1. Ka gayaraabei ladügün lun magundan wamá dan le wagumeserun abahüdaha houn amu luagu le wafurendeirubei tídangiñe Bíbülia.

HARITAGUA humagili san ida liña lan hasandiragun hungua dan le híchugubei fe darí humá lan inarüni? Furanguti arufudahani le tídanbei Bíbülia hun kei duna. Ani saminatün yebe busenbaña lan sun gürigia hánharun lun. Ani chouru humuti líchuguba lan uganu le tídanbei Bíbülia ugundani hun guentó luma emenigini buiti ámuñegü (Sal. 119:105). Lau saragu ugundani aba hagumeserun abahüdahei houn sun humadagu luma houn hiduheñu le hafurendeirubei. Gama lumoun, ma lirun dan le maha hamá saragu hádangiñe haganbunün!

2, 3. Ka meha hasaminarubei saragu gürigia luagu Hesusu luma luagu luganute?

² Moun lumuti taweiridun wanigi añahein lan gürigia máhatiña lun uganu le wapurichihabei. Dan meha le ya lubéi Hesusu Ubouagu, adügati meha milaguru le arufudubalin Heowá lan óunahabalin. Íbini ítara máhatiña meha hiibe-agei gürigia lun. Kéiburi dan meha láguyuguagüdübalin Lásaru, aba meha milaguru le hásiñarun láganigu eyeedagua, máhatiña meha alidihatiña relihión huríu lun hafiñerun Hesusu lan Mesíasibei. Álugarügütiña háfaruni dandu ligía kei Lásaru (Huan 11:47, 48, 53; 12:9-11).

³ Subudi lumuti meha Hesusu máhabaña lan hiibe-agei gürigia lun kei Mesíasi (Huan 5:39-44). Ariñagati houn saragu lani Huan disipulugu: “Ani fuleseiwati le madariti lébuna achugeraguni * nidan!” (Mat. 11:2, 3, 6). Ka uagu añahein lubéi saragu gürigia máhatiña lun Hesusu?

4. Kaba uagu wayanuhan lidan aturiahani le?

 ⁴ Lidan aturiahani le luma lidan le lunbei liabin lárigiñe, lakutihóuba saragu resun le adügübei lun hamahadun saragu lun Hesusu keisi Mesíasi lidan furumiñeti sígulu. Warihinbei giñe ka lan uagu hamahadunbei saragu gürigia lun uganu le wapurichihabei uguñe weyu. Ani le súdinibei warihibei kaba lan íderaguawa lun derebugu lan wafiñen luagu Hesusu luma lun machugeragun wamá.

5. Ka uagu hasaminara fiu gürigia mama lan Mesíasi le füramasewabei Hesusu?

⁵ Saragu gürigia chugeguagüda lumutiña halíagiñeti lan Hesusu. Subudi hamuti aban lan máisturu le garufudahaditi ani le adügübei milaguru, gama lumoun houn, aban gudemeti, ani liráü aban sarafangei. Ani lídangiñeti meha uburugu Nasarétü Hesusu, másiñati ni kata lan meha hanügüni fiu gürigia uburugu ligía. Íbini Natanaéli le lunbei meha lani lan Hesusu disipulu, ariñagati meha furumiñe: “Anihein funagia Nasarétüna buiti?” (Huan 1:46). Ka uagu lariñaga ítara? Ladüga uburugu lan le ñein lubéi meha lawinwanda Hesusu mama aban fulasu súdiniti. O másiñati lasaminaruña lan luagu profesía le lídanbei Mikeasi 5:2 le ñein lubéi lariñawagúa Belenba lan lagüriahóua Mesíasi, mama Nasarétü.

