LIDAN sun ubóu, lidan irumu le ásügürübei, iridúatiña saragu milu gefentiña luagu Heowá kei wéiyaaña lidan afiñeni o ídehatiña lidan damuriguaü. Anhein huguya lubéi aban hádangiñe íbirigu hínsiñewatiña ha, chóuruti gunda humá luagu iseri dasi le heresibirubei.

Gama lumoun, másiñati anihein lan murusun idiheri huagu, ani gunfurandawatün. Ariñagati Jason, aban wéiyaali lidan afiñeni le nibureingili: “Dan le niridúnbei kei wéiyaali lidan afiñeni saminatina yebe siñagua báadina lan nungua lau saragu buligasion”. Sandiguati giñe Moisesi luma Heremíasi houngua ítara luagu siñabei lan meha hagunfuliruni wadagimanu le líchugubei Heowá houn (Afu. 4:10; Her. 1:6). Sandiguañahadün san hungua ítara? Ka gayaraabei hadügüni lun masandiragun humá hungua ítara luma lun hasigirun awansera? Akutiha waméi lubuidun igaburi le larufudubei Timotéu (Adü. 16:1-3).

Háfuga wein lan meha irumu lau Timotéu dan le lagunbirahabalin Pábulu lun lidin luma lidan luweiyasun kei misioneru. Másiñati machourun lan meha lasandiragun Timotéu lungua ani hénrengu lan lun lun lárügüdüni iseri dasi le ichugúbei lun lidan damuriguaü (1 Tim. 4:11, 12; 2 Tim. 1:1, 2, 7). Gama lumoun, 10 irumu lárigiñe, gayaraahali meha lariñagun Pábulu houn lílana damuriguaü le Filipubei: “Anhein busén lubéi Wabureme Hesukrístu, nóunahabei Timotéu arihaün madise [...]. Ladüga úati amu numa le asaminaruti kei au” (Fili. 2:19, 20).

Ida liña san ábanhali lan wéiyaali lidan afiñeni Timotéu le gayaraahali lafiñerúniwa luagu? Akutiha wamá sisi katei le gayaraabei hafurendeirun lídangiñe le ladügübei.

1. Bereseti meha hau gürigia tau sun lanigi. Ariñagati Pábulu houn íbirigu ha Filipubaña luagu nidiheri lan Timotéu saragu hawagu (Fili. 2:20). Anha, bereseti meha Timotéu saragu hawagu gürigia. Busenti meha líderaguniña ederebudagüdei hamadagua luma Bungiu ani aranseñu liña meha lun ladügün saragu sákürifisiu wéinamuti hawagu.

Mítaran humá kei abugahati busu le nidiheritimabei lun lachülürün lidan dan lidoun fulasu le ñein lubéi tararama busu sügǘ luéi ladiheridun hawagu gürigia. Ruti William, aban wéiyaali lidan afiñeni le barühali lóugiñe 20 irumu lidan eseriwiduni le, aban lubuidun adundehani houn wügüriña ha málügili lúmagiñe heresibirun somu buligasion lidan damuriguaü: “Óusera humaña íbirigu lau ínsiñehabuni. Lunti hetenirun lun le hemegeirubei ha híbiri sügǘtima luéi hetenirun lun ida liña lan ladügǘn somu wadagimanu o dasi lidan damuriguaü”.

2. Ru lumuti apurichihani lidan furumiñeti lúgaaru. Lárigiñe layanuhan Pábulu luagu lubuidun ligaburi Timotéu, le meha mítaranbei kei ha híbiri, aba lariñagun: “Súngubei hawouguarügüñein haritagua, mama le labusenrubei Kristu Hesusu” (Fili. 2:21). Rómañein meha Pábulu dan le labürüdübalin dimurei burí le, aba líchugun fe luagu hagaburi íbirigu ha ñéinbaña, wéiriti meha hetenirun lun híchugun ugundani hóuniwagua. Lóuguati meha háfaagun lun haganwoundagüdüni heseriwidun lun Bungiu. Ánheinti Timotéu, magaburi lumuti meha igaburi le. Dan le lichugúnbei chansi lun lun laganwoundagüdüni leseriwidun lidan apurichihani, aba larufudun aban igaburi libe ligaburi Isaíasi, le ariñagubei: “Anahán, óunahabana” (Isa. 6:8).

Ka lunbei hadügüni lun gayara lan úaragua lan le hadügübei luma hani buligasion lidan damuriguaü? Furumiñe, furangu lan hun ka lan katei lunbei lanügüni furumiñeti lúgaaru lidan hibagari. Ruti Pábulu adundehani luagu lunti lan wanúadiruni katei le súdinitimabei (Fili. 1:10). Chouru huméi buidu ka lan súdinitimabei lun Bungiu ani ligía lan giñe súdinitima  hun. Libiaman, mibe lan húmati. Dise humá luéi sun le agidarubei dan luma erei. Ariñagati Pábulu lun Timotéu: “Anurahabá [...] luéi luriban hayumahan nibureingiña; barüba aban ibagari le lánina richaguaü, afiñeni, ínsiñehabuni luma darangilaü” (2 Tim. 2:22).

