1. Ka meha katei hénrenguti asuseredubei lun Dawidi?

 LANURAHAÑA meha Dawidi lun lesefuruni libagari, lugundun busenti meha urúei Saulu, urúei le meha gabafubei Ísüraeli, láfaruni hilagubei. Kei meha le ua lubéi ni kata luma Dawidi lun leigin, aba lidin uburugun Nobu, le ñein lubéi lamuriaha hama lílana lun híchugun seingü fein lun (1 Sam. 21:1, 3). Lárigiñe, ligía hama luwügüriñan aba houdin aramudagua lagadábugiñe dübü (1 Sam. 22:1). Ka meha asuseredubei lun Dawidi?

2. Ida liña ládaragun Saulu lungua lidoun denchaü? (1 Samueli 23:16, 17).

² Gimugati meha Saulu lun Dawidi lugundun wéiriti meha línsiñe Dawidi houn gürigia ani gáñeiti meha saragu wuribu. Subudi lumuti meha giñe Saulu mígirunhaali lan Heowá lun lasigirun keisi lurúeite Ísüraeli ani anúadira laali lan Heowá Dawidi lun ligíaba lan lurúeite Ísüraeli (aliiha huméi 1 Samueli 23:16, 17). Gama lumoun, kei aba lan lasigirun Saulu kei lurúeite Ísüraeli, gíbetiña meha lisudaranigu ha meha íderagubalin, ligíati mosu meha lanurahan Dawidi lun lesefuruni libagari. Afiñeti funa san Saulu gayara lan meha lararamuni le lariñagubei Heowá luagu Dawidi? (Isa. 55:11). Mariñagu tumutu Bíbülia, lau sun lira, gayaraati wachoururun aban katei: denchati meha katei le ladügübei Saulu. Lugundun sun ha ageindagubaña luma Bungiu súnwandan heferidirun.

3. Ida liña lasandiragun Dawidi lungua dan le lásügürünbei lídangiñe saragu lénrengunga?

³ Aban meha wügüri ǘnabuguti Dawidi. Mama ligía anuadiragúnbei lungua lurúeiteme Ísüraeli; Heowá anúadirubalin (1 Sam. 16:1, 12, 13). Hanarimeti meha liyereegun Dawidi lun  Saulu. Ani lau sun lira, michu lumuti Dawidi duru luagu Heowá luagu sun katei wuribati le lásügürünbei. Mekeharunti giñe luagu lilouguan leigin luma luagu lerederun aramudaguñu. Lubaragiñe lira, másiñati dan le lan meha lerederunbei aramudaguñu ligía lan labürüdüni dimurei lánina uremu lun lalawahóun Heowá, le ídangiñebei lasagarúa liri aturiahani le: “Ha áluahabalin Aburemei, memegeirúnbaña ni kata” (Sal. 34:10).

4. Kaba gádürü álügüdahani wóunaba ani ka uagu súdini lubéi?

⁴ Saragu lubúeingu Heowá uguñe weyu míbeti éigini hama luma burí katei le hemegeirubei lun hawinwandun. * Arihúati le lídantima dan le ídanbei wawinwanda, aban dan lánina saragu sandi. Ani eibu ayarafadeina wamá lun “saragu asufuriruni”, laribadatimaba katei ubouagu (Mat. 24:21). Ligíati, ariha waméi lóunabagüle gádürü álügüdahani le: ka uagu wariñaga ‘memegeirun lan meha Dawidi ni kata’?, ka uagu megei wabéi wafurendeirun lun gunda wamá lau wámati?, ka uagu gayara lubéi wachoururuni lóunigirubadiwa lan Heowá? ani ida liña gayara lan waranserun lubá ámuñegü?

5, 6. Ida liña líderaguniwa Sálumu 23 lun gunfuranda wamani ka lan meha labusenrubei Dawidi lariñagun dan le labürühanbei memegeirúnbaña lan lubúeingu Bungiu “ni kata”?

⁵ Ka meha labusenrunbei Dawidi lariñagun dan le lariñagunbalin dimurei memegeirúnbaña lan lubúeingu Heowá “ni kata”? Lun gayara lan gunfuranda wamani, mosu wakutihani dimurei burí le áfuridubei lidan Sálumu 23 (aliiha huméi Sálumu 23:1-6). Gumese lumuti Dawidi Sálumu le lau dimurei: “Nabureme óunigirubalina, [...] ligía úa lubéi nemegeirun”. Lidan le líbiri, ayanuhati Dawidi lidan Sálumu le, luagu burí katei le wéiribei lisudinin, kei burí: saragu abiniruni le libihubei ladüga Heowá lan Lúniribei. Adundeha lumuti Heowá Dawidi “luéigiñe üma le richabei” ani íderagualei lau úarani dandu lidan buiti kei lidan dan hénrenguti. Íbini emeraaguagüda lani Heowá Dawidi lidan fulasu darangilati le ítarabei kei  “sagadi le hilumati”, subudi lumuti meha giñe Dawidi lásügürüba lan lídangiñe lénrengunga. Másiñati anihein lan dan lasandiragun lungua lau maguraasuni, kamá hamuga lásügürüña “lídangiñe fulasu le búrigatimabei”, ani ariñagati gáganibei lan. Íbini ítara, kei meha Heowá lan Lúniribei abürühati: “Manufudebadina ni ka uéi”.