6. Ka lunbei hamuga hadügüni ha amaharubaña lun Hesusu keisi Mesíasi?

⁶ Ka tariñagubei Bíbülia? Ariñagati profeta Isaíasi meberesenbaña lan láganigu Hesusu lau, ani “úati ni aban ebereseruti kaba lan asusereda lun” (Isa. 53:8). Saragu lídangiñe ariñahani le luáguti Hesusu anihein tidan líburu to habürühaboun profetagu. Lun hamuga meha akutiha hamani le asuseredubei hasubudiruñein hamuga Belén lan lagüriahóua Hesusu ani ladügawagun lan urúei Dawidi (Luk. 2:4-7). Ítarati, úarati le ñein lubéi lagüriahóua Hesusu luma le bürüwañubei lidan Mikeasi 5:2. Ligíati, kati turobulibei? Kei uá lan sun ariñahani hama, ligía chará lubéi hasaminan. Aba hachugeragun ani maha hagía lun Hesusu.

7. Ka uéigiñe maha habéi saragu gürigia houn lubúeingu Heowá?

⁷ Ligiaméme san asuseredubei uguñe weyu? Anha. Hiibe-agei lubúeingu Heowá mama hádangiñetiña gürigia rísitiña ni súdinitiña. Saragu gürigia ariha hamutiwa mama wamá “gürigia aturiahatiña saragu”, ani gürigia wamá “ha furumiñeguarügü” (Adü 4:13). Ariñagatiña siñá lan warufudahan tídangiñe Bíbülia ladüga midin wamá tidan Luban furendei íñuti le ñein lubéi larufudahóua tuagu Bíbülia. Híbiri ariñagatiña aban lan relihión Merigana, le linarün katei, aban hádangiñe kada sedü gefentiña luagu Heowá awinwandubaña Meriga. Ani abahüdawagúati houn amu mafiñen hamá Gefentiña luagu Hesusu. Lidan sun irumu le burí sügühalibei ariñagatiña wawagu “komunista wamá”, “merigana lan aríaahatiña wagía” ani “deregüda lan walurudun”. Ha aganbahabalin abahüdaguni le úati ariñahani inarüniti hama ani máhatiña lun, ani mínsiñetiña lumutuniña Heowá houn.

8. Según Adügaü 17:11, ka lunbei hadügüni anhein busén hubéi achoururuni kátaña lan lubúeingubaña Bungiu uguñe weyu?

⁸ Kaba íderaguaün lun machugeragun humá? Akutiha huméi ariñahani buidu. Ligía meha láfaagunbei Lúkasi ladügün. Dan meha le labürühabarun ewanhéliu álügüdahati meha “giñe buidu buidu libügürü sun katei le asuseredubei lúmagiñe lagumeserun”. Busenti meha lun hasubudiruni aliihatiña “linarün katei [...] buidu buidu” luagu le haganbubei luagu Hesusu (Luk. 1:1-4). Ligiaméme gayaraabei wariñagun hawagun huríu ha lídanbaña binadu uburugu Beréa. Dan meha le haganbunbalin uganu buiti luagu Hesusu furumiñe wéiyaasu, aba hakutihanu Abürüdǘni Ebüréu lun hachoururuni houngua anhein inarüni lubéi le ariñawagúbei houn  (aliiha huméi Adügaü 17:11). Aba katei ítarati lunbei hadügüni, lunti harihini anhein inarüni lubéi somu ariñahani. Ariha huméi giñe le harufudahabei gefentiña luagu Heowá lumoun le tariñagubei Bíbülia. Ani buídubei giñe lun haturiahani sügǘ le hani gefentiña luagu Heowá le lídanbei wadaani. Ánhawa aturiahei buidu, mídinbadiwa luéigiñe hóubadina ha iyereehabúbaña ni luéigiñe hóubadina ha adimuredügübaña.

9. Ka asuseredubei dan le lamaharunbei Hesusu larufudun aban seini siélugiñeti houn?

⁹ Lidan meha lidaani Hesusu añahein meha gürigia lóuguati meha lubuidun larufudahan houn; busentiña meha lanwoun. Amuriahatiña meha luma lun larufudun somu seini houn le siélugiñeti lun hafiñerun “lúmagiñe lan Bungiu liabin” (Mat. 16:1). Másiñati hamuriahanbalin lira ladüga wuriba lan lafurangüdǘniwa Danieli 7:13, 14. Gama lumoun, lun Heowá mámagili meha dan lun lagunfulirun profesía ligía. Lunti hamuga meha hagufurumadun lau le larufudahabei Hesusu lun hafiñerun ligía lan Mesíasibei. Kei le maha lubéi líchuguni seini le hamuriahabei, aba hachugeragun, ani aba hamahadun lun (Mat. 16:4).

