1. Ida liña líchugun Heowá dǘgüdaguaü luma emenigini houn gürigia lárigiñebei ebedaaguni lidan fuluri-agei Edén?

LÚMAGIÑEBEI lagumeserun figóu ubouagu arufudaali Heowá ligía lan Bungiu le íchugubei gurasu. Lárigiñebei ebedaaguni lidan fuluri-agei Edén, aba lariñagun Heowá aban profesía le meha lunbei líchugun dǘgüdaguaü houn ladügawagun Adán. Lárigiñeme buga gunfurandawa lan profesía le lídanbei Agumesehani 3:15 líchuguba meha emenigini houn gürigia luagu lagumuchawaguba lan lau Mafia luma lau sun wuribani le adüga láalibei (1 Huan 3:8; Aruf. 12:9).

2. Ida liña líchugun Heowá gurasu lun Noé?

² Wínwanti meha Noé haganagua gürigia ha máhuduraguntiña lun Heowá, ligíarügüñein meha hama liduheñu áhuduragua lun Heowá lidoun dan ligía. Gayaraati hamuga meha lírudagun saragu lau larihin anarimeni luma magíaguni lidan sun fulasu (Agu. 6:4, 5, 11; Hud. 6). Gama lumoun, ru lumuti Heowá ganigi  le lemegeirubei lun lunmeme úaragua lan lun (Agu. 6:9). Ariñagati Heowá lun Noé lagumuchaguba lan hau gürigia wuribatiña hagía, ariñagaléi lun kaba lan ladüga lun lesefurun habu sun liduheñu (Agu. 6:13-18). Másiñati ru lan katei lira saragu gurasu lun Noé.

3. Ka ladügübei Heowá lun líchugun gurasu lun Hosué? (Ariha huméi dibuhu le lídanbei lagumeseha arütíkulu).

³ Saragu irumu lárigiñe, resibiti Hosué aban óunwenbu dasi: ladügün lun hebelurun ísüraelina lidoun Fulasu Füramasewati. Lun lira, mosu meha lawuribuhan hama saragu gawuribuhatiña héretiña ha meha awinwandubaña lidan burí fulasu ligía. Subudi lumuti Heowá gayara lan meha ladügün lira lun ladiheridun Hosué. Ligía aba lubéi lóunahani Heowá Moisesi lun líchugun gurasu lun. Ariñagati: “Arufudahabá lun Hosué, ruba gurasu luma anigi lun, lugundun ligíaba adundehaña Ísüraelina lun habihini ani deregeléime fulasu le barihubei houn” (2 Lur. 3:28). Ani ruti giñe Heowá gurasu lun Hosué lau lariñagun lun: “Au ariñagubei bun lun báfaagun ani ganigi buguyame. Manufudedabá, meferidirunbeime buguraasun, ladüga au, le Bubungiute le Babureme, búmabadina ñein lumuti bidin” (Hos. 1:1, 9).

4, 5. a) Ka lariñagubei Heowá lun líchugun gurasu houn lubúeingu lidan binadu dan? b) Ida liña líchugun Heowá gurasu lun Liráü?

⁴ Mámarügüñein houn fiu hádangiñe lubúeingu Heowá líchiga gurasu, ruti gurasu houn súngubei. Kei subudi lani hemegeiruba lan meha huríu gurasu lidan hadaürǘn Babilónia, ligía ladügünbalin füramasei le lun kada aban hádangiñe: “Manufudedabá, ladüga anahein buma; manufudedabá au Bubungiutebei. Rútina erei bun, íderagua numutibu, ágüdaha numutibu lau núhabu le gagañeiradibei” (Isa. 41:10). Chouru hamuti meha furumiñetiña kristiánugu luagu lagunfulirubei lan Heowá dimurei burí le ani chouru wamuti ligiaméme uguñe weyu (aliiha huméi 2 Korintuna 1:3, 4).

⁵ Ruti giñe Heowá gurasu lun Hesusu le Liráü. Dan le labadiseirunbei, aganbúati aban umalali siélugiñe le ariñagubei: “Anihán niráü le hínsiñebei nun, le aubei óunwenbu lan nugundan” (Mat. 3:17). Chóuruti ru lan dimurei burí le gurasu lun Hesusu lun lapurichihan.

