ATURIAHANI 5
Yusu huméi hidaani lidan katei buiti
“Góunigi humá lubeiti buidu ida liña lan hóuserun. Mabagarida humá kei ibidiougua tau, habagarida kei chu tau. Yusu huméi hidaani lidan katei buiti” (EFE. 5:15, 16).
UREMU 8 Heowá naramudaguagülebei
LE LUNBEI WATURIAHANI *
1. Ida liña wásügürün dan luma Heowá?
MA HÍNSIÑETI woun lun wásügürün dan hama gürigia ha hínsiñebaña woun? Gürigia ha maríeibaña hínsiñeti houn lun hásügürün dan hámagua. Ha nibureingiñabaña hínsiñeti houn lun hásügürün dan hama hamadagu. Ani sun wagía hínsiñeti woun lun wásügürün dan buiti hama wábirigu. Lau sun lira, létima hínsiñebei woun lun wásügürün dan luma Bungiu. Ida luba wadügüni? Lau wafurieidun lun, waliihanu Lererun, wararamagun asaminara luagu lisuuni luma luagu lubuidun ligaburi. Sun dan le wásügürübei luma Heowá wéiriti lebegi woun (Sal. 139:17).
2. Ka uagu anihein lubéi burí dan hénrengu lan lun lasügürǘniwa dan luma Heowá?
2 Íbini hínsiñe lan woun lun wásügürün dan luma Heowá, mama súnwandan lun ménrengubei lan. Kei bereseguñu waña lubéi lidan wabagari másiñati ñeinbei lan dan lun hénrengu lan woun lun wetenirun lun katei lánina wamadagua luma Bungiu. Gayaraati ladügün wadagimanu, iduheñu luma burí amu dasi lun wasaminarun hénrengu lan lun wasagarun dan lun wafurieidun, waturiahan luma lun wararamagun asaminara.
3. Ka burí amu katei denchati lunbei wóunigiragun woungua luéi?
3 Anihein aban katei denchati le lunti wóunigiragun woungua luéi. Anihein burí katei le wadügübei, íbini mariban lan, gayaraati ladügün lun madaani wamá lun wayarafadun lun Heowá. Kei hénpulu, gayaraati ladügün somu burí isebáhari buiti woun. Lau sun lira, ánhawa móunigi gayaraabei ladügün lun burí madaani wamá lun katei le lánina wamadagua luma Bungiu. Súdiniti lun wakipuruni isebáhari lidan lilugaarun (Ari. 25:27; 1 Tim. 4:8).
4. Kaba wariha lidan aturiahani le?
4 Lidan aturiahani le, warihibei ka lan uagu megei wabéi lun wayusuruni wadaani keisi lubudubu. Wafurendeiruba giñe ka lan lunbei wadügüni lun wasagarun buiti lídangiñe dan le wásügürübei luma Heowá.
BUIDU LAN WANÚADIRUN ANI YUSU WAMEIME WADAANI LIDAN KATEI BUITI
5. Ida luba gayara lan líderaguniña Éfesuna 5:15-17 nibureintiña lun hanúadiruni üma le buídutimabei lidan habagari?
5 Anúadira waméi üma létima buídubei. Anihán katei létima nidiheridagüdü báaliña saragu nibureintiña. Luagu le aban oubaü, másiñati hínchahaniña máisturugu o agübürigu ha mama gefentiña nibureintiña lun haturiahan lun buidu lan nege habara lidan ubóu le. Gama lumoun, gayaraati ladügün üma le lun heferidiruni liibe-agei hadaani. Luagu le aban oubaü, másiñati ínchaha hamaniña agübürigu o lílana damuriguaü nibureintiña lun hayusuruni hadaani eseriwida lun Heowá. Kaba íderaguei nibureinti le hínsiñebei Heowá lun anúadira buidu? Gayaraati laliihani Éfesuna 5:15-17 (aliiha huméi). Lárigiñe lararamagun asaminara luagu le ariñawagúbei, gayaraati lálügüdagun lungua: “Ka san labusenrubei Heowá lun nadügüni? Kaba katei au lagundaara? Kaba üma íderaguana ayusurei nidaani buidu?”. Haritagua waméi ‘wuribaali lan dan’ ani yarafaali lan dan lun lagumuchun ubóu le, le lábugiñebei lubafu Mafia. Le buídutimabei lun wayusuruni wabagari lun wagundaaragüdüni Heowá.