10. Ida liña lagunfuliruni Hesusu le ariñawagúbei luagu Mesíasi?

¹⁰ Ka tariñagubei Bíbülia? Ariñagati Isaíasi luagu Mesíasi: “Miñurun lubéi lumala, maganbagüdün lubéi lumalali ǘmadarugu” (Isa. 42:1, 2). Gumese lumuti meha Hesusu lani ministeriu sin líchugun uéiriguni lúniwagua. Metenirunti meha ábunagua tanarime burí ténpulu, madaüragun ligía daüguaü espechalitu tibe burí to hayusuruboun alidihatiña relihión, mamuriaha ligía lun hagúahan lun lau iri le lánina uéiriguni. Dan le añahán lan aguseragüdei íbini lídanñein lan denchaü libagari máhati lun ladügün milaguru le gayaraabei hamuga laweiridagüdünu lanigi urúei Erodesi (Luk. 23:8-11). Inarüni lidan lan meha sun lani ministeriu adügati meha fiu milaguru ani le meha súdinitimabei lun súnwandan lapurichihani uganu buiti. Ariñagati houn lani disipulugu: “Lun lira niabin ubouagu” (Mar. 1:38).

11. Ka saminaü charati hasaminarunbei gürigia wawagu?

 ¹¹ Ligiaméme san asuseredubei uguñe weyu? Anha. Añahein saragu gürigia wéirigüda lumutu hanigi tuéinamun burí ligilisi to burí wéndeboun lau saragu katei le gebegiti, wéiritu giñe hanigi lau lanarime burí iri le aubei lagúahoua houn alidihatiña relihión, luma burí lemesi o kultu le hadaagubei, íbini murusunrügaaña lan asubudirei lídangiñeti lan échuni hani ha máhuduragunbaña lun Bungiu liabin dandu le mini lubéi. Gama lumoun lidan burí lemesi luma burí kultu, ha achülürübaña aganbahei murusunrügüñein hafurendeirun ñein luagu Bungiu luma luagu le labusenrunbei ladügün. Ánhañati ha ñǘdünbaña lidoun wadamuridagun furendeitiña ka lan lamuriahabei Heowá wámagiñe luma ka lan lunbei wadügüni lun wagundaaragüdüni. Úati uéndeguni tidan Luban Wadamuridagun, harumatu ani míbeti katei tidan. Ha abugurubalin wadamuridagun mayusuruntiña daüguaü espechalitu ani maguarúnti giñe houn lau iri le adügübei lun iñu lan hasandiragun houngua. Le wafiñerubei luma le warufudahabei tídangiñeti Lererun Bungiu. Íbini ítara saragu gürigia chugeguatiña ladüga madügün wamá saragu katei lidan wáhuduragun lun Bungiu luma giñe le lan nege warufudahabei múaran lan luma le habusenrunbei haganbun.

12. Según Ebüréu 11:1, 6, kaba lébuna bafiñen?

¹² Kaba íderaguaün lun machugeragun humá? Ariñagati apostolu Pábulu houn kristiánugu ha Rómabaña: “Ítara liña lubeiti, lídangiñe haganbuni gürigia uganu hafiñera, ani Lererun Kristu uganu ligía” (Rom. 10:17). Mibihinti afiñeni derebuguti lídangiñe lemesi ni lídangiñe kultu le móudinbei luma le tariñagubei Bíbülia meberesenga buidu lan larihin o wéirigüda lanu hanigi gürigia. Lunti derebugu lan wafiñen ani lunti giñe inarüni lan le tídanbei Bíbülia lébuna, ladüga “siñati lagundaarun Bungiu wau anhein mafiñen wabéi luagu” (aliiha huméi Ebüréu 11:1, 6). Ligíati, lun lachoururuni somu gürigia darí laali lan inarüni memegeirunti lanarime seini siélugiñe. Buídurügüti laturiahanu Bíbülia buidu buidu lun gayaraabei lan lederebudagüdüni lafiñen luma lun lagidaruni furumiñeguarügü machouruni luáriua.

