Badiseiti John Mills, le núguchi, lidan irumu 1913 uburugu Newayóru, dan meha 25 lubéi irumu lau. Íbiri Russell íchugubalin yanu lánina badisei. Murusun dan lárigiñe, aba láguyun núguchi lidoun ubouhu Trinidad, ñein lubéi lamarieida tuma aban Gefentu chubalugutu gíritu Constance Farmer. Íderagua lumuti núguchi William Brown, * le lumada, lun burí larufuduni “Foto-Drama de la Creación” darí irumu 1923, dan le lóunahounbei íbiri Brown tuma lani weiriou Áfürikoun. Rédeitiña nagübürigu Trinidad ani hádangiñetiña meha ha hemenigibaña houdin sielun.

Nefuñanun meha hasaanigu nagübürigu. Aba híchugun Rutherford luagu furumiñeti hasaani, lugundun ligía meha líribei íbiri le meha arihibei tau Óundaruni Watch Tower lidan dan ligía. Lárigiñe aba nagüriahóun, 30 lidan duusu-hati, irumu 1922. Aba híchugun Woodworth nuagu lugundun Clayton Woodworth meha liri íbiri le meha arihibei lau labürühóun arütíkulu tidan garüdia The Golden Age (to gíriboun uguñe weyu Agaguduabá!). Óunaha hamutiwa nagübürigu leskuela, lau sun lira ténitimatiña meha lun hínchahaniwa lun waganwoundagüdüni weseriwidun lun Heowá. Buitu meha núguchu lun tadügün lun wafiñerun luagu burí saminaü le tídanbei Bíbülia. Hínsiñeti meha lun núguchi labahüdahan abahüdaguni tídangiñeti Bíbülia woun lau layusuruni sun lúgubu luma lumalali lun gayara lan wasaminarun luagu le asuseredubei lidan abahüdaguni.

Adügati áfaaguni le hadügübei lun buidu lan lidin woun lidan weseriwidun. Seingüñadiwa wügüriña ani ǘrüwa wádangiñe ñǘdüntiwa tidan Leskuela Galaadü. Ani seriwitiña ǘrüwa hádangiñe nítunu kei prekursorugu Trinidad luma Tobagu. Lau harufudahan wagübürigu woun luma lau lubuidun hagaburi, adügati lun weseriwidun lun Heowá, kei aubei lariñagei Sálumu 92:13. Íderagua lumutiwa gurasu le híchugubei woun lun werederun lidan weseriwidun luma lun wabuiduragüdüni wamadagua luma Heowá.

 Wábiñegiñe meha ladügǘwa aransehani lun apurichihani. Ñein meha hóundaragua prekursorugu ani liibe-agei dan ayanuhatiña meha luagu íbiri George Young, aban meha misioneru kanadána le ñǘdünbei abisidahei ubouhu Trinidad. Ani ayanuhatiña meha nagübürigu lau saragu ugundani hawagu ha meha hapaanábaña lidan apurichihani, íbirigu Brown, dan meha ligía heseriwiduña meha Áfürika. Ínchaha lumutina sun katei le lun nagumeserun apurichiha dan le 10 lubéi irumu nau.

Lidan meha dan ligía, furanguti meha tayanuhan wani agumeiraguagüdüni luagu relihión mama inarüniti, tábutigu bísinisi ha igaaduabaña luma liwiye hóuserun lílana polítika. Ligíati, lidan irumu 1936, aba hadügün tábutigu ligilisi lun mígirun lan gumadimati lun tebelurun luma lun tayusurún agumeiraguagüdüni to tani Watch Tower. Aba waramudunu ani sigitiwa ayusuroun darí lun tagumuchun. Amarücharatiwa meha lun wíchugun ariñahani, ñüdün wagía tidan burí beiki tau tratadu tuma tau burí gárada lau abürüdǘni. Ñǘdüntiwa apurichiha úara luma sétanu le meha apurichihabei lidan aüdü Tunapuna, tau karü to meha lauboun máhina lun laganbún yanu dise, apurichihatiwa íbini lidan burí fulasu le dísetimabei Trinidad. Adügati lubuidun burí sügǘ le nawinwandubei lun nabadiseirun dan le 16 lubéi irumu nau.

