1. Ka álügüdahani másiñati wadügübei lan?

SANDITÜN san murusun anufudei dan le hasaminarun luagu le lunbei lasuseredun yarafa madise, kei burí tagünrinchawagun burí relihión mama inarünitu, lábürühan Gogu le Magoguna wawagun luma wuribu le gíribei Arümahedón? Anihein san dan álügüdagua humá hungua anhein ganigibadün lubéi lun úaragua humá danme le lasuseredun sun katei le? Anhein ítara liña lubéi, líderagubadün saragu lau hakutihani lererun Hesusu le waliihabei lidan bérusu le ñéingiñe lubéi lasagarúa aturiahani le. Ariñagati Hesusu houn lani disipulugu: “Madiherida humá, afiñe humá” (Huan 14:1). Anhein derebugu lubéi wafiñen, gayaraabei wagagibudagun lau ichouruni luma le lunbei lasuseredun ámuñegü.

2. Ida luba gayara lan wederebudagüdüni wafiñen, ani kaba wariha lidan aturiahani le?

² Aban igaburi lun wederebudagüdüni wafiñen lun gayara lan wagagibudagun luma le lunbei liabin ámuñegü, wakutihani ida liña lan wagagibudagun luma óuchawaguni le wásügürübei guentó. Ítara, gayaraabei warihini ka lan katei lidan wafiñen lunbei wabuiduragüdüni. Sagü wawandun óuchawaguni, ábatima lederebugudun wafiñen. Ladügüba katei le lun wawanduni le lunbei liabin ámuñegü. Lidan aturiahani le, warihiba gádürü katei le arufudubalin megei hamá meha lani Hesusu disipulugu lanwoun hafiñen. Warihiba giñe ida luba lan wawanduni turobuli le genegeguabei luma le lídanbei hadaani disipulugu lúmati ida liña lan laranserúniwa katei le luba ámuñegü.

3. Según waliiha lidan Matéu 6:30, 33 ka lafuranguagüdübei Hesusu luagu afiñeni?

³ Sun hachügüdina tílana muna busentiña híchuguni le temegeirubei hani weiriou luma le hemegeirubei hasaanigu houn, kei  burí éigini, daüguaü tuma muna. Mama aban katei ménrengunti lidan dan le. Añahein íbirigu féridi hamaali hawadigimari ani íbini áluahaaña lan saragu wéiyaasu madaritiña amu. Lidan hakesin amu íbirigu máhatiña lun wadagimanu le moun lumuti hadügüni kristiánugu. Lidan kesi kei le, mégeitiwa aban afiñeni le derebuguti luagu larihiba lan Heowá lun ua lan wemegeirun. Afuranguagüda lumuti Hesusu le houn lani disipulugu luagu Serumu luagu Wübü (aliiha huméi Matéu 6:30, 33). Anhein chouru wabalin buidu buidu mágurun lubadiwa lan Heowá, gayaraabei wetenirun lun dasi létima súdinitimabei: lawanserawagüdün luadigimari Larúeihan. Lau warihini ida liña lan líderaguniwa Heowá lau burí líchuguni le wemegeirubei, wasandiraguba woungua yarafañu lun ani ábame lederebugudun wafiñen.

4, 5. Ka íderagubaliña aban iduheñu lun hagagibudagun luma idiheri luagu libihin le mégeiwabei lun lawinwandúniwa.

⁴ Ariha waméi le asuseredubei houn iduheñu Castro, Bénesuela. Ariha hamaali ida liña lan líderaguniña Heowá agagibudagua luma idiheri luáguti libihín le mégeiwabei lun lawinwandúniwa. Gacharitiña meha iduheñu ha ani ñéingiñe meha hawinwanda. Gama lumoun, aba hebelurun wuribatiña lidoun hafulasun ani aba hafosuruniña lun háfuridun ñéingiñe. Ariñagati Miguel, le úguchili: “Guentó, wawadigimariduña lidan aban liraüraü fulasu le afuredeihoubei woun. Furumiñeti katei le nadügübei sagü weyu namuriahan luma Heowá lun líchuguni le wemegeirubei woun weyu ligía”. Dereti ibagari houn iduheñu Castro, ligía afiñe habéi sunsuinagubei luagu gayara lan ladariragüdüni Wáguchi Bungiu le hínsiñehabubei houn le hemegeirubei sagü weyu. Ligía mígirun hamagili lubéi habasiihan adamuridagua ni hapurichihan. Ru hamuti Larúeihan Bungiu furumiñe lidan habagari ani lóunigirubaña.