13. Ka san uagu hamahada saragu gürigia lun Hesusu?

¹³ Lidan lidaani Hesusu wéiritu meha hanigi lani Huan le abadiseihabei disipulugu ladüga mayunarun hamá lani Hesusu disipulugu. Afuranguagüda lumuti Hesusu houn mébuna lan lun hayunarun lánigu, sun anihagua lan wínwañu (Mat. 9:14-17). Íbini ítara, mínsiñeti meha Hesusu houn fariséugu luma houn amu láganigu, ladüga mafalarun lani hechun luma ligaburi háhuduragun. Aba hagañidun luma dan le harihinbalin areidaguagüda gürigia samudi. (Mar. 3:1-6; Huan 9:16). Pántatiña meha gürigia hagía ladüga inebe lan samudi houn, luagu le aban oubaü adügatiña meha bísinisi ténpulurugu sin hasaminaruni bián wéiyaasu. Aba hagañidun dan le ladeinhanbei Hesusu houn luagu katei le (Mat. 21:12, 13, 15). Dan le lapurichihanbei Hesusu tidan haligilisin huríu uburugu Nasarétü, ha aganbubalin aban hagañidun saragu ladüga layusurun hénpulu le lani binadu Ísüraeli lun lariñaguni houn lougua lan hafiñen luma hawouguounrügüñein lan hasaminara (Luk. 4:16, 25-30). Saragu hádangiñe aba hachugeragun ladüga madügǘn lani Hesusu le hagurabubei lun ladügün (Mat. 11:16-19).

14. Ka uagu magundan lubéi Hesusu lau hechun gürigia le mídinti luma le tariñagubei Lererun Bungiu?

¹⁴ Ka tariñagubei Bíbülia? Ariñagati Heowá liyumulugugiñe profeta Isaíasi: “Gürigia ha, láurügüñein dimurei nínsiñeda houn, hayumárügiñe híchiga inebesei nun, ánhounti hanigi, dísetu nuéi, óundaruni le hadügübei nun, katei le hadüga wügüriña lira, lafurendeirun hachügü” (Isa. 29:13). Buiti meha ladüga Hesusu lau magundan lan lau échuni le mídinbei luma le tariñagubei Lererun Bungiu. Ha meha beresebaña saragu luagu échuni luma lilurudun wügüri, sügǘ luéi le tariñagubei Lererun Bungiu, hamahaduña meha lun Heowá luma lun Mesíasi le lóunahabei.

15. Ka san uagu magundan habéi saragu gürigia hau gefentiña luagu Heowá?

¹⁵ Ligiaméme san asuseredubei uguñe weyu? Anha. Saragu gürigia gáñitiña ladüga mafalarun hamani gefentiña luagu Heowá échuni burí le mídinbei luma le tariñagubei Bíbülia, kei burí lagunfulirun irumu luma burí lefeduhóun 25 lidan duusu-hati. Añahein amu aba burí hagañidun ladüga madan laadiwa lufedun ageiraü ani mafalarun wamuti giñe échuni luáguti egeburihani, igaburi le aubei magundan tan Lererun Bungiu. Másiñati haruma tan hanigi gürigia ha, ani afiñe hagía gunda lan Bungiu lau le hadaagubei. Gama lumoun, anhein himei hamagili lubéi hafalaruni échuni burí le lani ubóu, luéi arufudahani harumati le tídanbei Bíbülia, magundanbei Heowá hau (Mar. 7:7-9).