Adügati alagan le nibihubei hámagiñe nagübürigu luma sun le nawinwandubei lidan apurichihani lun busén nan neseriwidun kei misioneru. Busénmemegidina meha neseriwidun kei misioneru dan le nídinbei apurichiha lidan irumu 1944 lidan ubouhu Aruba úara luma íbiri Edmund Cummings. Wéiriti meha wagundan lau hachülürün diisi gürigia lidoun Aritaguagülei lidan irumu 1945. Irumu lárigiñe, aba lagumeserun aban damuriguaü lidan ubouhu ligía.

Murusun dan lárigiñe, aba napurichihan tun aban nupaaná lidan wadagimanu gíritu Oris Williams. Hanarimeti meha línsiñe tafiñen tun ani mígiraguagüdün meha tungua lun le narufudahabei tun. Íbini ítara, lau taturiahanu Bíbülia, aba tafurendeirun kátima lan tarufudahabei Lererun Bungiu ani aba tabadiseirun 5 lidan eneru, irumu 1947. Lau lásügürün dan, aba wínsiñedagun wámagua ani aba wamarieidun. Lidan unsu-hati, irumu 1950 aba tagumeserun eseriwida kei prekursora. Wínwantiwa lubuidun burí sügǘ úara.

Lidan irumu 1955, aba wagunbirahóun tidoun Leskuela Galaadü. Ábati wígiruni wawadigimari, aba walugurunu waban luma amu burí wamegen ani aba woudin Arubagiñe. Wein-nefu lidan sedü-hati, irumu 1956, aba weresibihan tídangiñe külase 27 tidan Leskuela Galaadü ani aba wounahóun Niherioun.

Dan lárigiñe, dan le tasaminarunbei Oris luagu dan ligía, aba tariñagun: “Íderagua lumutibu lani Heowá sífiri lun béchudun luagu ibagari lánina misioneru, dandu luagu le buídubei luma le mabuidunbei. Mítaranti meha nisaminan kei lisaminan nani weiriei, mabusenruntina meha lun neseriwidun kei misionera. Hímeinagili yebe lun gaban wamá luma lun gasaanigu wamá. Lau sun lira, aba lasansirun nisaminan dan le gunfuranda nani lisudinin lapurichihóun uganu buiti lau lóufudagun. Ligíati, dan le weresibihanbei tídangiñe Leskuela Galaadü, aranseeli meha nisaminan lun neseriwidun kei misionera. Dan le wádinuña lan tidoun waporu to gíriboun Queen Mary, aba lariñagun íbiri Worth Thornton woun, le meha nadagimeinbei tidan lani íbiri Knorr áfisi, aguraba lan lun buidu lan lidin woun ani tídanba lan Beteli weseriwida. Aba nírudagun. Lau sun lira, aba néchudun luagu nidasin lau lóufudagun ani aba línsiñedun nun. Ídehatina lidan saragu dasi Betelirugu. Létima hínsiñetimabei nun neresibiruniña gürigia. Hínsiñetiña meha gürigia nun ani adügati meha dasi le lun netenirun houn íbirigu. Saragu hádangiñe, chülütiña meha buin lau kaliki, buchá meha hawagu, mágürabu hagía ani lau ilamaü. Gúndaatina meha lau níderaguniña lun buidu lan hasandiragun houngua. Sun meha katei le, eseriwiduni sagüráuti lun Heowá ani ligía meha nasandiragunbei nungua buidu ani lau ugundani”. Le linarün katei, íderagua lumutiwa sun wadasin lun wabuiduragüdüni wamadagua luma Heowá.

