1, 2. a) Ida liña leyeeduniña Satanási gürigia? b) Kaba wakutiha lidan arütíkulu le?

YEEDA laaña Satanási, le “lúguchibei iyeeni”, gürigia lúmagiñe lidaani Adán tuma Ewa (Huan 8:44). Laganagua burí iyeeni le lariñagubei anihein arufudahani mama inarüniti hawagu hilaaña luma ibagari lárigiñe óunweni. Lídangiñe burí arufudahani le liabin saragu échuni luma afiñeni le kamanibei lidan ubóu le. Ligía lubeiti, dan le lounwen somu haduhe somu íbirigu o somu gürigia le awinwandubei lidan fulasu le ñein lubéi heredera, mosu háfaagun fiu íbirigu luagu le hafiñerubei (Hud. 3).

² Anhein adügüdara somu gürigia wawagu lun wafalarun somu échuni le mínsiñeti lun Bungiu, kaba íderaguawa lun wafuranguagüdüni inarüni le tídanbei Bíbülia le ayanuhabei luagu óunweni? (Efe. 6:11). Ánheinti anihein lubéi somu íbiri le agagibudagubei luma aban óuchawaguni libe le, ida luba wíchugun gurasu luma iderebugu lun? Lidan arütíkulu le, wakutihabei adundehani le líchugubei Heowá woun. Gama lumoun, furumiñe, ariha waméi le tariñagubei Bíbülia luagu óunweni.

3. Ka asuseredubei lárigiñe lariñawagún furumiñeti iyeeni ubouagu?

³ Mabusenrunti meha Bungiu lun hóunwegun gürigia, busenti meha lun hawinwandun lun súnwandan. Lun lira, mosu meha gaganbadi lan Adán tuma Ewa lun Heowá, le íchugubalin gumadi ménrenguti le houn: “Meigabóun tin wewe to lánina lasubudirúniwa le buídubei lumoun le wuribabei. Meigabóun tin wewe tuguya, ladüga anhoun beiga ninarün bau bóunweba” (Agu. 2:16, 17). Ábati layusurun Satanási aban hewe lun lariñagun tun Ewa: “Móunwegunbadün”. Ma lirun aba lan tafiñerun lun iyeeni ligía ani aba teigin lídangiñe tin wewe tuguya. Lárigiñe, aba giñe leigin tani weiriei  tídangiñe (Agu. 3:4, 6). Ítara liña lebelurun figóu luma óunweni ubouagun (Rom. 5:12).

4, 5. Ka ladügübei Satanási lun lasigirun eyeedaña gürigia?

⁴ Aba lounwen Adán tuma Ewa, kei buga lariñaguni Bungiu lasusereduba lan ánhaña maganbadi. Íbini ítara, sigiti Satanási eyeeha luagu óunweni. Somu dan lárigiñe, aba lagumeserun aburuchaguagüda amu iyeeni, kéiburi arufudahani luagu dan le lan lounwen aban gürigia, sigiti lan somu katei lídangiñe awinwanda, másiñati lidan lan ubóu hani sífirigu. Yeeda laaña saragu gürigia lau ámuñegueinarügü luwuyeri iyeeni luaguméme katei le darí lumoun wadaani (1 Tim. 4:1).

⁵ Ka uagu adüga lubéi Mafia lun hafiñerun saragu gürigia luagu burí iyeeni le lariñagubei? Lugundun, subudi lumuti ida liña lan wasandiragun woungua luagu óunweni ani yusu lumuti katei le lun leyeeduniwa. Kei adügǘwa wamá lun wawinwandun lun súnwandan, mabusenruntiwa wóunwegun (Apur. 3:11, TNM). Ariha wamuti óunweni keisi aban ágani (1 Ko. 15:26).

6, 7. a) Ibihaali san Satanási lun masubudirúniwa lan inarüni luagu óunweni? Afuranguagüda huméi. b) Ida liña líderaguniwa inarüni le tídanbei Bíbülia lun manufudedun wamá hawéi hilaaña?

