1, 2. Dan le lunti lan banúadiruni kátima lan súdinibei bun, ka uagu buidu lubéi lun gaganbadi ban lun Bungiu? (Arihaboun iyawaü to lídanboun lagumeseha arütíkulu).

ANHEIN nibureingidibu lubéi, másiñati rúaali lan saragu adundehani bun luagu le lunbei badügüni lau bibagari ámuñegü. Másiñati ínchaha hamaadibu lan bumaisturugu, ha íchugubaña adundehani leskuelarugu hama amu gürigia lun basigiruni baturiahan lun gayaraabei lan bagañeirun saragu seinsu. Ánheinti Heowá, ínchaha lumutibu lun badügün amu katei. Inarüni busén lan lun aban ban aturiahati le buiti, lun lárigiñe lanme beresibihan lun gayaraabei lan banuriagun bungua (Kol. 3:23, TNM). Lau sun lira, danme lunti lan banúadiruni kátima lan súdinitimabei bun, ariñagati bun lun bígiraguagüdün bungua lun ladundehan. Líderagubadibu ladundehan lun gabaroun bani le labusenrunbei lun wadügün lidan lagumuhóun dan le (Mat. 24:14).

² Haritaguabéi giñe subudi lani Heowá le lunbei lasuseredun lun ubóu le ámuñegü ani murusunrügaali dan lun lagumuchun lau (Isa. 46:10; Mat. 24:3, 36). Ani subudi lumutiwa buidu. Subudi lumuti ka lan agundaaragüdünbaliwa luma le adügübei lun wasandiragun woungua buidu ani subudi lumuti giñe le adügübei lun hiru wamá luma le  adügübei lun wasaminarun ni kata lan wabagari. Ligíati, íbini buidu lan laganbún fiu adundehani le híchugubei gürigia, anhein múaran lubéi luma le tariñagubei Bíbülia, mabuidunti (Ari. 19:21).

3, 4. Ka asuseredubei lun Adán tuma Ewa hama sun hadügawagun ladüga hafalarun aban luriban adundehani?

³ Mama aban katei iseriti adundehani le mabuidunbei. Satanási furumiñetibei íchuguti adundehani wuribati houn gürigia. Mabusigariti meha lariñagun tun Ewa lun tanúadiruni tuguya luma tani weiriei le lunbei hadügüni lau habagari lun gunda hamá (Agu. 3:1-6). Le linarün katei, luouguounrügüñein meha Satanási lasaminara. Mabusenrunti meha lun láhuduragun Adán tuma Ewa hama hadügawagun lun Heowá luma lun gaganbadi hamá lun, busenti meha lun lun lan háhuduragua gaganbadi hagía lun. Gama lumoun, ka meha san ladügübei hawagu? Ni kata. Heowá meha íchugubalin sun le hámabei houn: maríei, aban lubuidun fuluri-agei ñein lubéi heredera luma úgubu le úati mégeiti luagu lun hawinwandun lun súnwandan.

⁴ Ma lirun maganbadi lan Adán tuma Ewa lun Bungiu ani aba hadüraaguni hamadagua luma. Kei barihini, wuribati lidin houn lárigiñe. Aba hagumeserun aweiyada ani aba hóunwegun, ítara kei dan le lounwen aban fuluri lárigiñe latügürǘn. Súfuritiña giñe hadügawagun ladüga figóu (Rom. 5:12). Lau sun lira, hiibe-agei gürigia himei hamagili maganbadi hamá lun Bungiu. Busentiña hadügüni le habusenrun (Efe. 2:1-3). Arufuda lumuti ligaburi hawinwandun gürigia ua lan “lichú aau [le hámagiñeti gürigia] gebegiti ligibugiñe Bungiu” (Ari. 21:30).

5. a) Ka meha lachoururubei Heowá? b) Ka uagu subudi wabalin inarüni lan le lachoururubei?

