1, 2. a) Ka uagu gayara lubéi hafiñerun ha sun liña hamarieidun luagu Heowá? (Sálumu 37:3, 4). b) Kaba wariha lidan aturiahani le?

SUN liña san hamarieidun o málühadün amarieida? Anhein ítara liña lubéi, chóuruti busenbadün lan habagaridun aban ibagari lau ugundani tuma würi to hínsiñeboun hun. Inarüni aniheinbei lan burí lénrengunga lidan habagari maríeitiña, lubaragiñe lira súdiniti le lunbei hanúadiruni. Según hahandilihani katei guentó, ítara luba gunda humá luagu saragu irumu. Anhaün afiñera luagu Heowá, buídubei le lunbei hanúadiruni lidan hibagari, derebugubei hibagari keisi maríeitiña ani gúndaabadün saragu. Anhein mafalarun humá ladundehan Heowá, másiñati gaturobulinbadün lan lidan hibagari keisi maríeitiña ani magundanbadün (aliiha huméi Sálumu 37:3, 4).

² Lau sun layanuhaña lan aturiahani le houn ha málügiñabaña lúmagiñe hamarieidun, lakutihóuba giñe sügǘ le másiñati hagagibudaguba lan sun maríeitiña luma. Larufudubei hénpulu le hani binadu wügüriña hama würiña ha uágubaña tabahüdaha Bíbülia, luma burí le afurendeirúbei lídangiñe, le gayaraabei lahuudun lidan ibagari luma lidan habagari maríeitiña. Warihibei giñe le wafurendeirubei hámagiñe fiu maríeitiña ha lánina wadaani.

3, 4. Ka lénrengunga úmabei hagagibudagua ha málügilibei lúmagiñe hamarieidun?

³ Anihein burí fulasu le ñein lubéi hariñaga gürigia houn ha sun liñabei hamarieidun lunti lan hanügün aban ibagari le “kamaniti”.  Másiñati hadügüdarun agübürigu hama amu iduheñu hawagu maríeitiña lun gasaanigu hamá lau lóufudagun. O hariñagun fiu hádangiñe iduheñu hama umadagu houn, lau lubuidun aritaguni, lunti lan hagañeihan aban muna luma lun habuinchagüdünu lau umegeguni buíduburiti.

⁴ Ánhaña móunigiragun maríeitiña houngua, másiñati hanúadirun hádaragun houngua lidoun dúeiti wéinamuti. Ani lun hafayeihani, háfuga mosu lanme hawadigimaridun biángubei hagía luagu saragu oura. Ábameti lóuguaali lan hadaani lun haturiahanu Bíbülia hábugua, háhuduragun keisi iduheñu luma háfuridun apurichiha. Másiñati gayara lan heferidirun adamuridaguni lun hawadigimaridun saragu lun hagañeirun saragu seinsu o lun hakipuruni hawadigimari. Ladügüba lira, lun heferidiruni lubuidun chansi lun haganwoundagüdüni heseriwidun lun Heowá.

5. Ka hafurendeirubei lídangiñe lani Klaus tuma Marisa hénpulu?

⁵ Anihein saragu hénpulu le arufudubalin dan le lan líchaagun gürigia lungua lun libihin umegeguni, manügünti lan ugundani. Ligía larihinbei Klaus tuma Marisa. * Dan le hamarieidunbei, biángubei hagía nadagimeintiña dan dayarüti lun gayara lan buidu lan dan houn. Gama lumoun, magundanti meha habagari. Ariñagati Klaus: “Lidan katei lánina umegeguni anihein meha lóugiñe le wemegeirubei wama, lidan wamadagua luma Bungiu úati meha wachügüwagu kaba lan wadüga lidan weseriwidun lun. Le linarün katei, hénrenguti meha wabagari ani lau saragu idiheri”. Háfuga rúhadün lan fe manügün lan ugundani dan le letenirun gürigia áluaha umegeguni. Mábürühala harüna. Gayaraati líderagunün lubuidun hani amu hénpulu. Furumiñe, ariha waméi le gayaraabei hafurendeiruni wügüriña maríeitiña lídangiñe lani urúei Hosafátü hénpulu.