⁵ Lidan sun dan le, ténihali Miguel tuma Yurai to lani weiriou arihei ida liña lan lóunigiruniña Heowá. Anihein dan yusu lumutiña Heowá íbirigu lun burí líchuguni fiu katei le lemegeirubei Miguel o lun híderaguni áluaha wadagimanu. Anihein burí giñe dan, resibitiña iduheñu ha ídemuei hámagiñe íbirigu ha ídehabaña dan burí le anihein lan somu liñawan dan hiriri o katei líbeina lira ha tóunahan sukursáli lun burí híchuguni le hemegeirubei houn. Mágurun lumutiña Heowá. Ligía derebuguhali lubéi hafiñen iduheñu ha. Lárigiñe hayanuhan luagu ka lan idan líderaguaña Heowá, ariñagatu Yoselin, haráü to íbugañaü: “Hingí lumutu nanigi narihini ida liña lan líderaguniwa Heowá. Ariha numuti kei aban umadaü le uágubei nemenigida súnwandan”. Ariñagayatu: “Turobuli le ídangiñebei hásügüra niduheñu laranseruñadiwa lubá le lunbei liabin ámuñegü”.

6. Anhein hásügürüña lubéi lídangiñe turobuli le lanügübei maseinsuni, ida luba hederebudagüdüni hafiñen?

⁶ Hásügürüña san lídangiñe turobuli lánina maseinsuni? Anhein hásügürüña lubéi lídangiñe turobuli le, aban dan hénrenguti lira. Íbini hénrengu lan le ídangiñebei hásügüra, gayaraati meferidirun humani chansi le lun hederebudagüdüni hafiñen. Furíei humá lun Heowá, aliiha huméi dimurei le lariñagubei Hesusu lidan  Matéu 6:25-34 ani ráramagua humá asaminara luagu. Samina humá luagu burí hénpulu le lídanbei wadaani le arufudubalin góunigi lumutiña lan Heowá ha beresegubaña lidan heseriwidun lun (1 Ko. 15:58). Líderagubadün le lun hederebudagüdüni ichouruni le huágubei luagu líderagubadün lan Húguchi Bungiu le siélubei, ítara kei líderaguniña ha ásügürübaña lídangiñe sügǘ le genegeguabei luma le hásügürübei. Subudi lumuti Bungiu le hemegeirubei ani subudi lumuti ida luba lan líchuguni hun. Danme le harihini ida liña lan lóunigirunün Heowá lidan hibagari, ábame lederebugudun hafiñen ani gayaraabei hawanduni óuchawaguni le wéiritimati le lunbei liabin ámuñegü (Abak. 3:17, 18).

7. Según abahüdaguni le lídanbei Matéu 8:23-26, ida liña lóuchaguni aban lanarime durumandei hafiñen disipulugu?

⁷ Luagu aban dan, dan le ladügünbei Hesusu hama lani disipulu wéiyaasu tidan aban ugunei, aba liñuragun aban lanarime liñawan dan. Meferidirunti Hesusu chansi lun líderaguniña lani disipulugu arihei megei hamá lanwoun hafiñen (aliiha huméi Matéu 8:23-26). Hanarimeti liñawan dan weyu ligía darí lun lebeluhan duna tidoun ugunei, lau sun lira larumuguña meha Hesusu lau darangilaü. Lau saragu alouchuni, aba hagagudahani disipulugu lun hamuriahan luma lun lesefuruniña. Lau aban darangilaü, aba lariñagun Hesusu houn: “Ka san uagu hanufudeda? Lougua tafiñen huguya le!”. Lunti meha hasubudiruni disipulugu gabafu lan Heowá lun lóunigiruni Hesusu hau sun ha lúmabaña. Ka wafurendeirubei? Furendeitiwa aban lan afiñeni le derebuguti gayara lan líderaguniwa agagibudagua luma lanarime turobuli lidan wabagari luma dan le lan wásügürüña lan lídangiñe chagaguaü le lanügübei liñawan dan.

8, 9. Ida liña lóuchawagun tafiñen Anel ani ka íderagubarun?