⁵ Lau sun lira, subudi lumuti meha Heowá ñéinbaña lan fiu gürigia ha busenbaña hasubudiruni luma lun heseriwidun lun ani añahein nibureintiña haganagua (Sal. 103:17, 18; 110:3, TNM). Hínsiñetiña sun nibureintiña lun saragu. Saminatibu san buguya lan aban hádangiñe? Anhein ítara liña lubéi, chóuruti gunda ban lau saragu katei buiti le líchugubei Heowá bun ani le adügübei lun bagundaarun (aliihabéi Sálumu 103:5; Ari. 10:22). Ítara kei le lunbei warihini, lidan burí katei buiti le, anihein ariñahani le líchugubei woun le ítarabei kamá éigini, habuidun umadagu ha wámabaña, chansi lun waganwoundagüdüni weseriwidun lun Bungiu luma esefuruni inarüniti.

6. Ka uagu lunti lubéi betenirun lun le bemegeirubei lidan bumadagua luma Bungiu, ani ida liña líchuguni Heowá ariñahani le bemegeirubei bun lun buidu lan bumadagua luma?

⁶ Mítarantiwa kei animaalugu lugundun mégeitiwa wabuiduragüdüni wamadagua luma Bungiu ani Ligíarügüñein gayara líchuguni ariñahani le wemegeirubei woun lun buidu lan wamadagua luma (Mat. 4:4). Dan le gaganbadi wamá lun le lariñagubei, ibihatiwa gunfurandaü, lichú aau luma ugundani. Ariñagati Hesusu: “Fuleseiwatiña ha asubudirubalin luagu megei hamani lídehan Bungiu” (Mat. 5:3). Ru lumuti Heowá ariñahani le bemegeirubei bun tau Lererun luma lau sun adundehani le líchugubei lúmagiñe “musu úaraguati” (Mat. 24:45; Isa. 65:13, 14).

7. Ida luba lahuudun bun bayusuruni ariñahani le líchugubei Bungiu bun lun buídutima lan bumadagua luma?

⁷ Líchuguba ariñahani le líchugubei Bungiu bun lichú aau bun luma lun gayara lan basaminarun buidu, le lunbei lóunigirunibu lidan ámuñegueinarügü igaburi (aliihabéi Ariñawagúni 2:10-14). Kéiburi, líderagubadibu lun basubudiruni iyeeni le ariñawagúbei luagu Bungiu, kéiburi ua lan Bungiu o lun lan gunda ban megei ban bagañeirun saragu seinsu luma lun gibe lan búmati. Líderagubadibu giñe lun mígiraguagüdün ban bungua lun luriban saminaü ni lun igaburi le adügübei wuribani bun. Ligíati, áfaaguaba lau sun biyaraati lun bibihini lichú aau le lúmagiñeti Bungiu  luma lun gayara lan basaminarun buidu. Ítara luba barihini bungua hínsiñe ban lun Heowá ani busén lani le buídutimabei bun (Sal. 34:8; Isa. 48:17, 18).

8. a) Ka uagu lunti lubéi bayarafadun lun Bungiu guentó? b) Ida luba lahuudun le bun ámuñegü?

⁸ Yarafa madise, lagumuchawaguba lau ubóu le lábugiñebei lubafu Satanási ani Heowarügübei gayara lóunigiruniwa. Le linarün katei, másiñati ñeinbei lan aban dan le ídanbei mosu lanme wafiñerun luagu líchugubei lan weigin woun (Abak. 3:2, 12-19). Ligíati, anihán dan lun bayarafadun lun Búguchi le siélubei luma lun bederebudagüdüni bafiñen luagu (2 Fe. 2:9). Ítarati, meberesenga le asuseredubei geyegu bau, basandiraguba bungua ítara kei Dawidi, le abürühabei: “Súnwandan anihein lan Nabureme nigibugiñe, lau Bungiu luéigiñe nóunwenren, úabei éiguadagüdütina” (Sal. 16:8).