6. Según adundehani le lídanbei Ariñawagúni 3:5, 6, ida liña lagagibudagun urúei Hosafátü luma aban sügǘ hanarimeti lénrengun?

⁶ Wügüriña maríeitiña, anihein san dan hasandiragun hungua gíbeya lan katei lun hichügü ladüga saragu buligasion le lunbei hadügüni? Anhein ítara liña lubéi, gayaraati líderagunün lani Hosafátü hénpulu. Kei meha urúei lan, mosu meha letenirun lun buidu lan lidin lun ageiraü. Lun letenirun lun lueirin dasi le, adüga lumuti sun liyaraati lun lóunigiruniña lílana ageiraü. Bunaguati baríeiru geyegu lau uburugu Hudá ani óundaragua ligía hóugiñe 1,160,000 súdaragu héretiña (2 Kro. 17:12-19). Lau lásügürün dan, aba lagagibudagun luma aban sügǘ le hénrenguti. Dandu urúei kei liduheñu ítara kei lílana ageiraü, aba hagagibudagun hama saragu lisudaranigu Amón, Moabü luma hama gürigia ha awinwandubaña luagu luwübüri Seirü (2 Kro. 20:1, 2). Ka ladügübei Hosafátü? Aba lamuriahan ídemuei luma erei luma Heowá, ítara kei lariñaguni lubuidun burí dimurei le lídanbei Ariñawagúni 3:5, 6 (aliiha huméi). Furíei le ladügübei lau  saragu ǘnabuguni le wadarirubei lidan 2 Krónikasi 20:5-12, arufudati afiñe lan luagu Lúguchi Bungiu le siélubei le hínsiñehabubei. Ida liña lóunabuni Heowá?

7. Ida liña lóunabuni Heowá furíei le ladügübei Hosafátü?

⁷ Óunaba lumuti Heowá Hosafátü liyumulugugiñe aban lewita le gíribei Haasieli. Ariñagati: “Deregüdagua humá, harihubei ida luba lan lesefurunün Wabungiute” (2 Kro. 20:13-17). Ma lubuidun katei le ladügübei lubá lidin awuribuha! Mama lúmagiñe aban wügüri liabin adundehani le, lúmagiñe Heowá liabin. Afiñeti meha Hosafátü luagu Lubungiute ani gaganbaditi lun. Dan le láfuridunbei urúei habaroun láganiñu, aba líchuguniña wügüriña ha úaboun ni aban áruma háhaburugu ubaráü ani eremuheina houdin. Ítara kei füramase lani Heowá lun Hosafátü, gañei lumutiña Hosafátü súdaragu áganiñu (2 Kro. 20:18-23).

8. Ka gayaraabei hafurendeiruni maríeitiña lídangiñe lani Hosafátü hénpulu?

⁸ Wügüriña maríeitiña, ka gayaraabei hafurendeirun lídangiñe lani Hosafátü hénpulu? Huguya gánibalin buligasion lun hetenirun houn hiduheñu, ligíati, áfaagua humá lun híderaguniña luma lun híchuguni le hemegeirubei houn. Danme le liábingua turobuli, másiñati hasaminarun gayara hubéi lan aransera hábugua. Gama lumoun, mígiraguagüda humá hungua lun saminaü luagu gayara lan haransehani turobuli lau hubafu guánarügü. Le lunbei hadügüni, furíei humá lun Heowá hábuguarügü ani amuriaha humá ídemuei luma. Ani furíei humá tídangiñe sun hanigi tuma hani weiriou. Áluaha huméi ladundehan Heowá, aturiaha humóun Lererun tuma burí agumeiraguagüdüni to tíchuguboun lóundarun, ani adüga huméi le lariñagubei adundehani le hadarirubei. Gayaraati ñéinbaña lan gürigia magundantiña lau le hanúadirubei hadügün según adundehani le tídanbei Bíbülia ani másiñati hariñagun hun aban lan libidiounigan aau le hadügübei. O hariñagun lan hun seinsu lan luma umegeguni ligía lan buídutimabei lun hounigirún iduheñu. Haritagua huméi lani Hosafátü hénpulu, afiñeti meha luagu Heowá ani arufuda lumuti lau le ladügübei. Mágurun lumuti Heowá wügüri úaraguati le, ani mágurun lubadün giñe (Sal. 37:28; Ebü. 13:5). Agia maríeitiña? Ka gayaraabei hadügüni lun gunda lan habagari?

