1. Ka adüga laalibei Heowá luagu kada aban wádangiñe?

YARAFAGÜDA laadiwa Heowá kada aban wádangiñe luouguoun (Huan 6:44). Samina wamá luagu le mini lubéi le? Lidan aniha lan Heowá akutihaña saragu milu míñunu gürigia ubouagu, arihati katei buiti wawagu: arihati aban anigi harumatu wadan to hínsiñeti tun (1 Kro. 28:9). Subudi lumutiwa Heowá ani gunfuranda lumutiwa ani hínsiñetiwa lun. Ma ruti le darangilaü woun, adián?

2. Ka sügǘ labahüdahabei Hesusu woun lun líderaguniwa gunfurandei hínsiñe lan kada aban wádangiñe lun Heowá?

² Sanditi Heowá aban lanarime ínsiñeni huagu, ani sandi lumuti giñe luagu kada aban hádangiñe wíbirigu kristiánugu. Lun líderaguniwa gunfurandei ruti Hesusu aban hénpulu. Anhein añahein lubéi 100 mudún luma aban wügüri ani leferidira aban hádangiñe, kaba san ladüga? “Ma lígirubaña híbiri luagu wübü, ábame lidin áluahoun to ayuridaguboun?” Danme ladarirunu mágañidunbei tuma, gúndaarügübei. Ka wafurendeirubei lídangiñe sügǘ le? Kei ítara liña lan Heowá kei hóuniri mudún, súdinitiña kada íbirigu lun ha ítarabaña kei mudún lun. Ariñagati Hesusu: “Mabusenrunti Húguchi Bungiu le siélubei lun leferidirun ni aban hádangiñe ǘnabugutiña ha” (Mat. 18:12-14).

3. Kaba wariha lidan aturiahani le?

³ Ligíati, mabusenrúntiwa wadügün o wariñagun ni kata le gayaraabei ladügün lun heferidiruni wábirigu haguraasun. Lidan aturiahani le wóunabubei álügüdahani burí le: ka gayaraabei wadügüni lun machugeraguagüdün wamá amu? ani kaba wadüga ánhaña adüga amu wuribati woun? Gama lumoun, ayanuha wamá  murusun hawagu “ǘnabugutiña ha” uágubaña layanuhóua lidan kapítulu 18 lidan Matéu.

4. Kátaña san “ǘnabugutiña ha”?

⁴ Ǘnabugutiña ha lánigu Hesusu disipulugu. Meberesenga harumudiri ítara haña “kei irahüñü” ladüga ígiraguagüdatiña houngua lun larufudahan Hesusu hou (Mat. 18:3). Íbini lídangiñetiña lan ámuñegueinarügü fulasu luma échuni ani ámuñegueinarügüti hagaburi luma katei le hínsiñebei houn, sun hagía ru hamuti hafiñen luagu Kristu. Ani hínsiñetiña giñe lun saragu (Mat. 18:6; Huan 1:12).

5. Ida liña lasandiragun Heowá lungua dan le ladügün aban gürigia lun lachugeragun aban hádangiñe lubúeingu?

⁵ Sun “ǘnabugutiña ha” wéiriti hebegi lun Heowá saragu. Lun gunfuranda wamani ida liña lan larihiniña Heowá, samina wamá ida liña lan warihiniña irahüñü. Gebegitiña irahüñü woun. Busentiwa wóunigiruniña ladüga mere hamá, lóuguagili hasubudirun ani úati giñe lichú aau hawagu libe le hawagubei gürigia wéinamugaaña. Ani mínsiñeti giñe woun lun ladügǘn wuribani lun ni aban gürigia, gama lumoun, anhein abuleseira aban gürigia aban irahü gáribei woun ani ábame giñe wagañidun. Ligiaméme lasandirubei Heowá. Busenti lóunigiruniña lubúeingu. Ligía, dan le labuleseiruniña aban gürigia o ladügün lan lun lachugeragun aban hádangiñe ǘnabugutiña ha aba lagañidun Heowá (Isa. 63:9; Mar. 9:42).

