1-3. a) Ka san gádanbaliña sun nibureintiña, ani ka uma gayara lan genegeguagüda wamani? (Ariha humoun iyawaü to lídanboun lagumeseha arütíkulu). b) Ka gayaraabei hadügüni nibureintiña kristiánugu lun hagagibudagun luma sügǘ le?

SAMINABÁ béibuga lan lidoun aban fedu súdiniti. Mosu baweiyasuha tidan busu ani migifebei wéiyaasu ligía. Dan le bachülürün lidoun fulasu le ñeinba lubéi bárügüdoun busu aba básiñaragun bungua ladüga barihin saragu gürigia ñein tuma saragu busu. Keiti le subudibani haliñounbadibu lan aba bidin tidoun busu to lunboun tanügünibu lidoun fulasu le ñéinhinba lubéi bidin. Furanguti mádinunbadibu lan tidoun busu to lunboun tidin lidoun amu fulasu.

² Ítara liña ibagari kei wéiyaasu le, ani ha nibureingiña ítara haña kei gürigia ha lídanbaña fulasu le ñein lubéi tárügüdüwa busu. Kei gibe lubéi katei lun hadügüni lidan habagari, gayaraati anihein lan dan aba hasandiragun houngua ibidiñe lan houn kaba lan hadüga. Gama lumoun, anhein furangu lubéi houn halíñoun lan habusenra houdin, ménrengunbei houn desidírü hamá kaba lan hadüga.

³ Línchahabaña arütíkulu le nibureintiña lun hayusuruni habagari lun hagundaaragüdüni Heowá. Mini lan le lun hasaminarun luagu Heowá lidan sun le lunbei hadügüni lidan habagari, kei burí aturiahani, wadagimanu luma hani buligasion lidan habagari keisi iduheñu. Lunti giñe háfaagun luagu le habusenrubei hibihin lidan heseriwidun lun Heowá.  Gayaraati hachoururuni nibureintiña ha etenirubaña lun heseriwidun lun Heowá luagu labinirubaña lan Heowá ani buídubei lidin houn lidan habagari (aliihabei Ariñawagúni 16:3).

4. Kaba wariha lidan arütíkulu le?

⁴ Buiti lun báfaagun lun baganwoundagüdüni beseriwidun lun Bungiu. Ka uagu? Lidan arütíkulu le warihuba ǘrüwa resun. Le furumiñeti biama larufudahaba bun lau lan báfaagun luagu le babusenrubei bibihin lidan beseriwidun lun Heowá líderagubadibu lun buídutima lan bumadagua luma. Ani le lǘrüwan, larufudubei kaba lan buiti basagara lídangiñe ánhabu áfaagua lun baganwoundagüdüni beseriwidun lun Bungiu lúmagiñe biñüraü.

5. Kátima resun súdinibei lun baganwoundagüdüni beseriwidun lun Bungiu?

⁵ Furumiñeti resun ka lan uéigiñe lunti lubéi báfaagun lun baganwoundagüdüni beseriwidun lun Bungiu lun barufuduni lun teinki bani luagu línsiñehabu luma luagu sun le adüga laalibei buagu. Abürühati aban lubúein Bungiu: ‘Buiti lichugúniwa seremei lun Heowá’. Ariñagati giñe: “Nabureme, gúndaaguagüda báadina lau burí katei le badügübei! Buíngüda lumutina burí katei ligía lau ugundani” (Sal. 92:1, 4). Nibureinti, saminabá luagu sun le líchugubei Heowá bun: ibagari, lubuidun chansi luagu basubudiruni, basubudiruni inarüni le larufudahabei, Bíbülia, damuriguaü luma aban lubuidun emenigini lubá ámuñegü. Ánhabu íchigei bumadagua luma Bungiu lidan furumiñeti lúgaaru, mámarügü teinkirügü bubéi luagu sun abiniruni le, badügüba giñe aban lubuidun umadaguaü luma.

6. a) Ka lánibei baganwoundagüdüni beseriwidun lun Bungiu luma bumadagua luma? b) Ka gayaraabei badügüni lidan beseriwidun lun Bungiu guentó íbini ñǘraügidibu lan?