⁶ Lau sun áfaaguaali lan Satanási saragu, mibihingili lun masubudirúniwa lan inarüni luagu óunweni. Masuseredunñahagili kei guentó ñein hamá saragu gürigia ha subudihabúbaña ani ayanuha hagía luagu le tarufudahabei Bíbülia luagu óunweni luma luagu emenigini houn hilaaña (Apur. 9:5, 10; Adü. 24:15). Ruti inarüni burí le awalidaguni woun ani íderagua lumutiwa lun manufudedun wamá luéi óunweni ni lun machourun wamá luagu le asuseredubei houn hilaaña. Kéiburi, manufudeduntiwa gayara lan hadügün hilaaña somu katei wuribati woun ni luagu gayara lan lasuseredun somu katei wuribati houn. Subudi wamuti mámaaña lan lau ibagari ani siñá lan hadügün wuribani ni ka un. Ítara liña kamá lídanñanu aban idabagu huliliti (Huan 11:11-14). Ani subudi wamuti míchugun hamá fe luagu lásügürün dan. Ligíati, danme háguyugun, íbini ha barühañabaña saragu sígulu lúmagiñe hounwen, masandirun habéi luagu sügühali lan saragu dan.

⁷ Ma inarüni luagu furanguti lan ani ménrengun ligía gunfurandawa lan inarüni hawaguti hilaaña? Mítaranti iyeeni burí le lariñagubei Mafia. Bóugudin luéi leyeeduniña Satanási gürigia, ayanuhati giñe iyeeni luagu Heowá. Lun gunfuranda wamani buidu damichi le adüga laalibei Satanási, wakutiha ǘrüwa katei le adüga laalibei liyeeni. Furumiñe dasei laali liri Bungiu. Libiaman, adügaali lun hasaminarun gürigia mama lan mosu hafiñerun luagu sákürifisiu le ladügübei Kristu. Ani lǘrüwan, adügaali lun laganwoundun hagarigu luma hasufurirun gürigia.

8. Kei aubei larufudúa lidan Heremíasi 19:5, ka uagu dasei lubalin liri Heowá iyeeni le lariñagubei Mafia hawagu hilaaña?

⁸ Dasei laali iyeeni burí le lariñagubei Satanási hawagu hilaaña liri Heowá. Laganagua burí iyeeni le, anihein arufudahani mama inarüniti luagu sufuriragüdawa hamá hilaaña lidan máfiougati. Ka uagu adüga lubéi arufudahani burí le lun lawiyedún liri Bungiu? Lugundun adügati lun hafiñerun gürigia ítarameme lan ligaburi Heowá, Bungiu le ínsiñenibei, kei Mafia (1 Huan 4:8). Ida liña ladügün katei le lun wasandiragun woungua? Ani le súdinitimabei, ida liña ladügün lun lasandiragun Heowá lungua? Mabulieida waméi iyereegu lan sun luwuyeri wuribani lun (aliiha huméi Heremíasi 19:5).

9. Ka lánibei liyeeni Satanási luagu afiñeni luagu sákürifisiu le ladügübei Kristu le uágubei layanuhóua lidan Huan 3:16; 15:13?

⁹ Adügati iyeeni burí le lariñagubei Satanási hawagu hilaaña lun hasaminarun gürigia mama lan mosu hafiñerun luagu sákürifisiu le ladügübei Kristu (Mat. 20:28). Ábanya iyeeni lúmagiñeti Satanási, anuhein lan nege aban uani móunwedaditu hawagu gürigia. Lun hamuga ítara lan, hawinwanduña hamuga sun gürigia lun súnwandan. Lun hamugati ítara liña lan, mama hamuga mosu líchuguni Kristu libagari lun lesefuruniwa lun wawinwandun lun súnwandan. Haritagua waméi sákürifisiu lan le ladügübei Kristu, ligíatima lan igaburi wéiritimati le ídanbei larufudúa ínsiñeni hawagu gürigia (aliiha huméi Huan 3:16; 15:13). Ida liña funati lasandiragun Heowá lungua luma Liráü ladüga burí arufudahani le larufudahabei Mafia le adügübei lun larihín lubuidun idewesei le keisi aban katei le memegeirunwati?

