LIIBE-AGEI dan, úatu meha waporu lun haweiyasuhan gürigia lidan lidaani Pábulu. Lun haweiyasuhan gürigia, mosu meha hálügüdahan anhein anuhein tubéi somu waporu to anaahaboun ílagu to lunboun tidin le ñein lubéi labusenra gürigia lidin ani anhein gayara lubéi hanügün gürigia (Adü. 21:2, 3). Íbini anhein meha mídinboun lubéi waporu lidan fulasu le ñeinba lubéi lidin gürigia, gayaraati meha ládinun tidan ani dan meha tararamun lidan burí potu, láluahaba meha amu waporu to lunboun tidin yarafatima lun fulasu le ñein lubéi labusenra lidin (Adü. 27:1-6).

Lídanrügüñein meha fiu dan lidan irumu taweiyasuhan waporu ani móurateti meha táfuridun. Gayaraati meha hadarasahani mádulungu ha afiñebaña luagu somu afiñeni mébunati lóurate táfuridun waporu mámarügü ladüga luriban dan, adüga hamuti meha giñe kéiburi anhein meha anihein lubéi aban würidiri agúaraha tuagu ugunei o ánhaña meha ariha laru beya tárigirugu somu waporu to adibiraguboun. Aweiyasuhatiña meha mádulungu ánheingubeirügü buidu lubéi láfuhan garabali lugundun megei hamuti meha lun gayaraabei lan haweiyasuhan. Ligíati, dan meha ladarirun somu aweiyasuhati aban waporu to ánharutu lun tanügüni, mosu meha lidin tau lílagu luagun wafu lun lagurabahan darí lun hawisahan táfurida lan waporu tuguya.

Ariñagati Lionel Casson, aban abahüdaguti: “Buiti meha aransehani le lídanbei uburugu Roma lun aweiyasuhati lun merederun lan agararaha áluaha somu waporu luagu wafu. Luáguñein meha liyumoun duna Tíber potu ligía. Yarafa lun uburugu Ostia, ñeinñein meha aban fulasu tau burí áfisi. Saragu tídangiñe áfisi to, hani meha taburiña waporu to lánina ámuñegueinarügü potu: waporu to lídangiñetu Narbona [aban fulasu le lídanbei ageiraü le subudiwabei kei Faransu uguñe weyu], waporu to lídangiñetu Cartago [aban uburugu le lídanbei ageiraü le subudiwabei kei Túnesi uguñe weyu], [...] tuma burí amu. Ñǘdünrügübei meha le lunbei laweiyasuhan tidoun áfisi to lani burí uburugu le ñéinhinba lubéi tidin ugunei to lunboun lárügüdünu ani ñeinba meha lálügüdaha”.

Furesetimati meha laweiyasuhan gürigia baranaha, gama lumoun, denchati meha giñe. Dibiguatu ugunei lau apostolu Pábulu saragu wéiyaasu lidan burí wéiyaasu lánina apurichihani le ladügübei (2 Ko. 11:25).