LÚMAGIÑE binadu dan, héchutiña meha ísüraelina íchiga seinsu lun hídehan lidan láhudurawagun lun Bungiu. Gama lumoun, lidan lidaani Hesusu, mosu meha hafayeihan huríu saragu liseinsuna gumadi, adügati meha katei le lun hénrengu lan habagari.

Sun huríu ha meha wéinamuhañabaña mosu meha hafayeihan bián düraküma tun lisanduariun Bungiu ani dan lárigiñe tun ténpulu. Ani lidan furumiñeti sígulu, yusu wati seinsu ligía lun taransehóun luma lun adagaragüdüni tidan ténpulu to ladügagüdüboun Erodesi. Álügüda hamuti fiu huríu Féduru ka lan lasaminarunbei Hesusu luagu liseinsuna gumadi le, aba lariñagun Hesusu mariban lan lafayeirun. Ani ruti adundehani lun Féduru lun libihin seinsu lun lafayeiruni liseinsuna gumadi (Mat. 17:24-27).

Ani dan meha ligía mosu meha giñe hafayeihani lumutuniña Bungiu diisi lídangiñe san, mini lan le diisi lídangiñe kada san le halubahabei o lídangiñe hafayeiti (Fad. 27:30-32; 1 Lur. 18:26-28). Amuriahatiña meha alidihatiña relihión lun lafayeirun diisi lídangiñe san, lídangiñe sun le alubahóubei, íbini “menta, anisi, luma kominu”. Mayanuhanti Hesusu wuriba luagu lafayeirun liseinsuna gumadi le, le uágubei layanuhan luagu biangua lan hagibu ha arufudahabalin lilurudun Moisesi hama fariséugu (Mat. 23:23).

Gama lumoun, lábugiñeñanu meha hagumadiha rómana huríu, ligíati mosu lubéi meha hafayeihan saragu liseinsuna gumadi. Kéiburi, ha meha gamuabaña, mosu meha hafayeihan aban luwuyeri liseinsuna gumadi (kei burí lúmagiñe 20 darí 25 lídangiñe kada san le líchugubei múa) le meha gayaraabei hafayeiruni lau seinsu o lau le halubahabei lídangiñe hamúaha. Lunti meha giñe hafayeihan kada huríu liseinsuna gumadi. Álügüda hamuti fariséugu Hesusu anhein buidu lubéi lun lafayeihóun seinsu ligía, ani aba lóunabuniña lau dimurei le: “Ru humeiti lani urúei lun urúei, ru humeime lani Bungiu lun Bungiu” (Mat. 22:15-22).

Ani ebegidinaü burí le áfuridubei lídangiñe ítaga burí fulasu mosu meha lafayeirun liseinsuna gumadi luagu. Ani seinsu meha burí le, luagu meha wafu laguburahóua, tuagu burí burichi, luagu burí legeyedun üma, o luagu lebelaagüle uburugu o tebelaagüle mágidu.

Hanarimeti meha libe liseinsuna gumadi le lunbei meha hafayeihani gürigia ha lábugiñebaña hagumadihan rómana. Según labahüdahan aban wügüri le abürühabei luagu binadu sügǘ rómana gíriti Tácito, lidan lan meha larúeihan Tiberiu dan meha le ya lubéi Hesusu Ubouagu, “amuriahatiña meha gürigia ha awinwandubaña Siria luma Hudéa, lun lararirawagüdün lídangiñe lafayeirun liseinsuna gumadi ladüga gíbeya lan houn”.

Adügati ligaburi laguburahóun liseinsuna gumadi lun hénrengu lan ibagari houn huríu. Ánheinti wadagimanu le lánina laguburahóun liseinsuna gumadi, gürigia meha le busenbali mosu meha lafayeirun saragu seinsu lun libihini. Sagá hamuti meha le habusenrun lídangiñe. Ani álugatiña meha amu gürigia lun hagía lan aguburahei seinsu ligía; ani ragütiña giñe lídangiñe. Genegeti, añahein lan meha nadagimeintiña luma Sakéu aguburahei liseinsuna gumadi (Luk. 19:1, 2). Ligíati gañi habéi gürigia hama aguburahatiña liseinsuna gumadi ani mínsiñe hagía houn.