6. Ka tanúadirubei María ani ka uagu buidu lubéi le tanúadirubei?
6 Ariha waméi kátima lan súdinitimabei. Lun wayusuruni dan buidu, anihein dan mosu wanúadirun lídangiñe bián katei le busén wabéi wadügün lau sun mariban lan biángubei. Anihán le asuseredubei dan le lídinbei Hesusu bisidoun María tuma Marta. Kei meha geresibiradi tubéi Marta gürigia hábiñe ani gunda hagía lau lidin Hesusu bisidaña, aba tetenirun Marta ábougua. Ánhounti María, to tamulelua, aba tañuurun lubadu Hesusu lun taganbuni larufudahan. Madügüntu Marta ni kata wuribati, íbini ítara ariñagati Hesusu tun “anúadira taali María lubuidun-agei katei” (Luk. 10:38-42). Másiñati lau lan lásügürün dan aba lan tabulieiduni María ka lan téigibei weyu ligía, gama lumoun mabulieidun tumuti le tafurendeirubei lúmagiñe Hesusu. Furanguti weiri lan lebegi dan le tun María, le tásügürübei luma Hesusu, wagía sun wéiriti giñe lebegi dan le wásügürübei luma Heowá woun. Ida luba buídutima lan wayusuruni dan ligía?
SAGÁ WAMÉI SUN BUITI LE WAYARAATI LÍDANGIÑE DAN LE WÁSÜGÜRÜBEI LUMA HEOWÁ
7. Ka uagu súdini lubéi wafurieidun, waturiahan luma lun wararamagun asaminara?
7 Haritagua waméi aban lan fánreinti lídangiñe wáhuduragun lun Heowá wafurieidun, waturiahan luma wararamagun asaminara. Dan le wafurieidun, wayanuhaña luma Wáguchi le siélubei, le hínsiñehabubei woun (Sal. 5:7). Dan le waturiahanu Bíbülia wafurendeiruñein “lanichigu lasubudirúniwa Bungiu”, le chútimabei au lidan sun ubóu (Ari. 2:1-5). Ani dan le wararamagun asaminara, wasaminaruña luagu lubuidun ligaburi Heowá, luagu lubuidun lisuuni woun luma houn sun gürigia. Chóuruti, anihán lan igaburi le buídutimabei lun wayusuruni wadaani! Ligíati, ida luba wayusuruni wadaani buidu?
Gayaraati san háluahan aban fulasu le darangilati lun haturiahan hábuguarügü? (Ariha huméi párafu 8 luma 9).
8. Ka hénpulu buiti líchugubei Hesusu woun dan le lídinbei lidoun fulasu mageirawati?
8 Anhein gayara, áluaha wamá aban fulasu le darangilati. Samina wamá luagu le ladügübei Hesusu. Dan le lagumeserunbalin lani ministeriu ya ubouagu, sügüti 40 weyu lidan fulasu mageirawati (Luk. 4:1, 2). Ñein, gayaraati meha lafurieidun luma lasaminarun luagu le labusenrunbei Lúguchi lun. Chóuruti íderagua lani meha katei le lun laranserun lubá óuchawaguni le meha lunbei lásügürüni. Ka wafurendeirubei lídangiñe lani Hesusu hénpulu? Anhein gibe habéi gürigia aganóutiña wábiñe, háfuga aniheinbei lan dan hénrengu lan woun lun wadarirun darangilaü turageirugu waban. Anhein ítara liña lubéi, gayaraati woudin lidoun amu fulasu. Ligíati tadügübei Julie dan le busén tan tásügürün dan afurieida lun Heowá. Lidan aban liraüraü rumu teredera luma tani weiriei ageiraü Faransu ani hénrengu tun lun tábuguarügü tan luma lun ua lan ni kata eberesehoun. Abahüdahatu: “Sagü weyu náfuridun éibuga párükerugu. Ñein, gayaraati nábuguarügü nan, lun nasaminarun luma lun nayanuhan luma Heowá darangilañu”.
