ATURIAHANI 4
Ka uagu wachülüra lidoun Aritaguagülei
“Adüga huméi le haritaguagüleme nuagun” (LUK. 22:19).
UREMU 20 Derege bumuti Biráü le hínsiñebei bun
LE LUNBEI WATURIAHANI *
1, 2. a) Ka burí dan waritagua luagu aban waduhe le hilaalibei? b) Ka gumadi líchugubei Hesusu guñoun le lubaragiñebei lounwen?
DAN LE weferidirun somu waduhe lidan óunweni íbini lásügürün saragu dan lúmagiñe lounwen súnwandan waritagun luagu. Lanwoun lira, aba waritagun luagu sagü lagunfulirun irumu lúmagiñe lounwen.
2 Sagü irumu, óundaratiña saragu míñunu gürigia lidan sun ubóu, wagía haganagua, lun haritaguni lounwen aban gürigia le hínsiñebei houn saragu: Hesukrístu (1 Fe. 1:8). Adüga wamuti lun haritaguni le ederegerubalin libagari lun lesefuruniwa lídangiñe figóu luma óunweni (Mat. 20:28). Busenti meha Hesusu haritaguni lani disipulugu lounwen. Guñoun le lubaragiñebei lounwen, aba lagumeserun aban adineruni espechaliti hama lani disipulugu ani aba líchuguni gumadi le: “Adüga huméi le, haritaguagüleme nuagun” (Luk. 22:19).
3. Kaba wakutiha lidan aturiahani le?
3 Hádangiñe saragu míñunu gürigia ha achülürübaña lidoun laritaguagüle lounwen Kristu, fiúrügüñanu hemenigitiña hawinwandun sielu, ani hiibe-agei hádangiñe agurabatiña hawinwandun ya ubouagu. Lidan aturiahani le, wakutihaba fiu resun ka lan uagu hachülüra bián sétanu ha sagü irumu lidoun Aritaguagülei. Wakutihabei giñe buiti le wasagarubei dan le wachülürün lidoun Aritaguagülei. Águyuguagüda waméi ka lan uagu hachülürünbei kristiánugu anuadirúaaña lidoun Aritaguagülei.
KA UAGU HOUDIN KRISTIÁNUGU ANUADIRÚAAÑA LIDAN ARITAGUAGÜLEI
4. Ka uagu heigan kristiánugu anuadirúaaña tídangiñe fein ani gurá hagía tídangiñe diwéin lidan Aritaguagülei?
4 Aban lídangiñe lébuna hachülürün kristiánugu anuadirúaaña lidoun Aritaguagülei sagü irumu lun heigin tídangiñe fein luma lun hatun tídangiñe diwéin. Ka uagu gayara lubéi hadügüni? Lun wasubudiruni óunabagülei, haritagua waméi le ladügübei Hesusu lagumuhóun guñoun le ya lubéi ubouagu. Lárigiñe lefeduhani Hesusu Luéyuri Esefuruni, aba lagumeseruni le unbei wagúara Ladinerun Aburemei. Aba lásügüragüdünün fein tuma diwéin houn unsu lani apostolugu ha úaraguabaña ani aba lariñagun houn lun heigin tídangiñe fein ani gurá hagíame tídangiñe diwéin. Ani ayanuhati houn luagu bián daradu: iseri daradu luma daradu lánina Arúeihani (Luk. 22:19, 20, 28-30). * Adügati daradu burí le lun gayara lan heseriwidun apostolugu hagía hámaya fiu amu kristiánugu keisi urúeigu luma fádirigu sielu (Aruf. 5:10; 14:1). Añahein kristiánugu anuadirúaaña ha añahaguabaña ya ubouagu lidan bián daradu le ani hagíarügüñanu lun heigin tídangiñe fein gurá hagía tídangiñe diwéin lidan Aritaguagülei.
