ATURIAHANI 2
Le wafurendeirubei lúmagiñe lamulen Hesusu
“Au Santiagu, eseriwiduti lun Bungiu luma lun Wabureme Hesukrístu” (SANT. 1:1).
UREMU 89 Biní lumutiña Heowá ha gaganbadibaña lun
LE LUNBEI WATURIAHANI *
1. Ka gayaraabei wariñaguni hawagu liduheñu Santiagu?
HADAN meha iduheñu ha derebuguti hamadagua luma Heowá laweirida Santiagu, le lamulen Hesusu. * Wéiriti meha línsiñe Heowá lun Hosé luma tun María, ha lagübürigu Santiagu ani áfaaguatiña meha lun heseriwidun lun Heowá lidan aban lubuidun igaburi. Resibiti meha Santiagu ábaya abiniruni: ábanbei meha Mesíasi le füramasewabei líbugaña. Ma meha lubuidun chansi le libihubei Santiagu lun hádangiñe lan iduheñu hagía!
Kei úara lubéi haweinamuda, subudi lumuti meha Santiagu, Hesusu le líbugaña buidu buidu. (Ariha huméi párafu 2).
2. Ka burí katei adügübei lun garíaguadi lan meha Santiagu lun lubuidun ligaburi líbugaña?
2 Gíbeti katei le adügübei lun garíaguadi lan meha Santiagu lun lubuidun ligaburi líbugaña (Mat. 13:55). Kei hénpulu, wéiriti meha lisubudin Hesusu tuagu Lererun Bungiu, lau sun meha 12 lan irumu lau, wéirigüda lumutu hanigi wéiyaaña ha Herusalénbaña ha subudihaña saragu (Luk. 2:46, 47). Ani másiñati giñe nadagimein lan Santiagu kei sarafangei úara luma Hesusu. Anhein ítara liña lubéi, chóuruti subudi lani Santiagu líbugaña buidu buidu. Súnwandan lariñagun íbiri Nathan Knorr: “Dan le bawadigimaridun luma aban gürigia fureindeitibu lúmagiñe”. * Másiñati ruti lan meha Santiagu fe luagu aweirideina liña lan “Hesusu dandu lidan úgubu kei lidan saminaü, ani richati ligibugiñe Bungiu kei hagibugiñe gürigia” (Luk. 2:52). Agurabúati yebe lun Santiaguba lan aban hádangiñe furumiñetiña lani Hesusu disipulugu, ani masuseredunti ítara.
3. Ka ladügübei Santiagu dan le lagumeserunbalin Hesusu lani ministeriu?
3 Lidan lani Hesusu ministeriu ya ubouagu, mama meha disipulu Santiagu le lamulen (Huan 7:3-5). Másiñati Santiagu lan aban hádangiñe liduheñu Hesusu ha ariñagubaña: “Lǘlühali lan lau” Hesusu (Mar. 3:21). Ani úati meha ni kata le arufuduti luagu anihein lan meha Santiagu úara tuma María to lúguchu dan le ládarawagunbei Hesusu luagu wagabu (Huan 19:25-27).
4. Kaba bián katei wakutiha?
4 Dan lárigiñe, aba lafiñerun Santiagu luagu Hesusu ani aba ábanhali lan kristiánu inebewati lidan damuriguaü. Lidan aturiahani le, wakutihaba bián katei le wafurendeirubei lúmagiñe Santiagu: 1) ka uagu lunti lubéi ǘnabugu wamá? ani 2) ida luba máisturugu wamá ha buítiña?
ǗNABUGU WAMÁ KEI SANTIAGU
Ǘnabuguti meha Santiagu dan le larufudagunbei Hesusu lun ani adügati lira lun aban lan lani Kristu disipulu le úaraguati. (Ariha huméi párafu 5 darí 7).
