1. Ida liña larufuduni wügüri samariana le lareidaguagüdübei Hesusu leteingiradi?

ANIHEIN meha lépüra hawagu diisi wügüriña hagía ani ibidiñeti meha houn kaba lan hadüga. Aganbaaña meha luagu Máisturu le Wéirigutimabei, Hesusu, luagu gayara lan meha lareidaguagüdün furumiñeguarügü sandi ani afiñetiña meha gayara lan lareidaguagüdüniña. Ligíati dan le lachülürünbei weyu lun harihini, aba hagúaragun lun: “Hesusu, Máisturu, gudeme wamá bun!”. Aganba lumuti Hesusu hayumuragun, ábati lareidaguagüdüniña sunsuinagubei. Chóuruti seremei hamani súngubei hagía luagu le ladügübei hawagu. Gama lumoun, ábanrügüñein arufudei leteingiradi * lau le lariñagubei. Wügürirügüñein ligía, le meha samariana, asandira lunti lan lalawahani Bungiu lau umalali héreti (Luk. 17:12-19).

2, 3. a) Ka gayaraabei ladügün lun marufudun wamani weteingiradi? b) Kaba wariha lidan arütíkulu le?

² Ítara kei meha wügüri samariana, chóuruti busén wamá giñe lun weteingiruniña ha adügübaña buiti woun. Lau sun lira, gayaraati anihein lan dan wabulieiduni warufuduni dandu lau le wariñagubei kei lau le wadügübei seremei wamaniña.

³ Lidan arütíkulu le, warihibei ka lan uagu súdini lubéi lun geteingiradi wamá. Ani wakutihabei giñe le hadügübei saragu gürigia ha lídangiñetiña tidaani Bíbülia ha meha geteingiradibaña hama ha metengiradibaña. Lárigiñe, wakutihaba luagu burí le gayaraabei wadügüni lun warufuduni weteingiradi.

4, 5. Ka uagu lunti lubéi warufuduni weteingiradi?

⁴ Heowá íchugubalin hénpulu lánina larufudúniwa geteingiradi.  Aban lídangiñe igaburi le aubei larufudei lau líchugun afayeiruahaü houn ha hínsiñehabubaña lun (2 Sam. 22:21; Sal. 13:6; Mat. 10:40, 41). Ariñagatu Bíbülia woun: “Kei lirahüñü hubéi Bungiu ha hínsiñetiña lun, houcha humá háyeihani” (Efe. 5:1). Ligíati, dan le wáyeihani ligaburi Heowá ligía aban lídangiñe igaburi súdinitimati le aubei warufudei weteingiradi.

⁵ Gayaraati lafuranguagüdüniwa le libiaman resun lau hénpulu le. Ítara liña geteingiradi kei aban éigini semeeti, semeetimati dan le wéigiñein lan úara hama amu. Adügati wasandiruni geteingiradi hamá amu lun wagundaarun. Ani adügati warufuduni geteingiradi wamá lun hagundaarun amu. Ka uagu? Ladüga rútiña fe hu lan áfaaguni le hadügübei lun híderaguniwa o híchuguni le wemegeirubei woun. Adügatiti katei le lun lederebugudun wamadagua hama.

6. Ka idan genegegua lan dimurei burí lánina eteingiruni tuma burí mansana lautu golu?

⁶ Wéiriti lebegi dimurei lánina eteingiruni. Ariñagatu Bíbülia: “Dimurei le ariñawagúti lidan dan; ítara liña kei mansana lautu golu lidan pülata” (Ari. 25:11). Ma buídumeraütu hamuga aban mansana lautu golu lau uéndeni le pülata? Ani inarüni gebegitimaboun lan hamuga. Ida luba hamuga wasandiragun woungua anhein edewehóua aban katei ítarati woun? Dan le wariñagun fiu dimurei burí lánina eteingiruni lun aban gürigia gayaraabei weiri lan lebegi lun. Ani ítara kei gebegi tan aban mansana golu luagu saragu dan, gayaraati giñe gebegi lan dimurei burí lánina eteingiruni le wariñagubei lun aban gürigia lun sun libagari.

7. a) Según Sálumu 69:30, ida liña larufuduni Dawidi leteingiradi? b) Ida liña harufuduni ladügawagun Asafü heteingiradi?