9. Kaba wariñaga luagu profeta Isaíasi tuma lani weiriou?

⁹ Direi lumuti Isaíasi tuma lani weiriou libagari lun leseriwidun lun Heowá. Profeta meha Isaíasi ani gayaraati adüga tan meha lani weiriou dasi líbeina lira, lugundun ariñawagúati tuagu tidan Bíbülia “profetisa” (Isa. 8:1-4). Láhudurawagun lun Heowá ligía meha súdinibei houn maríeitiña ha. Chóuruti aban lan hénpulu buiti Isaíasi tabu lani weiriou houn maríeitiña ha lídanbaña wadaani.

10. Eibu hederebudagüdüni maríeitiña habusenrun hadügüni sun hayaraati lidan heseriwidun lun Heowá, ka uagu buidu lubéi lun haturiahani profesía le tídanbei Bíbülia?

¹⁰ Ida luba háyeihani maríeitiña Isaíasi tuma lani weiriou? Lau hadügüni sun hayaraati lidan heseriwidun lun Heowá. Lun gayara lan hederebudagüdüni hafiñen luagu Bungiu, gayaraati haturiahani profesía le tídanbei Bíbülia luma lun harihini ida liña lan lagunfulirun súnwandan (Titu 1:2). * Gayaraati hararamagun asaminara ida luba lan gadan lanün lagunfulirun fiu profesía tídangiñeti Bíbülia, kéiburi le lariñagubei Hesusu lapurichihóuba lan uganu buiti lidan sun Ubóu lubaragiñe lagumuchun ubóu (Mat. 24:14). Éibutima hachoururuni maríeitiña  lagunfuliruña lan profesía le tídanbei Bíbülia, éibutimaame aranseñu hamá lun hadügüni sun hayaraati lidan heseriwidun lun Heowá.

11. Ka meha gayaraabei tadügüni Pürisíla luma Akila ani ka uagu?

¹¹ Nibureintiña ha maríeihaña, gayaraati lahuudun hénpulu le hun le hani aban feru maríeitiña huríu ha meha awinwandubaña uburugu Roma, Pürisíla luma Akila. Aba haganbuni uganu buiti luagu Hesusu ani aba hadügagun houngua kristiánugume. Chóuruti gunda hamá lau meha habagari lidan uburugu ligía. Gama lumoun, aba lasansiragun katei sódini dan le líchugunbei urúei Külaudiu gumadi lun háfuridun sun huríu Rómagiñe. Samina wamá luagu le mini lubéi le lun Akila luma tun Pürisíla. Mosu meha hígiruni ageiraü le úagubei héchuda lun hadarirun aban iseri fulasu lun hawinwandun ñein luma lun híchuguni hani bísinisi le lánina tadaawagun kianpu lidan amu uburugu. Adügati san asansiruni le lídanbei habagari lun híchuguni Larúeihan Bungiu lidan libiaman lúgaaru? Chóuruti subudi lan óunabagülei woun. Dan meha le Korintuhaña Akila tuma Pürisíla, aba híchaagun houngua lun hídehan lidan damuriguaü le ñeinbei luma lun híderaguni apostolu Pábulu íchiga dǘgüdaguaü houn íbirigu. Lau lásügürün dan, aba háguyun lidoun amu uburugu le ñein lubéi lemegeirúa ídemuei lun apurichihani (Adü. 18:18-21; Rom. 16:3-5). Bereseguñanu meha lidan habagari ani másiñati buin haña lan meha lau ugundani!