⁶ Le libiaman resun, dan le báfaagun lun baganwoundagüdüni beseriwidun lun Bungiu badügüña aban katei buiti ani aríagu liña Heowá lun. Derebugüda lumuti giñe katei le bumadagua luma. Chóurugüda lumuti apostolu Pábulu katei le dan le lariñagunbei: “Lugundun richaguati Bungiu, ani mabulieidun lubéi le adüga humaalibei, luma ínsiñehabuni le arufuda humaalibei lun” (Ebü. 6:10). Úati ni aban lun lariñagun ñǘraügili lan ligía siñá lubéi lasaminarun laganwoundagüdüni leseriwidun lun Heowá. Tenibá lun sügǘ burí le. Diisi meha irumu tau Christine dan le tagumeserunbei aliihei abahüdaguni luáguti habagari Gefentiña ha úaraguabaña lun Heowá. Duusu meha irumu lau Toby dan le desidírü lubéi laliihanu sun líburu to tídanboun Bíbülia lubaragiñe labadiseirun. Unsu meha irumu lau Maxim ani diisi tau Noemi, to lamulelua, dan le habadiseirunbei. Ani biángubei hagía aba hagumeserun áfaagua lidan heseriwidun lun Bungiu lun gayara lan heseriwidun Betelirugu. Lun mabulieidun hamani le habusenrubei hibihin lidan heseriwidun lun Heowá aba híchugunu gárada to lunboun habuinchagüdünu lun heseriwidun Betelirugu touba muna. Lidan bikesin, ida liña barihin lun basaminarun luagu katei le súdinitimabei lun bibihini lidan beseriwidun lun Bungiu ani gumese buguyame awadigimarida lun bibihini? (Aliihabei Filipuna 1:10, 11).

7, 8. a) Ka uéigiñe gayara lubéi wariñagun lau lan báfaagun lun baganwoundagüdüni beseriwidun lun Heowá ménrenguntimabei lan bun lun desidírü bani le lunbei badügüni? b) Ka meha uagu tanúadira aban nibureintu lun midin tan aturiaha tidan luban furendei íñuti?

⁷ Ariha waméi le lǘrüwan resun ka lan uéigiñe mosu lubéi báfaagun lun baganwoundagüdüni beseriwidun lun Heowá. Dan le nibureingidibu, mosu desidírü bani kaba lan baturiahan, halíaba lan bawadigimarida luma katei líbeina lira. Dan le badügüni le uágubei basaminara ítara liña kamá banúadiruni bémeri dan le badunragun luma bián üma. Anhein subudi lubéi bun haliñounbadibu lan, ménrenguntimabei bun banúadiruni halíagiñeba lan béibuga. Ítarameme, anhein furangu lubéi bun ka lan babusenrubei bibihin lidan bibagari ménrenguntimabei bun lun desidírü ban. Ariñagati Ariñawagúni 21:5: “Aransehani le saminawati buidu, buiti lasalirun”. Eibu madarasahan ban badügün aransehani buiti luagu le babusenrubei bibihin, furesetimabei basagarun buiti lídangiñe. Ligía meha asuseredubei  tun aban nibureintu gíritu Damaris dan le mosu lubéi desidírü tan luagu aban katei súdiniti.

⁸ Lárigiñe tagumuchunu Damaris sun tileskuelan lau puntu íñuti, aba halügün tumaisturugu híchugun aban beka tun lun taturiahan awogóu tidan luban furendei íñuti. Gama lumoun, himei tumuti tawadigimaridun lidan aban fulasu le ñein lubéi magañeirun tan saragu. Ka uagu? Afuranguagüda tumuti: “Desidírühadina meha lúmagiñe niñüraü lun neseriwidun kei prekursora. Lun lira, mosu meha náluahan aban wadagimanu le ígiruti chansi lun neseriwidun lun Heowá. Lun hamuga meha aturiaha nan lun awogóu nan, nagañeiruña hamuga meha saragu seinsu, gama lumoun machansibadina hamuga lun nawadigimaridun lidan aban wadagimanu le mama dan dayarüti”. Uguñe weyu, barüharu Damaris 20 irumu eseriwida kei prekursora. Asakürihatu san luagu le desidírü tubéi dan meha le nibureingiru? Uá. Ariñagatu: “Lidan fulasu le ñein lubéi nawadigimarida, ayanuhatina hama saragu awogóu, adüga hamuti wadagimanu le yebe lunbei nadügüni lun hamuga eresibiha nan kei awogóu. Gama lumoun, saragu hádangiñe magundantiña lau hawadigimari. Seremei meha neseriwidun kei prekursora, adügati le lun magárigüdün nani nichügü ani gúndaatina lidan sun irumu burí le naubei eseriwida lun Heowá”.

