Disinéfu lidan seingü-hati irumu 1940, nágurahoua lidan uburugu Amiún (Líwanu). Fiu irumu lárigiñe, aban wáguyun uburugun Trípoli. Hama nagübürigu naweirida úara hama níbirigu, gürigia gúndaatiña, buiti hagaburi ani wéiriti línsiñe Heowá houn. Ǘrüwañanu meha níbirigu würiña hama bián wügüriña, au adarahounibei. Úati meha súdini lan lagañeirun seinsu houn nagübürigu, le súdinibei houn waturiahanu Bíbülia, woudin adamuridagua luma lun wíderaguniña gürigia asubudirei Bungiu.

Añahein meha saragu kristiánugu anúadiraaña lidan damuriguaü le ñein wabéi. Michel Aboud aban meha hádangiñe, ligía meha adundehabalin le meha unbei wagúara taturiahoun líburu. Furedei lumuti meha inarüni Newayóru, ani aba lidin apurichiha uburugu Líwanu lidan lagumeseha irumu burí wein. Haritaguanagili buidu buidu inebesei le aubei lóuseroun Anne tuma Gwen Beavor ani luma ida liña lan líderaguniña bián nibureintiña ha, ha meha eresibihaaña tídangiñe Leskuela Galaadü. Umadagu meha buítiña íbirigu ha houn niduheñu. Saragu irumu lárigiñe, aba nadunragun tuma Anne Meriga, gúndaagüda lumutina katei le saragu. Murusun dan lárigiñe, aba giñe nadunragun tuma Gwen, maríeiharu meha luma Wilfred Gooch ani  heseriwiduña meha tidan sukursáli to Alunduboun (Ingülatéra).

Dan meha le ñǘraügidina, lóuguatiña meha Gefentiña uburugu Líwanu. Íbini ítara, arufudaha wamuti houn gürigia le wasubudirubei tídangiñe Bíbülia. Adügameme wamuti íbini hadügüdarun fiu tábutigu relihión wawagu lun madügün wamani. Dagá lumoun weyu le, haritaguanagili buidu buidu fiu lídangiñe katei le wásügürübei.

Aban weyu, napurichihaña úara tuma Sana to níbugaña tidan aban muna íñutu to lautu saragu rumu. Lidan awanha lan ayanuha luma aban tílana muna lidan aban lídangiñe fuló, aba lachülaagun aban fádiri. Háfuga somu gürigia aguarúbaña lun. Aba lagumeserun fádiri le anabaguawa ani aba lagañidun saragu darí lun ladaarunu níbugaña luéigiñe esütépu. Aba hagúarun somu gürigia houn lúrudu, aba hachülürün ani aba houserúniwa lau ínsiñehabuni ani aba híderagunu Sana ladüga buleseitu dan le téiguadubei. Aba hanügüni fádiri tidoun áfisi hani lúrudu ani aba híchugun fe anuhein lan bisilédu luma. Aba hálügüdaguni hábutigu lúrudu fádiri: “Kata bun san? Aban tábuti relihión, o aban hábuti wuribatiña?”.

Mabulieidun numuti giñe weyu le láhayaanbei damuriguaü aban busu lun woudin apurichiha lidan aüdü díseti. Buiti léibugun sun katei darí lun lasubudiruni fádiri le lánina aüdü awanhein lan fulasurugu ani aba lóundarun gürigia lun hagayuahan wawagun. Darí lun hachamuragun dübü wawagun, ani bougua hamuti lábulugu núguchi. Aritaguanagili ligibu núguchi buin lau hitaü. Aba lagiribudun tidoun busu úara tuma núguchu, aba woudin hárigi lau saragu idiheri. Mabulieidun numuti le tariñagubei núguchu sun anuha lan arumadahei ligibu núguchi: “Heowá núguchi, ferudunabaña, ladüga ibidiñeti houn ka lan hadügübei”.