12. Ka uagu lunti lubéi hasaminarun maríeitiña luagu le habusenrunbei hadügün lidan heseriwidun lun Bungiu?

¹² Gayaraati hasigiruni maríeitiña ha lídanbaña wadaani tani Pürisíla luma Akila hénpulu lau híchuguni Larúeihan Bungiu furumiñe lidan habagari. Dan le buídubei lun hayanuhan luagu le habusenrunbei hibihin lidan hibagari, dan le gadaradun humá. Dan le híchuguni maríeitiña lidan habagari le habusenrunbei hadügün lidan heseriwidun lun Heowá ani áfaagua hagía lun hibihini, gachansintimatiña lun harihini lawadigimaridun lani Heowá sífiri sandu (Apur. 4:9, 12). Ariha waméi likesin Russell tuma Elizabeth. Ariñagati Russell: “Dan le gadaradun wabéi, ayanuhatiwa buidu luagu le wabusenrubei wibihin lidan weseriwidun lun  Bungiu”. Ariñagatu giñe Elizabeth: “Ayanuhatiwa luagu katei le, lun danme lan le lachülürün oura lun wanúadahani le lunbei wadügüni, madügün láamuga lun mibihin wamani le wabusenrubei wibihin lidan weseriwidun”. Íderagua lumutiña gádantiña lun háguyun lidoun ageiraü Míküronesia lun heseriwidun le ñein lubéi hemegeirúa apurichihatiña.

13. Según Sálumu 28:7, kaba asusereda ánhawa afiñera luagu Heowá?

¹³ Ítara kei Russell tuma Elizabeth, anúadiraña saragu maríeitiña hanügün aban ibagari le ménrengunti lun híchuguni sun hadaani lun apurichihani luma lun arufudahani. Ánhaña áfaagua maríeitiña tídangiñe sun hanigi, lun habihini le hasaminarubei hadügün lidan heseriwidun lun Heowá, lárigiñe, aba háfaagun lun hibihini, heresibiruba saragu abiniruni. Harihibei ida liña lan líderaguniña Heowá, laganwounduba hafiñen luagu ani gúndaabaña le tímatimaati (aliiha huméi Sálumu 28:7).

14. Ida liña larufuduni apostolu Féduru tuma lani weiriou afiñe hamá luagu füramasei le lídanbei Matéu 6:25, 31-34?

¹⁴ Ábaya hénpulu buiti houn maríeitiña le lani apostolu Féduru tuma lani weiriou. Labadinagua sisi hati o aban irumu lárigiñe lasubudiruni apostolu Féduru Hesusu, mosu meha lanúadirun aban katei súdiniti. Kei óuchahani lubéi meha lifisiutebei dan le lagunbirahanbalin Hesusu lun lafalaruni lidan dan dayarüti, mosu meha lakutihani Féduru kaba lan ladüga lidan hakesin liduheñu (Luk. 5:1-11). Aba lanúadirun lidin luma Hesusu lidan dasi lánina apurichihani. Ma meha lubuidun le lanúadirubei! Anihein meha saragu resun buiti wama lun wafiñerun ñüdün tan lani Féduru weiriou luma. Ariñagatu Bíbülia lárigiñe lan láguyugun Hesusu, aweiyasuha tan luma Féduru íbini luagu fiu dan (1 Ko. 9:5). Chóuruti adüga lan lubuidun hénpulu le tíchugubei lun gabafu lan Féduru líchugun adundehani luáguti laruman ibagari houn würiña maríeitiña luma houn wügüriña maríeitiña (1 Fe. 3:1-7). Furanguti afiñe lan meha Féduru tuma lani weiriou luagu le füramase lubéi Heowá líchugubei lan le hemegeirubei houn ánhaña íchigei Larúeihan lidan furumiñeti lúgaaru lidan habagari (aliiha huméi Matéu 6:25, 31-34).

