GÚNFULIHARU Diana lóugiñe 80 irumu. Dagáali meha Alzheimer luagu tani weiriei ani sügǘ lumuti lagumuhóun dan le laubei awinwanda tidan haban wéiyaaña. Aba giñe hounwen bián tisaanigu ani anihein meha kánserü luagu taniguagu. Lau sun lira, dan le harihinu íbirigu ha lílana damuriguaü le ñein tubéi, apurichiha o lidan adamuridaguni ariñagatiña gunda tan súnwandan.

Aban meha óunigiruti sirkuitu John luagu 43 irumu. Hínsiñeti meha lidasin lun, gama lumoun, aba lígiruni ladüga lunti lan meha letenirun lun aban liduhe le asandirubei. Dan le harihini íbirigu John ha asubudirubalin luagu saragu dan lidan burí adamurini, ariñagatiña masansirungili lan ligaburi. Ábangili gürigia le gúndaati.

Ida liña gundamémegiru lan Diana lau sun John? Ida liña gayara lan gundaméme lan aban gürigia lau sun lasufuriruña lan o lau sun lunti lan lígiruni lidasin le wéiribei línsiñe lun? Ariñagatu Bíbülia: ‘Hagundaaruba gürigia ha buídubaña lidan Heowá’ (Sal. 64:10). Lun gunfurandatima wamani inarüni súdiniti le, akutiha wamá luagu le anügübei ugundani inarüniti woun luma le manügünbei ugundani inarüniti.

Anihein burí katei le adügübei lun wagundaarun, kéiburi wamarieidun, gasaanigu wamá o wibihin aban dasi lánina eseriwiduni. Ani gébunati wasandiragun woungua ítara lugundun lúmagiñeti Heowá katei burí le. Ligía adügübalin maríei, ligía adügübei lun gayara lan gasaanigu wamá ani ligía giñe íchugubei dasi woun túmagiñe lóundarun (Agu. 2:18, 22; Sal. 127:3, TNM; 1 Tim. 3:1).

Lau sun lira, anihein burí ugundani le madurati saragu dan. Híruti gayara lan lounwen aban hádangiñe maríeitiña o hagabarahan (Ese. 24:18; Ose. 3:1). Añahein irahüñü maganbaditiña houn hagübürigu ni lun Bungiu ani anihein dan mosu habugún lídangiñe damuriguaü. Kéiburi lirahüñü profeta Samueli, meseriwiduntiña meha lun Heowá kei aubei lagundaara ani lidan likesin urúei Dawidi, aba lafigouhan ani barüti katei le saragu turobuli houn liduheñu (1 Sam. 8:1-3; 2 Sam. 12:11). Adügati turobuli kei burí le lun lasansirun lugundan gürigia luagu igarigu luma asufuriruni.

Ítarameme, gayaraati weferidiruni wadasin lidan weseriwidun lun Bungiu ladüga sándiñadiwa lan,  lunti lan wetenirun lun somu buligasion hadan waduheñu o ladüga asansiruni tidan lóundarun Heowá. Saragu hádangiñe íbirigu ha ígirubalin hadasin, álugatiña luagu ugundani le meha hasandirubei lau hagunfulirun lau eseriwiduni le.

Ménrengunti larihín, anihein lan dan, madurarun lan ugundani le lanügübei katei burí le. Lau sun lira, arufudati le asuseredubei lun Samueli, Dawidi luma houn amu anihein lan amu luwuyeri ugundani le magumuchunbei íbini dan le lasansirun le gádanbaliwa sódini o wasufurirun.

Subudi lumuti meha Hesusu katei lan ugundanibei inarüni. Buiti meha libagari dan le lawinwandubei sielu lubaragiñe liabin ubouagun. Ligía gunda lubéi meha “ligibugiñe Heowá súnwandan” (Ari. 8:30, TNM). Ánheinti dan le liábinbei ubouagun, anihein meha dan lagagibudagun luma turobuli wéiriti. Lau sun lira, gúndaamemeti meha lau ladügüni lugundan Lúguchi (Huan 4:34). Ka íderagubalin awandei igarigu le lasandirubei lidan lagumuhóun oura le laubei abagarida kei gürigia? Ariñagatu Bíbülia: ‘Súfuriti Hesusu luagu wagabu, lugundun subudi lani luagu lásurun lanme lasufurirun, lagundaaruba lan’ (Ebü. 12:2). Akutiha waméi bián katei le lariñagubei Hesusu luagu ugundani inarüniti.

Luagu aban dan, giributiña 70 hádangiñe lani Hesusu disipulugu gúndaañu lárigiñe hapurichihan ladüga adügaaña lan meha milaguru, kéiburi hasagahan sífirugu wuribatiña. Ábati lariñagun Hesusu houn: “Magundaara humá luagu haganbunün sífirigu wuribatiña, gunda humá luagu anihein lan hiri bürüwañu sielu” (Luk. 10:1-9, 17, TNM, 20). Ligíati, íbini ru lan saragu ugundani woun wagunfulirun lau aban dasi lidan weseriwidun lun Bungiu, súdinitimati lun gunda lan Heowá wau ani ligía katei le adügübei lun wagundaarun le tímatimaati.