9. Ka uagu lunti lubéi wariñagun houn nibureintiña buidu lan hadüga?

⁹ Añahein saragu milu nibureintiña lidan burí damuriguaü lidan sun ubóu ha mégeitiña lun wariñagun houn buidu lan hadüga ladüga seriwitiña lun Heowá tau sun hanigi ani heteniruña lun haganwoundagüdüni heseriwidun lun. Inarüni gunda hamá lidan habagari. Gama lumoun, furendeitiña afalarei ladundehan Heowá lidan sun katei, kéiburi lidan katei luáguti aturiahani, wadagimanu luma habagari keisi iduheñu. Ariñagati urúei Salomón lunti lan wafiñerun luagu Heowá tau sun wanigi. Ani ariñagati giñe: “Haritaguabá luagu Bungiu lidan sun le badügübei, ábame lanügünibu luéigiñe üma le surubei” (Ari. 3:5, 6). Wéiriti hebegi nibureintiña kristiánu lun Heowá. Ani wéiriti hínsiñe lun, ligía lóunigirubaliña, adundehalaña ani biní lumutiña.

10. a) Ka uagu lunti lubéi súdini lan apurichihani bun? b) Kaba íderaguabu lun buidu lan lidin bun lidan apurichihani?

¹⁰ Anhein busén lubéi aban nibureinti lun lagundaaragüdüni Heowá, lunti letenirun lun apurichihani. Arufudahati Hesusu súdini lan wadagimanu le dan le lariñagunbei: “Lapurichihóuba uganu luáguti asalbaruni houn sun néchanigu” (Mar. 13:10). Kei le aubei barihei, lunti súdini lan apurichihani bun lidan bibagari. Ligíati, saminaadibu san baganwoundagüdüni bapurichihan, íbini lun beseriwidun kei prekursoru? Ánheinti magundan bubéi saragu lidan apurichihani? Kábati íderaguabu lun buidu lan lidin bun dan le bayanuhan houn amu luagu Heowá? Adügabéi bián katei le: aransebá buidu ani merederabéi babahüdaguni houn amu le basubudirubei. Taweiriduba banigi lau barihini ugundani le lanügübei badügüni katei le.

11, 12. a) Ka gayaraabei hadügüni nibureintiña lun aranseñu hamá lun hapurichihan? b) Ida liña meferidirun lani aban nibureinti chansi lun layanuhan luagu Heowá leskuelarugu?

¹¹ Furumiñe, houchabá baranserun lun bóunabun fiu álügüdahani le gayaraabei hadügüni bánigu paaná leskuelarugu bun. Lidan wani páhina lidan Internet jw.org anihein arütíkulu le íderagubaliña nibureintiña lun híchugun óunabagülei lun álügüdahani le kamaniti hadan nibureintiña. Kéiburi, ánhabu hamuga hamisurahan bánigu paaná lun bagamaridun, kaba hamuga bóunaba? Líderagubadibu arütíkulu le gíribei “Kaba nadüga anhein adügüdarúa nuagu lun nagamaridun?” le tídanbei garüdia Lóunabagüle 10 hálügüdahan nibureintiña lun baranseruni le lunbei bóunabuni. Tidan garüdia to, badariruba amu arütíkulu le gayaraabei leseriwidun bun lun bóunabun amu álügüdahani (aliihabei Kolosana 4:6).

¹² Danme le gachansin ban, ariñagabá houn bánigu paaná lun hebelurun lidoun páhina jw.org. Anihán le ladügübei Luca aban weyu dan le hayanuhanbei tuagu ámuñegueinarügü relihión tidan lani külase. Aba larihini anihein lan fiu charati lidan le  ariñawagúbei hawagun gefentiña luagu Heowá tidan líburu to ayusurúboun lidan külase. Íbini ladadagaruña lan, aba lamuriahan üma tuma lumaistaran lun lafuranguagüdüni ka lan uagu iyeeni lubéi le tariñagubei líburu tuguya hawagu Gefentiña. Aba lafuranguagüdüni lafiñen hagibugiñe sun lánigu paaná ani aba giñe larufuduni wani páhina le lídanbei Internet houn. Aba tíchugun máistara kei dasi lun harihini bidéu lánina abürühagülei wínwantu le gíribei Cómo defenderte sin dar un solo golpe. Ma lugundan Luca ladüga gayara lan ladimurehan luagu Heowá houn amu.