⁸ Ariha waméi le asuseredubei tun aban íbiri mamarieidungiru gíritu Anel Potu Rísiti, aba lederebugudun tafiñen dan le tagagibudagunbei luma aban lanarime óuchawaguni. Lidan tikesin, sügütu lídangiñe durumandei ligía. Rédeitu Anel mábanga, mawadigimari ladüga herigini le adagarubei Potu Rísiti lidan irumu 2017, le gíribei María. Abahüdahatu Anel: “Lidan dan hénrenguti ligía, sanditina aban lanarime anufudei. Aba nafurendeirun arabacha luagu Heowá lau nafurieidun lun luma mígirun nan lun lararamunina saragu idiheri”.

⁹ Abahüdahatu Anel anihein lan aban katei le íderagubarun saragu dan le tásügürünbei lídangiñe óuchawaguni: gaganbadi. Ariñagatu: “Íderagua lumutina nafalaruni adundehani le tíchugubei lóundarun Heowá lun darangilu nan. Dǘgüdaguaü le híchugubei íbirigu nun tídangiñe Lererun Bungiu luma ídemuei le neresibirubei, adügati lun narihini lóunigiruñadina lan Heowá”. Ariñagayatu: “Ruti Heowá saragu nun lóugiñe le nasaminarubei, aba giñe lederebugudun nafiñen saragu”.

10. Ka lunbei hadügüni anhein hageindaguña lubéi luma aban turobuli le ítarabei kei durumandei?

¹⁰ Hagagibudaguña san luma aban lanarime  durumandei lidan hibagari? Másiñati hasufuriruña lan ladüga aban óunwenbu liñawan dan. O másiñati “durumandei” lan le úmabei hagagibudagua aban lan lanarime sandi le adügübei lun labuinchun hichügü lau idiheri luma lun ibidiñe lan hun kaba lan hadüga. Gayaraati anihein lan dan aba hasandiragun hungua lau idiheri, mígira humá lun ladügün lun machourun humá luagu Heowá. Dará humoun hanigi lun Heowá ani ariñaga huméi sun le hasandirubei lun. Derebugugüda huméi hafiñen lau hasaminarun hulili luagu burí líderagunün Heowá lidan dan le sügühalibei (Sal. 77:11, 12). Gayaraati hachoururuni maweiyasunti lan Heowá águraün ni guentó ni ámuñegü.

11. Ka uagu lunti lubéi aranseñu wamá lun gaganbadi wamá houn ha anügübalin ubaraü tidan lóundarun Heowá?

¹¹ Kaba íderaguaün awandei óuchawaguni? Kei tariñaguni Anel, gaganbadi. Furendei humá afiñera hawagu ha uágubaña lafiñera Heowá luma Hesusu. Anihein dan, híchugun íbirigu ha iridúbaña tidan lóundarun Heowá adundehani le genegeti mabuidun lan woun. Haritaguabei biní lani Heowá gaganbadi. Dimurei le hariñagubei wábirigu ha úaraguabaña luma le sügǘ hamaalibei arufudahati woun esefuha lan gaganbadi ibagari (Afu. 14:1-4; 2 Kro. 20:17). Samina humá luagu burí hénpulu ligía, ítara luba aranseñu humá lun hídehan lidan adundehani le tíchugubei lóundarun Heowá dandu guentó keime ámuñegü (Ebü. 13:17). Ligíati, mébunabei lun hanufudedun luéi óunwenbu durumandei le lunbei liabin yarafa madise (Ari. 3:25).

12. Según Lúkasi 18:1-8, ida liña amu lan afiñeni lumoun lawandun marichaü?

¹² Subudi lumuti meha Hesusu ladügüba lan marichaü lun lóuchawagun hafiñen lani disipulugu. Lun líderaguniña awanda, aba labahüdahan aban sügǘ houn le gayaraabei waliihani tidan liliburun Lúkasi. Ayanuhati tuagu aban würi to hilaali tani weiriei to ayumuraguboun saragu wéiyaasu lun aban aguseragüdüti le minebenti Bungiu lun lun líderagunu. Chouru tumuti anhoun lan asigira amuriaha irichaü luma, líderaguboun lan. Ani ítara liña lasuseredun. Ka wafurendeirubei? Úati marichaü luma Heowá. Ligía lariñagubei Hesusu: “Gúbumeti líchigei Bungiu haricha lánigu houn, ha ayumuraguatiña lun áriebu, wéyuagu [...]?” (aliiha huméi Lúkasi 18:1-8). Lárigiñe, ariñagayati Hesusu: “Danme le nagiribudun, au le Wügüri Garaüwarügüti, ubouagun, nadariruba funa san afiñeni hadan gürigia ha ubouagubaña?”. Dan le wasufurirun marichaü, lunti warufuduni lau gaguraasun wamá luma lau awanduni luagu anihein lan aban afiñeni wawagu libe le tuágubei würi to hilaalibei tani weiriei. Adügati afiñeni le lun wachoururuni líderagubadiwa lan Heowá súnwandan. Mosu giñe wafiñerun luagu lubafu furíei. Anihein dan gayara lan lóunabuni Bungiu wafurieidun dan le magurabun wamani.