9. Íbini weiri lan meha luberesegun Hesusu, ida liña larufuduni weiri lan meha lebegi lumadagua luma Heowá lun?
9 Aban meha gürigia bereseguti Hesusu. Ñein lumuti nidin, súnwandan meha geyegu liña lan hau saragu gürigia ha amuriahabaña luma lun lásügürün dan hama luma lun letenirun houn. Ariñagatu Bíbülia, luagu lan aban dan “aba hóundaragun sun lílana fulasu lubadu” tubenari aban muna lun harihini. Íbini ítara, sagati dan lun lóunigiruni lumadagua luma Heowá. Lubaragiñe larugadun, aba lidin lidoun aban fulasu le darangilati, lun lásügürün dan luma Lúguchi (Mar. 1:32-35).
10, 11. Según Matéu 26:40, 41, ka adundehani líchugubei Hesusu houn lani disipulugu lidan fuluri-agei Hetüsemaní, ani ka asuseredubei?
10 Le lagumuhóun guñoun le laubei Hesusu ya ubouagu, dan le gumú memeeli lani ministeriu, aba láluahan aban fulasu darangilati le ñein lumuti gayara lan lafurieidun luma lun lasaminarun: aba lidin lidan fuluri-agei Hetüsemaní (Mat. 26:36). Ñein, aba líchugun Hesusu adundehani houn lani disipulugu luagu ida luba lan hafurieidun.
11 Ariha waméi le asuseredubei. Dan le hachülürünbei lidoun fuluri-agei Hetüsemaní dárühali, háfuga lóugiñe haali amidi áriebu. Aba lariñagun Hesusu houn lani apostolugu lun herederun agagudúañu ani aba lidin afurieida (Mat. 26:37-39). Dan le lagiribudunbei aba ladariruniña arumuga. Ligía ábaya lubéi lariñagun houn: “Agagudúañu humá, afurieida huguyame” (aliiha huméi Matéu 26:40, 41). Subudi lumuti meha nidiheri hamá saragu weiri ligía lubucha hawagu. Ligía gudemehabu lubéi houn ariñaga ligía houn “ánheinti húgubu, débiliti”. Íbini ítara ñǘdünyati afurieida bián wéiyaasu, ani dan le lagiribudunbei aba larihini mama lan hafurieiduña, harumuguña lan (Mat. 26:42-45).
Gayaraati san hasagarun dan lun hafurieidun dan le maweirin lan lubucha huagu? (Ariha huméi párafu 12).
12. Ka gayaraabei wadügüni anhein sandí wabéi idiheri o lubucha uagu lun wafurieidun?
12 Anúadaha waméi dan le buídutimabei. Háfuga aniheinbei lan dan le ídanbei wasandiragua woungua lau lueirin idiheri luma lau lubucha uagu, ani mámarügüñein wagía asandiragua woungua ítara. Ka gayaraabei wadügüni? Héchutiña meha fiu íbirigu afurieida dan le lagumuchun weyu, gama lumoun ariha hamaali buítimati lan hafurieidun lubaragiñeraü lagumuchun weyu, dan le mabuchadungili lan hawagu saragu. Añahein amu ariha hamaali sandigua hamá houngua buidu dan le hafurieidun ñun o hudugu. Ka lunbei wadügüni anhein nidiheri wabéi o maguraasun wamá lun wafurieidun? Ariñaga waméi lun Heowá ani madiherida wamá, gudemehabuti ani gunfuranda lubadiwa (Sal. 139:4).
Gayaraati san móunabun wamani ariñahani o koréu le óunahounbei woun lidan wagagamurun o katei líbeina lira dan le lídanñadiwa lan adamuridaguni? (Ariha huméi párafu 13 luma 14).
