Subuditi san hun?
Ka san asuseredubei lun Níniwe lárigiñe lidaani profeta Honasi?
KEI burí lidan irumu 670 lubaragiñe Kristu, Asiriaali meha ageiraü le gabafutimabei ubouagu. Kei larihín lidan aban Museo Británico, “chawaguati meha lubafu ageiraü le lúmagiñe Chípüre darí Irán, ani lidan fiu irumu chawaguati meha giñe darí Ehiptu”. Níniwe meha luburugutebei Asiria, ani ligía meha uburugu wéiritimabei ubouagu. Apantahatiña tau tubuidun burí muna to hámaboun, lanarime burí fuluri agei, palasiu wéndegutu tuma burí tuéinamun muna tau líburu agei. Lidan binadu Níniwe dariwati abürüdǘni touba muna le arufudubalin ariñaga lan urúei Asurbanipal, luougua ítara kei amu burí urúeigu asiriana “lurúeite lan ubóu” hagía. Ani lidan meha dan ligira genegeti meha magañeinruwadi lan Asiria luma Níniwe.
Arúeihani gabafuti le hani asiriana ligía meha arúeihani wéiritimabei ani le gabafutimabei ubouagu dan ligira.
Dan le anihán lubéi Asiria lidan lubafu, aba lariñaguni profeta Sofoníasi le lunbei ladügüni Heowá: “Liñurubei lúhabu luagun nórute lun Lagünrinchaguni Asiria, lígirubei uburugu Níniwe málouga lasaliraguagüdübei lun ábanme fulasu mageirawati le mábeiti”. Ariñagati giñe ábaya lani Heowá profeta le gíribei Naún: “Íweruha huméi pülata! Íweruha huméi golu! [...] Günrinwagua Níniwe, málougaali ñein. […] Sunme ha arihitibu, héibaaguba buéi ariñageina: ‘Günrinwagua Níniwe!’” (Sof. 2:13; Naún 2:9, 10; 3:7). Dan le laganbúnbei profesía burí le, másiñati álügüdagua hamá gürigia houngua: “Lasusereduba funa san le? Gayaraabei funa san lagañeirún Asiria ageiraü le gabafutimabei?” Chóuruti hénrengu lan houn lun hafiñeruni.
Málougaali Níniwe ani ábanhali fulasu mageirawati.
Susereti le yebe genegebei siñá lan lasuseredun. Yarafa lun irumu 600 lubaragiñe lidaani Kristu ragǘ hamaali meha babilóniana hama médiana Asiria. Lau lásügürün dan, aba lerederun Níniwe málouga, aba labulíeiduniwa. Tidan aban agumeiraguagüdüni to lani Museo de Arte Metropolitano de Nueva York ariñagatu lau lan lásügürün dan, ua hamá awinwandutiña Níniwe, bunañu liña lan; laganbunbei luagu Níniwe seremei ariñahani le tídanbei Bíbülia”. Según Biblical Archaeology Society Online Archive, lidan lagumeseha sígulu 19, “ibidiñewati meha anhein inarüni lubéi anihein lan meha aban óunwenbu uburugu Asiria”. Gama lumoun, lidan irumu 1845, aba lagumeserun arqueólogo Austen Henry Layard achigaha ani darí lumuti uburugu Níniwe. Arufudati le adarirubei aban lan meha uburugu súdiniti Níniwe.
Dérebügüda lumuti lagunfulirun profesía luáguti Níniwe wafiñen luagu lagunfuliruba lan profesía le bürüwañubei tidan Bíbülia le ayanuhabei luagu lagumuchúba lan lau arúeihani gabafuti le uguñebei weyu (Dan. 2:44; Aruf. 19:15, 19-21).