13. Ida liña líderaguniña furíei aban iduheñu ha agagibudagubaña luma marichaü?

¹³ Ariha waméi le tásügürübei aban íbiri gíritu Vero to awinwanduboun Republika Demokrátiku lani Kongo luma tani weiriei tabu tisaani to 15  irumu tau. Ǘrüwagubei hagía mosu meha hanurahan hawéi milidaru lídangiñe aüdü le ñein lubéi hawinwanda dan le hábürühanbei hawagu. Luagu üma, aba hadunragun hama milidaru ani mígirun hamutiña milidaru hagía lun hásügürün, siadirügü hamaña háfaraguaaña lan hilagubei. Aba tayahun Vero, áfaaguatu tiráü tamalihanu lau tafurieidun lau umalali héreti ani írida tumuti liri Heowá saragu wéiyaasu. Dan le lagumuchubei tafurieidun, aba lálügüdünün hábuti súdara: “Nibureintu, ka arufudahabei afurieiduni bun?”. Aba tóunabuni: “Núguchu, lau tafalaruni adundehani le lídanbei Matéu 6:9-13”. Aba lariñagun wügüri ligía tun: “Beiba hau bagübürigu lau darangilaü, lóunigirubadün Heowá le Bubungiute”.

14. Ka gayaraabei ladügün lun lóuchaguni wafiñen ani kaba íderaguawa awanda?

¹⁴ Sügǘ libe le, adügati lun wasaminarun súnwandan lan gabafu lan furíei. Gama lumoun, ánheinti marihin hubalin lounabún hafurieidun lau lóufudagun o lau aban igaburi le aweiridagüdüti anigi? Ítara kei würi to hilaalibei tani weiriei to uáguboun labahüdaha Hesusu, sigí humá afurieida lau ichouruni, mágurun lubadün Wabungiute ani lóunabubei hafurieidun lidan lidaani. Sigí humá afurieida lun Heowá lun líchuguni lani sífiri sandu hun (Fili. 4:13). Haritagua huméi yarafa madise lan líchuguba lan saragu abiniruni hun le lunbei ladügün lun habulieiduni sun le súfuri humaalibei lidan dan le sügühalibei. Lau hawanduni óuchawaguni lau úaraguni derebugutimaabei hafiñen lubá le lunbei liabin (1 Fe. 1:6, 7).

15. Según Matéu 17:19, 20, ka turobuli úmabei hagagibudagua lani Hesusu disipulugu?

¹⁵ Arufudahati Hesusu houn lani disipulugu líderagubaña lan afiñeni lun hiñuragun lídangiñe lénrengunga (aliiha huméi Matéu 17:19, 20). Íbini asagahaaña lan meha disipulugu máfianu saragu wéiyaasu, luagu aban dan, aba siñaali lan hadügüni. Ka turobulibei? Aba lafuranguagüdüni Hesusu houn mégeigiña lan lanwoun hafiñen. Aba lariñagun houn anhein derebugu lubéi hafiñen buidu buidu, gabafubaña lan hahandilihan lénrengunga le ítarabei kei luéinamun wübü. Uguñe weyu, wagagibudaguña giñe luma turobuli le genegeti siñabei lan wiñuragun lídangiñe.

