1, 2. a) Ka san uagu nidiherigüda lubaliña meha amudirawaguni gürigia ha lánina lidaani Pábulu, samina hagía lunti lan hesefurun ha amudirawagubaña? b) Según Pábulu, Halíagiñe liabin esefuruni le inarüniti?

GÜRIGIA meha ha lábugiñebaña hagumadihan rómana pántatiña meha ladüga ageindagua hamá lun lagunfulirún lau lúrudu, lun ñein lan irichaü luma lun hesefurun ha amudirawagubaña. Gama lumoun, saragu lídangiñe ubafu luma uéiriguni le meha lúmabei arúeihani le ibiha lumuti ladüga wadagimanu le hadügübei ha amudirawagubaña. Chülüti aban dan lun hamudirawagun kéiburi darandi hádangiñe kada san gürigia ha lábugiñebaña arúeihani le. Chóuruti nidiherigüda lániña meha amudirawaguni gürigia, íbini kristiánugu, ani saminatiña lunti lan hesefurun ha amudirawagubaña.

² Abürühati meha apostolu Pábulu saragu luagu esefuruni. Busentiña meha gürigia ha lídanbaña lidaani lun lasansirun katei lidan habagari o lidan polítika, gama lumoun, mama meha le habusenrubei gürigia ha hibihin labusenrubei Pábulu. Áfaaguarügüti Pábulu hama ha híbiri kristiánugu lun híderaguniña gürigia lun hasubudiruni uganu  luáguti Larúeihan Bungiu luma luagu lanarime lebegi esefuruni le lafayeirubei Hesusu. Arufuda lumuti apostolu houn lílana damuriguaü Halíagiñe lan liabin esefuruni le inarüniti. Kei hénpulu, tidan tibiaman gárada to labürühaboun houn kristiánugu korintuna, ariñagati: “Heowá Sífiribei, ani le ñein lumuti lani Heowá sífiri, anihein esefuruni ñein” (2 Kor. 3:17, TNM).

3, 4. a) Ka uagu layanuhan Pábulu lidan burí bérusu le lubaragiñebei 2 Korintuna 3:17? b) Ka lunbei wadügüni lun gayara lan wagundaarun lau esefuruni le líchugubei Heowá woun?

³ Tidan tuguyaméme gárada to lóunahaboun Pábulu houn korintuna, ayanuhati luagu le asuseredubei lun Moisesi dan le lararirunbei luéigiñe wübü Sinaí lárigiñe ladimurehan luma lani Heowá ánheli. Ámirihati ligibu. Dan le harihinbalin ísüraelina aba hanufudedagun ligía ladouragunbei lau ligibu tau aban belu (Afu. 34:29, 30, 33; 2 Kor. 3:7, 13). Afuranguagüda lumuti Pábulu dan le lan lagiribudun somu gürigia lun Heowá “aba tagidarún belu tuguya luéi” gürigia ligía (2 Kor. 3:16). Ka labusenrubei lariñagun?

⁴ Kei wafurendeirun lidan arütíkulu le lubaragiñebei le, Heowárügüñein garicha lun ladügüni le labusenrun, ligía Adügübalin sun katei. Ligíati, le ñein lubéi luéirigun luma lani Heowá sífiri anihein esefuruni ñein. Ariñagati Pábulu anhein busén wabéi wibihini esefuruni le lunti wagiribudun lun Heowá. Mini lan le lunti buidu lan wamadagua luma Heowá. Marihin hamuti meha ísüraelina ha lídanbaña fulasu mageirawati katei kei larihini Heowá. Ítara liña kamá hamuga aban belu adouraguboun lau hasaminan luma tau hanigi. Busenrügütiña meha hayusuruni esefuruni le hibihibei lun híchugun ugundani hóuniwagua (Ebü. 3:8-10).

5. a) Ka luwuyeri esefuruni líchugubei lani Heowá sífiri? b) Ida liña wasubudiruni gayara lan hagundaarun lau esefuruni le líchugubei Heowá íbini ha amudirawagubaña o ha furisunrugubaña? c) Kaba san álügüdahani wakutiha?