5. Ka hasubudirubei kristiánugu anuadirúaaña luagu emenigini le heresibirubei?
5 Amu resun le uágubei busén hamá kristiánugu anuadirúaaña lidan hamá Aritaguagülei ladüga ruti aban chansi houn lun hasaminarun hulili luagu hemenigi. Rúhali Heowá aban emenigini espechaliti houn: lun habihin aban úgubu le mañaladaditi ani le móunwedaditi, heseriwiduba úara luma Hesukrístu le ibihaalibei uéiriguni sielu hama ha híbiri 144,000 kristiánugu anuadirúaaña, ani le súdinitimabei, liñúarübaña lan Heowá (1 Ko. 15:51-53; 1 Huan 3:2). Subudi hamuti kristiánugu anuadirúaaña resibihaña lan aban lubuidun agunbirahani lun heseriwidun sielu. Gama lumoun, lun gayara lan hebelurun sielun mosu úaragua hamá darí hounwen (2 Tim. 4:7, 8). Gúndaatiña dan le hasaminarun luagu hemenigi (Titu 2:13). Ka gayaraabei wariñagun hawagun “amu mudún”? (Huan 10:16). Ka uagu houdin lidoun Aritaguagülei? Ariha wamá fiu resun.
KA UAGU HOUDIN AMU MUDÚN LIDAN ARITAGUAGÜLEI
6. Ka uagu hóudinbei lílana amu mudún lidoun Aritaguagülei sagü irumu?
6 Aban lídangiñe lébuna hachülürün amu mudún lidoun Aritaguagülei mama lun heigin tídangiñe fein ni lun hatun tídangiñe diwéin, hóudinbei lun harihini, íbini ítara gúndaatiña lau ñein hamá. Lidan irumu 1938 ligía meha furumiñe wéiyaasu hagunbirahóun ha hemenigibaña hawinwandun ya ubouagu lun houdin lidoun Aritaguagülei. Ariñagatu garüdia La Torre del Vigía to lánina gádürü-hati, irumu 1938: “súdiniti lun ñein hamá” ha hádangiñebaña amu mudún lidan Aritaguagülei “lun harihini le adügǘbei ñein”. Sigitu ariñaga: “Lunti ítara lan ani lidaani giñe ugundani houn”. Ítara kei gunda hamá gürigia ha agunbirahóubaña lidoun aban maríei ligiaméme giñe ugundani hasandirubei lílana amu mudún da le houdin lidoun Aritaguagülei.
7. Ka uagu busén habéi ha lílana amu mudún haganbuni yanu lánina Aritaguagülei?
7 Saminatiña giñe amu mudún hulili luagu hemenigi. Busentiña giñe haganbuni yanu lánina Aritaguagülei, ladüga liibe-agei le ayanuhóubei lidan yanu le layanuhaña luagu le lunbei ladügüni Kristu úara hama 144,000 ha lúnbaña harúeiha luma, hawagu gürigia ha úaragubaña, lídanme Arúeihani le lánina Milu Irumu. Lábugiñe larúeiha Urúei Hesukrístu, híderagubei urúeigu siéluna ha adügei Ubóu lun aban lan Paraísu luma lun hagidaruni figóu sunsuinagubei hawéi gürigia ha gaganbadibaña. Chóuruti barǘ lan le ugundani houn saragu milu gürigia ha achülürübaña lidoun Aritaguagülei dan le hasaminarun luagu weyu le lunbei liabin danme lagunfulirun profesía le lídanbei Isaíasi 35:5, 6; 65:21-23 luma le lídanbei Arufudúni 21:3, 4. Lau haríagun hungua lidan iseri ubóu hama hiduheñu ñein huma, ábame lederebugudun hemenigi ani aransetimabadün lau ichouruni lun hasigirun eseriwida lun Heowá (Mat. 24:13; Gal. 6:9).