16. Ida liña líderagunu tafiñen Geydi agagibudagua luma aban lanarime lamiselu?

¹⁶ Ariha waméi tani Geydi hénpulu, aban íbiri wadimaluna. Aba háfaruni tani weiriei dan le hagiribudunbei hábiñoun lárigiñe aban adamuridaguni le lani damuriguaü. Abahüdahatu ida liña lan líderagunu tafiñen lun gayara lan tawanduni lanarime igarigu ligía: “Lau nafurieidun, aba nígiruni sun nidiheri lun Heowá ani ruti katei le darangilaü nun. Ariha numuti ida liña lan líderagunina lau layusuruniña niduheñu hama íbirigu ha lílana damuriguaü. Íderagua lumutina beresegu nan lidan neseriwidun lun Heowá lun labulubudun nigarigu ani íderagua lumutina katei le lun nawinwandun sagü weyu sin nadiheridun saragu luagu haruga. Arufudahaali le nawinwandubei nun meberesenga lan ka lan óuchawaguni  lunbei liabin ámuñegü, gayaraabei lan nagagibudagun luma lau lídehan Heowá, Hesusu tuma lóundarun Heowá”.

17. Ka gayaraabei wadügüni danme wagagibudagun luma aban lénrengunga le ítarabei kamá aban wübü?

¹⁷ Hilá san somu hiduhe le hínsiñeti hun? Direi humá dan lun hederebudagüdüni hafiñen luagu águyuguni lau haliihani abahüdaguni le tídanbei Bíbülia le abahüdahabei hawagu gürigia ha meha águyugubaña. Hírutün san ladüga labugún somu hiduhe lídangiñe damuriguaü? Aturiaha humá lun hachoururuni ladundehan lan Bungiu ligía lan buídutimabei súnwandan. Meberesenga ka lan turobuli úmabei hagagibudagua ariha huméi kei aban chansi lun hederebudagüdüni hafiñen. Dará humóun hanigi lun Heowá. Lubaragiñe herederun hábuguarügü, redei humá yarafa houn íbirigu (Ari. 18:1). Adüga humá katei le gayaraabei líderagunün awanda, íbini lau águiraü (Sal. 126:5, 6). Mararamagua lan habasiihan adamuridagua, ni hapurichihan ni haliihanu Bíbülia. Ani sigí humá asaminara hulili luagu lubuidun abiniruni le füramase lubéi Heowá. Lau harihini ida liña lan líderagunün Heowá, laganwounduba hafiñen luagu.

18. Ánhaadün ariha anihein lan mégeiti lidan hafiñen, ka gayaraabei hadügüni?

¹⁸ Mábürühala harüna anhein anihein lubéi aban sügǘ lidan hibagari, lidan dan le sügühalibei o guentó, le arufudubei lóuguaali lan hafiñen. Ariha huméi kei aban chansi lúntima hederebudagüdüni hafiñen. Amuriaha huméi libe le hamuriahabei lani Hesusu apostolugu: “Ruba lanwoun wafiñen” (Luk. 17:5). Samina humá giñe luagu hénpulu le ariha wamaalibei lidan aturiahani le. Ítara kei Miguel tuma Yurai, haritagua huméi sun dan le ídanbei líderaguaün Heowá. Ítara kei tiráü Vero, tuma giñe Anel furíei humá lun Heowá tídangiñe sun hanigi, dántima le hásügürüña lan lídangiñe dan hénrenguti. Ítara kei Geydi, anha humá lun ídemuei le líchugubei Heowá hun hámagiñe hiduheñu luma hámagiñe íbirigu. Anhaün ígira lun líderagunün Heowá agagibudagua luma óuchawaguni le uguñebei weyu, afiñentimabadün luagu líderagubadün lan agagibudagua luma furumiñeguarügü óuchawaguni ámuñegü.

19. Ka lachoururubei Hesusu ani ka giñe gayaraabei hachoururuni?

¹⁹ Arufuda lumuti meha Hesusu ka lan idan hemegeira lani disipulugu lanwoun hafiñen, gama lumoun chouru lumuti meha lau lan lídehan Heowá gayaraabei lan hiñuragun lídangiñe óuchawaguni le lunbei liabin ámuñegü (Huan 14:1; 16:33). Ani chouru lumuti meha ñéinbaña lan saragu gürigia ha lúnbaña hásügürün wínwanñu lídangiñe óunwenbu asufuriruni seremei aban afiñeni le derebuguti (Aruf. 7:9, 14). Huguyaba san aban hádangiñe saragu gürigia ha? Seremei lareini Heowá, ítara luba, anhein meferidirun humá sun chansi lun hederebudagüdüni hafiñen (Ebü. 10:39).