⁵ Gama lumoun, wéiritimati esefuruni le líchugubei lani Heowá sífiri sügǘ luéi esefuruni le habusenrubei hiibe-agei gürigia. Sefu lumutiwa lani Heowá sífiri luéi lamudihan figóu luma óunweni, ítara giñe kei luéi lamudihan relihión mama inarüniti luma burí échuni le ñǘbuinbei lídangiñe. Gíbetimati le gayara lubéi esefuruni le íchiga sügǘ luéi le gayara habéi wügüriña adüga (Rom. 6:23; 8:2). Ma lubuidun esefuruni le líchugubei Heowá! Gayaraabei giñe hagundaarun íbini ha amudirawagubaña o ha furisunrugubaña lau esefuruni le (Agu. 39:20-23). Ligía asuseredubei tun íbiri Nancy Yuen luma lun íbiri Harold King. Biángubei hagía dáüwatiña luagu saragu irumu ladüga hafiñen. Gayaraati warihiniña ani aganba wameime le habahüdahabei lidan programa JW Broadcasting (VIDEOS > ENTREVISTAS Y EXPERIENCIAS > SE ENFRENTAN A PRUEBAS). Gama lumoun, akutiha waméi álügüdahani burí le: Ida liña warufuduni gebegi lan esefuruni le woun? Ani ka lunbei wadügüni lun wayusuruni buidu?

6. Ida liña harufuduni ísüraelina mebegi lan esefuruni le líchugubei Heowá houn?

⁶ Dan le ledewehan aban gürigia idewesei woun le gebegiti teinki wamuti saragu. Sefu lumutiña Heowá ísüraelina dan le lasagarunbaliña Ehiptugiñe. Ida liña heteingiruni? Murusun dan lárigiñe hígirawagüdün lídangiñe amudirawaguni, aba hagumeserun ayumahei éigini le Ehiptubei ani aba hagumeserun ekehara luagu le líchugubei Heowá houn. Darí lun hariñagun busén hamá hagiribudun Ehiptun. Súdinitimati meha úduraü houn, pepinu, badía, sebuya luma lai sügǘ luéi chansi le hibihibei lun háhuduragun lun Heowá sin heberesehóun. Maweiriduntu wanigi luagu lagañidun hama saragu (1 Lur. 11:5, 6, 10; 14:3, 4). Furendeitiwa aban katei súdiniti lídangiñe sügǘ le.

7. a) Ida liña ladügüni Pábulu le lariñagubei adundehani le guánarügü labürüdübei lidan 2 Korintuna 6:1? b) Ida luba wadügüni ligiaméme?

⁷ Ínchaha lumutiña apostolu Pábulu kristiánugu lun mabulieidun hamani esefuruni le ru laalibei Heowá woun lau lóunahani Hesukrístu le Liráü lun  lounwen luagu wafigoun (aliiha huméi 2 Korintuna 6:1). Haritagua waméi wuriba lan meha lasandiragun Pábulu lungua ladüga lidamun lan figóu luma óunweni ligía. Gama lumoun, aba ladügüni le lariñagubei adundehani le guánarügü labürüdübei: “Búngiugubeirügü, lídangiñe Wabureme Hesukrístu. Teinki niña lun Bungiu!” Ka uagu lariñagei le? Afuranguagüda lumuti lau lariñagun: “Ru laali Kristu lani [s]ífiri woun, ani [s]ífiri ligía, ruti iseri ibagari woun; furigüda láadiwa lábugiñegiñe lubafu figóu le anügübaliwa lidoun óunweni” (Rom. 7:24, 25; 8:2). Mabulieida waméi giñe sefu laadiwa lan Heowá lídangiñe lamudihan figóu luma óunweni. Seremei lafayeirún lebegi esefuruni gayara lubéi weseriwidun lun Heowá lau aban saminaü darangilati (Sal. 40:8).