Luagu amu dan, dan le larufudahaña lubéi meha Hesusu houn saragu gürigia, aba tariñagun aban würi huríu lun chóuruti lan gunda tan lúguchu lau ladüga aban lan máisturu buiti ligía. Gama lumoun, aba lariñagun Hesusu tun: “Fuleseiwatimatiña ha aganbubalin ani adüga haméi le lubeibei Bungiu!” (Luk. 11:27, 28). Anhein buidu lubéi hagaburi lisaanigu aban gürigia, chóuruti gunda lan hau ani pántati hau. Lau sun lira, gúndaatimabei anhein gaganbadi  habéi lun Heowá ani buidu ligía hamadagua luma.

Le linarün katei, wasubudiruni gunda lan Heowá wau ligía adügübei lun gunda wamá le tímatimaati. Chóuruti madügün lan turobuli lun wagundaarun, lau sun lira, magida lumuti giñe ugundani wawéi. Dan le wawandun, úaragua wagía lun Heowá, ábatima laganwoundun wagundan (Rom. 5:3-5). Ani haritagua waméi ru lani Heowá lani sífiri sandu houn ha afiñerubaña luagu ani ugundani aban lídangiñe igaburi le líchugubei sífiri ligía (Gal. 5:22). Ligía ariñaga lubéi Sálumu 64:10: ‘Hagundaaruba gürigia ha buídubaña lidan Heowá’.

Ligía meferidirun tubalin Diana luma John, ha uágubaña wayanuha lidan lagumeseha arütíkulu, hagundan íbini labadinagua lénrengunga. Ariñagatu Diana: “Áluahadina aramudaguagülei luma Heowá, ítara kei láluahan aban irahü aramudaguagülei hama lagübürigu”. Ariñagatu giñe: “Afiñetina biní laadina lan Bungiu lau líderagunina lun nasigirun apurichiha hayañu súnwandan”. Ágiati John? Ariñagati iridúa lan meha lidan irumu 1998 keisi máisturu tidan Leskuela lun larufudahóun houn íbirigu wügüriña ani lúmagiñe lan dan ligía, aturiahatimahali lan saragu. Ídehati giñe laturiahan lun sigimeme lan apurichiha dan le lígirunbalin leseriwidun keisi óunigiruti sirkuitu dan lárigiñe. Ariñagati giñe ménrengun lan meha lun luma tun lani weiriou hadügüni asansiruni ligía lugundun súnwandan meha aranseñu haña lan lun hadügüni le lamuriahan Heowá hama. Ani ariñagati: “Masakürihantiwa luagu ni kata”.

Ariha hamaali giñe amu kristiánugu inarüni lan dimurei le ariñawagúbei lidan Sálumu 64:10. Ariha waméi le asuseredubei houn aban feru maríeitiña ha eseriwidubaña lóugiñe 30 irumu tidan Beteli to Merigaboun ani lárigiñe aba lasansirún hadasin lun heseriwidun keisi prekursorugu espechalitiña. Ariñagatiña: “Maribanti lun bírudagun dan le beferidirun aban katei le wéiriti línsiñe bun. Lau sun lira, siñati berederun híruñu lun súnwandan”. Lau lóufudagun, aba hagumeserun ídeha lidan apurichihani úara luma damuriguaü le ñein lubéi meha heseriwida. Ariñagatiña giñe: “Furanguti meha wayanuhan lun Heowá lidan wafurieidun. Dan meha warihini lóunabuni wafurieidun, aba meha wagundaarun saragu ani ruti katei le gurasu woun. Murusun dan lárigiñe wagumeserun eseriwida lidan damuriguaü ligía, aba hagumeserun amu íbirigu lidan damuriguaü eseriwida kei prekursorugu. Ani gúndaatiwa lau ru wamá aturiahani houn bián gürigia ha awansetiña lidan hafurendeirun luagu Bungiu”.

Inarüni anihein lan dan hénrengu lan lun wakipuruni wagundan. Ani ñeinbei dan wasandiragun woungua lau íruni. Lau sun lira, ruti Heowá gurasu woun lau dimurei le lídanbei Sálumu 64:10. Íbini anhein abürüha warüna, gayaraati wafiñerun ‘hagundaaruba lan gürigia ha buídubaña lidan Heowá’. Lidan amu dimurei, meberesenga le asusereduti woun, gúndaabadiwa ánhawa úaragua lun Heowá. Ani agurabatiwa lachülürün dan danme lagunfulirun le füramase lubéi luagu “aban iseri sielu luma aban iseri ubóu”. Mafigounhañame lubúeingu Bungiu ani ábame habuinchun “lau ugundani lun sun dan” luagu le lunbei ladügüni (Isa. 65:17, 18).

Samina wamá luagu le lílabei katei le: buídubei wátuadi ani sagü weyu wásaaruba buin lau erei. Maritagunhadiwame luagu somu katei wuribati o luagu somu igarigu le meha wasandirubei. Füramaseti Heowá: “Labulieidúaba sun le sügühalibei, úaalime aritaguti luagun”. Ladügüba águyuguni lunme wóundarun hamoun waduheñu ha hilaguaañabaña. Hasandiruba saragu míñunu gürigia aban ugundani le siñati wafuranguagüdüni, ítara kei meha tagübürigu nibureintu to meha dúusubei irumu tau, to láguyuguagüdüboun Hesusu (Mar. 5:42). Ani lachülürüba weyu lun richagua hamá sun gürigia ha Ubouagubaña sunsuinagubei ani hagundaaruba lidan Heowá lun súnwandan.