6. Según 1 Korintuna 1:26-29, ida liña harihiniña gürigia ha ubouaguna lánigu Hesusu disipulugu?

⁶ Ka ida ítara hamá lani Hesusu disipulu kei “irahüñü”? Kátaña san súdinitimabaña lun ubóu? Rísitiña, ha subudiwabaña hama ha gabafubaña. Hiibe agei lani Hesusu disipulugu mítarantiña. Ligía hanügünbaliña gürigia ha ubouaguna kei ni kata, mini lan le masudinin hamá saragu (aliiha huméi 1 Korintuna 1:26-29). Ánheinti Heowá marihin lumutiña ítara.

7. Ida liña labusenrun Heowá lun warihiniña wábirigu?

⁷ Hínsiñetiña sun lubúeingu Heowá lun, meberesenga átiri lan dan hau eseriwida lun. Anhein sun lubéi lubúeingu Heowá súdinitiña lun, lunti giñe súdini hamá woun. Busentiwa hínsiñe hamá sun waduheñu “luéigiñe Hesukrístu” woun mámarügü fiu hádangiñe (1 Fe. 2:17). Lunti aranseñu wamá lun wadügüni sun wayaraati lun wóunigiruniña wábirigu. Ánhawa íchiga fe adügaadiwa lan lun lasandiragun somu íbiri lungua wuriba moun lumuti wíchugun mabaüdüni luagu o wasaminarun delikoun lan o lunti lan labulieiduni le asuseredubei. Ka adügübei lun lasandiragun gürigia lungua wuriba? Másiñati ladüga lan ligaburi lagüriaruniwa lasandiragunbei lungua kei ni kata. O másiñati íserigili lan lidan inarüni mafurendeirugili ahandilihei hachara amu. Lidan furumiñeguarügü kesi, lunti wadügüni sun wayaraati lun waransehani gádantiwa. Luagu le aban oubaü anhein agañida somu íbiri lau lóufudagun, lunti laritaguni mabuidun lan igaburi le mosu lan luadigimaridun lun ligiruni igaburi le. Súdiniti lun ladügüni, lun darangilaü lan luma lun habuidun guánarügü ha híbiri.

8. Ka saminaü hawagubei lani Hesusu disipulugu?

⁸ Ka san uagu layanuha Hesusu hawagu “irahüñü ha”? Álügüdagua hamaali meha lani disipulugu: “Katei san wéirigutimabei lidan Larúeihan Bungiu?” (Mat. 18:1). Lidan meha dan lügüra, gíbetiña meha huríu súdiniti meha uéiriguni houn luma burí ubaraü hadan gürigia. Ariñagati meha aban sásaamu: “Áfaraguatiña wügüriña houngua lun hibihin uéiriguni, lun habahüdün, lun subudiwa hamá, luma lun inebewa hamá”.

9. Ka lunbei hadügüni lani Hesusu disipulugu?

⁹ Subudi lumuti meha Hesusu mosu lan háfaagun lani disipulugu saragu lun hígiruni igaburi  le güragubei tidan hanigi huríu. Ariñagati: “Le wéirigutimabei le tímatimaati hidan lunti lanaagun lungua kei le ǘnabutimabei; le agumadihabei, lunti ítara lan kei le eseriwidubei” (Luk. 22:26). Lun wóuserun “kei le ǘnabutimabei” lunti wasaminarun íñutima hamá amu wawéi (Fili. 2:3). Éibutimaame wáfaagun lun gagaburi wamani igaburi le éibutimaame hénrengu lan lun wadügün lun hachugeragun amu.

10. Ka adundehani lúmagiñeti Pábulu lunti wíchuguni tidan wanigi?

¹⁰ Sun íbirigu dandu wügüriña kei würiña íñutiña wawéi lidan somu katei. Ménrengunti warihini le dan le wetenirun lun katei buiti le hadügübei. Lunti wíchuguni tidan wanigi adundehani le lariñagubei Pábulu houn korintuna: “Kagia adügübalibu buidu hawéi ha híbiri? Ka katei búmabei le mámabei líchugun Bungiu bun? Ánheinti Bungiu lubéi íchugubalin sun katei bun, kati uagu banaagua bungua kamá hamuga mama resibirügü bumuti?” (1 Ko. 4:7). Ligíati méiguada wamá lidan óuchawaguni lánina wachawahaniña gürigia wawouguoun o lun wafiñerun íñutima wamá hawéi amu. Anhein íchiga aban íbiri aban lubuidun yanu o tíchuguña lan aban íbiri saragu aturiahani tídangiñeti Bíbülia, súnwandan lunti lan híchuguni uéiriguni lun Heowá.