Lidan irumu 1961, lidan aban adamuridaguni hama iduheñu lidan ubouhu Trinidad, aba labahüdahan íbiri Brown luagu lubuidun burí sügǘ le lawinwandubei Áfürika. Lárigiñe, aba nabahüdaha houn luagu ligaburi lawanserun wadagimanu Niheria. Aba lóuburunina íbiri Brown lau ínsiñeni ani aba lariñagun lun núguchi: “Johnny, mídintibu Áfürika, lau sun lira, ñǘdünti Woodworth”. Ábati lariñagun núguchi: “Bubaruaguounbá Worth, bubaruaguounbá!”. Adügati gurasu le híchugubei wügüriña wéiriti hafiñen ha nun lúntima busén nan nagunfulirun lau nidasin sunsuinagubei.

 Lidan irumu 1962, ibiha numuti lubuidun chansi lunya nidin tidan Leskuela Galaadü tidan külase 37, ñein lubéi larufudahóua nun luagu diisi hati. Ñǘdünti íbiri Wilfred Gooch, le meha arihibei tau Beteli Niheria, tidan külase 38 ani aba lounahóun Ingülatéroun, ábati niridún leweñegua. Ítara kei íbiri Brown, aweiyasuhatina meha saragu ani ídehati katei le lun nasubudiruniña íbirigu niherianu buidu luma lun hínsiñedun nun. Lau sun meha mibe lan hámati, mama kei gürigia ha awinwandubaña lidan burí ageiraü le awanseti, arufuda lumuti meha furangu ugundani le hawagubei mama lan luagu liibe lúmati gürigia o gaseinsun lan adügübei lun gunda lan. Gúndaatiwa meha lau warihiniña íbirigu lidan adamuridaguni lau sun le gádanbaliña, harumatiña ani buiti harihín. Chülütiña meha saragu lidoun adamurini tidan burí durugu tuma burí tidan bolekajas, * aban tuwuyeri busu to hunren liña touba to kamanitu ñein. Liibe-agei dan, bürüwañu liña meha dimurei kéiburi le tuagu: “Adügati saragu lédedehan duna aban óunwenbu barana”.

Ani inarüni dimurei burí ligía! Ídehati liraüraü áfaaguni le ladügübei kada gürigia ani ídehatiwa giñe. Lidan irumu 1974, aba Niheriahali lan libiaman ageiraü, lárigiñe Meriga, lau hiibe apurichihatiña, chülütiña lun 100,000. Chóuruti lawanseruña lan meha wadagimanu lánina apurichihani!

Lidan burí dan ligía, aba hagumeserun gürigia awuribuha hámagua Niheria, durati wuribu ligía lúmagiñe irumu 1967 darí irumu 1970. Aba maganbuharu lan Beteli hawagu íbirigu ha lárurugubaña duna Níher ha lóubagiñebaña Biafra, luagu saragu hati. Siñati meha werederun chagüñu warüna, mosu meha wanügün agumeiraguagüdüni luma amu ariñahani houn. Kei aubei nariñagei lidan lagumeseha abahüdaguni le, hiñugua wamuti duna Níher saragu wéiyaasu, furíeitiwa lun Heowá afiñeñu luagu tau sun wanigi.

Haritaguanagili sügǘ burí ligía kamá hamuga wurinouga. Dénchanougati meha saragu: añahein meha súdaragu ha aransetiña lun haduurun hawagun gürigia, anihein meha giñe sandi luma burí amu katei wuribati. Sagü meha wánhiñuraguni duna ligía, wíchuguñein meha wabagari lidoun denchaü. Hénrenguti meha lun wásügürün ñéingiñe habéi súdaragu ha lánina ageiraü, ha meha machourunbaña hawagu ni aban. Gama lumoun, hénrengutimati meha lun wánhiñuragun lidoun oubaü le lani Biafra. Aban guñoun, aba nánhiñuraguni lanarime lidunari Níher tidan aban guríara lúmagiñe Asaba lun Onitsha ani aba nidin Enugu lun níchugun gurasu houn wéiyaaña lidan afiñeni. Luagu amu dan, ñǘdüntina íchiga gurasu houn wéiyaaña lidan afiñeni ha meha Abábaña, ñein lubéi meha migirúniwa lan lun lebedún leiti guñoun. Aban weyu, mosu wagumuchuni adamuridaguni lau aban furíei furesegueina lidan uburugu Port Harcourt, lugundun aba hebelurun súdaragu ha lánina ageiraü, Biafra.

