1, 2. Ka meha uagu weiri lubéi lidiheri Hesusu?

HANARIMETI meha lidiheri Hesusu lagumuhóun weyu le laubei awinwanda Ubouagu. Subudi lumuti murusunrügaali lan meha dan lubá hasufuriragüdüni láganigu darí lun háfaruni hilagubei. Lau sun lira, anihein meha ámuya katei le nidiheridagüdübalin. Busenti meha lagundaaragüdüni Lúguchi ladüga lueirin línsiñe lun. Ani subudi lumuti meha anhein lan úaragua lun lidan óuchawaguni ligía, lídehaba meha lun larufudún mama lan inarüni sun iyeeni le ariñawagúbei luagu Heowá ani garicha lan lun libihin uéiriguni. Hínsiñetiña meha giñe gürigia lun Hesusu ani subudi lumuti meha gayara lan hemenigi wamá wawinwandun lun súnwandan ánheingubeirügü meha úaragua lun Heowá darí lounwen.

² Lau sun meha lauñein lan saragu idiheri Hesusu, darangilañuméme liña meha. Murusun dan lubaragiñe lira, ariñagaali meha houn lani apostolugu: ‘Ru numuti nidarangilan hun’ (Huan 14:27). Anihein meha lidarangilan Bungiu luagu, lidan amu dimurei, gálumaü le lasandirubei gürigia le buiti lumadagua luma Heowá. Anihán meha darangilaü le lasandirubei Hesusu lidan lisaminan luma tidan lanigi (Fili. 4:6, 7).

3. Kaba wakutiha lidan arütíkulu le?

³ Magagibudagunbei ni aban wádangiñe luma lanarime asufuriruni le úmabei lagagibudagua Hesusu. Íbini ítara, sun wagía ha lánigu, wásügürüba lídangiñe lénrengunga (Mat. 16:24, 25; Huan 15:20). Ani chóuruti ñeinbei lan dan wasandirun idiheri. Ka lunbei wadügüni lun madiheridun wamá saragu ni lun weferidiruni wadarangilan? Ariha waméi ǘrüwa katei le ladügübei Hesusu lidan lani ministeriu Ubouagu ani ida luba lan wáyeihani dan le wagagibudagun luma lénrengunga.

4. Lau 1 Tesalónikana 5:17 wachügüwagu, ru humá fiu hénpulu le arufudubalin furíei lan Hesusu saragu wéiyaasu lidan lagumuhóun weyu le laubei awinwanda Ubouagu.

⁴ (Aliiha huméi 1 Tesalónikana 5:17). Lidan lagumuhóun weyu le laubei Hesusu awinwanda Ubouagu, furíeiti saragu wéiyaasu. Dan le larufudahabei houn lani disipulugu lun haritaguni lounwen, adügati aban furíei lubaragiñe lásügüragüdünu fein houn luma lubaragiñe lásügüragüdünu diwéin houn (1 Ko. 11:23-25). Adügati giñe aban furíei hama lubaragiñe houdin lídangiñe fulasu le ñein lubéi hefeduhei Luéyuri Esefuruni (Huan 17:1-26). Dan le hachülürünbei luagu wübü Oliwu guñoun ligía, furíeiti saragu wéiyaasu (Mat. 26:36-39, 42, 44). Ani lagumuhóun burí dimurei le lariñagubei lubaragiñe lounwen, ariñaga lumuti lidan aban furíei lun Lúguchi (Luk. 23:46). Kei aubei warihei, furíeiti Hesusu lun Heowá lidan sun katei súdiniti le asuseredubei weyu ligía.

5. Ka uagu marufudun habéi apostolugu ganigi?

⁵ Aban lídangiñe resun le uágubei awanda lan Hesusu ladüga merederun lani lafurieidun lun lamuriahan ídemuei luma Lúguchi. Ánheinti apostolugu, madügün hamuti ligiaméme, ligía marufudun habéi ganigi dan le hóuchawagunbei (Mat. 26:40, 41, 43, 45, 56). Ka wafurendeirubei? Úaraguabadiwa ánheingubeirügü gabügürügua lubéi wafurieidun, ítara kei ladüga Hesusu. Kábati wamuriaha lidan furíei?