13. Ka uagu moun lumuti lubéi lábürühan barüna dan le bagagibudagun luma turobuli?

¹³ Mábürühan lan barüna anhein achülaagua turobuli bun lidan bibagari le adügübei lun hénrengu lan bun lun bibihini le uágubei báfaagua lidan beseriwidun lun Heowá. Sigiba áfaagua luagu (2 Tim. 4:2). Ligía tadügübei Katharina. Dan meha le disedü lubéi irumu tau, aba tábunaguni lidan tisaminan lun tapurichihan houn sun tánigu paaná lidan wadagimanu. Aban hádangiñe tánigu paaná anaba lumutu saragu wéiyaasu, lau sun lira, mábürühanti tarüna Katharina. Wéirigüda lumutu lubuidun ligaburi tóuserun lanigi aban hádangiñe tánigu paaná, le gíribei Hans. Kati asuseredubei lárigiñe? Aba lagumeserun Hans aliihoun wani agumeiraguagüdüni, resibi ligía aturiahani tídangiñeti Bíbülia ani aba labadiseirun. Íbidiñeti meha ni kata tun Katharina luagu le ladüga aba táguyun lidoun amu fulasu. Tareisi irumu lárigiñe, aban weyu, tídanñoun Luban adamuridaguni Katharina aba taweiridun tanigi lau tarihini Hansba lan meha íchigei yanu. Ma lubuidun mígirun tani meha tapurichihan houn tánigu paaná lidan wadagimanu!

14, 15. a) Ka lunbei gabaroun bani dan le hadügüdarun amu buagu? b) Ka lunbei badügüni anhein hadügüdaruña lubéi amu buagu?

¹⁴ Darí guentó, ínchaha laadibu arütíkulu le lun bíchuguni beseriwidun lun Heowá lidan furumiñeti lúgaaru lidan bibagari luma lun báfaagun lun baganwoundagüdüni beseriwidun lun. Gayaraati súnwandan lan añaha lan nibureintiña ha biseisin lidan isebáhari ani agunbiraha hamutibu giñe lun bóundarun hama. Mama uguñe mama haruga, barufudubei giñe anhein inarüni lubéi desidírühadibu lan lun báfaagun lun bibihini le babusenrubei lidan beseriwidun lun Heowá. Mígiraguagüdaba bungua lun hadügün amu lun metenirun ban lun beseriwidun. Saminabá luagu hénpulu luáguti fulasu le ñein lubéi tárügüdua busu. Chóuruti úabaña lan ni aban lun hádinun tidoun aban busu ladügarügü harihin gunda hamá ha lúnbaña haweiyasuhan tidan.

 ¹⁵ Anihein amu katei le gayaraabei badügüni lun bagagibudagun luma hadügüdarun amu nibureintiña bíledigu buagu. Kéiburi lun midin ban le ñein lubéi gayara lan bóuchawagun (Ari. 22:3). Ani saminabá luagu le gayaraabei lasuseredun ánhabu hamuga adüga katei le mabuidunti (Gal. 6:7). Líderagubadibu giñe basubudiruni megei bubéi lan hídehan amu gürigia. Anhein ǘnabugu bubéi, bánharuba lau sun bugundan lun adundehani le híchugubei bagübürigu bun o le híchugubei amu kristiánugu ha derebuguhaña lidan afiñeni (aliihabei 1 Féduru 5:5, 6).