10. Ida liña ladügün iyeeni burí le lariñagubei Satanási hawagu hilaaña lun laganwoundun hasufurirun gürigia?

¹⁰ Adügati iyeeni burí le lariñagubei Satanási hawagu hilaaña lun laganwoundun hagarigu luma hasufurirun gürigia. Másiñati ariñawagúa lan houn agübürigu ha féridihaña somu hasaani lidan óunweni barǘ lan lan Bungiu sielun ladüga megei lan ábanya ánheli ñein. Ma madügünti iyeeni lúmagiñeti Satanási le lun labulubudun hagarigu, ma gánwounguagüda lumuti? Luagu le aban oubaü, yúsuwaali arufudahani mama inarüniti luagu máfiougati lun laricharaguagüdüni hasufuriragüdüniwa gürigia, kéiburi dan meha le hagudún wínwanñu ha magundanbaña lau le tarufudahabei ligilisi. Según aban líburu to ayanuhaboun hawagu lúrudugu esüpáñana ha meha éibaahabaliña gürigia lau anarimeni saragu san irumu guentó ladüga múaran lan hafiñen tuma ligilisi, saminatiña yebe fiu hádangiñe ha adügübalin wuribani le, harufudarügüña lan meha houn ha ebedaagubaña “murusun lídangiñe le lunbei hasufurirun lidan máfiougati lun súnwandan” lun gayaraabei lan hasakürihan lubaragiñe hounwen luma lun midin hamá lidoun máfiougati. Ani lidan saragu fulasu, saminatiña gürigia mosu lan híchugun heigin hilaaña, háluahan ídemuei hámagiñe o hamuriahan hama lun hóunigiruniña. Añahein amu, aba háfaagun lun hámalihaniña luéi habeichuniña. Ma lirun míchugun lan afiñeni le lídangiñeti iyeeni le lariñagubei Satanási gurasu inarüniti. Lubaragiñe lira, adügati lun hadiheridun gürigia mébunouga o lun hanufudedagun.

11. Ida liña gayara lan hadügüdarun waduheñu o wamadagu ha buiti haritagun wawagu?

¹¹ Ruti ínsiñeni luagu Bungiu luma tuagu Lererun erei woun lun gaganbadi wamá lun Heowá íbini dan le háfaagun waduheñu o wamadagu ha buiti haritagun hadügüdarun wawagu lun gadan lániwa somu échuni hawaguti hilaaña le múaranti tuma Bíbülia. Gayaraati háfaagun hadügün lun wasandiragun woungua lau duru lau hariñagun mínsiñe hamá meha waduheñu ha hilaañabaña woun ani mineben hamá woun. O gayaraati hariñagun ladügüba lan hilaali somu katei wuribati houn ha wínwangiñabaña wadüga. Ida lubati wayanuhani inarüni le tídanbei Bíbülia? Akutiha  wamá fiu adundehani tídangiñeti Bíbülia ani ariha wamá ida luba lan wawinwanduni.

12. Ka burí afiñeni luma échuni le gániti hama hilaaña furanguti múaran lan luma le tarufudahabei Bíbülia?

¹² Aranseñu wamá lun madan lániwa afiñeni luma échuni le múaranti luma le tarufudahabei Bíbülia (2 Ko. 6:17). Lidan aban ubouhu libiti barana Karibe, afiñetiña saragu gürigia dan le lan lounwen aban gürigia gayara lan lerederun lani sífiri haganagua ha wínwangiñabaña lun lafayeiragüdüniña ha óuserubalin wuriba dan meha le nibagarigili. Según aban líburu, gayaraati íbini “ladügün damichi lun fulasu le meha ñein lubéi lawinwanda”. Lidan fiu fulasu Áfürika, héchutiña gürigia adouragua tau isubusei tidan muna to ñein lubéi hilaali luma lun hagarabaagunu liyawa luagun touba muna. Ka uagu? Añahein ariñagatiña ladüga moun lumuti lan larihini hilaali ligibu guánarügü. Keisi lubúeingu Heowá, mafiñentiwa luagu burí afiñeni le arufudahabalin liyeeni Satanási, mánharun wagía lun burí échuni le lúmagiñeti (1 Ko. 10:21, 22, TNM).