6. Ka uagu líderagubadiwa lubéi afiñeni lun wakipuruni wadarangilan?

⁶ Gayaraati wamuriahan luma Heowá lun líchugun “lanwoun wafiñen” (Luk. 17:5; Huan 14:1). Wemegeiruba afiñeni lugundun lóuchagubaña Satanási sun ha afalarubalin Hesusu (Luk. 22:31). Líderagubadiwa afiñeni lun darangilañuméme wamá íbini ánhawa agagibudagua luma saragu turobuli. Ka uagu? Lugundun  anhein adüga wamaali lubéi sun le wayaraati lidan wagagibudagun luma somu lénrengunga, línchahabadiwa afiñeni lun wígiruni sun katei lúhaburugu Heowá. Ladügüba wafiñerun luagu buídutimabei lan ligaburi lahandilihani turobuli sügǘ wawéi, lun darangilañu lan wasaminan tuma wanigi (1 Fe. 5:6, 7).

7. Ka wafurendeirubei lídangiñe le labahüdagubei Robert?

⁷ Íderagua lumutiwa furíei lun wakipuruni wadarangilan meberesenga ka lan asusereduti woun. Ariha waméi le asuseredubei lun Robert, aban wéiyaali lidan afiñeni le gúnfulihali lóugiñe 80 irumu. Afuranguagüda lumuti le ladügübei lun lakipuruni lidarangilan: “Íderagua láadina adundehani le lídanbei Filipuna 4:6, 7 dan le nagagibudagunbei luma burí lénrengunga lidan nibagari. Gagibuguadina luma maseinsuni ani anihein meha aban dan le ídanbei siñá hali lan meha neseriwidun kei wéiyaali lidan afiñeni”. Ariñagati giñe: “Furíeitina lun Bungiu dan le nagumeserun asandira idiheri. Afiñetiña dan le lan gabügürügua lan nafurieidun ani adüganéi tídangiñe sun nanigi, darangilatimati nasandiragun nungua”.

8. Según le lariñagubei Huan 8:29, ka ámuya katei adügübei lun lasandirun Hesusu darangilaü?

⁸ (Aliiha huméi Huan 8:29). Sanditi meha Hesusu darangilaü íbini dan le héibaahabalin láganiñu lugundun subudi lumuti meha lagundaaragüdüñein lan meha Lúguchi. Gaganbaditi meha lun Heowá dan meha le hénrengu lubéi lun. Kei meha hínsiñe lubéi Heowá lun, adügati lun leseriwidun lan lun ligíatima lan katei súdinitimati lidan libagari. Lubaragiñe liabin Hesusu Ubouagun, nadagimeinti meha úara luma Heowá kei aban “nadagimeinti hemeniti” (Ari. 8:30, TNM). Ani dan le liábinbei Ubouagun, arufudaha  lumuti inarüni luagu Lúguchi lau ubebeni (Mat. 6:9; Huan 5:17). Adügati wadagimanu le lun lagundaarun Hesusu saragu (Huan 4:34-36).

9. Ida liña lídehan beresegu wamá lidan apurichihani lun darangilañu wamá?

⁹ Gayaraati wáyeihani Hesusu lau gaganbadi wamá lun Heowá luma dan le ‘gánwoungueinarügü lan le wadügübei lidan luadigimari Wabureme’ (1 Ko. 15:58). Dan le wíchaagun woungua sunsuinagubei lun apurichihani ariha wamuti waturobulin lidan amu igaburi (Adü. 18:5). Kei hénpulu, liibe-agei dan, hénrengutimati habagari gürigia ha únbaña wapurichiha sügǘ wawéi. Gama lumoun, dan le línsiñedun Heowá houn, furendei hagía adügei le lariñagubei, aba labuidurun habagari ani gúndaatimatiña. Sagü lasuseredun katei le, aba laganwoundun wafiñen luagu lóunigirubadiwa lan Bungiu. Ani adügati afiñeni le lun wakipuruni wadarangilan. Ligía asuseredubei tun aban íbiri to barüharuboun saragu irumu ageindagua luma tasandiragun tungua moun tan luma giñe tasandiragun tungua lau lanarime íruni. Ariñagatu: “Adügati beresegu nan lidan apurichihani lun buidu lan nasandiragun nungua ani gúndaagüda lumutina. Afiñetina ladüga lan ligíatima lan dan nasandiragun nungua yarafatima nan lun Heowá”.