Lidan ábanya waweiyasuhan, aba woudin abisidahaña waduheñu lidan uburugu le ñéingiñe lubéi meha wayabin. Dan le wachülürünbei lúbiñoun náruguti, ñeinñein obispo, aban tábuti relihión le súdinitimabei houn. Subuditi meha lun gefentiña lan luagu Heowá nagübürigu. Lau sun sisi lan meha irumu nau, aba lálügüdünina: “Buguya, ka uagu mabasterungidibu lubéi?”. Lau sun ñǘraügidina lan aba nariñagun lun mosu lan naganwoundagüdüni nisubudin tídangiñe Bíbülia ani héregüdaneime nafiñen. Kei magundan lubéi lau nóunabagüle, aba lidin ariñaga lun náruguti, nawügürihouña lan lun.

Chóuruti, aban lan sügǘ burí híruti le. Besafu Líwanuna, buiti hagaburi ani gamadóuntiña. Ligíati, liibe agei dan ayanuhatiwa meha hamá gürigia tuagu Bíbülia ani rútiwa meha saragu aturiahani.

Dan meha le leskuelagidina, aba lidin aban íbiri le bénesuelana abisidahei ageiraü Líwanu. Ñǘdünti adamuridagua lidan damuriguaü le ñein wabéi, lárigiñe aba lagumeserun adarihoun Wafa to níbugaña. Lau lásügürün dan, aba hamarieidun ani aba houdin awinwanda Bénesuela. Dan meha tóunaha Wafa gárada, súnwandan meha tariñagun weiri lan tálugun wawagun, ani lun lan woudin awinwanda tuma Bénesuela. Murusun dan lárigiñe, aba lasuseredun le tayumahabei!

 Lidan irumu 1953 ligía wáguyun Bénesuela ani aba wóundi awinwanda uburugu Karakas, madise tuéi luban urúei. Kei nibureingidina lan meha, wéirigüda lumutu meha nanigi dan le narihin lásügürün urúei tidan lugune to sérutu ani ábugahouwarügütu lau. Gama lumoun, hénrenguti meha houn nagübürigu lun héchudun, ladüga iseri meha sun le houn: ageiraü, iñeñein, échuni, éigini luma ligaburi dan. Ani le lúgubu, hagumeseruña meha échuda luagu iseri katei burí le dan le lasuseredunbei aban sügǘ híruti.

Sódini, aba lagumeserun núguchi lau luriban ladariragun lungua. Hénrenguti meha woun lun wánharun lun katei le, ladüga aban meha wügüri héreti ani buiti meha látuadi. Marihinñaha naagili lau sandi. Ariñagati surusia anihein lan kánserü luagu ani aba libugún. Híruti aba lan lounwen aban dimaasu lárigiñe.

Gáriti meha katei le woun saragu. Tareisirügülin meha irumu nau. Magurabun wamuti lounwen sódini, ani sandiguatiwa woungua mítaran hali lanme wabagari kei meha. Barüti saragu dan, lun tánharun núguchu úaali lan tani weiriei tuma. Gama lumoun, aba wárügüdagun woungua, aba wasigirun wabaruaguóun, lau lídehan Heowá. Dan le neresibihanbei tídangiñe kolehiu 16 meha irumu nau, uburugu Karakas, sanditina meha mosu lan níderaguniña niduheñu ibihei le hemegeirubei.

Lidan dan ligía, aba tamarieidun Sana to níbugaña luma Rubén Araujo, aban meha íbiri le agiribudubei Bénesueloun lárigiñe leresibihan tídangiñe leskuela Galaadü. Aba háguyun awinwanda Nuewayoru. Aba nounahóun awinwanda tuma Sana luma Rubén Newayóru lun nidin aturiaha tidan luban furendei íñuti. Sun anaha lan aganawa hama, íderagua lumutina lubuidun hani hénpulu lun nederebudagüdüni numadagua luma Heowá. Lau sun lira, añahein meha saragu íbirigu derebuguti hafiñen lidan damuriguaü, Brooklyn Spanish. Añahein meha bián hádangiñe Milton Henschel luma Frederick Franz, hínsiñetiña meha nun saragu, tidan meha Beteli to Brooklynboun heseriwida.