8, 9. a) Ka eweridihani lariñagubei apostolu Féduru luagu wayusuruni ubafu le wawagubei lun wanúadahani le wabusenrubei wadügün? b) Ka katei denchati úmabei wagagibudagua uguñe weyu?

⁸ Lunti giñe wóunigiragun woungua luéi wuriba lan wayusuruni ubafu le wawagubei lun wanúadahani le wabusenrubei wadügün. Wéridi lumutiwa apostolu Féduru luéi wayusuruni ubafu le lúnrügü wadügüni wuribani le wayumahabei (aliiha huméi 1 Féduru 2:16). Haritaguagüda lumutiwa eweridihani le luagu le hadügübei ísüraelina lidan fulasu mageirawati. Uguñe weyu, humemegili eweridihani le, háfuga sügǘtima luéi dan lügüra. Gíbetimarügaali katei lasagahan Satanási luma ubóu le lábugiñebei lubafu le adügübei lun lawamaadun houn gürigia, kei burí daüguaü, éigini, uniñein, isebáhari luma burí amu katei. Yúsutiña laburiña bísini gürigia ha buídumeraütiña ani gabimehaditiña lun hafiñenragüdüniwa megei wamá wagañeihan umegeguni le memegeirun wamuti. Ménrengunti lun wéiguadun tidoun sádara to luma lun wayusuruni ubafu le wawagubei lun wanúadahan wuriba.

⁹ Huuti giñe adundehani le líchugubei Féduru woun lidan katei súdinitimati le lunbei wadügüni lidan wabagari, kei burí lidan aturiahani o lidan wadagimanu. Kei hénpulu, dǘgüdatiña máisturugu hawagun nibureintiña leskuelarugu lun haturiahan tidan luban furendei íñuti. Adügatiña lun hafiñerun adüga lan aturiahani íñuti lun hadarirun aban wadagimanu le buiti le lunbei ladügün lun hagañeirun saragu seinsu. Rútiña burí ariñahani houn le arufudubei fayeiwatima hamá ha eresibihabaña tídangiñe luban furendei íñuti sügǘ hau ha maturiahantiña tidan. Gayaraati aban lan óuchawaguni sun le houn nibureintiña ha lúnbaña desidírü hamá kaba lan hadüga lau habagari. Ka lunbei haritaguni dandu hagía kei hagübürigu?

10. Ka lunbei gabaroun wamani dan le desidírü wamá kaba lan wadüga lidan wabagari?

¹⁰ Añahein gürigia másiñati afiñe hamá kei kada lan gürigia lunti larihini kaba lan ladüga lidan luáguti katei le ligía lunti lubéi lanúadiruni kaba lan ladüga ígirarügü laali ligía lisaminan lun ladügüni. Háfuga hasaminarun luagu le lariñagubei Pábulu houn korintuna luagu éigini: “Ka san uagu lunti lubéi lafalaruni aban gürigia laritagun amu?” (1 Kor. 10:29). Inarüni gabafu wamá lun desidírü wamá kaba lan waturiaha luma kaba lan wadüga lidan wabagari. Gama lumoun, lunti waritaguni luagu gébeha lan ubafu ligía ani sun lan le lunbei wadügüni lanügüba buiti o wuribani woun. Ligía lariñagunbei Pábulu: “Gayaraati nadügüni le nabusenrun, gama lumoun mama sun katei lun buidu lan lanügün. Gayaraati nadügüni le nabusenrun, gama lumoun mama sun katei lun lawanseragüdüniwa lidan katei le lánina sífiri” (1 Kor. 10:23). Chóuruti líderagubadiwa lan le lun gunfuranda wamani maweirin lan lisudinin le hínsiñebei woun dan le mosu lan desidírü wamá.