10. Ka wafurendeirubei lídangiñe le tabahüdagubei Brenda?

¹⁰ Ariha waméi giñe le asuseredubei tun aban íbiri gíritu Brenda. Dandu tuguya kei tisaani, anihein aban sandi wuribati hawagu gíriti esclerosis múltiple. Yúsutu Brenda aban haláü gabalabalati ani lóuguati giñe tere. Sagü gayara lan, apurichihatu tidan burí muna, gama lumoun, liibe-agei dan, apurichihatu lau tabürühan gárada. Ariñagatu: “Dan le gunfuranda nubalin mareidagunbadina lan lidan ubóu le ani aba nánharun lun nisandi, aba gayaraahali lan meha netenirun sunsuinagubei lun nani ministeriu. Le linarün katei, adügati apurichihani lun nabulieiduni nidiheri. Adügati lun netenirun lun níderaguniña gürigia ha únbaña nayanuha lidan fulasu le ídanbei lapurichiha damuriguaü le ñein nubéi. Ani haritaguagüda lumutina súnwandan luagu nemenigin lubá ámuñegü”.

11-13. a) Ida liña harufuduni apostolugu hama amu disipulugu umadagu hamá meha ha inarünitiña lun Hesusu? b) Ida liña hadügün lumadagu Hesusu lun lasandiragun lungua?

¹¹ Lidan sun dan le lapurichihanbei Hesusu, sügüti lídangiñe saragu lénrengunga. Lau sun lira, arufudatiña apostolugu úaraguatiña umadagu hamá ha inarünitiña, kei ha uágubaña layanuhóua lidan aban ariñawagúni, le ariñagubei: “Añahein giñe umadagu úaraguatiña sügǘ lau íbiri” (Ari. 18:24). Wéiriti meha hebegi umadagu ha lun Hesusu. Lidan meha dan le ladurarubei lani ministeriu, mafiñentiña meha lamulenu luagu (Huan 7:3-5). Chülüti íbini aban dan lun hasaminarun liduheñu lǘlühali lan meha lau (Mar. 3:21). Ánheinti apostolugu ha úaraguatiña, mítarantiña meha. Guñoun le lubaragiñebei lounwen Hesusu, ariñagati houn: “Huguya meha úarabaña numa lidan nóuchawagun” (Luk. 22:28).

¹² Anihein meha dan hirudagüdüni apostolugu Hesusu. Lau sun lira, metenirunti lun hachara, téniti meha lun afiñeni le hawagubei luagu (Mat. 26:40; Mar. 10:13, 14; Huan 6:66-69). Lidan lagumuhóun guñoun le laubei hama wügüriña úaraguatiña ha, ariñagati houn: “Nanügünün kei numadagu ladüga subudigüda naali sun le lariñagubei Núguchi nun hun” (Huan 15:15). Chóuruti ru hamá meha lumadagu Hesusu saragu gurasu lun. Adügati ídemuei le híchugubei lun lidan lani ministeriu lun labuinchun lau ugundani (Luk. 10:17, 21).

¹³ Amu hawéi apostolugu, añahein meha amu lumadagu Hesusu, dandu wügüriña kei würiña, ha íderagubalin lidan ámuñegueinarügü igaburi lidan lani ministeriu. Añahein meha hádangiñe  belugüda hamuti hábiñoun lun leigin hama (Luk. 10:38-42; Huan 12:1, 2). Añahein meha amu aweiyasuhatiña luma ani yusu hamuti hámati lun hetenirun lun (Luk. 8:3). Ka uagu buidu habéi meha lumadagu Hesusu? Ladüga aban lan meha giñe umadaü buiti ligía. Adügati meha katei buiti hawagu ani mamuriahanti hama lóugiñe le gayara habéi adüga. Lau sun mafigoun lan meha Hesusu ani gafigountiña meha lumadagu, teinki lumutiña meha luagu ídemuei le híchugubei lun. Ani chóuruti ídeha hamá meha lun lakipuruni lidarangilan.

14, 15. a) Ida luba wadügün umadagu buítiña? b) Ida luba híderaguniwa umadagu ha?