5. Ida liña lóunabun Santiagu dan le larufudagunbei Hesusu lungua lun lárigiñe láguyugun?
5 Ida buga lagumesera Santiagu eseriwida kei aban lani Hesusu disipulu le úaraguati? Lárigiñebei láguyugun Hesusu, “aba larufudagun lungua lun Santiagu luma houn sun apostolugu” (1 Ko. 15:7). Aba lasansirun libagari Santiagu lárigiñebei larufudagun Hesusu lungua lun. Ñeinñein meha Santiagu dan le hadamuridagunbei apostolugu lidan aban rumu íñuti Herusalén agurabaha heresibiruni sífiri sandu le füramase wabéi houn (Adü. 1:13, 14). Dan lárigiñe, gachansinti meha Santiagu lun hádangiñebei lan lílana sétanu le arihibei lau damuriguaü kristiánu lidan furumiñeti sígulu (Adü. 15:6, 13-22; Gal. 2:9). Ani, lubaragiñe irumu 62 l.l.K. abürühati Santiagu aban gárada houn kristiánugu anuadirúaaña. Huutu gárada tuguya woun uguñe weyu, dandu anhein hemenigi wabéi wawinwandun sielu o ya ubouagu (Sant. 1:1). Según Josefo, wügüri le abahüdahabei luagu binadu sügǘ le lánina furumiñeti sígulu, fádiri meha huríu Anán íchugubei gumadi lun lafarúniwa Santiagu hilagubei. Úaraguati meha Santiagu lun Heowá darí lagumuchun libagari ya ubouagu.
6. Ida liña ligaburi lóunabun Santiagu hawéi tábutigu relihión ha lánina dan ligía?
6 Ǘnabuguti meha Santiagu. Ariha waméi amu lan ligaburi lóunabun Santiagu lau lásügürün dan luéi hóunabun alidihatiña relihión. Dan le larihinbalin Santiagu furangu luagu Hesusu lan Liraübei Bungiu, ánhati lun lau ǘnabuguni. Ánhañati hábutigu fádirigu ha Herusalénbaña mítaranti hóunabun. Kei hénpulu, siñati meha hariñagun máguyuguagüdün lani Hesusu Lásaru. Lubaragiñe meha hánharun luagu lóunahan lan Heowá Hesusu, álugarügütiña háfaruni Hesusu labu sun Lásaru (Huan 11:53; 12:9-11). Dan lárigiñe, dan le láguyugunbei Hesusu, álugatiña lun masubudirun hamani gürigia (Mat. 28:11-15). Adügati lanarime hapantan lábutigu relihión ha lun hamahadun lun Mesíasi.
7. Ka uagu mosu lubéi wígiruni pantaü?
7 Le wafurendeirubei: Ǘnabugu wamá ani ígira wamá lun larufudahan Heowá woun. Ítara kei gayara lan ladügün aban sandi lun tedererun lanigi aban gürigia luma lun mawadigimaridun tan buidu, gayaraati giñe ladügün pantaü lun tedererun wanigi luma lun maganbadi wamá lun Heowá. Ígiratiña meha fariséugu lun tedererun hanigi saragu darí lun maha hamá hánharun lun katei burí le arufudubalin furangu luagu Liráü lan Bungiu Hesusu ani anihein lan lani Bungiu sífiri luagu (Huan 12:37-40). Adügati luriban igaburi le lun heferidiruni chansi lun hawinwandun lun súnwandan (Mat. 23:13, 33). Ligía súdini lubéi wígirun lun tasansiruni Lererun Bungiu luma lani sífiri sandu ligaburi wasaminan luma burí katei le wadügübei lidan wabagari (Sant. 3:17). Kei le ǘnabugu lubéi Santiagu, ígirati lun larufudahan Heowá lun. Ani warihiba wabaruaguounméme, ladüga lan ǘnabugu lan, ligía aban lubéi máisturu buiti.
MÁISTURU WAMÁ BUÍTIÑA KEI MEHA SANTIAGU
8. Kaba íderaguawa lun máisturugu wamá ha buítiña?
8 Maturiahanti meha Santiagu saragu. Houn tábutigu relihión ha lídanbaña dan ligía, ítara liña meha kei Féduru luma Huan aban wügüri le “furumiñeguarügü” (Adü. 4:13). Lau sun lira, aban meha máisturu buiti Santiagu, kei warihini tidan gárada to labürüdüboun. Ítara kei meha Santiagu, másiñati maturiahan wamá saragu. Íbini ítara, lau lídehan lani Heowá sífiri sandu luma arufudahani le wibihibei túmagiñe lóundarun, gayaraati giñe máisturugu wamá ha buítiña. Akutiha waméi lani Santiagu hénpulu ani ariha waméi kaba lan wafurendeira lídangiñe.
