu ha ibidiñegubeiti houn ka lan násügürübei. Ani ariñaga hagía katei buiti nun le íchugubei gurasu, añahein hádangiñe óunahatiña gárada nun lidan dan létima nemegeiruni, adügati sun lira lun buidu lan nasandiragun nungua. Íderagua lumutina giñe nayanuhan hama íbirigu hiñaruñu ha sügühaña lídangiñe le násügürübei, furendeitina saragu katei hámagiñe. Súnwandan hadügün wéiyaaña lidan afiñeni lun nasandiragun nungua gebegi nan houn lílana damuriguaü”.

13. Ida luba wíchugun gurasu wámagua lidan adamuridaguni?

¹³ Aban lídangiñe katei le íchugubei dǘgüdaguaü woun lun wásügürün dan hama wíbirigu lidan damuriguaü. Dan le woudin adamuridagua gayaraati wagumeserun íchiga gurasu houn wíbirigu, lau wariñagun houn hínsiñe hamá woun lúmati lun weteingiruniña luagu le hadügübei. Kei hénpulu, lubaragiñe lagumeserun adamuridaguni, ariñagati aban wéiyaali lidan afiñeni gíriti Peter tun aban íbiri to úati tani weiriei tuma lidan inarüni: “Ruti gurasu woun warihinibu ya. Ani súnwandan aranseñutiña lan hau sisi tisaanigu luma lun híchuguni hóunabagüle lidan adamuridaguni”. Lau saragu geteingiradi ani buin águiraü tágurugu, aba tariñagun: “anihán buga le nemegeirunbei naganbun uguñe”.

14. Ka buiti líchubei apurichihani woun?

¹⁴ Ministeriu. Adügati wapurichiha lun buidu lan wasandiragun woungua ani ruti giñe saragu dǘgüdaguaü woun, aganba haméi yebe gürigia uganu le wanügübei houn o maganbun (Ari. 11:25). Ariha tumuti aban íbiri gíritu Stacy tungua. Dan le labugúnbei aban tiduhe lídangiñe damuriguaü, aba laribadun tasandiragun tungua. Meredeti tálügüdagun tungua, anhein gayara lubéi meha tadügün ámuya katei lun tíderaguni. Güreweiti meha tun tasaminarun luagu amu katei. Ka meha íderagubarun lun tasigirun tubaruaguóun? Apurichihani. Lau táfuridun apurichiha, aba tagumeserun íderaguaña gürigia ha mégeibaña ídemuei lidan fulasu le ñein lubéi tapurichihan. Ariñagatu: “Lidan dan ligira aba líchugun, Heowá aban aturiahatu Bíbülia nun to awansetu lau lóufudagun, ani ruti lira saragu dǘgüdaguaü nun. Íderagua laadina lidan nibagari náfuridun apurichiha”.

15. Ka larufudahabei le tariñagubei Mary woun?

¹⁵ Másiñati wasaminarun mibe lan wadüga lidan apurichihani, ladüga gádantiwa. Lau sun lira aritagua wama, ánhawa lan adügei sun wayaraati gúndaabei Heowá wau. Dan le táguyunbei Mary, to buga auboun wayanuha lubaragiñe le, lidoun aban damuriguaü ñein lubéi layanuhóun amu iñeñein sandiguatu tungua mibe lan tadügün. Ariñagatu: “Luagu aban dan, lérügüñein niyaraati nadüga lun níchugun aban óunabagülei ménrengunti o naliiha aban bérusu tídangiñeti Bíbülia o nafanreinhan tratadu lidan apurichihani”. Sandiguatu tungua kei ni kata dan le taganbuni hayanuhan ha gariñagadibaña lun iñeñein ligía buidu. Gama lumoun aba tasansiruni ligaburi tasaminarun, aba tíchugun fe gayara lan layusurunu Heowá meberesenga mayanuha tani iñeñein ligía buidu. Ariñagatu: “Ménrengunti lan inarüni  le tafuranguagüdübei Bíbülia, ani inarüni lan burí ligía adügübei lun lasansirun habagari gürigia”.

16. Kaba íchiga erei hou ha siñabei háfuridun hábiñegiñe?

¹⁶ Íbini anhein sándiñadiwa lubéi ani siñá wáfuridun wábiñegiñe, ariha lumuti Heowá ani gebegiti le wayumahabei lun lun hamuga wáfuridun apurichiha. Gayaraati wadarirun chansi lun wapurichihan houn ha óunigirubaliwa o houn lan surusiagu. Anhein wagoubaguagüda le meha wadügübei lumoun le wadügübei guentó, háfuga lábürühaba lan harüna. Ánhawa, etenira lun ida liña lan líderaguniwa Heowá guentó, wibihibei erei le wemegeirubei lun wawandun furumiñeguarügü óuchawaguni sin weferidiruni wagundan.

17. Según Apurichihati 11:6, ka uagu mosu lubéi wasigirun apurichiha íbini marihin wamani lubuidun lidin woun lau lóufudagun?

¹⁷ Ibidiñeti woun kaba lan lídangiñe ilaü le lánina inarüni le wábunubei aboucha (aliiha huméi Apurichihati 11:6). Kei hénpulu, anuhein aban íbiri gíritu Barbara 80 irumu tau, gabügürüguati tapurichihan luéigiñe gágamuru luma tau gárada. Tidan aban tídangiñe gárada to tóunahaboun, da tumutu Garüdia Awisahatu to lánina 1 lidan ǘrüwa-hati, 2014, le ñein lubéi láfurida aturiahani le gíribei “Ka adüga láalibei Bungiu huagu?”. Sin tichugún fe, aba tóunahanu gárada houn aban feru maríeitiña ha gefentiña luagu Heowá ha bugawaaña. Aliiha hamutu garüdia to lóugiñe aban wéiyaasu. Aba lasandiragun tani weiriei kamá hamuga layanuhaña Heowá luma gagibuguañu. Aba hagumeserun biángubei hagía adamuridagua, ani lau lásügürün dan lárigiñe lóugiñe 27 irumu, aba hagiribudun tidoun lóundarun Heowá. Gayaraati wasaminarun lau lubuidun tasandiragun Barbara tungua lau tarihini sagá tan buiti lídangiñe lubuidun apurichihani? Sun le seremei aban gárada!

18. Ka lunbei wadügüni lun líchugun Heowá erei woun?

¹⁸ Kei le aubei warihei, ruti Heowá saragu chansi woun lun wasandiruni óunwenbu lubafu. Sagá wamá saragu buiti lídangiñe katei le ru láaliibei woun kéiburi, furíei, Bíbülia, wíbirigu luma apurichihani. Ánhawa adügei warufudubei afiñe wama luagu lubafu luma luagu busén lan líderaguniwa. Rabá wama súnwandan luagun Wáguchi le siélubei, ladüga busenti “lun líchugun erei houn ha hemenigibaña luagu le tímatimaati” (2 Kro. 16:9).