11. Ka wafurendeirubei lídangiñe abahüdaguni le labahüdahabei Hesusu luagu urúei luma lidamun?

¹¹ Lárigiñe labahüdaha Hesusu aban abahüdaguni houn lani disipulugu lun lan madügün hamá lun hachugeragun amu, aba labahüdahan aban sügǘ houn luagu le ladügübei aban urúei lun lidamun. Feruduna lumuti urúei le lidamun lídangiñe aban dúeiti le mabafu lubéi idamu lun lafayeiruni. Dan lárigiñe, idamuniméme ligía máhati lun feruduna lani idamuni le adúeirubalin. Ka wafurendeirubei? Ariñagati Hesusu: “Ítara luba giñe ladüga Núguchi Bungiu le siélubei hun anhein ua feruduna lani kada aban hídangiñe líbiri tídangiñe lanigi” (Mat. 18:21-35).

12. Ánhawa uá feruduna wamaniña ha achararubaña woun, ida liña wadügüña lan wuribani houn?

¹² Mámarügüñein lungua ladüga idamuni le wuribani, adügati giñe wuribani houn amu. Furundeti wügüri ligía luma lupaaná “ñǘdünrügü ligía aba ládaruni furisunrugun darí lafayeiruni ladúeihan”. Ani adügati giñe wuribani houn amu musu ha arihubalin le ladügübei. Ariñagati Hesusu “Dan le harihinbalin ha híbiri musu katei le, aba lagaridun houn saragu; aba houdin, aba habahüdaguni lun urúei”. Ítarameme, le wadügübei gayaraati gani lan hawagu amu. Ánhawa hóusera amu wuriba ani máhatiwa feruduna wamaniña, ka gayaraabei lasuseredun? Wadügüña wuribani lun ladüga maha wamá lun feruduna wamani luma lun warufudun ínsiñehabuni lun, darí lun meberesen wamá lau. Ani wadügüba giñe lun wuriba lan hasandiragun lílana damuriguaü hougua luma lun madariragun hamá hougua laume harihini uá lan darangilu wamá luma gürigia ligía.

13. Ka wafurendeirubei lídangiñe le asuseredubei tun aban prekursora?

¹³ Adügati buiti woun feruduna wamaniña wábirigu ani adügati giñe lun hasandiragun amu houngua buidu. Ligía meha asuseredubei tun aban prekursora to unboun wagúara Crystal. Aritagua tágili luriban tóuserunu aban íbiri lidan damuriguaü: “Anihein dan gari lan le tariñagubei kamá hamuga lácharuña aban gürigia gusiñu naniguagu. Dan le wáfuridun apurichiha, mabusenruntina nírügü híchugunina tidan tuguyaméme ugunei úara tuma. Aba nagumeserun eferidirei ubebeni luma ugundani”. Genegeti meha tun Crystal gébuna lan tasandirun igarihabu. Gama lumoun, mareidahatu igarihabu ni lun tasandirun gudemehabu túniwagua. Arufudatu ǘnabuguni, aba tadügüni le lariñagubei ariñahani le lánina aturiahani le gíribei “Perdonemos de corazón”, le áfuridubei tidan Garüdia Awisahatu to lánina 15 lidan diisi-hati irumu 1999. Lárigiñe lira aba feruduna tanu Crystal íbiri  tuguya. Ariñagatu: “Guenlé gunfuranda naali sun lan wagía wáfaaguña lun wabuiduragüdüni wagaburi ani feruduna lumutiwa Heowá sagü weyu lau sun lugundan. Sanditina gidaadina lan aban lanarime ihürügu nuáriua ani gúndaatimahadina”.

14. Según Matéu 18:21, 22, ka turobuli úmabei lagagibudagua apostolu Féduru ani ka hafurendeirubei lídangiñe óunabagülei le líchugubei Hesusu? b) Ka gayaraabei líderaguniwa ánhawa agagibudagua luma aban katei ítarati?