9. a) Según Huan 6:44, ka ladügübei Heowá? b) Ka uagu espechali lubéi basubudirun amu Gefentiña?

⁹ Dan le basubudirun somu gürigia le mama Gefenti, subuditi san bun buidu? Mama saragu. Másiñati subudi ban murusun luagu, kéiburi liri luma ida liña lan laríawaguniwa. Ánheinti dan le basubudirun aban Gefenti, mítaranti. Subudi bumuti hínsiñe lan Heowá lun ani ariha lan Bungiu somu katei buiti luagu ani aba lan línchahani lun aban lan hádangiñe lumutuniña (aliihabéi Huan 6:44). Íbini lílana lan amu ageiraü, amu lan lechun o lirasan, subudi hádibu saragu luagu ani subudi hali giñe saragu buagu.

10, 11. Ka wámabei sun wagía ha eseriwidubaña lun Heowá, ani ida liña lahuudun le woun?

¹⁰ Kei hénpulu, lau lóufudagun, aba bíchugun fe hudugua lan íbiri ligía lun Heowá lidan úarani  kei buguya (Sof. 3:9). Lidan amu dimurei, subudi hamuti huguya biángubei ligiaméme lan le hafiñerubei luagu Bungiu, luagu lilurudun luáguti laruman ibagari luma emenigini lubá ámuñegü luma burí amu katei. Ani ligía katei súdinitimati le gayaraabei wasubudiruni luagu amu gürigia lugundun ligía adügübei lun wafiñerun luagu luma lun gayaraabei lan wadügün aban umadaguaü luma, le lunbei ladurarun lun sun dan.

¹¹ Mama waweiridaguagüdüñein katei lau wariñagun ladüga lan beseriwidun lun Heowá gamadaguatibu lan hama umadagu ha buídutimabaña lidan sun ubóu, íbini ibidiñegiña lan súngubei hagía bun. Gayaraati hamuga san lariñaguni somu gürigia le meseriwidunbei lun Heowá ligiaméme?

12. Ka katei uágubei gayara lan báfaagun luagu lidan beseriwidun lun Heowá?

¹² (Aliihabéi Apurichihati 11:9-12:1). Báfaaguña san lun bibihin somu katei o saragu lidan beseriwidun lun Heowá? Másiñati báfaaguña lan lun baliihanu Bíbülia sagü weyu o lúntima bapurichihan saragu o babuiduragüdüñein lan bóunabagüle lidan adamuridaguni. Ida liñati basandiragun bungua dan le barihini buiti le lanügübei le badügübei o dan le harihini amu ani aba hariñagun bun buidu lan badüga? Chóuruti buidu lan basandiragun bungua. Ani lunti basandiragun bungua ítara lugundun saragu lídangiñe le bibihubei ibiha bumuti ladüga bíchuguñein lan lugundan Bungiu lóugiñe le himei bubéi, ítara kei ladügüni Hesusu (Sal. 40:8; Ari. 27:11).

13. Ka uagu buídutima lubéi leseriwidúniwa lun Bungiu sügǘ lau letenirun gürigia áluaha libihin somu katei lidan ubóu le?

¹³ Ánhabu etenira lun baganwoundagüdüni beseriwidun lun Heowá, gúndaabadibu ani basandiruba gasuuni lan bibagari. Abürühati apostolu Pábulu: “Ítarameme humá deregüdagu lidan hafiñen, merederagunga ligía huádigimari súnwandan, gánwoungueinarügü lidan luadigimari Wabureme; lugundun subudi humuti luagu mama lan luagu ni kata hadügei wadagimanu le hadügübei lidan aban luma Wabureme” (1 Ko. 15:58). Gürigia ha etenirubaña lun hibihini le habusenrunbei lidan ubóu le, kéiburi lagañeirún seinsu o lun subudiwa hamá, madaritiña ugundani inarüniti (Luk. 9:25). Kei le lunbei warihini, furendei lumuti urúei Salomón katei le lúnguarügü lidan le lawinwandubei (Rom. 15:4).