6. Ka un línchahawa abahüdaguni luáguti seinsu?

⁶ Áyeiha lumuti Hesusu Lúguchi. Ariha waméi ida liña lan ladügüni. Lidan abahüdaguni luáguti seinsu, ínchaha lumutiña lani disipulugu lun hasigirun eseriwida lun Heowá lau úaraguni. Lídanmeme abahüdaguni ligía, aba lariñagun iyubudiri houn kada aban hádangiñe lumusuniña ha úaraguabaña buidu lan hadüga lau dimurei le: “Buiti, aban musu buiti ani úaraguati buguya; kei úaragua bubéi lidan le murusunrügüti, níchiga gíbetimati lábugiñoun baríaahan. Keimoun, gunda buguyame úara numa” (Mat. 25:21, 23).

7. a) Ida liña meha líchugun Hesusu gurasu houn lani apostolugu? b) Ídatima liña líchugun Hesusu gurasu lun Féduru?

⁷ Wéiriti meha hasigenehan apostolugu luagu ka lan hádangiñe súdinitimabei. Gama lumoun, lau gaguraasuni línchahaña Hesusu lun ǘnabugu hamá luma lun heseriwiduniña amu, mama lun hóuserun kei ábutigu (Luk. 22:24-26). Adügati Féduru lun lírudagun Hesusu saragu wéiyaasu (Mat. 16:21-23; 26:31-35, 75). Íbini ítara, marufudunti Hesusu mabahüdǘni lun, rúrügüti gurasu lun, ariñaga ligía lun lun líchugun gurasu houn líbirigu lidan damuriguaü (Huan 21:16).

8. Ida liña líchugun Esekíasi gurasu houn hábutigu milidaru luma houn lílana uburugu?

⁸ Lubaragiñebei liabin Hesusu ubouagun íchiga aba buiti hénpulu, subudi hamaali  meha lubúeingu Bungiu buidu súdini lan híchugun gurasu houn amu. Samina wamá luagun le ladügübei urúei Esekíasi. Dan le hasiadirubalin asiriana Hudá, aba lóundaraguniña hábutigu milidaru hama lílana uburugu lun líchugun gurasu houn (aliiha huméi 2 Krónikasi 32:6-8).

9. Ka wafurendeirubei luagu gurasu lídangiñe le asuseredubei lun Hobu?

⁹ Guentó, ayanuha wamá luagu le asuseredubei lun Hobu. Wéiriti meha lirun ani ha ñǘdünbaña íchiga gurasu lun rúrügütiña “lidere dan” lun, bulesei haméi lau le hariñagubei lun. Ligía aba lubéi lariñagun Hobu houn lun hamuga ligía lan hagía, lariñaguña hamuga houn dimurei burí le lunti lámalihaniña (Hob. 16:1-5). Eliú luma Heowá íchugubaña gurasu lun Hobu (Hob. 33:24, 25; 36:1, 11; 42:7, 10).

10, 11. a) Ka uagu megei tubéi meha lisaani Hefüté saragu gurasu luma dǘgüdaguaü? b) Ka amu gürigia mégeibaña lun wíchugun gurasu houn ariñaga wagíame houn buidu lan hadüga?

¹⁰ Mégeitu meha giñe lisaani Hefüté gurasu. Dan le meha lawuribuha lubéi alidihati le hama amonna, aba füramase lan lun Heowá lederegerubei lan furumiñeti gürigia le áfuriduti eresibirei lúbiñegiñe danme le lagiribudun lídangiñe wuribu lun leseriwidun lun Heowá tidan sanduariu. Liráü áfuriduboun furumiñe lun tefeduhani lagañeirun luma. Wéiriti meha lirun Hefüté ladüga tuguyarügüñoun lan lisaani. Íbini ítara, gúnfuliti lau lererun, ábati lóunahanu eseriwida tidan sanduariu Siló lun sun tibagari (Ali. 11:30-35).

¹¹ Lau sun meha hénrengu lan katei le lun Hefüté, hénrengutimati meha tun lisaani, íbini ítara, ánhatu lun tagunfulirun lau le füramase lubéi túguchi (Ali. 11:36, 37). Ánhatu lau sun siñaali lanme tamarieidun, gasaanigu tan, tídehan lun magumuchagun hamá ladügawagun túguchi luma halagante tiduheñu. Chóuruti megei tan meha saragu gurasu luma dǘgüdaguaü. Ariñagatu Bíbülia: “Ligía aban lubéi échuni Ísüraeli lun sagü lan irumu houdin würiña irahüñü íchiga dǘgüdaguaü tun liráü Hefüté le galaadüna, luagu gádürü weyu” (Ali. 11:39, 40, TNM). Uguñe weyu, súdiniti giñe lun wíchugun gurasu houn kristiánugu ha mamarieidungiña ladüga haritagun “luagu burí katei le luáguti Bungiu” ani gayaraati giñe wariñagun houn buidu lan hadüga (1 Ko. 7:32-35).