⁷ Dawidi ábanbei hádangiñe lubúeingu Bungiu ha lánina binadu dan ha arufudubalin heteingiradi (aliiha huméi Sálumu 69:30). Arufuda lumuti tídangiñe sun lanigi weiri lan  lebegi áhuduraguni lun Heowá lun. Kéiburi dan le líchugunbei saragu seinsu luma umegeguni lun tábunawagun ténpulu. Ladügawagun Asafü hagía amu lubúeingu Heowá ha arufudubalin gebegi lan áhudurawaguni lun Bungiu houn. Arufuda hamuti heteingiradi lau habürühan sálumu, mini lan le uremu burí lun lalawahóun Bungiu. Lidan aban lídangiñe uremu ligía, rútiña seremei lun Heowá lau aban tueirin anigi luagu lubuidun burí katei le ladügübei (Sal. 75:1). Furanguti larihíniwa busén lan meha dandu Dawidi kei ladügawagun Asafü harufuduni weiri lan lebegi sun abiniruni le resibi hamaalibei lúmagiñe Heowá houn. Agia wagía, ida luba wáyeihaniña?

8, 9. a) Ida liña larufuduni apostolu Pábulu gebegi hamá líbirigu lun? b) Ida liña funa san hasandiragun houngua?

⁸ Gebegitiña meha líbirigu apostolu Pábulu lun ani arufuda lumuti lau le lariñagubei hawagu. Kei hénpulu, súnwandan meha líchugun seremei hawagu lidan furíei le ladügübei lábugua. Ani tidan gárada to lóunahaboun houn, ariñagati houn hínsiñe hamá lun. Lidan Rómana 16:1-15, írida lumuti hiri 27 kristiánugu. Haritagua lágiña meha ani ariñagati tuagu Pürisika luma Akila: “Ru hamuti habagari guánarügü lidoun lénrengunga lun hasalbaruni nibagari”. Ani ariñagati tuagu Febe, “saraguhaña [lan] tíderagun” ani ligía lan haganagua. Ayanuhati buidu hawagu íbirigu hínsiñewatiña ha, ha áfaagubaña saragu.

⁹ Subudi lumuti meha luagu chará hamá íbirigu ha. Íbini ítara, aba letenirun lun lubuidun hagaburi ani bürǘ lumuti lidan tagumuchagüle gárada to labürüdüboun houn kristiánugu rómana. Ligíati, dan le taliihóunbei gárada houn lílana damuriguaü, chóuruti gunda lan hasandiragun íbirigu hagía houngua lau haganbuni le lariñagubei Pábulu hawagu. Ani chóuruti aba lan lederebugudun hamadagua luma. Ítara waña san kei Pábulu, gabügürüguati san wíchugun seremei houn wíbirigu ha lílana damuriguaü luagu le hariñagubei luma le hadügübei?

10. Ka gayaraabei wafurendeirun lídangiñe lasubudiragüdüni Hesusu houn lánigu gebegi lan sun le hadügübei lun?

¹⁰ Lidan uganu le lóunahabei Hesusu lun fiu damuriguaü le meha lídanbei Liraüraü Asia, subudigüda lumuti houn gebegi lan wadagimanu le hadügübei lun. Kei hénpulu, gumese lumuti uganu le lóunahabei lun damuriguaü le Tiatirabei lau dimurei burí le: “Subudi numuti sun le hadügübei; subudi numuti hínsiñehabu, hafiñen, heseriwidun lau huguraasun, subudi numuti giñe luagu hadügüña lan katei buiti guentó luéi meha furumiñe” (Aruf. 2:19). Mama ariñagarügüti gánwoungüda hamani buiti le hadügübei, ariñagati giñe houn buidu lan igaburi le ínchahabaliña adügei hawadigimari buidu. Inarüni mosu lan meha lererehan houn fiu kristiánugu ha lídanbaña damuriguaü ligía, íbini ítara, gumese lumuti ani gumú lumuti uganu le líchugubei houn lau dimurei burí le ruti dǘgüdaguaü (Aruf. 2:25-28). Hesusu lichügüdinabei sun damuriguaü, ligíati, gabafuti luagu damuriguaü. Ani mama mosu leteingiruniwa luagu le wadügübei luagu. Íbini ítara, subudigüda lumuti buiti le wadügübei woun. Chóuruti ru lan aban hénpulu buiti houn wéiyaaña lidan afiñeni.

11. Kei aubei larufudei Ebüréu 12:16, ida liña meha larihini Esaú katei sagüráuti?

¹¹ Híruti añahein lan gürigia ha lídangiñetiña tidaani Bíbülia ha meha arufudubaña meteingiradi. Ariha waméi le ladügübei Esaú. Íbini meha hínsiñe lan Heowá houn lagübürigu ani inebe ligía houn, marufudunti gebegi lan katei sagüráuti lun (aliiha huméi Ebüréu 12:16). Ida liña larufuduni igaburi le? Aba lóufudahan alugurei liricha keisi íbugañaü lun Hakobu le  lamulen luagu aban asiedu lenteha gisóu (Agu. 25:30-34). Dan lárigiñe, aba lasakürihan luagu le ladügübei, aba lekeharun lau igañi lau meresibirun lani abiniruni le yuubei lun keisi ibugañaü. Gama lumoun, mébunati meha lekeharun lugundun arufuda laali meha mebegi lan le lúmabei lun.