16. Abahüdahabá aban sügǘ le arufuduti ka lan uagu súdini lubéi ǘnabuguni.

¹⁶ Ariha waméi le asuseredubei lun aban nibureinti le gíribei Christoph, le arufudubei ǘnabuguni ani ánhati lun adundehani le leresibirubei. Murusun dan lárigiñe labadiseirun, aba lagumeserun abasiha lidoun fulasu le ñein lubéi ladügǘwa ehersísiu. Lau ñein, aba hagunbirahani amu nibureintiña lun labürüdagún lungua lidan aban sétanu lánina áhureruni. Aba labahüdahani Christoph lun aban wéiyaali lidan afiñeni, aba lariñagun wéiyaali lidan afiñeni lun lubaragiñe lan labürüdǘn lun lan lasaminarun luagu denchaü le lanügübei ládaragun lungua lidoun huraraü le, kei burí láfaagun lun ligíatima lan buidu hawéi ha híbiri. Íbini ítara, aba labürüdagún Christoph lungua lidan sétanu ligía. Lau lásügürün dan, aba líchugun fe hanarime lan huraraü le láhurerubei ani dencha ligía. Aba layanuhan luagu katei le hama saragu wéiyaaña lidan afiñeni, sun hagía aba híchugun adundehani tídangiñeti Bíbülia lun. Ariñagati: “Óunaha lumutiña Heowá íbirigu lun híchugun lubuidun adundehani nun. Íbini barǘ nan saragu dan lun nánharun lun adundehani le ichugúbei nun, lagumuhóun aba nánharun lun adundehani ligía”. Ǘnabugutibu san lun bánharun lun adundehani le ichugúbei bun?

17, 18. a) Ka labuserunbei Heowá houn nibureintiña? b) Ka lunbei badügüni lun masakürihan ban luagu le desidírü bubéi guentó lau nibureingidibu lan? Íridaba aban sügǘ.

¹⁷ Ariñagati Heowá: “Befeduha nibureingili, guentó luagu buin biña lan lau ibagari; efeduhabéi le buídubei guentó le auti biyara” (Apur. 11:9). Busenti Heowá lun gunda ban. Lidan arütíkulu le arihaadiwa lun gayara lan bagundaarun lunti betenirun lun baganwoundagüdüni beseriwidun lun Heowá luma lun basaminarun luagu Heowá lidan sun le badügübei lidan bibagari. Éibutima adügagiñebani aransehani le lidan bibagari, arihagiñetima bubéi ida liña lan ladundehanibu Heowá, lóunigirunibu luma labinirunibu. Saminabá luagu sun lubuidun adundehani le tíchugubei Bíbülia ani gaganbadibá lun adundehani le: “Haritaguabá luagu Bungiu guentó lau nibureingidibu lan” (Apur. 12:1).

¹⁸ Murusunrügüñein dan nibureinti lan gürigia. Lubaragiñe bíchugun fe wéiyaadibume. Híruti saragu lan gürigia ha wéinamugaaña asakürihatiña luagu háfaagun luagu amu katei dan meha nibureingiña o luagu madügün hamá ni kata lidan habagari. Ánhañati nibureintiña ha áfaagubaña lun haganwoundagüdüni heseriwidun lun Heowá buídubei hasandiragun houngua danme le haweinamudun. Ítara liña tasandiragun Mirjana tungua guentó. Dan meha le nibureingiru, buitu meha lidan huraraü darí lun tagunbirahóun lun tahurerún lidan huraraü le gíribei Juegos Olímpicos de Invierno. Íbini ítara, himei tumuti teseriwidun lidan dan dayarüti. Sügühali lóugiñe 30 irumu ani anuhamémegua lidan dan dayarüti úara luma tani weiriei. Ariñagatu: “Murusunrügüñein lidura subudiwa lan gürigia, gabafu lan luma lun lagañeirun saragu seinsu ani katei málati lira. Le buídutimabei weseriwidun lun Bungiu luma lun wídehan lun hasubudiruni amu”.

19. Ka buiti lunbei bibihini ánhabu áfaagua lun baganwoundagüdüni beseriwidun lun Heowá?

¹⁹ Lunti wariñagun houn nibureintiña ha eseriwidubaña lun Bungiu buidu lan hadüga lau hetenirun lun heseriwidun lun íbini lidan lénrengunga le úmabei hagagibudagua. Áfaaguatiña lun haganwoundagüdüni heseriwidun lun Bungiu, lun híchuguni apurichihani lidan furumiñeti lúgaaru lidan habagari luma lau mígirun hamá lun leferidiraguagüdüniña ubóu le. Nibureinti, gayaraati bachoururuni gebegi lan báfaagun. Harufuduba íbirigu ínsiñehabuni bun ani híderagubadibu lidan beseriwidun lun Bungiu. Ánhabu asaminara luagu Heowá lidan sun le lunbei badügüni lidan bibagari buídubei lidin bun.