¹⁴ Híderagubadiwa umadagu buítiña lun úaragua wamá lun Heowá. Ani lúntima wadügün umadagu, mosu giñe aban lan umadaü wagía houn amu (Mat. 7:12). Kéiburi, ariñagatu Bíbülia woun lun wayusuruni wadaani luma were lun wíderaguniña amu, hátima ha mégeihabubaña (Efe. 4:28). Samina wamá hawagu íbirigu lidan damuriguaü le ñein wabéi, ha mégeibaña ídemuei. Anihein san somu íbiri le siñá hali láfuridun? Másiñati gayara lan woudin agañeihei le lemegeirubei lun. Gayaraati giñe wábouagun houn somu iduheñu ha agagibudagubaña luma maseinsuni. Subudi wamuti san layusurún páhina jw.org^® luma programa JW Library^®? Anhein ítara liña lubéi, gayaraati wíderaguniña fiu lílana damuriguaü le ñein wabéi lun hayusuruni burí ídemuei le lun hasagarun buiti lídangiñe lubuidun ariñahani le lídanbei. Ánhawa etenira lun wíderagun amu, másiñati gúndaatimabadiwa lan (Adü. 20:35).

¹⁵ Híderagubadiwa umadagu ha wadügübaña danme le wagagibudagun luma lénrengunga ani híderagubadiwa lun wakipuruni wadarangilan. Ítara kei aganba lani Eliú Hobu dan le labahüdagunbalin lituróbulin lun, haganbubadiwa giñe wamadagu lau gaguraasuni danme le wabahüdaguni  wadiheri houn (Hob. 32:4). Moun lumuti wagurabun hariñagun wamadagu woun kaba lan wadüga, lau sun lira, warufuduba lichú aau ánhawa aganbei adundehani tídangiñeti Bíbülia le híchugubei woun (Ari. 15:22). Ani danme le anihein lan wemegeirun, ítara wamá kei urúei Dawidi, le mígirunbei lun ladügün pantaü lun mánharun lan lun ídemuei le híchugubei lumadagu lun (2 Sam. 17:27-29). Chóuruti aban lan idewesei lúmagiñeti Heowá umadagu burí ha ítarabaña (Sant. 1:17).

16. Según Filipuna 4:6, 7, ida luba gayara lan wibihin darangilaü? Afuranguagüda huméi.

¹⁶ (Aliiha huméi Filipuna 4:6, 7 *). Ka uagu lariñaga Heowá woun gayara lan wibihini lidarangilan lau lídehan Hesukrístu? Lugundun lun darangilu lan wasaminan tuma wanigi súnwandan, súdiniti lun gunfuranda wamani ka lan lánibei Hesusu lidan lisuuni Bungiu ani afiñe wagíame luagu. Kéiburi, ruti awalidaguni woun wasubudiruni ferudunawa lan sun wafigoun ladüga sákürifisiu le ladügübei (1 Huan 2:12). Ruti giñe emenigini woun wasubudiruni Hesusu lan Urúeibei lidan Larúeihan Bungiu ani laransehabei lan sun wuribani le adüga láalibei Satanási luma ubóu le lábugiñebei lubafu (Isa. 65:17; 1 Huan 3:8; Aruf. 21:3, 4). Ani ruti giñe ganigi woun wasubudiruni anihein lan Hesusu wama íderaguawa lun wagunfulirun lau dasi hénrenguti le líchugubei woun lun wadügüni lidan lagumuhóun dan le (Mat. 28:19, 20). Ma súdiniti awalidaguni, emenigini luma ganigi lun darangilañu lan wasaminan?

17. a) Ida luba lakipuruni aban kristiánu lidarangilan? b) Ítara kei larufuduni Huan 16:33, kaba gayara lan wadüga?

¹⁷ Ida lubati darangilañu wamá dan le wagagibudagun luma saragu lénrengunga? Gayaraati wadügüni lau wáyeihani Hesusu. Furumiñe, furíei wamá súnwandan. Libiaman, gaganbadi wamá lun Heowá ani apurichiha wamá lau ubebeni íbini lidan lénrengunga. Ani lǘrüwan, ánhara wamá lun ídemuei le híchugubei wamadagu woun. Ábameti lóunigiruni lidarangilan Bungiu wasaminan tuma wanigi. Ani ítara kei Hesusu, wiñuraguba lídangiñe furumiñeguarügü óuchawaguni (aliiha huméi Huan 16:33).