12, 13. Ida liña harufuduni ísüraelina meteingiradi hamá ani ida liña lidin houn?

¹² Gíbeti yebe lébuna harufuduni ísüraelina heteingiradi. Óunahaali meha Heowá diisi íñanaü Ehiptun lun lesefuruniña lídangiñe amudirawaguni. Ani murusun dan lárigiñe, aba lesefuruni habagari lau láfaraguniña súdaragu ehiptuna lidan barana Funati. Seremei hamuti Bungiu saragu darí lun hadügün aban uremu le lánina agañeiruni lun. Átiriñeinti dan lidura eteingiruni le hasandirubei?

¹³ Dan le hagagibudagunbei luma lénrengunga, aba habulieiduni sun le adüga láalibei Bungiu hawagu ani aba harufudun meteingiradi (Sal. 106:7). Ariñagatu Bíbülia aba lan “hagumeserun sun hagía adimureha wuriba luagu Moisesi luma Aarón” ani le linarün katei luagu meha Heowá hadimureha wuriba (Afu. 16:2, 8). Hírugüda hamuti saragu darí lun lariñagun dan lárigiñe hóunweguba lan sun gürigia hagía lidan fulasu mageirawati, Kalebürügübei lan luma Hosué móunwegun ñein (1 Lur. 14:22-24; 26:65). Ka gayaraabei wadügüni lun máyeiha wamani luriban igaburi le luma lun wáyeihani le buídubei? Ariha waméi.

14, 15. a) Ida luba harufuduni maríeitiña heteingiradi? b) Ida luba harufudahan agübürigu houn hasaanigu lun geteingiradi hamá?

¹⁴ Houn iduheñu. Sun iduheñu sagatiña buiti dan le geteingiradi lan kada aban hádangiñe lílana. Éibutima harufudun maríeitiña geteingiradi hámagua, lídantimabaña aban ani ménrenguntimabei houn lun ferudunagua hamá hámagua. Wügüri maríeiti le arufudubei gebegi tan lani weiriou lun mámarügüñein lun dimurei buiti le tariñagubei luma le tadügübei letenira, adimurehati giñe buidu tuagu (Ari. 31:10, 28). Ariñaga tumuti giñe würi maríeitu lun tani weiriei ka lan hínsiñebei tun luagu.

¹⁵ Agübürigu, ida luba harufudahan houn hisaanigu lun geteingiradi hamá? Haritagua huméi áyeiha hamani isaanigu le hariñagubei luma le hadügübei agübürigu. Ligíati, ru humá hénpulu buiti houn lau heteingiruniña dan le hadügün somu katei buiti hun. Ani arufudaha humá houn lun geteingiradi hamá dan le hadügün amu katei buiti houn. Íderagua humaña gunfurandei tídangiñe lan anigi láfurida  geteingiradi ani gayara lan líderaguniña dimurei le hariñagubei amu gürigia. Aban hénpulu, ariñagatu aban íbiri gíritu Clary: “Dan meha le 32 lubéi irumu tau núguchu, sódini aba terederun tábugua agüriahaña ǘrüwagubei tisaanigu. Dan le nagunfulirunbei 32 irumu, aba níchugun fe mosu lan meha hénrengu lan ibagari tun lidoun dan ligía. Ábati nariñagun tun teinki nani sun sákürifisiu le tadügübei wawagu. Málügili aba tariñagun nun aniheingua lan dimurei le nariñagubei tun tidan tanigi, samina tan luagu súnwandan ani gúndaagüda lanu”.

16. Abahüdagua humá aban sügǘ le arufudubalin ru wamá gurasu houn amu dan le warufuduni weteingiradi houn.

¹⁶ Houn íbirigu lidan damuriguaü. Rútiwa gurasu houn íbirigu dan le warufudun geteingiradi wamá houn. Ariha waméi le asuseredubei lun aban wéiyaali lidan afiñeni le gíribei Jorge, 28 irumu lau. Kei aba lubéi lasandirun, sügüti aban hati mídinga adamuridagua. Danya le lagumeserunbei adamuridagua, siñagili meha líchugun yanu. Ariñagati: “Móuniti meha nasandiragun nungua ladüga siñá lan netenirun lun nidasin lidan damuriguaü. Aban weyu, dan le layarafadúnbei aban íbiri nun lárigiñe adamuridaguni, aba lariñagun nun: ‘Busentina neteingirunibu luagu lubuidun hénpulu le bíchugubei houn niduheñu. Chóuruti ibidiñe lan bun weiri lan línsiñe woun waganbahani yanu le bíchugubei lidan sun irumu burí le. Adügaali biyanun lun buídutima lan wamadagua luma Heowá’. Ítagaraü yebe nayahun oura ligía. Ligía meha nemegeirubei naganbun”.