16. Según Sálumu 119:97, 113, 163-165, ka lunbei wadügüni, ani kaba un wamahada?

¹⁶ Kaba íderaguaün lun machugeragun humá? Lau haganwoundagüdüni ínsiñeni le hasandirubei luagu lilurudun Bungiu, luma luagu lugumadin (aliiha huméi Sálumu 119:97, 113, 163-165). Anhein hínsiñe lubéi Heowá hun hamahaduba lun furumiñeguarügü échuni le aubei magundan lan. Mígira humá lun ñein lan ni kata lóugiñe ínsiñeni le hasandirubei luagu Heowá.

17. Ka meha san hagurabubei saragu gürigia lúmagiñe Mesíasi?

¹⁷ Lidan lidaani Hesusu, añahein meha huríu busentiña lun hasansirun gumadimatiña lau lóufudagun. Agurabatiña meha lun lesefuruniña Mesíasi lídangiñe lubafu Roma. Gama lumoun dan le hálugunbei lun hadügüni Hesusu urúeime, máhati (Huan 6:14, 15). Añahein meha fádirigu hanufudetiña meha luéi lasansiruni Hesusu ítaga gumadi, luéi hagañidun gumadimatiña rómana ha meha íchugubaña ubafu houn, luéi lagidarún ubafu hawéi le meha  íchugubei houn. Chugeguatiña meha saragu huríu ladüga katei burí líbeina le.

18. Ka profesía uágubei meberesen hamá huríu?

¹⁸ Ka tariñagubei Bíbülia? Inarüni ariñaga tan lererun Bungiu lageindaguba lan Mesíasi aban wuribu, ani lagañeiruba lan, gama lumoun ariñawagúati giñe mosu lan lounwen furumiñe luagu wafigoun (Isa. 53:9, 12). Lau sun lira, kati uagu chará lubéi hasaminarun gürigia luagu Mesíasi? Ladüga hetenirun lun sun profesía le ayanuhabei luagu laransehoun turobuli lau lóufudagun, ani metenitiña lun le líbiri profesía (Huan 6:26, 27).

19. Ka san uagu hachugeragua saragu gürigia uguñe weyu?

¹⁹ Ligiaméme san asuseredubei uguñe weyu? Anha. Saragu gürigia chugeguatiña ladüga midin wamá luéigiñe lóubadina ni aban polítika. Saminatiña mosu lan wabuduhan lidan lidaani abuduhani. Gama lumoun, ánhawa hamuga anúadira aban wügüri kei gumadimati, warufuduña hamuga mabusenrun wamani Heowá (1 Sam. 8:4-7). Másiñati giñe samina hamá lunti lan hamuga wetenirun ábunagua háspitali, leskuela ítara kei burí amu katei le gayaraabei líderaguniña gürigia. Chugeguatiña ladüga wetenirun lun apurichihani mama lun waransehani liturobulin ubóu le.

20. Según le lariñagubei Hesusu lidan Matéu 7:21-23, ka san súdinitimabei?

²⁰ Kaba íderaguaün lun machugeragun humá? (Aliiha huméi Matéu 7:21-23). Haritagua waméi le lan súdinitimabei lun wadügüni, dasi le líchugubei Hesusu woun lun hadügün (Mat. 28:19, 20). Mígira wamá lun ladireiruni turobuli le lani polítika luma haturobulin gürigia warihin. Wagía gefentiña luagu Heowá hínsiñetiña gürigia woun, ani nidiheritiwa luagu haturobulin, gama lumoun, subudi wamuti le lan buídutimabei lun wadügüni houn, lun warufudahan luagu Larúeihan Bungiu houn, luma lun wíderaguniña lun gamadagua hamá luma Heowá.

21. Ka aranseñu wabéi lun wadügün?

²¹ Ligíati lidan aturiahani le arihaadiwa gádürü resun ka lan uagu hachugeragua saragu gürigia luma hamahadun lun Hesusu lidan furumiñeti sígulu, luma giñe lébuna hamahadunbei fiu gürigia houn lani Hesusu disipulugu. Mámarügüñein le. Lidan leweñegua aturiahani warihiba gádürü lanwoun. Sun wagía lunti aranseñu wamá lun derebugu lan wafiñen luma lun mígirun wamá lun lachugeraguagüdüniwa ni kata.