8. Ka uagu hóudinbei lílana amu mudún lidoun Aritaguagülei?
8 Hachülürünbei giñe amu mudún lidoun Aritaguagülei ladüga busén hamá híderaguniña kristiánugu anuadirúaaña luma lun harufudun ínsiñeni houn. Ariñagatu Lererun Bungiu lídanbaña lan aban kristiánugu anuadirúaaña hama ha agurabubaña hawinwandun ya ubouagu. Ariha wamá fiu profesía le arufudubalin.
9. Según profesía le lídanbei Sakaríasi 8:23, ka hasandirubei amu mudún hawagu kristiánugu anuadirúaaña?
9 (Aliiha huméi Sakaríasi 8:23). Lau wadiraaruni profesía le lidan wasaminan arufuda lumuti le hasandirubei amu mudún hawagu kristiánugu anuadirúaaña. Dimurei “aban huríu” luma dimurei “huma” layanuhaña hawagu hagiaméme sétanu: kristiánugu anuadirúaaña ha añaheinguabaña ubouagu (Rom. 2:28, 29). “Diisi terencha ha lílana líbiri fulasu” mini hamá amu mudún. Aba hárügüdün lau sun hanarün hawagu kristiánugu anuadirúaaña, mini lan le badüle hamá hawagu lau úaraguni ani óundaragua hagía hamoun lidan láhudurawagun lun Heowá. Ligíati, lidan guñoun le lánina Aritaguagülei arufuda hamuti amu mudún lídanñanu lan aban hama kristiánugu anuadirúaaña lau lidan hamá ókaasion espechaliti le úara hama.
10. Ka ladügübei Heowá lun lagunfuliruni profesía le lídanbei Esekiéli 37:15-19, 24, 25?
10 (Aliiha huméi Esekiéli 37:15-19, 24, 25). Gúnfulihali Heowá lau profesía le lau ladügün lun heseriwidun kristiánugu anuadirúaaña úara hama amu mudún lidan aban sunsuinagubei. Ayanuhati profesía le luagu bián wewe. Ha hemenigibaña lun hawinwandun sielu ítara haña kei “luewen Hudá” (türibu le ñéingiñe lubéi meha hanuadirúa lurúeitegu Ísüraeli). Ánhañati ha hemenigibaña lun hawinwandun ya ubouagu ítara haña kei luewen “Éfürain”. * Lóundaragubaña Heowá bián sétanu ha lun “ábanrügü wewe”. Mini lan le heseriwiduba lan lábugiñe larúeihan ábanrügü Urúei, Kristu Hesusu. Sagü irumu, hóundaragun kristiánugu anuadirúaaña hama amu mudún lidan Aritaguagülei, mama kei bián sétanu le fánreinguati, óundaraguatiña “lidan aban fárüga luma aban óunigiruti” (Huan 10:16).
11. Ida liña híderaguniña amu mudún kristiánugu anuadirúaaña según Matéu 25:31-36, 40?
11 (Aliiha huméi Matéu 25:31-36, 40). “Mudún” ha iridúbaña lidan abahüdaguni le mini hamá amu mudún o gürigia richaguatiña ha awinwandubaña lidan lidaani lagumuchagüle Ubóu ani ha hemenigibaña hawinwandun ubouagu. Lau úaraguni ídehatiña mudún ha hama kristiánugu anuadirúaaña ha añaheinguabaña ubouagu lídantima híderaguniña agunfulira aban lanarime dasi: le lánina lapurichihóun luma larufudahóun lidan sun ubóu (Mat. 24:14; 28:19, 20).
12, 13. Ka amu igaburi idan híderaguaña amu mudún líbirigu Kristu?