⁶ Ligíati, ka labusenrunbei Dawidi lariñagun dan le lariñagubei ‘memegeirúnbei lan ni kata’? Layanuhaña meha luagu lumadagu luma Heowá, resibi lumuti meha sun le lemegeirubei. Memegeirunti meha Dawidi umegeguni lun gunda lan. Lugundun gúndaagüda lumuti sun le líchugubei Heowá lun. Létima súdinitimabei lun Dawidi, abiniruni luma óunigiruni le leresibirubei lúmagiñe Bungiu.

7. Según Lúkasi 21:20-24, ka burí lénrengunga úmabei hagagibudagua kristiánugu lánina furumiñeti sígulu ha Hudeabaña?

⁷ Arufudahati dimurei le labürüdübei Dawidi súdiniti lan ligaburi warihini umegeguni. Inarüniti gayara lan wagundaarun lau wámati, lau sun lira, moun lumuti wígirun lun ligíaba lan anügei furumiñeti lúgaaru lidan wabagari. Anihán meha aban katei súdiniti le meha lunbei gunfuranda hamani kristiánugu lánina furumiñeti sígulu ha Hudeabaña (aliiha huméi Lúkasi 21:20-24). Wéridi laaña meha Hesusu lachülürüba lan buga dan lun hegeyedaguni “súdaragu uburugu Herusalén”. Ani danme lan buga lasuseredun sun le mosu lan buga hanurahan luagun burí wübü. Anhein meha hadüga, hesefuruba meha, lau sun lira, mosu meha hígirun saragu katei hárigiñegua. Fiu irumu guentó, ariñagatu Garüdia Awisahatu: “Ígira hamutu haban luma hachari, ani manügün hamuti umegeguni hábiñegiñe. Lugundun afiñetiña meha luagu líderagubaña lan Heowá ani lóunigirubaña lan, ru hamuti meha háhuduragun lun Bungiu lóugiñe sun le súdinibei houn”.

8. Ka katei súdiniti wafurendeirubei lídangiñe le meha asuseredubei houn kristiánugu Hudéa?

⁸ Ka wafurendeirubei lídangiñe le meha asuseredubei houn kristiánugu ha Hudeabaña? Ariñagatu Garüdia Awisahatu to buga uáguboun wayanuhan lidan párafu 7: “Másiñati wagagibudaguba lan luma óuchawaguni le lunbei larufuduni ida liña lan warihini umegeguni. Wéiribei san lisudinin umegeguni woun o súdinitimabei esefuruni le lunbei heresibiruni sun ha úaraguabaña lun Bungiu woun? Másiñati, wasufuriruba lan lénrengunga lidan awanha lan anuraha. Lunti aranseñu wamá lau le wemegeirubei kei meha hadügüni kristiánugu ha lánina furumiñeti sígulu ha Hudeabaña”. *

9. Ida liña línchahanün adundehani burí le líchugubei Pábulu houn ebüréuna?

⁹ Saminañahaadün san luagu lénrengun houn kristiánugu ha hígiruni sun hámati ani gumese hagía aban iseri ibagari lidan amu fulasu? Mégeitiña meha hafiñerun líderagubaña lan meha Heowá lun habihini le hemegeirubei. Ani seingü irumu lubaragiñebei hegeyedaguni súdaragu uburugu Herusalén, ruti meha apostolu Pábulu fiu adundehani houn kristiánugu ebüréuna le meha lunbei líderaguniña. Abürühati: “Míchiga huméi hínsiñehabu luagun seinsu; gunda humá lau le húmati, lugundun líchugubei Bungiu le hemegeirubei hun. Ariñagaali: ‘Nóunigirubadibu; mígirun nubadibu’”. Gayaraati lubeiti wariñagun lau afiñeni: ‘Nabureme Bungiu íderagubalina; manufudebadina. Kábati gayara hamá gürigia adüga nau?’” (Ebü. 13:5, 6). Ida liña meha lidin houn kristiánugu ha meha gaganbadibaña lun adundehani burí le líchugubei Pábulu lubaragiñe meha hárügüdüni súdaragu Rómana uburugu? Chóuruti máfaagun hamá saragu lun héchudun luagu iseri habagari lidan iseri fulasu le ídanbei mibe lan umegeguni  hama. Chouru hamuti meha líchugubei lan Heowá le hemegeirubei houn lun hawinwandun. Adügati dimurei le lariñagubei Pábulu lun giñe wafiñerun líchugubei lan giñe Heowá le wemegeirubei woun.