Súdiniti meha adamuridaguni burí ligía lun waritaguagüdüniña íbirigu luagu hínsiñe hamá lun Heowá ani lóunigirubaña lan meha luma lun wíchugun adundehani houn luagu moun lumuti lan houdin luéigiñe lóubadina ni aban lidan wuribu ani mosu lan lidan hamá aban keisi íbirigu. Iñuraguatiña íbirigu niherianu lídangiñe lanarime lénrengunga ligía. Arufuda hamuti ínsiñeni le wéiritimabei sügǘ luéi iyereehabúni hadan türibu ani anihein meha úarani hadan. Aban meha lubuidun chansi nun hama nan laganagua burí óuchawaguni ligía.

Lidan irumu 1969, íbiri Milton Henschel arihibei lau Adamurini le ñein lubéi hachülüra íbirigu lídangiñetiña ámuñegueinarügü ageiraü lidan fulasu ñein lubéi táhurerua bali le gíribei Yankees (Newayóru). Au meha íderagubalin ani furendeitina saragu lúmagiñe. Ídehati meha le nafurendeirubei saragu lugundun lidan irumu 1970 adügǘwati Adamurini le ñein lubéi hachülüra íbirigu lídangiñetiña ámuñegueinarügü ageiraü Lagos (Niheria) le gíribei “Hombres de Buena Voluntad”. Adügǘwati adamurini le murusunraü dan lárigiñe wuribu le meha lídanbei ageiraü lugundun biní lumuti Heowá sun áfaaguni le adügǘbei lubá. Chülütiña 121,128 gürigia ani adügǘwati lidan 17 iñeñein, aban katei le meha madügǘnwagili. Ariha lumuti íbiri Knorr luma íbiri Henschel, úara hama amu abisidahatiña ha achülürübaña tidan burí awión Merigagiñe luma Ingülatéragiñe, aban lídangiñe badisei le wéiritimabei lúmagiñe Pentekosutesi, ñein lubéi habadiseira 3,775 iseri disipulugu. Afiñetina úagili lan meha beresegu nan saragu ítara kei meha dan le ladügǘnbei aransehani lubá adamurini le. Haganwounduña meha apurichihatiña furesegueina.

Lidan burí lóugiñe darandi irumu le naubei Niheria, anihein meha dan neseriwidun kei óunigiruti sirkuitu Áfürika luma kei íbiri le abisidahabarun sukursáli lídangiñe amu ageiraü. Wéiriti meha eteingiruni le hasandirubei misionerugu lau hibihin gurasu luma lau letenirún lun kada aban hádangiñe. Gúndaatina lau  meha nachoururagüdüni houn mabulieidua hamá. Arufudahati dasi le nun megei hamá íbirigu lun larufudún houn berese wamá hau lun heseriwidun lun Heowá luma lun derebuguñu tan lóundarun Heowá luma lun ñein lan úarani hadan tílana.

Láurügüñein lídehan Heowá gayara lan wagagibudagun luma turobuli le lanügübei wuribu lidan ageiraü luma burí sandi. Súnwandan meha warihini furangu labiniruñadiwa lan meha Heowá. Abahüdaguatu Oris:

“Dagati malaria wawagu saragu wéiyaasu. Lidan aban lídangiñe dan le wasandirubei lau malaria, chülüti Worth haspitalirugun Lagos ibidiñegua lungua. Aba lariñawagún nun háfuga lan lounwenba lan meha, gama lumoun, aba lareidagun! Dan le lagagudunbei, aba layanuhan luagu Larúeihan Bungiu lun anosuhati le meha etenirubei lun, le gíribei Nwambiwe. Lárigiñe, ñǘdüntina luma Worth abisidahei gürigia le lun lasigirun afurendeira tídangiñe Bíbülia. Aba lánharun lun inarüni ani dan lárigiñe aba leseriwidun kei wéiyaali lidan afiñeni lidan aüdü Aba. Íderagutina giñe saragu gürigia, íbini meha gürigia musulman ha deregeguatiña houngua lun hani relihión, lun heseriwidun lun Heowá tau sun hanigi. Gúndaatiwa saragu lau wasubudiruniña wábirigu niherianu luma lun hínsiñedun woun, línsiñedun hechun, hagaburi luma hañeñe woun”.