3. Nadagimeinti saragu lun leseriwidun lun Heowá. Ariñagati Pábulu houn filipuna: “Ánheinti Timotéu, subuditi ligaburi hun, luma ida liña lan leseriwidun numa lidan lapurichihóun uganu le lánina asalbaruni keisi aban isaani le íderaguti lúguchi” (Fili. 2:22). Úati meha magúali lan Timotéu. Nadagimeinti saragu úara luma Pábulu ani adügati katei le lun buídutima lan hamadagua.

Anihein saragu wadagimanu le gayaraabei hadügüni tidan lóundarun Bungiu, wadagimanu le lunbei líchugun saragu ugundani hun ani ladügüba lun hayarafaduntima houn híbirigu. Ligíati, áfaagua humá súnwandan lun haganwoundagüdüni le hadügübei “lidan luadigimari Wabureme” (1 Kor. 15:58).

4. Adüga lumuti le lafurendeirubei. Abürühati Pábulu lun Timotéu: “Anhein buguya, falá baali narufudahan buidu, ligaburi nabagaridun, nafiñen, nuguraasun, nínsiñehabu, nigunfulin” (2 Tim. 3:10). Kei le adüga lubalin Timotéu le lafurendeirubei, ligía leresibirubei lanwountima lani buligasion (1 Kor. 4:17).

Anihein san aban íbiri derebuguhali lidan afiñeni ani barǘ humuti kei humaisturun? Anhein ua lubéi ni aban gürigia ítara huma, ka uagu máluahan hubéi aban? Tom, aban wéiyaali lidan afiñeni le barühali saragu irumu eseriwida kei wéiyaali, haritagua lágili berese lan meha aban wéiyaali lidan afiñeni lau, barühali meha íbiri ligía saragu irumu lidan eseriwiduni le ani ligíaali meha lumaisturun. Ariñagati Tom: “Súnwandan meha namuriahan adundehani luma, ani sun le lariñagubei nun adüga numuti, ani ligía katei le adügübei lun buídutima lan nasandiragun nungua”.

5. Sigiti ederebudagüdei lafiñen luagu Bungiu. Ariñagati Pábulu lun Timotéu: “Áfaaguaba lun bagunfulirun luma Bungiu” (1 Tim. 4:7). Gayaraati ñein lan aban gürigia arufudaha lun aban áhureruti, gama lumoun lunti lasigirun áhureruti adüga ehersísiu dan le uá lan le arufudahabei lun. Ariñagati Pábulu lun Timotéu: “Rúguaba bungua lun baliihanu Lererun Bungiu lun adamurini, íchiga gurasu houn waduheñu lidan hafalaruni, alidihaña darime nachülürün. [...] Saminabá luagu burí katei le, deregeguabá bungua lun, lun gayara lan larihíniwa bawanserun” (1 Tim. 4:13-15).

Mégeitün giñe hasigirun abuiduragüdei le hiyarabei adüga. Mígira humá lun lararamun hawanserun. Áfaagua humá lun hafurendeiruni iseri burí adundehani le tíchugubei lóundarun Heowá sagü dan. Góunigigua humá hungua luéi weiri lan hafiñerun huouguoun. Masaminara humá ladügarügü gíbeeli lan hisubudin gayara lan haransehan furumiñeguarügü turobuli sin hadireirun dan lun háluahan ariñahani libügürü. Ítara kei Timotéu, góunigigua humá hungua ani góunigi huméi le harufudahabei (1 Tim. 4:16).

6. Afiñeti meha luagu ladundehan lani Heowá sífiri. Dan le lasaminarunbei Pábulu luagu lapurichihan Timotéu, aba líchuguni adundehani le lun: “Lau lubafu [s]ífiri [s]andu le wádanbei, góunigibei arufudahani le líchugubei Bungiu labun baríaahan” (2 Tim. 1:14). Lun lóunigiruni Timotéu lapurichihan lunti meha lafiñerun luagu ladundehan sífiri sandu.

Ariñagati Donald, aban wéiyaali lidan afiñeni le barühalibei saragu irumu eseriwida kei wéiyaali: “Lunti gebegi lan hamadagua luma Heowá houn íbirigu wügüriña ha anügübalin ubaraü lidan damuriguaü ani góunigi hameime umadaguaü ligía, lau hadügüni katei le, ‘aganwoundeina luba here’. Ánhaña amuriaha sífiri sandu ani gagaburi hameime igaburi le líchugubei, ábanbaña abiniruni houn íbirigu” (Sal. 84:7; 1 Fe. 4:11).

Ma lubuidun harihín saragu íbirigu ha málügiña lúmagiñe hiridún, kei huguya, awansera lidan heseriwidun lun Bungiu. Ariñagati Jason, le buga uágubei wayanuha furumiñe lidan arütíkulu le: “Lidan sun dan le naubei eseriwida kei wéiyaali lidan afiñeni furendeihadina saragu ani guentó sandiguadina nungua lau bandi ichouruni. Gúndaatina lau dasi le ichugúbei nun ani ariha numuti kei aban lubuidun chansi”.

Agia huguya, ítaramemebadün san awansera lidan heseriwidun lun Bungiu? Áfaagua humá lun háyeihani ligaburi Timotéu. Ánhadün áyeihei, ítarabadün kei aban abiniruni houn lumutuniña Heowá.