14. Ka bafurendeirubei lídangiñe le ladügübei Salomón?

¹⁴ Aban meha gürigia rísiti ani gabafu ligía Salomón ani aba labagaridun aban “ibagari buiti” lun larihin ida luba lan meha lidin lun (Apur. 2:1-10). Aba lábunagun muna, aba ladügagüdün fuluri-agei luma burí párüke ani adüga lumuti sun le labusenrunbei. Sandiguati san lungua buidu ani lau ugundani? Ligía guánarügü ariñagubei dan le lan lasaminarubei luagun sun le ladügübei, ariha lumuti málati lan sun katei ligía ani mebegi lan (Apur. 2:11). Badügüba san gasu lau le bafurendeirubei lídangiñe le ladügübei Salomón?

15. Ka uagu súdini lubéi afiñeni, ani según Sálumu 32:8, ida luba lahuudun bun?

¹⁵ Añahein gürigia furendei hamuti le buídubei lárigiñe hachararun súfuri haméi wuribani le lanügübei le hadügübei. Mabusenrunti Heowá lun lasuseredun le bun. Busenti lun gaganbadi ban lun. Lun lira, mégeitibu afiñeni, gama lumoun, masakürihanbadibu luagu le badügübei luagu bafiñen. Ani mabulieidun lubéi Heowá ínsiñeni le barufudubei luagu liri (Ebü. 6:10). Ligíati, áfaaguaba lun badügüni sun biyaraati lun bederebudagüdüni bafiñen. Ítara luba barihini bungua sun lan le lariñagubei Búguchi le siélubei bun lun bubuidun guánarügü (aliihabéi Sálumu 32:8).

16. Ka uagu lunti lubéi gebegi lan chansi le líchugubei Heowá woun lun wadügüni le wabusenrun ani yusu wameime buidu?

¹⁶ Abürühati Pábulu: “Le ñein lumuti lani Heowá sífiri, anihein esefuruni ñein” (2 Ko. 3:17, TNM). Mínsiñeti lun Heowá lun lagüraguniña gürigia ani adüga lumutiwa lidan aban igaburi le ídanbei gayaraabei lan línsiñedun woun wadügüni  le wabusenrun. Lau sun lira, busenti lun buídubei lan wayusuruni chansi le lugundun lóunigirubadiwa ánhawa adügei ítara. Másiñati subudi ban nibureintiña ha aríagubaña iyawaü lánina agamariduni, adügatiña magíaguni, áhurerutiña huraraü le denchati, yúsutiña düroga o gátaditiña. Gayaraati gunda hamá luagu murusun dan lau le hadügübei. Gama lumoun, liibe-agei dan, gíbetimati le lunbei híchuguni luagu le hadügübei: aba héchudun saragu luagu le hadügübei, aba hasandirun o íbini aba hounwen (Gal. 6:7, 8). Saminatiña gayara lan hadügüni sun le habusenrun, gama lumoun, heyeedaguña houngua (Titu 3:3).

17, 18. a) Ka uagu gayara lubéi lariñawagún adüga lan gaganbadi lun Heowá lun wibihini chansi lun wadügüni le wabusenrun? b) Ida liña amu lan le meha gayara lubéi Adán tuma Ewa adüga furumiñe luma le gayara habéi gürigia adüga uguñe weyu?

¹⁷ Dan le gaganbadi wamá lun Heowá barüti buiti woun: buiti wátuadi ani adügati lun wibihini chansi lun wadügüni le wabusenrun (Sal. 19:7-11). Ani dan le bayusuruni chansi le buidu —lidan amu dimurei, dan le bafalaruni lilurudun luma ladundehan Bungiu le úati mégeiti luagu lun badügüni le babusenrun—, aba barufuduni lun Heowá luma houn bagübürigu gayara lan hígirunibu lun badügün amu katei le babusenrun. Le linarün katei, busenti Bungiu líchugun esefuruni inarüniti houn lubúeingu ha úaraguabaña, le uágubei tariñaga Bíbülia gafanranbaña lan “lirahüñü Bungiu” lidan haweirigun (Rom. 8:21).