13. Kei aubei lariñagei Santiagu 1:5, ka lunbei wadügüni anhein machourun wabalin mínsiñe lan somu échuni lun Heowá?

¹³ Anhein machourun wabalin mínsiñe lan somu échuni lun Heowá, amuriaha wamá luma lau afiñeni lun líchuguni lichú aau woun (aliiha huméi Santiagu 1:5). Lárigiñe, áluaha wamá ariñahani tidan wani agumeiraguagüdüni. Ani anhein megei wabéi lanwoun ariñahani, álügüda wamaña wéiyaaña lidan afiñeni ha lídanbaña damuriguaü le ñein wabéi. Lau sun siñá lan hariñaguni woun ka lan lunbei wadügüni, harufuduba fiu adundehani tídangiñeti Bíbülia woun le lunbei lahuudun woun, kéiburi le akutihóubei lidan arütíkulu le. Líderagubadiwa katei burí le lun wayusuruni le furendei wamaalibei tídangiñe Bíbülia buidu lun wasubudiruni “le buídubei lumoun le wuribabei” (Ebü. 5:14).

14. Ka lunbei wadügüni lun madügün wamá lun hachugeragun amu?

¹⁴ “Adüga huméi [sun katei] lun híchugun uéiriguni lun Bungiu. Míchiga humá lébuna éiguaduni lun ni aban” (1 Ko. 10:31, 32). Danme le wasaminarun anhein gadan lubadiwa lubéi échuni burí le o madan lubadiwa lan, lunti giñe wasaminarun kaba lan hasaminara amu gürigia, wíbirigutima. Mabuseruntiwa lun wadügün lun hachugeragun amu (Mar. 9:42). Ani mabuseruntiwa giñe lun hasandiragun ha mámabaña Gefentiña houngua wuriba mébunouga. Línchahabadiwa ínsiñeni lun wayanuhan hama lau inebesei, lugundun ruti katei le uéiriguni lun Heowá. Ani chóuruti masigenehabadiwa lan hama madügün wagíame bula lau hechun. Haritagua waméi gabafu lan ínsiñeni. Anhein inebehabu wabéi samina wagía hawagu amu, gayaraati  íbini wañuludagüdünu hanigi ha mánharunbaña lun wafiñen.

15, 16. a) Ka uagu buidu lubéi lun wayanuhan houn amu luagu wafiñen? Abahüdagua humá aban sügǘ. b) Ka larufudahabei dimurei le lariñagubei Pábulu lidan Rómana 1:16 woun?

¹⁵ Ariñaga wamá houn waduheñu hama wabesinanigu gefentiña lan luagu Heowá wagía (Isa. 43:10). Ánhawa adügei katei le lubaragiñe lounwen somu waduhe, másiñati ménrenguntimabei lan woun wasubudiruni kaba lan wadüga danme le wagagibudagun luma sügǘ burí le. Ariñagati Francisco, le erederubei Mosanbíke: “Dan le nafurendeirubalin inarüni, au tuma Carolina, to nani weiriou, aba wariñagun houn waduheñu máhuduragunhadiwa lan meha houn hilaaña. Aba louchawagún wafiñen dan le tóunwenbei tíbugaña Carolina. Ñein lubéi wawinwanda, héchutiña gürigia ágouwagüdei hilaali kei aban lídangiñe katei le hadügübei lidan háhuduragun. Lárigiñe, mosu larumugun liduhe le yarafatimabei lun hilaali luagu ǘrüwa guñoun lidan fulasu le ñein lubéi láturua duna. Adügati nege échuni le lun lagalumadun lani hilaali sífiri. Agurabatiña yebe tiduheñu Carolina lun tuguyaba lan arumuga ñein”.

¹⁶ Kati ladügübei Francisco tuma lani weiriou? Ariñagati: “Kei hínsiñe lubéi Heowá woun ani busentiwa wagundaaragüdüni, mánhatiwa lun wafalaruni échuni ligía. Aba hagañidun tiduheñu Carolina saragu. Aba híchugun wadurun ariñageina mineben tan hilaaru woun ani aba hariñagun miabinhaña lan abisidahawa, míderagun hamaadiwa lan giñe. Kei afuranguagüda wamaali lan meha wafiñen houn lubaragiñe sun lira, ligía mayanuhan wabéi hama luagu katei le dan le gañiñanu habéi. Añahein hádangiñe ayanuhatiña waweigiñe ani ariñagatiña afuranguagüda wamaali lan meha furangu le wasaminarubei. Lau lásügürün dan, aba hagalumadun tiduheñu Carolina ani aba gayaraahali meha ñein lan darangilaü waganagua. Ñǘbuinhaña íbini fiu hádangiñe abisidahawa lun hamuriahan agumeiraguagüdüni tídangiñeti Bíbülia wama”. Ligíati, maweiyasun wamá abusigarida lun wayanuhani inarüni libügürü óunweni (aliiha huméi Rómana 1:16).