9. Kaba hariñaga luagu ligaburi larufudahan Santiagu?
9 Mayusuti meha Santiagu dimurei burí hénrenguti ani ménrenguti ligaburi lafuranguagüdüni katei. Kei resultóu, subudi hamuti meha gürigia ka lan lunbei hadügüni luma ida luba lan hadügüni. Kei burí, dan le larufudahabei Santiagu mosu lan aranseñu hamá kristiánugu lun hasufurirun marichaü mareidahan hagíame igarihabu tidan hanigi. Abürühati: “Wagía, barǘ wamutiña ha awandubalin asufuriruni keisi gürigia gúndaatiña. Aganbaadün luagu luguraasun Hobu, ani subudi humaali giñe ida liña lan fulesei lani Bungiu lagumuhóun oura, lugundun areidati Bungiu, gudemehabu ligía” (Sant. 5:11). Ariha wamuti luagu yusu lanu Santiagu Lererun Bungiu lun larufudahan. Yusu lumutu giñe lun líderaguniña gürigia arihei ru lan Heowá hafayeiruaha ha úaraguabaña lun kei meha líchuguni lun Hobu. Arufudaha lumuti Santiagu katei le lau dimurei le ménrengunti. Ítarati, ru lumuti uéiriguni lun Heowá, mama lúniwagua.
10. Ida luba wáyeihani Santiagu dan le warufudahan?
10 Le wafurendeirubei: Ménrengun lan ligaburi warufudahan ani yusu wamóun Lererun Bungiu. Mabusenrúntiwa warufuduni houn gürigia weiri lan wasubudin, lubaragiñe lira, busentiwa warufuduni houn weiri lan lisubudin Heowá ani berese lan hau (Rom. 11:33). Gayaraabei wibihini katei le ánhawa ayusuroun Bíbülia súnwandan. Kei hénpulu, lubaragiñe wariñagun houn aturiahatiña wama kaba lan hamuga wadüga lun hamuga lídanñadiwa lan halugaarun, lunti wíderaguniña asaminara luagu hénpulu burí tídangiñeti Bíbülia luma lun harihini houngua ka lan lisaminanbei Heowá luma ida liña lan lasandiragun lungua. Ítarati, busenbaña hagundaaragüdüni Heowá mama lun hagundaaragüdüniwa lidan hawinwanduni le hafurendeirubei.
11. Ka meha haturobulinbei fiu hádangiñe kristiánugu ani ka adundehani líchugubei Santiagu houn? (Sant. 5:13-15).
11 Magurabunti meha Santiagu saragu hámagiñe amu. Ariha wamuti tidan ligaradan, subudi lumuti lan meha turobuli le hásügürübei líbirigu lidan afiñeni ani ruti adundehani furanguti houn luagu le lunbei hadügüni. Kei hénpulu, añahein meha fiu kristiánugu darasati hafalaruni adundehani lidan habagari (Sant. 1:22). Añahein meha amu himei hamutiña rísitiña (Sant. 2:1-3). Ani añahein meha amu wuribati meha hayusurunu hañeñe (Sant. 3:8-10). Wéinamuti meha haturobulin kristiánugu burí ha, íbini ítara, marihin lumutiña Santiagu keisi máraninaaña. Ruti adundehani le furanguti houn lau ínsiñeni ani ínchaha lumutiña ha débilibei hamadagua luma Heowá lun háluahan ídemuei hama wéiyaaña lidan afiñeni (aliiha huméi Santiagu 5:13-15).