Anihán ábanya katei le wafurendeirubei: lun buidu lan lidin woun lidan wadasin lidan amu ageiraü, mosu meha hínsiñedun wábirigu woun meberesenga amu lan hechun luma hagaburi.

Aba lasansirún wadasin lidan irumu 1987. Aba wounahóun Betelirugugiñe Niheria lun woudin lidoun lubuidun ubouhu le gíribei Santa Lusía, keisi misionerugu. Aban meha lubuidun dasi le wibihubei, lau sun lira, gagibuguatiwa giñe luma lénrengunga. Maríeitiña meha wügüriña Áfürika hama saragu würiña, ánheinti Santa Lusía, wínwantiña meha wügüriña hama würiña mamarieidunga. Ínchaha lumutiña tubafu Lererun Bungiu lun hadügün saragu hádangiñe gürigia ha únbaña wíchiga aturiahani asansiruni lidan habagari.

Lau lásügürün dan, aba wagumeserun eferidirei were. Ábati lóunahaniwa Musu Úaraguati tidoun Beteli to Brooklynboun (Newayóru) lidan irumu 2005. Aba tounwen Oris lidan irumu 2015 ani hénrenguti nun lun nayanuhan luagu katei le. Sagü weyu neteingiruni Heowá tuagu. Aban meha paaná buitu tuguya ani aban würi hínsiñehabutu. Lidan 68 irumu le waubei wámagua, wéiriti meha tínsiñe nun tau sun nanigi. Aba wíchugun fe lun lan gunda wamá keisi maríeitiña luma lidan damuriguaü mosu inebe hamá ha anügübalin ubaraü woun, ferudunagua wagíame wámagua súnwandan, ǘnabugu wagíame luma lun warufuduni igaburi le líchugubei lani Bungiu sífiri sandu.

Dan le meha wagagibudagunbei luma íruni luma maguraasuni, amuriahatiwa meha luma Heowá lun labiniruni wáfaagun. Sigiti arufudaha woun ani súnwandan meha warihini labuidurun katei eibu lásügürün dan. Ani chülümémeeli le buídutimabei! (Isa. 60:17; 2 Ko. 13:11).

Biní lumuti Heowá háfaagun nagübürigu luma háfaagun amu íbirigu Trinidad luma Tobagu. Según ariñahani le iserigilitimabei, óundaraguaña 9,892 gürigia lidoun áhuduraguni inarüniti. Ídehatiña saragu íbirigu Aruba lun lederebugudun furumiñeti damuriguaü le meha ñein lubéi neseriwida. Guentó, aniheinhali 14 damuriguaü lidan ubouhu ligía hau íbirigu ha eseriwidubaña lau saragu ubebeni. Gánwounguaaña apurichihatiña Niheria darí lun hachülürün lun 381,398. Ani lidan ubouhu Santa Lusía, añaheinhaña 783 apurichihatiña luagu Larúeihan Heowá.

Gúnfulihadina lóugiñe 90 irumu. Ariñagati Sálumu 92:14 hawagu ha eseriwidubaña lun Heowá: “Haginduba íbini danme le wéiyaaña; hérebaña súnwandan ani buin haba lau ibagari”. Wéiriti neteingiruni Heowá luagu sun dan le násügürübei lidan neseriwidun lun. Ínchaha lumutina lubuidun alagan le nibihubei hámagiñe nagübürigu lau harufudahani inarüni nun, lun neseriwidun lun Heowá tau sun nanigi. Ladüga línsiñehabu luma lúaragun, íderagua lumutina lun labuidurun numadagua luma luma lun buidu lan lidin nun lidan neseriwidun (Sal. 92:13).