15. Ka hafurendeirubei lídangiñe sügǘ le lani Tiago tuma Esther?

¹⁵ Ánheinti barühadün lubéi saragu irumu maríeiñu, ida luba hasigirun aganwoundagüdei ayumahani lun habusenrun hadügün saragu lidan heseriwidun lun Heowá? Aba igaburi lun hadügüni lau hetenirun ida liña lan hadügüni amu maríeitiña. Kei hénpulu, gayaraati haliihani fánreinti le áfuridubei tidan Garüdia Awisahatu le gíribei “Deregeguatiña houngua lau ugundani lun heseriwidun”. Ligía ladügübei Tiago tuma Esther, aban feru maríeitiña Bürasíli. Íderagua lumutiña fánreinti le lun busén hamá heseriwidun lidan fulasu le ñein lubéi hemegeirúa apurichihatiña. Abahüdahati Tiago: “Naliihan sügǘ luagu ida liña lan líderaguniña Heowá lubúeingu lidan wadaani, adügati lira lun wabusenrun warihini lúhabu Heowá óunigirawa luma adundehawa lidan wabagari. Lau lásügürün dan, aba háguyun maríeitiña ha Paraguay, le ñein lubéi heseriwida lidan iñeñein portugési lúmagiñe irumu 2014. Ariñagatu Esther: “Aban bérusu le hínsiñetimabei woun wagía biángubei le lariñagubei Éfesuna 3:20. Ariha wamaali lagunfulirun dimurei le saragu wéiyaasu”. Tidan gárada to labürühaboun Pábulu houn Éfesuna, chóurugüda lumuti líchuguba lan Heowá saragu lóugiñe le wamuriahabei luma. Ani súnwandan lagunfulirun füramase le.

16. Kaba uma hamuriaha maríeitiña ha nibureingiña adundehani lun hakutihani le habusenrunbei hadügün lidan habagari?

 ¹⁶ Maríeitiña ha nibureingiña, gayaraati hafurendeirun asagara saragu buiti lídangiñe sügǘ le hani ha afurendeirubaña afiñera luagu Heowá. Añahein maríeitiña barühaña saragu irumu eseriwida lidan dan dayarüti. Ka uagu mamuriahan hubéi adundehani hama anhein megei hubéi ídemuei lun hakutihani le habusenrunbei hadügün lidan heseriwidun lun Bungiu? Ligía amu igaburi lun harufuduni hafiñen luagu Heowá (Ari. 22:17, 19). Gayaraati giñe híderagunün wéiyaaña lidan afiñeni lun hibihini le habusenrunbei hibihin lidan heseriwidun lun Bungiu.

17. Ka asuseredubei lun Klaus luma tun Marisa ani ka wafurendeirubei lídangiñe hani hénpulu?

¹⁷ Anihein dan, wanúadirun waganwoundagüdüni weseriwidun lun Heowá, lau sun lira gayaraati masali lan katei le wagurabubei. Gararagua wamá lidoun lani Klaus tuma Marisa hénpulu, ha buga uágubaña wayanuhan furumiñe. Ǘrüwa irumu lárigiñe hamarieidun, aba hígirunu haban, aba houdin ídeha lidan bunagua tidan sukursáli to Finlandiaboun. Ábati híchugun fe siñabei lan herederun lóugiñe sisi hati ñein. Furumiñe, aba yebe hírudun. Gama lumoun, murusun dan lárigiñe, aba hamisurahóun lun hafurendeirun árabe, ani guentó heseriwiduña lau ugundani lidan iñeñein árabe lidan amu ageiraü. Dan le tasaminarun Marisa luagu dan le sügühalibei, aba tariñagun: “Hanufudeti gürigia ladisedun luéi le uágubei léchuda lun gayara lan larabachun luagu Heowá sunsuinagubei. Ariha naali nungua súnwandan lan líderaguniwa Heowá lidan aban igaburi le magurabun wamuti. Lárigiñe nawinwanduni le, derebuguti máhaali nafiñen luagu Heowá”. Kei le aubei warihei, gayaraati wachoururuni labinirubadiwa lan Heowá súnwandan ánhawa afiñera luagu tídangiñe sun wanigi.

18. Ka gayaraabei hadügüni maríeitiña lun hasigirun afiñera luagu Heowá?

¹⁸ Lúmagiñeti Heowá maríei ani aban idewesei, busenti Heowá lun hagundaarun maríeitiña lau idewesei le (Ari. 5:18; Mat. 19:5, 6). Maríeitiña ha nibureintiña, ka uagu makutihan hubalin le hadügübei lau hibagari? Hadügüñein san sun hiyaraati lun harufuduni lun Heowá seremei humani luagu idewesei le ru laalibei hun? Ayanuha humá luma Heowá, áluaha humá ariñahani tidan Lererun le gayaraabei lahuudun hun lidan le gádanbalün ani sigí huméi adundehani le líchugubei hun. Gayaraati hachoururuni ánhadün lan ederegerei hibagari lidan heseriwidun lun Heowá, gúndaabadün saragu lidan hibagari keisi maríeitiña.