12. Ida luba gayara lan wíderaguniña aturiahatiña?
12 Le wafurendeirubei: Buidu lan warihiniña amu ani buidu lan wasaminan hawagu. Añahein aturiahatiña hénrenguti houn lun hafalaruni adundehani le tídanbei Bíbülia (Sant. 4:1-4). Másiñati megei hamá dan lun hígiruni luriban échuni lun gayara lan hawinwanduni habagari keisi kristiánugu. Ítara kei Santiagu, mosu wariñaguni houn aturiahatiña lau ganigi megei hamá lun hawanserun. Ani lau sun lira, masaminara wamá wuriba hawagu ani afiñe wamá luagu lachawahabaña lan Heowá ha ǘnabugubaña luouguoun ani líchuguba lan erei houn lun gayara lan hadügün asansiruni lidan habagari (Sant. 4:10).
13. Ka lariñagubei Santiagu? (Sant. 3:2).
13 Ǘnabuti meha ligaburi lasaminarun Santiagu luougua. Masaminarunti meha Santiagu ladügarügü lan lamulen lan Hesusu ligía o ladügarügü lan lidasin lidan leseriwidun, súdinitima lan hawéi amu kristiánugu. Ariñagati hawagu kristiánugu hagía: “Niduheñu hínsiñetiña nun” (Sant. 1:16, 19; 2:5). Mariñagunti giñe luougua machara lan. Lubaragiñe lira, ariñagati: “Sun wagía charatiwa” (aliiha huméi Santiagu 3:2).
14. Ka uagu megei wabéi lun wánharun chará wamá?
14 Le wafurendeirubei: Haritagua waméi gafigoun wamá sun wagía. Moun lumuti wasaminarun, iñu wamá hawéi ha únbaña warufudaha. Ka uagu? Lugundun ánhawa ígira lun lasaminarun aturiahati machara wamá, gayaraati ladügün lira lun lasaminarun siñabei lan ladügüni le lagurabubei Bungiu lun ladügüni. Gama lumoun, dan le wasaminarun anihein lan dan hénrengu lan woun wafalaruni adundehani le tídanbei Bíbülia ani ariñaga wagía lun aturiahati ida liña lan líderaguniwa Heowá adüga asansiruni lidan wabagari, wíderaguñein lun leseriwidun lun Heowá.
Hénpulu burí le layusurubei Santiagu ménrengunti, furanguti ani gunfurandawati. (Ariha huméi párafu 15 luma 16).) *
15. Ida liña meha adundehani le layusurubei Santiagu? (Sant. 3:2-6, 10-12).
15 Yúsuti Santiagu adundehani le ánhingichubarun hanigi amu. Chóuruti íderagua lani sífiri sandu ani másiñati furendei lan saragu ida luba lan larufudahan, lau laturiahani hénpulu le lígirubei Hesusu le líbugaña. Adundehani le líchugubei Santiagu tidan ligaradan furanguti, ani ménrengunti lun gunfurandawa lan (aliiha huméi Santiagu 3:2-6, 10-12).
16. Ka uagu megei wabéi lun wayusurun hénpulu le ménrenguti?
16 Le wafurendeirubei: Yusu wamá hénpulu le ménrengunti lun gunfurandawa lan. Dan le wayusurun hénpulu le ménrengunti lun gunfurandawa lan, wíderaguñanu gürigia adiraarei le haganbubei lidan hasaminan. Ladügüba katei le hadirarubei lidan hasaminan lun haritaguni inarüni súdiniti le tídanbei Bíbülia. Buiti meha Hesusu lidan layusurún hénpulu ani áyeiha lumuti Santiagu le lamulen ligaburi larufudaha. Akutiha wamá aban lídangiñe hénpulu le líchugubei Santiagu ani ariha waméi ka lan uagu buidu lubéi.