13. Ida liña gayara lan ladügün gágamuru lun ladireirun wasaminan dan le wásügürüña lan dan luma Heowá?
13 Góunigigua wamá woungua luéi katei le agidarubalin wadaani dan le waturiahan. Mámarügüñein furíei wemegeira lun wederebudagüdüni wamadagua luma Heowá mégeitiwa giñe waturiahanu Lererun luma lun wadamuridagun. Gayaraati san wasagarun saragu buitu lídangiñe wasagarun dan lun waturiaha luma lun wadamuridagun? Álügüdagua wamá woungua: “Ka burí san katei eberesehabalina uguñe weyu?”. Laguarún san nun o labürühóun nun luéigiñe gágamuru, labürühóun nun luéigiñe koréu o katei líbeina lira? Huuti burí katei le uguñe weyu ani yusu hamuti saragu míñunu gürigia. Ariñagatiña fiu sásaamu dan le lan láfaagun aban gürigia lun líchuguni lisaminan lidoun le ladügübei, láurügü ñein lan aban gágamuru yarafa lun gayaraati ladireirun lisaminan. Afuranguagüdati aban máisturu: “Meteniti gürigia lun le ladügübei. Lídanñein amu fulasu lisaminan”. Anhein amuriahóua lubéi wama lubaragiñe lagumeserun aban adamurini lun wesetiruni wagagamurun lidan aban igaburi lun meberesehan lani haganbun ha híbiri, ka uagu madügün wabalin ligiaméme dan wásügürüña lan dan wábuguarügü luma Heowá?
14. Según Filipuna 4:6, 7, kaba ladüga Heowá lun líderaguniwa lun madireirun lan wasaminan?
14 Amuriaha wamá luma Heowá lun líderaguniwa lun madireirun lan wasaminan. Anhein waturiahaña lubéi o lídanñadiwa lan aban adamuridaguni ani aba wíchugun fe ladireiruña lan wasaminan, amuriaha wamá ídemuei luma Heowá. Anhein anihein lubéi katei le adiheridagüdütiwa, háfuga hénrengubei lan woun lun wígiruni idiheri luagu amu oubaü lun wetenirun lun le larufudahabei Heowá woun; gama lumoun súdiniti lun wadügüni. Furíei wamá lun Heowá lun líchuguni darangilaü le wemegeirubei woun lun wóunigirunu wanigi luma wasaminan (aliiha huméi Filipuna 4:6, 7).
BUITI LE WASAGARUBEI DAN LE WÁSÜGÜRÜN DAN LUMA HEOWÁ
15. Írida humá aban lídangiñe buiti le wibihibei dan le wásügürün dan luma Heowá?
15 Wasagaruba saragu buiti ánhawa asagara dan lun wayanuhan, waganbuni luma wasaminarun luagu Heowá. Kaba burí buiti wibiha? Furumiñe, buídutimabei wanúadahan. Ariñagatu Bíbülia: “Ha óundaragutiña hama chu tau, lachuuduba hau” (Ari. 13:20). Ligíati, dan le wásügürün saragu dan luma Heowá —le chútimabei au ubouagu—, ábatima lachuudun wau. Buídutimabei gunfuranda wamani ida luba lan wagundaaragüdüni ani madügünbadiwa ni kata le gayaraati lírudagüdüni.
16. Ka uagu buídutima lubéi warufudahan dan le wásügürün saragu dan luma Heowá?
16 Libiaman, buídutima báadiwa keisi máisturugu. Dan le wíchugun aturiahani tídangiñe Bíbülia, le wabusenrubei wibihin wíderaguni aturiahani ayarafada lun Heowá. Eibu wayanuhan luma Wáguchi le siélubei, wéiritimabei línsiñe woun ani buídutimabei warufudahan houn amu lun giñe línsiñedun Heowá houn. Ligía meha asuseredubei lun Hesusu. Dan le meha layanuhan luagu Lúguchi, arufudati meha saragu ínsiñe darí lun aba lan giñe línsiñedun Heowá houn lani disipulugu ha úaraguabaña (Huan 17:25, 26).