Murusunrügaali meha dan lun nagumuchuni furumiñeti irumu tidan luba furendei íñuti Newayóru, aba nararamagun asaminara ka lan nadügübei lau nibagari. Aliihatina meha fiu aturiahani tídangiñe Garüdia Awisahatu luáguti le gayaraabei wadügüni lun weseriwidun lun Heowá ani adügaali meha aturiahani le lun nasaminarun. Ariha numuti dandu lan prekursorugu kei betelitagu wéiriti hagundan ani busentina meha lun ítara nan kei hagía. Lau sun lira mabadiseirungidina meha, málüti lárigiñe, aba níchugun fe mosu lan meha nederegeruni nibagari lun Heowá. Ligía nadügübei ani aba nabadiseirun 30 lidan ǘrüwa-hati irumu 1957.

Lárigiñebei nabadiseirun, aba nasaminarun lun neseriwidun lidan dan dayarüti. Aganwoundeina liña meha nayumaha lun prekursoru nan, lau sun lira subuditi meha nun mámabei lan aban katei le ménrengunti. Aba nálügüdagun nungua ida luba lan nadüga lun netenirun lun bián katei, naturiahan tidan luban furendei íñuti luma lun napurichiha. Ñüdün giribu tiña gárada Newayórugiñe lun Bénesueloun lun nafuranguagüdüni tun núguchu  luma houn níbirigu ka lan uagu busén nubéi nígiruni naturiahan, lun nagiribudun Bénesueloun lun nagumeserun eseriwida lidan dan dayarüti.

Aba nagiribudun Karakas lidan sisi-hati irumu 1957. Aba níchugun fe mabuidun lan ligaburi léibugun katei hau niduheñu. Mégeitiña meha ábanya gürigia nadagimein lun lóustarun seinsu múnada. Gayaraati san nadügün somu katei lun níderaguniña? Aba nibihin aban wadagimanu bánkurugu, lau sun lira mama meha ligía nabusenrubei, busentina meha lun prekursoru nan. Le lúgubu, lun meha lira nagiribuda. Aba nanúadirun nadügüni biángubei katei. Luagu saragu irumu, nadagimeintina lidan dan dayarüti bánkurugu ani prekursoru meha au. Súnwandan wéiriti meha nuberesegun ani lau sun lira wéiriti meha nugundan.

Ábaya katei le adügübei lun nagundaarun nasubudirunu aban tubuidunmeraü íbiri Yámanina gíritu Sylvia, to hínsiñebei Heowá tun saragu aba meha táguyun úara hama tagübürigu Bénesueloun. Lau lásügürün dan, aba wamarieidun ani aba gasaanigu wamá bián irahüñü: Michel (le unbei wagúara Mike) tuma Samira. Aba giñe wanügünu núguchu lun tawinwandun wama lun wóunigirunu. Lau sun, mosu lan meha nígiruni apurichihani lidan dan dayarüti lun netenirun houn niduheñu, saminatina meha kei aban prekursoru. Súnwandan, dan le gayara lan lidan wani bakechanu, aba teseriwidun Sylvia úara numa keisi prekursoru ídehatiña.

Leskuelagiña meha warahüñü dan le lasuseredunbei le buga uágubei nabahüdagua. Le linarün katei buiti meha lidin nun lidan nibagari ani inebetina meha houn gürigia ha nadagimeinbaña bánkurugu. Íbini ítara, busentina meha lun harihinina kei aban gürigia le eseriwiduti lun Heowá. Súnwandan meha nasaminarun luagu lira. Aba lubeiti nañuurun tuma Sylvia arihei átiri ñein lan burí wagastarun. Anhein meha nígira nuadigimari bánkurugu, neresibirunba meha saragu seinsu. Ani kei ua lubéi dúeiti wama, saminatiwa ánhawa lan asigira awinwanda lau murusun wámati lóustaruba lan seinsu ligía lau saragu dan.