¹⁸ Ligía meha katei lúmabei Adán tuma Ewa furumiñe. Átiriñein katei uágubei lariñaga Heowá houn siñá lan hadügüni? Ábanrügüñein: lun meigin hamá lídangiñe tin tídibu aban wewe (Agu. 2:9, 17). Saminatibu san wuriba lan meha gumadi le o maricha lan? Uá. Mítaranti kei saragu burí lúrudu le híchugubei gürigia ani fosu hamutiña amu lun hafalaruni.

19. Ida liña larufudahan Heowá luma Hesusu woun lun wibihin esefuruni?

¹⁹ Arihúati lichú lau Heowá lidan ligaburi lóuseruniwa. Lubaragiñe líchugun saragu burí lúrudu woun, arufudahati woun lau gaguraasuni lun wafalaruni lúrudu le lánina ínsiñeni. Busenti lun wafalaruni ladundehan luma lun iyereegu lan wuribani woun (Rom. 12:9). Daritiwa aban lubuidun hénpulu luáguti ligaburi arufudahani le lidan yanu le líchugubei Hesusu luagu wübü, le ñein lubéi layanuha luagu burí katei le adügübei lun wafigouhan (Mat. 5:27, 28). Keisi Urúei lidan Larúeihan Bungiu, lasigiruba Hesusu arufudaha woun lidan iseri ubóu lun warihini le buídubei luma le wuribabei kei ligaburi larihini (Ebü. 1:9). Líderagubadiwa giñe lun ua lan mégeiti luagu wasaminan luma wágubu. Saminabá: masandirun hádibume busén ban bafigouhan ani masufurirun bubéi wuribani le lanügübei figóu. Chülüdügame dan lun gafanran ban lidan esefuruni le füramase lubéi Heowá.

20. a) Adüga lumuti san Bungiu sun le labusenrun? b) Ida liña lahuudun lani Bungiu hénpulu woun?

²⁰ Chóuruti siñabei lan wadügüni sun le wabusenrun lugundun wígiruba lun ladundehaniwa wínsiñehabu lun Bungiu luma wínsiñehabu hawagu gürigia. Le linarün katei, lamuriaharügüña Heowá wama lun wáyeihani. Lau sun gayara lan ladügüni sun le labusenrun, ígirati lun ladundehani ínsiñeni lidan ligaburi lóuserun hama gürigia luma hama ánheligu (1 Huan 4:7, 8). Ligía gébuna lubéi wasaminarun gayaraabei lan wadügüni le wabusenrun ánhawa áyeihei Bungiu.

21. a) Ka lariñagubei Dawidi lun Heowá? b) Kaba wakutiha lidan leweñegua arütíkulu?

²¹ Gebegiti san sun katei buiti le ru láalibei Heowá bun, kéiburi saragu ariñahani le líchugubei bun le ítarabei kei éigini, umadagu buítiña, chansi lun baganwoundagüdüni beseriwidun luma emenigini lun bibihin esefuruni le tímatimaati? (Sal. 103:5). Másiñati sandí ban saragu ugundani ítara kei meha Dawidi dan le lariñagunbei: “Barufudubei lémeri ibagari nun. Anihein óunwenbu ugundani biñuarü” (Sal. 16:11). Lidan leweñegua arütíkulu, wakutihaba luagu amu pérüla lúmagiñeti Bungiu le wadarirubei lidan Sálumu 16. Líderagubadibu katei burí le lúntima gunfuranda bani ida luba lan gunda lan bibagari le tímatimaati.