11. Ka lisuunibei lesefuruniwa Bungiu lídangiñe lagumadihan figóu luma óunweni?

¹¹ Dan le leweridihanbei Féduru lun mayusurun wamani wuriba ubafu le wawagubei lun wanúadahani  le wabusenrubei wadügün arufudati giñe lun lan wayusuruni ubafu le buidu lunti wadügagun woungua ‘lidamunme Bungiu’. Ligíati, yusu lumuti Heowá Hesusu lun lesefuruniwa lídangiñe lagumadihan figóu luma óunweni lun wederegeruni sun wabagari lun weseriwidun lun Heowá.

12. Ka hénpulu líchugubei Noé hama liduheñu woun?

¹² Kátima lunbei wadügüni lun mayusurun wamani wuriba esefuruni le líchugubei Heowá woun ni lun lidamunya wamá ayumahani luma le habusenrubei gürigia hibihin? Wetenirun lun weseriwidun lun Bungiu (Gal. 5:16). Ariha waméi le asuseredubei lun Noé hama liduheñu. Íbini hawinwanduña lan meha lidan aban ubóu buin lau anarimeni luma magíaguni, mígiraguagüdüntiña houngua lun le hayumahabei gürigia ni lun le hínsiñebei houn. Kati hadügübei lun mígiraguagüdün hamá houngua? Lau beresegu hamá adügei sun le lariñagubei Heowá houn lun hadügüni: adügoun árüka, areidaha éigini dandu hóuniwagua kei houn animaalugu luma awisaraña gürigia luagu ladibira lan meha ubóu. Ariñagatu Bíbülia: “Aba ladügüni Noé sun katei kei lariñaguni Bungiu lun” (Agu. 6:22). Ida liña lidin houn? Séfuti Noé hama liduheñu dan le ladibirunbei ubóu (Ebü. 11:7).

13. Ka gumadi líchugubei Heowá woun?

¹³ Ka gumadi líchugubei Heowá woun? Subudi wamuti óunaha lani Heowá Hesusu apurichiha ani ligiaméme ladügübei Hesusu, aba lóunahaniña lani disipulugu apurichiha (aliiha huméi Lúkasi 4:18, 19). Lidan wadaani, hiibe-agei gürigia marihin hamuti le asuseredubei ubouagu ladüga daruguaali Satanási lau harihin ani lidamun hagía le ladaagubei relihión, bísinisi luma le gádanbaliña gürigia (2 Kor. 4:4). Anhein wagía anihein lubuidun chansi wama lun wáyeihani Hesusu luma lun wíderaguniña gürigia asubudirei Heowá luma lun heseriwidun lun, le Lubungiute esefuruni (Mat. 28:19, 20). Mama aban wadagimanu ménrengunti, gagibuguatiwa luma saragu turobuli dan le wáfaagun lun wagunfuliruni. Lidan fiu ageiraü, añahein gürigia ha mínsiñehabutiña lun le wapurichihabei ani anihein dan furundetiña. Sun wagía lunti wálügüdagun woungua: Gayaraati san wayusuruni ubafu le wawagubei lun wanúadahani  le wabusenrubei wadügün lúntima wídehan lun lawanserun wadagimanu lánina apurichihani?

14, 15. Ka katei adüga hamaalibei saragu lubúeingu Heowá? (Ariha humoun iyawaü to lídanboun lagumeseha arütíkulu).

¹⁴ Gúndaatiwa warihin saragu lubúeingu Heowá ha gunfuranda hamuti yarafaali lan lagumuchagüle ubóu ani adügaaña lun mibe lan hamegegun lun gayara lan heseriwidun lun Bungiu lidan dan dayarüti (1 Kor. 9:19, 23). Añahein hádangiñe añaheingua lidan damuriguaü le ñein habéi, añahein giñe amu águyaaña lidoun amu damuriguaü le ñein lubéi mégeiwa hamá apurichihatiña. Arufudati ariñahani lidan lan lagumuhóun seingü irumu le ásügürübei gumesetiña hóugiñe 250,000 íbirigu eseriwida lidan dan dayarüti. Uguñe weyu, añaheinhaña hóugiñe 1,100,000 íbirigu eseriwida kei prekursoru ha adügübaña 70 oura luagu hati. Ma lubuidun le ibihúbei lau wayusuruni ubafu le wawagubei lun wanúadahani le wabusenrubei wadügün lun weseriwidun lun Heowá! (Sal. 110:3).