12, 13. Ida liña líchugun Féduru gurasu houn líbirigu kristiánugu?

¹² Ariñagati Hesusu lun apostolu Féduru guñoun le lubaragiñebei lounwen: “Simón, Simón, amuriahaali Mafia üma luma Bungiu lun gayaraabei lan lóuchagunün kei lewenihóun türigu; ibiha lumuti, gama lumoun ayumuraguaadina buagu lun Bungiu lun meferidirun bani bafiñen nuagu lídanme oura ligía. Ani danme le bagiribudun nun, bíchigame dǘgüdaguaü houn bíbirigu” (Luk. 22:31, 32).

¹³ Aban meha hádangiñe ha íchugubaña iderebugu lun damuriguaü lidan furumiñeti sígulu Féduru (Gal. 2:9). Ruti ganigi le larufudubei Féduru lidan Pentekosutesi dǘgüdaguaü houn líbirigu. Ani abürühati houn lidan burí lagumuhóun dan le leseriwidunbei lun Bungiu, ariñagati: “Nóunahañoun tiraüraü gárada to hun [...] lun níchugun dǘgüdaguaü lun hafiñen, gefén aume hun luagu anihán lan lareini Bungiu le tímatimaatibei. Deregüdaguameme humá lidan areini ligía” (1 Fe. 5:12). Rúharu gárada burí to labürüdüboun Féduru gurasu luma dǘgüdaguaü houn kristiánugu lidan sun sígulu le sügühalibei. Uguñe weyu, megei wamagili gurasu le lidan awanha lan agurabahei lagunfuliruni Heowá le füramase lubéi (2 Fe. 3:13).

14, 15. Ka uagu rúharu lubéi gárada burí to labürühaboun apostolu Huan gurasu houn kristiánugu lidan sun sígulu le sügühalibei luma lidan wadaani?

 ¹⁴ Ábanya hádangiñe ha íchugubaña iderebugu lun damuriguaü lidan furumiñeti sígulu apostolu Huan. Rúhali lubuidun labahüdahan luáguti lapurichihan Hesusu gurasu houn íbirigu lidan sun sígulu le sügühalibei ani rumémegili gurasu woun uguñe weyu. Kei hénpulu, lídanrügüñein ewanhéliu le labürüdübei Huan láfuacha dimurei le lariñagubei Hesusu luáguti hasubudirubei lan sun gürigia luagu lani wamá disipulugu ánhawa hínsiñegua wámagua (aliiha huméi Huan 13:34, 35).

¹⁵ Anihein arufudahani súdiniti tidan ǘrüwa gárada to labürüdüboun Huan. Kei hénpulu, ma ruti gurasu woun waliihan “chibá lumuti [lan] lita Hesukrístu sun wafigoun” dan le hiru wamá ladüga wachara? (1 Huan 1:7). Ánheinti sigí lubéi wasaminan asiadirawa, ma hingitu wanigi dan le waliihan wéiritima lan “Bungiu sügǘ tau wanigi”? (1 Huan 3:20). Ligíarügüñein abürüdüdei ínsiñeni lan Bungiu (1 Huan 4:8, 16). Ani ínchaha lumutiña Huan kristiánugu tidan tibiaman tuma tǘrüwan ligaradan lun hasigirun abagarida “úaragua luma inarüni” (2 Huan 4; 3 Huan 3, 4).

16, 17. Ida liña líchugun apostolu Pábulu gurasu houn kristiánugu ha awinwandubaña lidan furumiñeti sígulu?

¹⁶ Másiñati Pábulu lan meha apostolu le gíbetimabei katei ladügün lun líchugun gurasu houn líbirigu. Genegeti Herusalén lan meha hawinwanda hiibe-agei apostolugu dan le hagumeserunbei kristiánugu, ñéinñanu meha giñe lílana Sétanu le Arihibei lau Wadagimanu lánina Apurichihani lidoun dan ligía (Adü. 8:14; 15:2). Apurichihatiña meha kristiánugu ha Hudéabaña luagu Kristu houn gürigia ha meha afiñebaña luagu ábanrügü Bungiu ladüga hafurendeiruni hafiñen huríu. Ligía lóunahabalin sífiri sandu  apostolu Pábulu apurichiha houn güriegu hama rómana ha meha áhuduragubaña houn saragu búngiugu (Gal. 2:7-9; 1 Tim. 2:7).