17. Ka uagu íderagua lubaliwa furíei luma waturiahanu Bíbülia wábuguarügü lun derebugu lan wafiñen?
17 Lǘrüwan, derebugutimaabei wafiñen. Samina wamá luagu le asuseredubei dan le wamuriahan adundehani, gurasu luma ídemuei luma Bungiu. Sagü lóunabuniwa, ábatima lederebugudun wafiñen (1 Huan 5:15). Ábaya katei le adügübei lun léredun wafiñen, waturiahan wábuguarügü. Ariñagatu Bíbülia: “Lídangiñe haganbuni gürigia uganu hafiñera” (Rom. 10:17). Furanguti, anhein busén wabéi lun wederebudagüdüni wafiñen, úati buídurügü lan lau wafurendeirun fiu katei. Ka amu katei lunbei wadügüni?
18. Afuranguagüda huméi ka lan uagu súdini lubéi lun wararamagun asaminara.
18 Ráramagua wamá asaminara luagu le wafurendeirubei. Samina wamá luagu abürühati Sálumu 77. Nidiheriti meha lugundun samina lan magundan lan Heowá lau luma hau ísüraelina. Wéiriti meha lidiheri darí lun siñá lan larumugun (bérusu 2-8). Kati ladügübei? Aba lariñagun lun Heowá: “Nasaminaruba luagu sun le ladügübei” (bérusu 12). Chóuruti, subudi lumuti lan meha abürühati Sálumu sun katei buiti le meha ladügübei Heowá hawagu lumutuniña lidan dan le sügühalibei. Íbini ítara, álügüdaguati meha lungua: “Bulíeigua funagia Bungiu luéi lareini? Wéiriti funagia ligañi darí lun magudemehabuhaali lan?” (bérusu 9). Ráramaguati meha abürühati Sálumu asaminara luagu sun le ladügübei Heowá, luagu lareini luma luagu gudemehabu le meha larufudubei houn ísüraelina lidan binadu dan (bérusu 11). Ligíati, chóurugüda lumuti katei le, mígirun lubaña lan Heowá lubúeingu (bérusu 15). Ítarameme, derebugutimaabei wafiñen lau wararamagun asaminara luagu le adüga láalibei Heowá hawagu sun lubúeingu luma luagu kada aban wádangiñe.
19. Kaba amu katei wibiha dan le wásügürün dan luma Heowá?
19 Ligadürün, wéiritimabei línsiñe Heowá woun. Anihán katei létima súdinibei. Ka uagu? Lugundun ínsiñeni ligía igaburi le gayaraabei línchahaniwa lun gaganbadi wamá lun Heowá, lun wadügün sákürifisiu luma lun wawandun furumiñeguarügü óuchawaguni (Mat. 22:37-39; 1 Ko. 13:4, 7; 1 Huan 5:3). Úati ni kata súdinitimati luéi wamadagua luma Wabungiute Heowá le hínsiñehabubei (Sal. 63:1-8).
20. Ka hisaminanbei hadügün lúntima hásügürün saragu dan luma Heowá?
20 Haritaguaya waméi, wafurieidun, waturiahan luma wararamagun asaminara ligía aban fánreinti súdiniti lidan wáhuduragun lun Heowá. Ítara kei Hesusu, sagá wamá dan ani áluaha wamá fulasu le darangiluti lun wásügürüni dan luma Heowá. Góunigi wamá luéi burí katei le gayaraabei ladireiragüdüni wasaminan. Ani dan le wadügüña lan somu katei le gániti luma wamadagua luma Heowá, amuriaha wamá luma lun líderaguniwa íchigei wasaminan lidan le lunbei wadügüni. Ánhawa ayusurei dan buidu labinirubadiwa Heowá lau ibagari magumuchaditi lidan iseri ubóu (Mar. 4:24).
UREMU 28 Ida luba lumadagu wamá Bungiu
^ Heowá ligía bésibei wamada. Woun wéiriti lebegi wamadagua luma, ligía busén wabéi wasubudiruni sagü weyu lúmati lun buidu lan wamadagua luma. Gama lumoun barüti lira saragu dan, ani sun wagía bereseguñu waña lidan wabagari. Ligíati halíagiñeba wasagara dan lun wayarafadun lun Wáguchi le siélubei, ani kaba buiti wibiha dan le wadügüni? Warihibei lidan aturiahani le.