10. Ka katei labürüdübei Pábulu le húugili woun uguñe weyu?

¹⁰ Genegeguati adundehani le luma le lariñagubei Pábulu lun Timotéu, ani huuti giñe woun. Abürühati: “Anhein geigin wabéi gadaüragun, lunti gufuruma wamá lau lira” (1 Tim. 6:8). Mini lan san lira siñati lan wagundaarun lau éigini le semeeti, buidu tan waban o wagañeiha somu wadaüragun to buitu? Ka meha uagu layanuha Pábulu? Le meha labusenrunbei lariñagun mosu lan gúndaañu wamá lau le wámabei (Fili. 4:12). Anihán meha katei le uágubei layanuhan Pábulu. Wamadagua luma Heowá ligíatima katei le gebegibei wama, mama umegeguni (Abak. 3:17, 18).

11. Ka adundehani wafurendeirubei lídangiñe le lariñagubei Moisesi houn Ísüraelina?

¹¹ Másiñati le lan uágubei wasaminara megei wamani, lun Heowá memegeirun wamuti. Ariha waméi le lariñagubei Moisesi houn Ísüraelina lárigiñebei hanügün 40 irumu lidan fulasu mageirawati: “Biní laadün Wabureme le Wabungiute lidan sun le hadügübei, húmañein lidan sun bián-wein irumu le ani góunigi láadiwa lidan wéibugun lidan óunwenbu fulasu mageirawati le, úouga ni kata wemegeirun” (2 Lur. 2:7). Lidan 40 irumu ligía, ruti Heowá maná houn lun heigín. Ani daüguaü to meha hámaboun, danbei le háfuridunbei Ehiptugiñe,  mawesiruntu (2 Lur. 8:3, 4). Saminatiña meha fiu ísüraelina maweirin lan meha katei le, gama lumoun haritaguagüda lumutiña Moisesi anihein lan meha le hemegeirubei hama. Wagundaraguagüdübei Heowá ánhawa gufuruma lau le wámabei, lidan amu dimurei, anhein weiri lubéi lebegi íbini katei ñǘbüriti le líchugubei woun, ariha wamuti keisi aban abiniruni ani rútiwa eteingiruni luagu.

12. Ida liña wasubudiruni afiñeti lan meha Dawidi luagu Heowá mama luagu le gayara lubéi adüga?

¹² Subudi lumuti meha Dawidi úaraguati lan Heowá berese ligía saragu hau ha hínsiñehabubaña lun. Íbini lídanñein lan meha peliguru libagari Dawidi dan labürüdünbalin dimurei le lídanbei Sálumu 34, wéiriti meha lafiñen Dawidi darí lun lasandirun kamá le lóunigiruñein aban ánheli (Sal. 34:7). Genegeti ítara liña lan lani Heowá ánheli le lun Dawidi kei aban súdara le óunigihabei agagudúañu luéi hachülürün áganiñu. Íbini meha aban lan awuribuhati gabafuti Dawidi, füramase ligía Heowá lun urúeibei lan, mafiñerunti luagu lubafu lau lachüürün aban dübü o lau layusurunu eféin lun lábürühan hawagun láganiñu (1 Sam. 16:13; 24:12). Lubaragiñe lira, afiñeti meha luagu Bungiu luma luagu lóunahabei lan Bungiu lani ánheli lun lóunigiruniña ha inebehabubaña lun. Inarüni, uguñe weyu magurabahantiwa lóunahaba lan Heowá aban lani ánheli lun lóunigiruniwa. Lau sun lira, chouru wamuti masufurirunbei lan ni aban hádangiñe lubúeingu aban dañu le siñabei laransehani.

13. Danme le lagayuahan Gogu le Magoguna, ka uagu genegebei lan ménrengunbei lan hagañeirun, ani ka uagu manufudebadiwa lubéi? (Ariha huméi dibuhu le luágubei tidáü garüdia).