¹⁵ Ka íderagubaliña íbirigu ha lun haganwoundagüdüni heseriwidun lun Heowá? Ariha waméi likesin John tuma Judith. Lidan darandi irumu le sügühalibei, seriwihaña lidan ámuñegueinarügü ageiraü. Haritagua hamagili dan le lan tagumeserunbei Leskuela houn Prekursorugu, lidan irumu 1977, ínchahouatiña meha aturiahatiña lun háguyun lidoun amu fulasu le ñein lubéi mégeiwa hamá apurichihatiña. Ariñagati John mosu lan meha lasansihan wadagimanu saragu wéiyaasu lun mibe lan hámati luma lun hibihini le uágubei háfaagua lidan heseriwidun lun Bungiu. Lau lásügürün dan, aba houdin apurichiha lidan amu ageiraü. Ñein híchiga fe dan le lan hafiñerun luagu Heowá furíei hagía lun íderagua lumutiña lun magañeirun lániña turobuli, kei burí hafurendeirun amu iñeñei, hafurendeirun awinwanda lidan amu échuni o hagagibudagun luma lanarime lidiliga luma lanarime lárouga. Ida liñati hasandiragun houngua luagu irumu burí le haubei eseriwida lun Heowá? Ariñagati John: “Rúguaadina nungua lun neseriwidun lun Heowá ani úati amu eseriwiduni buídutimati luéi le. Ítara liña Heowá nun kei aban úguchili le hínsiñehabuti. Ani guentó, gunfuranda naali buidu le mini lubéi Santiagu 4:8, le ariñagubei: ‘Yarafa humá lun Bungiu, ábame giñe layarafadun hun’. Subudi numuti darina lan le náluahabei gasuunihali nibagari ani buin liña lau ugundani”.

16. Ida liña hayusuruni saragu íbirigu ubafu le hawagubei lun hanúadahani le habusenrubei hadügün?

¹⁶ Adügati le gádanbaliña amu íbirigu lun heseriwidun lidan dan dayarüti luágurügü murusun dan. Lau sun lira, hiibe-agei íbirigu lidan sun ubóu meferidirun hamuti chansi lun heseriwidun lidan tábunawagun muna to lunboun teseriwidun lun láhudurawagun lun Heowá. Kéiburi 27,000 íbirigu nadagimeintiña lidan tábunawagun iseri Beteli Warwick (Newayoru), to ñéingiñe lubéi larihíwa lau wadagimanu lánina apurichihani lidan sun ubóu. Añahein hádangiñe seriwitiña ñein luagu bián dimaasu, amu luagu saragu hati, ha híbiri luagu aban irumu o lóugiñe. Saragu hádangiñe ígira hamuti le hadügübei lun houdin ídeha. Sun hagía rútiña aban lubuidun hénpulu luagu ida liña lan layusurún esefuruni le líchugubei Heowá woun lun halawahani luma lun híchugun uéiriguni lun.

17. Ka buiti hagurabubei ha ayusurubalin buidu esefuruni le líchugubei Bungiu?

¹⁷ Teinki wamuti Heowá lau wasubudiruni luma lau ugundani le wasandirubei lau wibihini esefuruni le líchugubei áhuduraguni inarüniti. Busentiwa lun larufuduni le desidírü wabéi gebegi lan esefuruni le woun. Lubaragiñe wayusuruni wuriba o mabahüdün wamani yusu waméi lun weseriwidun lun Bungiu lau sun wayara. Ánhawa adügei ítara, gayaraabei wachoururuni weresibirubei lan abiniruni le füramase lubéi Heowá woun lau dimurei le: “Lesefuruba [...] ubóu lídangiñe asufuriruni luma agadeiruni le gádanbalin lun gafanranbei lan lidan haweirigun lirahüñü Bungiu” (Rom. 8:21).