12 Sagü irumu, fiu dimaasu lubaragiñe Aritaguagülei íderagua hamutiña amu mudún kristiánugu anuadirúaaña. Ida? Lau gadan lániña sunsuinagubei apurichihani le adügǘbei lidan sun Ubóu lun hagunbirahóun sun gürigia ha busenbaña, lidoun Aritaguagülei (ariha huméi rekuáduru “ Hadügüña san aransehani lubá lidaani Aritaguagülei?”). Lidan sun ubóu, adügǘwati aransehani lubá Aritaguagülei íbini ua hamá kristiánugu anuadirúaaña lidan sun damuriguaü. Gúndaatiña amu mudún saragu ladüga gayara lan hídehan hama líbirigu Kristu. Subudi hamuti lun lan Hesusu sun lan le hadügübei hawagu kristiánugu anuadirúaaña ítara liña lan kamá hamuga lun hadügei (Mat. 25:37-40).
13 Ka resun wámabei, meberesenga ka lan wemenigibei, lun lidan wamá Aritaguagülei?
KA UAGU WÓUDINBEI SUN WAGÍA LIDOUN ARITAGUAGÜLEI
14. Ida liña larufuduni Heowá luma Hesusu lueirin ínsiñeni le hasandirubei wawagu?
14 Ladüga seremei wamuti Heowá luma Hesusu luagu ínsiñeni le harufudubei wawagu. Arufuda laali Heowá línsiñehabu woun lidan ámuñegueinarügü igaburi. Létima wéiritimabei dan le lóunahanbalin Liráü asufurira ani hilá ligía wawagu (Huan 3:16). Arufuda lumuti giñe Hesusu línsiñehabu dan le aranseñu lubéi lun líchuguni libagari wawagu (Huan 15:13). Inarüni siñabei lan wafayeiruni sun le adüga láalibei wawagu, gama lumoun, gayaraati warufuduni seremei wamani lau ligaburi wawinwandun (Kol. 3:15). Lau wachülürün lidoun Aritaguagülei, warufuduñein seremei wamani luagu línsiñehabu ani warufuduñein giñe wínsiñehabu.
15. Ka uagu harufuda kristiánugu anuadirúaaña hama amu mudún saragu geteingiradi luagu idewesei le lánina esefuruni?
15 Ladüga hanarimeti lueirin idewesei lánina esefuruni (Mat. 20:28). Lidan hakesin kristiánugu anuadirúaaña, wéiriti lebegi esefuruni houn ladüga adügati lun chouru lan hemenigi. Seremei hafiñen luagu lani Kristu sákürifisiu, ariha lumutiña Heowá keisi gürigia richaguatiña luma keisi lirahüñü (Rom. 8:15-17, 23). Lidan hakesin amu mudún, gebegiti giñe esefuruni houn ladüga seremei hafiñen luagu hitaü le láwiyurubei Kristu, gayaraati hibihini lufulesein Bungiu lun heseriwidun lun lau arumani luma lun hásügürün lau ibagari lídangiñe “óunwenbu asufuriruni” (Aruf. 7:13-15). Dan le hachülürün bián sétanu ha lidoun Aritaguagülei sagü irumu, harufuduñein heteingiradi luagu lebegi esefuruni.
16. Ka amu resun lébubei woudin lidoun Aritaguagülei?
16 Ladüga busén wamá lun gaganbadi wamá lun Hesusu. Meberesenga ka lan wemenigibei, sun wagía gaganbaditiwa lun gumadi le líchugubei Hesusu guñoun le lagumeserunbalin Aritaguagülei: “Adügameme huméi katei le, haritaguagüleme nuagun” (1 Ko. 11:23, 24).
SAGATIWA BUITI LAU WOUDIN LIDOUN ARITAGUAGÜLEI
17. Ka uagu yarafatima wabéi lun Heowá dan le woudin lidoun Aritaguagülei?
17 Ladüga yarafagüda lumutiwa lun Heowá (Sant. 4:8). Kei le ariha wamaalibei, lau woudin lidoun Aritaguagülei ruti chansi woun lun wasaminarun hulili luagu emenigini le líchugubei Heowá woun luma luagu saragu ínsiñeni le larufudubei woun (Her. 29:11; 1 Huan 4:8-10). Chouru wamuti lagunfuliruba lan emenigini le ani magumuchagunbei lan línsiñehabu Heowá. Dan le wasaminarun luagu le, aba laganwoundun ínsiñeni le wasandirubei luagu Heowá ani aba giñe wasandiragun woungua yarafa lun (Rom. 8:38, 39).