¹⁴ Subudi wamuti lunti lan feruduna wamaniña ha achararubaña woun, ani ligía buídubei. Gama lumoun, másiñati hénrengu lan woun wadügüni. Genegeti anihein lan dan susere lan katei le lun apostolu Féduru (aliiha huméi Matéu 18:21, 22). Ka gayaraabei líderaguniwa? Furumiñe, ráramagua wamá asaminara luagu, feruduna lániwa Heowá saragu wéiyaasu (Mat. 18:32, 33). Madüna wamuti lun feruduna lániwa, gama lumoun, feruduna lumutiwa lau areini (Sal. 103:8-10). Ani “lunti giñe hínsiñegua wamá wámagua”. Ligíati, mama ánhawa busén lun feruduna wamaniña wíbirigu lunti feruduna wamaniña (1 Huan 4:11). Le libiaman, katei le gayaraabei líderaguniwa wasaminarun hulili luagu le asuseredubei dan le feruduna wamaniña amu. Wíderaguñanu gürigia ha óuserubaliwa wuriba, wadügüña giñe lun ñein lan úarani lidan damuriguaü, wóunigiruñein wamadagua luma Heowá ani wágidaruñein ihürügu wawariua (2 Ko. 2:7; Kol. 3:14). Le lǘrüwan ídemuei, wafurieidun lun Heowá, ligía amuriahabei wama lun feruduna wamaniña amu. Mígira wamá lun lagadeiruni Mafia darangilaü le wádanbei hama wíbirigu (Efe. 4:26, 27). Megei wamuti lídehan Heowá lun méiguadun wamá tidoun lisadaran Satanási.

15. Según Kolosana 3:13, kaba wadüga anhein adüga aban íbiri wügüri lan yebe o würi lun wasandiragun woungua wuriba?

¹⁵ Ánheinti adüga aban íbiri somu katei le mínsiñeti woun? Lidan kesi le, lunti wadügüni sun wayaraati lun ñein lan darangilaü. Furíei wamá lun Heowá ani abahüdagua waméi sun le  wasandirubei lun. Amuriaha wamá luma lun labiniruni le óuserubaliwa wuriba ani íderagua láwame arihei lubuidun ligaburi íbiri ligía, libe le larihibei Heowá luagu ani le hínsiñebei lun (Luk. 6:28). Anhein siñá wamá le ladügübei woun ásügüragüda, samina wamá ka lan igaburi buídubei lun wayanuhan luma. Súnwandan buidu lan lun mabulieidun wamani mama lan labusenrun ladügübei wuribani woun (Mat. 5:23, 24; 1 Ko. 13:7). Danme le wayanuha luma, samina wamá buidu lan lisaminan. Ánheinti mabusenrun lubéi laransehani katei? Ariñagatu Bíbülia: “Gaguraasun humá hubaruagua”. Mariha wamaña wábirigu kamá máraninaaña (aliiha huméi Kolosana 3:13). Le súdinibei mareidahan wamá igarihabu lubá, lagadeirubei katei le wamadagua luma Heowá. Ua lan ni kata lun ladügün lun wachugeragun. Ítara luba warufudun hínsiñe lan Heowá woun lóugiñe sun katei (Sal. 119:165).

16. Ka lunbei wadügüni kada aban wádangiñe?

¹⁶ Óunwenbu weteingiruni Bungiu luagu chansi hádangiñetiwa lan “aban fárüga” ha eseriwidubaña lun Heowá “luma aban óunigiruti” (Huan 10:16). Ariñagatu líburu: Organizados para hacer la voluntad de Jehová, páhina 165, “Le lunbei wadügüni lun wídehan akipurei úaraguni le wádanbei” ani ariñagayatu: “Wanügagunba woungua buidu hama wíbirigu ánhawa afurendeira arihaña kei larihiniña Heowá”. Ariha lumutiwa sun wagía kei lirahüñü ani gebegitiwa lun saragu. Ani ítara luba lunti lan warihiniña wábirigu. Ariha lumuti sun le wadügübei lun wíderaguniña luma lun wóunigiruniña ani gebegiti lun (Mat. 10:42).

17. Kaba wadüga?

¹⁷ Hínsiñetiña wábirigu kristiánugu woun. Ligía, aranseñu waña lubéi lun madügün wamá ni kata le gayaraati lachugeraguagüdüniña wábirigu (Rom. 14:13). Saminatiwa íñutima hamá wíbirigu wawéi ani busentiwa lun feruduna wamaniña tídangiñe sun wanigi. Mígiraguagüda wamá woungua lun ladügün le hadügübei amu lun wachugeragun. Ligíati, “ítarameme wamá lubeiti áluaha lun lidan lan darangilaü sun katei, lun gayara lan wíderagun woungua lun wederebugudun lidan wafiñen” (Rom. 14:19).