Ariñagati Heowá houn ísüraelina ka lan lunbei hadügüni lun sandu hamá. Lun gayara lan hadügüni aba líderaguniña lau líchuguni gumadi le houn: “Madimureha humá marasualugu hadan híbirigu. Mádaragua humá hungua lidan lafarúniwa gürigia híledi hilagubei. Au Aburemei” (Fad. 19:2, 16).

Dimurei “mádaragua humá hungua lidan lafarúniwa gürigia híledi” afuranguagüda lumuti buidu le mini lubéi lidan binadu ebüréu. Ka mini lubéi? Afuranguagüdatu aban líburu huríu tuagu haliburun Fádirigu: “Hénrenguti lan gunfurandawa lan le mini lubéi fánreinti le lídanbei bérusu le, létima mini lubéi ‘merederabá rara o yarafa lurugabu’”.

Añahein sásaamu saminatiña genegegua lan dimurei le lídanbei bérusu le lumoun le lídanbei bérusu le lubaragiñebei, le ariñagubei: “Richagualá haguseragüdün danme hasiadihan midin humá lúmagiñe le débilibei ni lúmagiñe le gabafubei ragǘ humá luéigiñe irichaü danme hasiadihan” (Fad. 19:15). Anhein ítara liña lubéi, gayaraati luagu lan moun lumuti lan hadügün ísüraelina ni murusun marichaü lidan aguseragüdüni ni lidan bísinisi, ni hadan iduheñu, layanuhóua lau gumadi le lídanbei bérusu 16 luáguti moun lumuti lan hádaragun houngua lidoun lafarúniwa gürigia háledi. Ani moun lumuti giñe hóuserun lau múarani lun habuidun guánarügü. Inarüni moun lumuti lan wadügün katei líbeina lira, lau sun lira anihein amu igaburi le furangutimati lun gunfurandawa lan le lariñagubei ariñahani le lídanbei bérusu 16.

Teni wamá lun le lídanbei furumiñeti fánreinti le lídanbei bérusu le, ariñagati Bungiu houn ísüraelina lun merede hamá aburuchaguagüda iyeeni. Haritagua wamá mama lan ligiaméme iyeeni luma achurahani lau sun lira gayaraati lanügün turobuli (Ari. 10:19; Apur. 10:12-14; 1 Tim. 5:11-15; Sant. 3:6). Liibe-agei dan, dan le layanuhóun iyeeni luagu gürigia adügati lira lun lawiyedúniwa liri. Háfuga ayanuha lan le eyeehabei katei wuribati luagu le aban gürigia íbini líchuguñein lan libagari gürigia ligía lidan denchaü. Ligía asuseredubei lidan likesin Nawotu, aba heyeehan fiu wügüriña luagu ani ladüga iyeeni ligía, afarúati hilagubei lau hachamuragun dübü luagu íbini madurun lan (1 Uru. 21:8-13). Ítara kei lariñaguni libiaman fánreinti tidan haliburun Fádirigu 19:16, gürigia le eyeehabei gayaraati láfaragüdün gürigia.

Másiñati layanuhan aban gürigia wuriba luagu aban gürigia ladüga iyereegu lan lun. Aliihatiwa lidan 1 Huan 3:15: “Sun le iyereehabúbei lun líbiri gáfarahati ani subudi humuti luagu úa lan ni aban gáfarahati lun gayara lan gabagari lan le magumuchaditi”. Súdiniti lárigiñe lan líchuguni Heowá gumadi le tídanbei haliburun Fádirigu 19:16, ariñaga lan: “Mareida humá iyereehabúni tidan hanigi lubá híbiri” (Fad. 19:17).

Ligía buidu lubéi gumadi le tídanbei haliburun Fádirigu 19:16, anihein saragu adundehani houn kristiánugu ñein. Lunti wamahadun lun luriban saminaü ani maweiyasun wamá ayanuha wuriba hawagu amu. Ánhawa ayanuha wuriba hawagu amu mini lan mínsiñe hamá woun o gimuga wamá houn, arufudahati igaburi le iyereegu lan gürigia ligía woun. Mabarati iyereehabúni lidan libagari aban kristiánu (Mat. 12:36, 37).