17. Dan le leferidirun somu íbiri aban liduhe lidan óunweni, kaba íderaguawa lun aban wamá umadaü inarüniti lun?

¹⁷ Dan le leferidirun somu íbiri aban liduhe lidan óunweni, lunti wáfaagun lau sun wayaraati  lun aban wamá ‘umadaü inarüniti’, “kei aban íbiri lidan lidaani idiheri” (Ari. 17:17). Kaba íderaguawa lun aban wamá umadaü inarüniti, dántima le ladügüdarúña lan luagu aban íbiri lun gadan lani échuni le múaranti luma le tarufudahabei Bíbülia? Ariha wamá bián adundehani tídangiñeti Bíbülia.

18. a) Ka uagu layahuaha Hesusu? b) Ka wafurendeirubei lídangiñe ligaburi Hesusu?

¹⁸ “Hayahua hama ha ayahubaña” (Rom. 12:15). Másiñati ibidiñe lan woun kaba lan wariñaga lun le egeburihabei. Lau sun lira, anihein dan, arufudatimati ayahuni berese wamá lau gürigia sügǘ lau le wariñagubei lun. Dan le lóunwenbei Lásaru, ayahuahatu María, Marta hama amu gürigia lárigiñe hábiri luma hamada le meha hínsiñebei houn. Dan le lachülürünbei Hesusu gádürü weyu lárigiñe, ayahuahati giñe, íbini subudi lani láguyuguagüdali lan meha Lásaru lídangiñe óunweni (Huan 11:17, 33-35). Arufuda lumuti layahun Hesusu ligaburi lasandiragun Heowá lungua luagu lounwen Lásaru. Arufuda lumuti giñe, le lan lúgubu hínsiñe hamá iduheñu ha lun Hesusu ani chóuruti ru lan katei le gurasu tun María tuma Marta. Ítarameme, dan le harihini wíbirigu wínsiñehabu luma berese wamá hau, subudi hamuti mama lan hábuguarügüñanu ani sandí hamuti hínsiñehabu luma hídehan hamadagu.

19. Ida liña líderaguniwa Apurichihati 3:7 lun wíchugun gurasu lun somu íbiri?

¹⁹ Anihein “lidaani ámanichuni luma lidaani adimurehani” (Apur. 3:7). Ábanya igaburi lun wíchugun gurasu lun somu íbiri, lau waganbuni. Ígira wamá lun lariñaguni sun le tídanbei lanigi ani masandiragua wamá woungua wuriba ladüga lariñagun somu katei le mabuidunti luma ladimurehan “lau anarimeni” (Hob. 6:2, 3). Másiñati weiri lan lidiheri ladüga hadügüdarun liduheñu ha mámabaña Gefentiña luagu. Ligíati, furíei wamá luma ani amuriaha wamá luma Heowá lun líchugun erei lun luma lun madourun lan lisaminan (Sal. 65:2). Anhein gayara lubéi, aliiha humoun Bíbülia úara o aban arütíkulu tídangiñeti wani agumeiraguagüdüni, kéiburi aban abahüdaguni luáguti ibagari le ruti dǘgüdaguaü.

20. Kaba wariha lidan leweñegua arütíkulu?

²⁰ Wéiriti weteingiruni Bungiu luagu wasubudiruni inarüni luagu óunweni luma lubuidun ibagari le lunbei hawinwanduni ámuñegü ha lídanbaña umúahaü (Huan 5:28, 29). Ligíati, arufudaha waméi inarüni le tídanbei Bíbülia lau le wariñagubei luma lau le wadügübei sagü gayara lan. Lidan leweñegua arütíkulu, wakutihaba ábanya katei le layusurubei Satanási lun láfaagun lun masubudirun hamani gürigia inarüni: katei le hani máfianu. Warihuba ka lan uagu moun lumuti lubéi gadan lániwa sun échuni luma isebáhari le gániti tuma sádara to to lúmagiñetu Mafia.