18. Ka buiti wibihibei lau wasaminarun luagu le ladügübei Hesusu?
18 Ladüga ínchaha lániwa wáyeihani lani Hesusu hénpulu (1 Fe. 2:21). Fiu weyu lubaragiñe Aritaguagülei, aliiha wamuti abahüdaguni tídangiñeti Bíbülia luagu lagumuhóun dimaasu le laubei meha Hesusu ubouagu, lounwen luma láguyugun. Ani guñoun le ladügǘnbei Aritaguagülei, haritaguagüda lumutiwa yanu le ichugúbei ñein luagu ínsiñeni le lasandirubei Hesusu wawagu (Efe. 5:2; 1 Huan 3:16). Lau waliiha luagu le ladügübei Hesusu luma wasaminarun hulili luagu, ínchaha lumutiwa lun wabagaridun “kei meha labagaridun” (1 Huan 2:6).
19. Ka lunbei wadügüni lun werederun lidan línsiñehabu Bungiu?
19 Ladüga íderagua lumutiwa lun wasigirun lidan línsiñehabu Bungiu (Hud. 20, 21). Dan le wadügüni sun wayaraati lun gaganbadi wamá lun Bungiu, wíchuguña uéiriguni lun liri, gúndaagüda wamutu lanigi ani rédeitiwa lidan línsiñehabu (Ari. 27:11; Mat. 6:9; 1 Huan 5:3). Lau woudin lidoun Aritaguagülei ruti lanwoun were lun wariñagun lun Heowá sagü weyu lau le wadügübei: “Busentina lun numadabá lun súnwandan!”.
20. Ka resun buídutimabei wama lun woudin lidoun Aritaguagülei?
20 Meberesenga ka lan wemenigibei, lun lan yebe wawinwandun sielu o ya lan ubouagu, anihein resun buiti wamá lun woudin lidoun Aritaguagülei sagü irumu. Sagü wadamuridagun lidan Aritaguagülei, waritaguñein lounwen Hesukrístu, gürigia le hínsiñetimabei woun. Lúntima waritaguni ínsiñeni le wéiritimabei: lederegeruni Heowá libagari Liráü lun lesefuruniwa. Lidan irumu le, ladügǘba Aritaguagülei 15 lidan gádürü-hati irumu 2022, wándaradi guñoun. Hínsiñeti Heowá luma Liráü woun. Ligíati, lidan weyu le lagunfulirun Hesusu ábaya irumu lúmagiñe lounwen, úati ni aban katei súdiniti woun luéidügü woudin lidoun Aritaguagülei.
UREMU 16 Alawaha waméi Heowá luagu Liráü, le Lanúadirubei
^ Wawinwandun lan yebe sielu wemenigibei o ya lan ubouagu lidan aban Paraísu, sagü irumu ayumahatiwa woudin lidoun Aritaguagülei. Lidan aturiahani le lakutihóuba fiu ariñahani tídangiñeti Bíbülia le arufudubalin lébuna wachülürün lidoun Aritaguagülei luma buiti le wasagara lau ñein wamá.
^ Hadariruba lanwoun ariñahani luáguti iseri daradu luma daradu lánina Arúeihani lidan aturiahani ‘Fádirigubadün ani harúeihaba giñe’, tidan Garüdia Awisahatu 1 lidan diisi-hati, irumu 2014 páhina 16 darí 20.
^ Hadariruba lanwoun ariñahani luagu profesía luagu bián wewe le uágubei layanuhóua lidan kapítulu 37 tidan liliburun Esekiéli tidan líburu La adoración pura de Jehová: ¡por fin restaurada!, páhina 130 darí 135, párafu 3 darí 17.