17. Ítara kei lariñawagún lidan Kolosana 3:15, ida luba weteingiruni Heowá luagu le líchugubei woun?

¹⁷ Lun Wabungiute le gíchigadibei. Ruti Heowá saragu ariñahani woun le ítarabei kei éigini. Kei hénpulu, resibitiwa ariñahani le huuti lidan wadamuridagun, garüdia luma burí páhina lidan Internet. Ma gúndaatiwa dan le waganbun aban yanu, aban arütíkulu o programa lidan JW Broadcasting ani saminatiwa anihán lan le wemegeirubei? Ligíati, ida luba warufuduni lun Heowá teinki wamani luagu idewesei le? (Aliiha huméi Kolosana 3:15). Wafurieidun súnwandan lun wíchugun seremei lun Heowá ábanbei lídangiñe (Sant. 1:17).

18. Ida liña warufuduni gebegi tan Luban Wadamuridagun woun?

¹⁸ Anhein wakipura fulasu le ñein lubéi wáhuduragua lun Heowá harumañu ani kipu wameime sun katei lidan lilugaarun warufudubei giñe lun seremei wamani. Ligía, wídehanbei lidan tarumadahóun luma taransehóun Luban Wadamuridagun. Ani ha arihibaña lau umegeguni le ahuudubei lun amuri luma lun larihíniwa bidéu lidan damuriguaü, góunigi hamuti hayusuruni.  Dan le téniwa lan tun Luban Wadamuridagun, duratimaatu ani míbeti aransehani le súdiniti temegeirun. Ítarati, aniheinbeitima seinsu lun tábunawagun luma lun taranserawagún amu burí Luban Adamuridaguni lidan sun ubóu.

19. Ka wafurendeirubei lídangiñe le asuseredubei lun aban óunigiruti sirkuitu tuma lani weiriou?

¹⁹ Houn ha awadigimaridubaña saragu wawagu. Gayaraati ladügün dimurei burí lánina eteingiruni le wariñagubei houn amu lun hasansiruni ligaburi harihini turobuli le úmabei hagagibudagua. Ariha waméi le asuseredubei lun aban óunigiruti sirkuitu tuma lani weiriou. Aban weyu, lárigiñe hagiribudun lídangiñe hapurichihan, aba hachülürün tidan muna to ñein lubéi heredera lau lubucha uagu ani diligati weyu ligía. Hanarimeti lidiliga weyu ligía darí lun tidin lani weiriou arumuga tau sun tadaüragun to lánina lidiliga. Larugan binaafin, aba tariñagun lun tani weiriei masandiragun tan tungua buidu lun tasigirun eseriwida lidan sirkuitu. Binaafin ligía, aba teresibirun aban gárada Betelirugugiñe. Tidan gárada tuguya, ariñawagúati lau ínsiñehabuni tun buidu lan tadüga lau teseriwidun luma tawandun, ariñawagúati giñe tun gabaroun hamani hénrengu lan lun gürigia lerederun aweiyasuha sagü dimaasu lidoun amu burí fulasu. Ariñagati tani weiriei: “Chülüti dimurei ligía tidoun tanigi darí lun mayanuhandigiaaru lan luagu tígiruni teseriwidun lidan sirkuitu. Ani dan le nasaminarunbei meha nígiruni neseriwidun lidan sirkuitu, tuguya íderagubalina lun nasigirun”. Rédeitiña íbirigu ha eseriwida lidan sirkuitu yarafa lun 40 irumu.

20. Ka katei lunbei wáfaagun luagu sagü weyu ani ka uagu?

²⁰ Áfaagua wamá sagü weyu lun warufuduni weteingiradi. Gayaraati dimurei lan le wariñagubei luma le wadügübei ligía lan lemegeirubei aban gürigia laganbun lun gayara lan lidin lubaruaguóun lidan ubóu meteingiraditi le. Ani gayaraati lídehan warufuduni weteingiradi lun wadügün umadaguaü le durati lun súnwandan. Ani le súdinitimabei, wáyeihabei lan Wáguchi Heowá le gíchigadibei.