17. Ka uagu ménrengun lubéi lun gunfurandawa lan hénpulu le tídanbei ligaradan Santiagu 1:22-25?
17 (Aliiha huméi Santiagu 1:22-25). Wéiriti lubuidun hénpulu tuáguti isubusei luagu saragu resun. Subudi lumuti meha Santiagu furangu ka lan adundehani labusenrunbei larufudahan: lun wasagarun buiti tídangiñe Lererun Bungiu úati buídurügü lan lun waliihanu, mosu giñe wawinwanduni le waliihabei. Yúsuti Santiagu aban hénpulu le meha lunbei ménrengun lan houn gürigia lun gunfuranda hamani: luagu aban wügüri le aríagubei lungua tidan aban isubusei. Ka labusenrubei Santiagu larufudahan? Luagu libidiounigan lan hamuga au lira lárigiñe laríagun aban gürigia lungua tidan isubusei ani aba larihini anihein lan somu katei luougua le mégeibei lun laranseruni, ani madügün lumuti. Ítarameme, warufuduña giñe libidiounigan au, lau masansirun wamani somu mégeiti le wawagubei o le luágubei wagaburi lárigiñe waliihanu Bíbülia.
18. Ka ǘrüwa katei lunbei wadügüni dan le wayusurun hénpulu?
18 Dan le wayusurun hénpulu, gayaraati wáyeihani Santiagu lau wadügün ǘrüwa katei: 1) chouru waméi gani lan hénpulu le lunbei wayusuruni luma tema le uágubei wayanuha, 2) yusu wamá hénpulu le ménrengunti houn gürigia lun gunfuranda hamani, 3) adüga wamá lun furangu lan le wabusenrubei warufudahan. Anhein hénrengu lubéi woun lun wadarirun hénpulu le buiti le gayaraabei wayusuruni, akutiha wamóun Índice de las publicaciones Watch Tower. Lidan fánreinti “Ejemplos” wadariruba saragu hénpulu ñein. Gama lumoun, dan le wayusurun hénpulu warufuduñein súdini lan aban katei luéi le líbiri. Ligíati yusu wamá hénpulu lúnrügü warufuduni puntu le súdinitimabei. Mama lun wíchugun uéiriguni wóuniwagua lébunabei wayusurun hénpulu, wadügüñein lun wíderaguniña sun gürigia ha wayaraatiña lun hádangiñe hamá lumutuniña Heowá ha gúndaabaña.
19. Ida liña warufuduni hínsiñe hamá wábirigu woun?
19 Inarüni meresibirun wamani lubuidun chansi lun waweiridun lóubawagu aban íbugañaü le mafigounti, lau sun lira ruti Heowá aban lubuidun chansi woun lun weseriwidun lun úara hama wábirigu. Arufuda wamuti hínsiñe hamá woun dan le wásügürün dan hama, wafurendeirun hámagiñe, weseriwidun úara hama lau úaraguni lidan dasi lánina apurichihani luma arufudahani. Dan le wáfaagun lun wáyeihani lani Santiagu hénpulu lidan ligaburi wóuserun luma warufudahan, wíchuguña uéiriguni lun Heowá ani íderagua wamutiña gürigia ha harumabaña anigi lun hayarafadun lun Wáguchi hínsiñehabuti le siélubei.
UREMU 114 Gaguraasun wamá
^ Tidan meha Ábanmeme muna laweirida Santiagu luma Hesusu, ligíatima asubudirubalin Liráü Bungiu buidu hawéi ha híbiri gürigia ha meha awinwandubaña lidan dan ligía. Lidan aturiahani le, wafurendeiruba lídangiñe libagari luma le larufudahabei lamulen Hesusu, le meha alidihabalin damuriguaü kristiánu lidan furumiñeti sígulu.
^ Lidan aturiahani le, wayanuhaba luagu Santiagu le lamulen Hesusu, íbini tuéigiñerügüñein lan háguchu íbirigu hamá. Ani anihein giñe ariñahani le arufudubalin ligía lan abürüdübarun gárada to anügübalin liri.
^ Aban meha hádangiñe lílana Musu Úaraguati íbiri Nathan Knorr ani gumuti leseriwidun ya ubouagu lidan irumu 1977.
^ LE ARIÑAWAGÚBEI TUAGU IYAWAÜ: Yúsuti Santiagu aban hénpulu luáguti murusun watu gemeti —aban katei le ménrengunti lun gunfuranda hamani gürigia— lun larufuduni dencha lan tayusurún iñeñein wuriba.