¹⁷ Aweiyasuhati Pábulu lidoun lidise-agei fulasu le gíribei guentó Turükía, Güresia luma Italia ani gumeseti damuriguaü hadan ha mámabaña huríu. Mégeitiña meha iseri kristiánugu ha saragu gurasu lugundun éibaaha hamutiña meha “hapaisanun” (1 Tesa. 2:14). Ariñagati Pábulu houn lílana iseri damuriguaü le meha Tesalónikabei tidan gárada to labürüdüboun houn kéiburi lidan irumu 50: “Súnwandan weteingiruni Bungiu huagu, sun huguya, írida wamáün lidan wafurieidún. Súnwandan waritagun ligibugiñe Wáguchi luagu lubuidun heseriwidun lun Hesukrístu ladüga hafiñen luagu [...] luma lubuidun hawanduni sun asufuriruni” (1 Tesa. 1:2, 3). Ani aba líchuguni gumadi le houn: “Rúmeme humá lubéi gurasu luma erei húniwagua ítara kei hadügüni guentó” (1 Tesa. 5:11).

18. Ida liña líchugun Sétanu le Arihibei lau Wadagimanu lánina Apurichihani gurasu lun Felipe?

¹⁸ Lidan furumiñeti sígulu, yusu lumutiña Heowá lílana Sétanu le Arihibei lau Wadagimanu lánina Apurichihani lun híchugun gurasu houn sun kristiánugu íbini houn ha anügübalin ubaraü lidan burí damuriguaü. Rútiña lílana sétanu ligía ídemuei lun Felipe dan le lapurichihanbei houn lílana Samaria luagu Kristu. Óunaha hamuti Féduru luma Huan, ha giñe lílanabaña sétanu ligía, lun hamuriahan luma Heowá lun líchugun sífiri sandu houn iseri kristiánugu hagía (Adü. 8:5, 14-17). Chóuruti ru lan ídemuei ligía gurasu lun Felipe luma houn ha adügagubaña houngua kristiánugume.

19. Ka un tahuuda gárada to hóunahaboun lílana Sétanu le Arihibei lau Wadagimanu lánina Apurichihani?

¹⁹ Dan lárigiñe, aba halügüdǘniwa lílana Sétanu le Arihibei lau Wadagimanu lánina Apurichihani lidoun dan ligía anhein lunti lubéi híchugun kristiánugu ha mámabaña huríu seini tuagu hóustarun ítara kei meha lariñaguni lilurudun Moisesi (Adü. 15:1, 2). Aba hamuriahan lílana Sétanu ligía sífiri sandu luma Heowá ani akutiha haméi le tariñagubei Lererun Bungiu le íderagubaliña lun hasubudiruni mámaali lan meha mosu hadügüni kristiánugu lira. Lun hasubudiragüdüni le desidírü habéi, aba habürühan aban gárada ani aba hóunahanu lidoun burí damuriguaü hama ha ayanuhabaña luagu hafulesein. Dan le haliihanbarun kristiánugu ha gárada tuguya, “aba hagundaarun saragu luagu gurasu le tíchugubei houn” (Adü. 15:27-32).

20. a) Uguñe weyu, ida liña líchugun Sétanu le Arihibei lau Hawadigimari Gefentiña gurasu houn sun kristiánugu lidan sun ubóu? b) Kaba wariha lidan leweñegua arütíkulu?

²⁰ Uguñe weyu, ruti Sétanu le Arihibei lau Hawadigimari Gefentiña luagu Heowá lidan sun Ubóu gurasu houn íbirigu ha eseriwidubaña Betelirugu, houn ha híbiri ha lídanbaña eseriwiduni espechaliti lidan dan dayarüti luma houn sun íbirigu ha lídanbaña sun ubóu. Ítara kei meha lidan furumiñeti sígulu, sanditiwa giñe ugundani dan le weresibirun gurasu. Lidan irumu 2015, fuatu aban garüdia gíritu Jehová desea que vuelva, lau lídehan Sétanu le Arihibei lau Hawadigimari Gefentiña, lun línchahaniña gürigia ha adisedubaña luéi Heowá lidan sun ubóu lun hagiribudun lidoun inarüni. Íbirigurügüñanu funa san ha arihibaña luagu wadagimanu gayara háyeihani Heowá lau híchugun gurasu houn amu? Warihibei lidan leweñegua arütíkulu.