Mama aban katei ménrengunti nun lun nadügüni lira. Íderagua tumutina nani weiriou tuma núguchu. Ligíati, ábaya nagiribudun lun neseriwidun lidan dan dayarüti. Ma meha nugundan! Lárigi aba weresibirun aban uganu le magurabun wamuti, gama lumoun aban meha lubuidun idewesei.

Aban weyu, aba lariñagun wasurusian woun lau dageinañoun lan Sylvia. Magurabun wamuti yebe le. Sanditiwa aba lanarime ugundani, ani lau sun lira anahagua meha asaminara lun neseriwidun kei  prekursoru. Gayaraagili funa san? Lau lóufudagun, aba wéchudun luagun saminaü le ani wagurabahañein meha wasaani lau ugundani. Gama lumoun, kaba meha san wadüga lau le wasaminarubei wadügün furumiñe?

Lárigiñe wakutihani le meha wabusenrubei wadügün furumiñe, aba woudin wabaruaguóun ani aba wadügüni. Lidan gadurun-hati irumu 1985 ligía lágurahoun Gabriel le wasaani. Aba nígiruni nuadigimari bánkurugu lidan sisi-hati irumu 1985. Aba nagumeserun eseriwida lidan dan dayarüti, lau lásügürün dan aba neseriwidun lidan sétanu le arihibei tau Sukursáli lidan ageiraü. Kei le meha 80 lubéi kilometuru (50 maili) tidise sukursáli luéi uburugu Karakas, mosu meha naweiyasuha bián o ǘrüwa wéiyaasu lidan dimaasu.

Uburuguñoun meha La Victoria sukursáli, ligíati aba wáguyun lun yarafa wamá tun Beteli. Aba meha asansiruni wéiriti le woun sungua luagu. Wéiritu nanigi hau niduheñu ani seremei numutiña giñe. Ídehati aranseñu haña lan súnwandan. Ariñagatu Baha to níbugaña teteniruba lan tun wáguchu. Maríeihali meha Mike, gama lumoun, Samira luma Gabriel añahagua meha awinwanda wamá. Ligíati mosu meha hígiruniña hamadagu ha awinwandubaña uburugu Karakas. Ani mosu meha, tígiruni Sylvia uburugu le ñein lubéi reinga lan lun gayara lan téchudun luagu aban uburugu le ñǘraüti. Ani sun wagía mosu meha wéchudun awinwanda tidan aban muna to ñǘraütimatu. Ligíati, anihein meha saragu sánsiguaü dan le wáguyunbei uburugugiñe Karakas lun uburugu La Victoria.

Aba liabin lanwoun asansiruni. Aba lamarieidun Gabriel, ani aba tunguaru lan Samira. Amu luéi lira, lidan irumu 2007, aba namisurahóun úara tuma Sylvia lun wáguyun tidoun Beteli, aban lubuidun chansi lira ani ma wagundan darí lumoun dan le. Mike, waráü le íbugañaü, wéiyaali lidan afiñeni ani prekursoru úara tuma Mónica to lani weiriou. Wéiyaali lidan afiñe giñe Gabriel ani leseriwiduña Italia úara tuma Ambra to lani weiriou. Prekursora giñe Samira ani tídehaña túbiñegiñe tuma Beteli.

Buin liña nibagari lau katei súdiniti le nanúadirubei. Masakürihantina lau le adüga naalibei. Nanúadirubei hamuga ligiaméme. Seremei numuti Heowá lau sun le gayara nubéi adüga lau neseriwidun lun. Lidan sun irumu le sügühalibei, ariha naali lisudinin derebugu lan lumadagu gürigia luma Heowá. Meberesenga anhein ñüraü lubéi o weiri lan le wanúadirubei lidan wabagari, gayaraati líchuguni Heowá ‘lidarangilan woun le wéiritimabei luéi sun subudi’ (Fili. 4:6, 7). Wéiriti nugundan au tuma Sylvia lau weseriwidun Betelirugu, saminatiwa giñe buidu lan meha sun le wanúadahabei wadügün lidan wabagari lugundun ru wamuti Heowá furumiñe súnwandan.