¹³ Yarafa madise, lóuchawaguba wafiñen luagu anhein gayara lubéi lóunigiruniwa Heowá. Danme le lagayuahan Gogu le Magoguna, o sétanu hani néchanigu wawagun, másiñati wasaminaruba lan hagumucha lan lau wabagari. Ligíati, mosu lubéi wachoururuni gayara lan lesefuruniwa Heowá ani ladügübei lan. Houn néchanigu ítara waba kei mudún ha móuniritiña (Ese. 38:10-12). Hasaminaruba ménrengubei lan wagañeirun, lugundun úatu áruma wama ani maransehatiwa lubá wuribu. Marihin habéi le gayara wabéi ariha lau agu le lánina afiñeni: saragu ánheligu geyegu hau lubúeingu Heowá aranseñu lun hageindagun waweigiñe. Ida lubati harihini néchanigu sun katei le, anhein mafiñen habéi luagu Heowá? Ábame taweiridun hanigi danme le lóunahaniña Heowá lani ánheligu lun hayabin esefurawa! (Aruf. 19:11, 14, 15).

14. Ka lunbei wadügüni lun aranseñu wamá lubá ámuñegü?

¹⁴ Ka gayaraabei wadügün guentó lun waransehan lubá ámuñegü? Furumiñe, lunti warihini umegeguni lidan aban lubuidun igaburi luma lun waritaguni lachülürüba lan aban weyu lun wanurahan ani mósume wígiruni sun katei le wárigiñegua. Lanwoun lira, lunti gunda wamá láurügü le wemegeirubei, gunda wagíame lau lumadagu wamá Heowá. Éibume wasubudiruni Wabungiute, éibume wachoururei lóunigirubadiwa lan danme le lagayuahan Gogu le Magoguna wawagun.

15. Ka burí sügǘ lidan libagari Dawidi arufudubalin lun lasigiruba lan Heowá íderaguei?

¹⁵ Ariha wamá amu katei le íderagubalin Dawidi agagibudagua luma óuchawaguni. Ariñagati: “Houcha humá, ariha humeime luagu buidu lan Aburemei. Fuleseiwatiña gürigia ha hemenigibaña luagu Bungiu!” (Sal. 34:8). Arufuda lumuti dimurei burí le ka lan uagu chouru lubalin meha Dawidi lóunigirubei lan Heowá. Súnwandan meha láluahani lídehan Heowá ani  mígirun lumuti Heowá. Dan meha le nibureingili Dawidi, ageindaguati luma aban hígandei filistéana gíriti Goliadi ani ariñagati lun: “Lederegeraadibu Nabureme núhaburugun, ani náfaraadibu hilagubei uguñe uguñe” (1 Sam. 17:46). Dan lárigiñe, dan le meha leseriwiduña lan Dawidi lun Saulu, hóuchati Saulu lun láfaruni Dawidi saragu wéiyaasu, lau sun lira, “íderagua lumuti Wabureme Dawidi” (1 Sam. 18:12). Kei meha ariha laali lan Dawidi lúhabu Heowá lidan dan le sügühalibei, subudi lumuti meha lasigiruba lan íderaguei. Gayaraati giñe líderaguniwa katei le lun waranserun lubá óuchawaguni.

16. Ida luba gayara lan warufuduni luagu buidu lan Heowá?

¹⁶ Éibume wáluahani ladundehan Heowá guentó, wéiritimabei wafiñen luagu líderagubadiwa lan ámuñegü. Kéiburi, mosu wafiñerun luagu Heowá lun gayara lan wamuriahan üma luma wayubudiri lun gayara lan woudin lidan aban adamurini wéiriti o wamuriahan lun lasansirúniwa lóurate wawadigimari lun gayara lan woudin lidan burí adamuridaguni luma lun waganwoundagüdüni wapurichihan. Samina wamá maha lan hamuga wayubudiri lun le wamuriahabei luma ani aba weferidiruni wawadigimari. Afiñetiwa san luagu mígirun lubadiwa lan Heowá ani líchugubei lan sun le wemegeirubei woun súnwandan? (Ebü. 13:5). Gayaraati habahüdagun saragu íbirigu ha lídanbaña dan dayarüti woun ida liña lan líderaguniña Heowá dántima le hemegeirunbalin. Gúnfuliti Heowá.

17. Ka líribei bérusu lánina irumu 2022, ani ka uagu súdini lubéi?

¹⁷ Kei anihein lubéi Heowá wama, moun lumuti wanufudedun luéi le lunbei lasuseredun ámuñegü. Mígirun lubadiwa Heowá, ánhawa íchigei furumiñe lidan wabagari. Lun laritaguagüdüniwa Musu Úaragu luagu dan hénrenguti le anitebei luma lun aranseñu wamá lubá, ani afiñe wagíame luagu Heowá, anuadirúaali Sálumu 34:10 kei bérusu le lánina irumu 2022, le ariñagubei: “Ha áluahabalin Aburemei, memegeirúnbaña ni kata”.