Winston, abahüdagua ban woun luagu ida liña lan bagumeserun áluahei inarüni.

Lidan fulasu le ñein lubéi tábunawagua türigu naweirida, Queensland (Australia). Meberesegúntiña meha niduheñu lau katei le lánina relihión. Kei meha áraabu lubéi wawinwanda dise hawéi amu, lóuguati meha numadagua hama gürigia ha mama niduheñu. Dan meha le 12 lubéi irumu nau, aba nagumeserun áluahei inarüni luáguti Bungiu. Aba nafurieidun lun Bungiu lun líderagunina asubudirei inarüni luagu. Lau lásügürün dan, aba nígiruni áraabu ani aba nadarirun aban wadagimanu uburugu Adelaida (Australia). Dan le 21 lubéi irumu nau, aba nasubudirunu Pam dan le nídinbei bakechanu uburugu Sydney. Aba tayanuhan nun luagu israelismo británico, aban relihión le ariñagubei hádangiñe lan türibu ha féridiwaañabaña Ísüraeli hayabin gürigia ha gürán büretáñana. Según sétanu le, türibu burí ha hagía nege diisi türibu ha meha lánina arúeihani nórute, ha anügǘbaña hageiragiñe lidan sígulu widü lubaragiñe wadaani. Dan le nagiribudunbei uburugun Adelaida, aba nayanuhan luagu katei le luma aban nupaaná lidan wadagimanu, le meha gumeseelibei aturiahoun Bíbülia hama gefentiña luagu Heowá. Lárigiñe nayanuhan luma luagu fiu oura, luágutima le hafiñerunbei Gefentiña, aba níchugun fe lounabúña lan meha furíei le nadügübei dan meha le irahügidina. Nafurendeiruñein meha inarüni luagu le adügübalina luma luagu Larúeihan. Darinaali meha ‘pérüla le wéiribei lebegi’! (Mat. 13:45, 46).

Pam, gumesetibu giñe áluahei “pérüla” le dan meha le nibureingidibu, adián? Ida liña badariruni?

Hadan iduheñu ha hínsiñeti katei luáguti Bungiu houn naweirida, uburugu Koffs Harbour (Newagálesi le súrubei). Ánhatiña meha nagübürigu hama nárügutinu lun harufudahan israelismo británico. Arufudahóuati nun, lun namulen, tun níbugaña luma houn saragu amu hádangiñe niduheñu  hínsiñe hamá hadügawagun gürán büretáñana lun Bungiu. Lau sun lira, mafiñentina meha sunsuinagubei luagu katei le ani masandiraguntina meha nungua yarafa lun Bungiu. Dan meha le 14 lubéi irumu nau, ñǘdüntina bisida saragu ligilisi to meha lídanboun fulasu le ñein lubéi weredera, kéiburi haligilisin ingülatérana, haligilisin bautista tuma haligilisin sedüna weyu. Gama lumoun, míderagun hamutina asubudirei Bungiu.

Dan lárigiñe, aba háguyun niduheñu uburugun Sydney, ñein lubéi nasubudirei Winston, dan le lídinbei bakechanu ñein. Kei aubei lariñagei Winston, adügati wayanuhan luagu relihión lun lagumeserun aturiahoun Bíbülia hama Gefentiña. Lárigiñe, sun meha gárada to labürühaboun nun, buin tiña meha lau bérusu tídangiñeti Bíbülia. Le linarün katei, aba yebe nadiheridun furumiñe, darí lun nagañidun. Gama lumoun, lau lásügürün dan, murusun murusun, aba níchugun fe anihán lan inarünibei.

Lidan irumu 1962, aba náguyun Adelaidoun lun yarafa nan lun Winston. Adügaali meha aransehani lun nerederun hama aban feru maríeitiña Gefentiña. Thomas tuma Janice Sloman híribei ani seriwihaña meha kei misionerugu Papúa Néwaginea. Diisi-widürügüñein meha irumu nau ani buiti meha hóuserunina ani íderagua hamutina lun nayarafadun lun Heowá. Aba giñeti nagumeserun aturiahoun Lererun Bungiu ani murusun dan lárigiñe aba nachoururuni darinaali lan meha inarüni. Lárigiñe wamarieidun, nuguya luma Winston, aba wagumeserun aban ibagari úara eseriwida lun Heowá lau ugundani. Ani lau sun gagibuguadiwa lan luma lénrengunga, adügaali le winwan wamaalibei lúntima gebegi lan pérüla le woun le meha wadarirubei.

Winston, abahüdagua ban woun luagu ida liña lan furumiñeti burí irumu lidan beseriwidun lun Heowá.

Murusun dan lárigiñe wamarieidun, aba ladaarun Heowá aban lídangiñe saragu “bena” woun lun weseriwidun lun lau sun wayara (1 Ko. 16:9). Íbiri Jack Porter, aban óunigiruti sirkuitu le meha abisidahabalin liraüraü damuriguaü le ñein wabéi, ligía arufudubalin “bena” le woun. Guentó, neseriwiduña úara luma Jack lidan Sétanu le Arihibei tau Sukursáli tidan sukursáli to Australasia. Ínchaha lumutiwa Jack tuma Roslyn, to lani weiriou, lun weseriwidun kei prekursorugu, aban eseriwiduni le aubei wagunfulira lau ugundani luagu seingü irumu. Wein-nefu meha irumu nau dan le wagunbirahóubei lun weseriwidun lidan sirkuitu lidan fiu ubouhu le luágunbei barana Pasifiku, le meha lábugiñebei taríaahan sukursáli to Fiyiboun. Ñǘdüntiwa lidan ubouhu Banuatu, Kiribati, Nauru, Niue, Samoa, Samoa Merigana, Tokelau, Tonga luma Tubalú.

Lidan meha dan ligía, machouruntiña meha lílana fiu ubouhu le dísetimabei hawagu gefentiña luagu Heowá, ligía mosu lubéi meha duari wamá chu ligíame wau (Mat. 10:16). Ñǘbüriti meha damuriguaü le lídanbei ubouhu burí le ani anihein meha fiu lídangiñe siñati híchugun lílana halíaba lan warumuga. Aba méhati wálügüdüniña lílana aüdü anhein gayara lubéi werederun hábiñe ani buiti meha hóuseruniwa súnwandan.

Winston, hínsiñeti wadagimanu lánina ásügüragüdüni bun, adían? Ida liña lagumeserun katei le ínsiñeda bun?

Lidan meha dan ligía, fiúrügüñoun meha tratadu tuma garüdia hama íbirigu ha lídanbaña ubouhu burí Tonga lidan hañeñe, le tongana. Lun híchugun aturiahani tídangiñeti Bíbülia houn gürigia, yusu hamutu meha líburu La verdad que lleva a vida eterna lidan inglesi. Ítara liñati, lidan gádürü dimaasu le táubei aban Leskuela houn wéiyaaña lidan afiñeni, aba hásügüragüdünu ǘrüwa wéiyaaña lidan afiñeni ha mariñagadibaña saragu inglesi líburu to lidoun tongana. Pam abürüdübalin lidan aban máhina abürügülei ariñahani le ásügürawagüdübei ani lárigiñe aba wóunahani tun sukursáli to Merigaboun lun imprimírua lan. Kéiburi widü dimaasu ladurarun sun dasi le. Lau sun maweirin lan meha lubuidun ligaburi lásügürawagüdün ariñahani ligía, íderagua lumutiña saragu gürigia ha ayanuhabaña tongana lun hafurendeiruni inarüni. Mawadigimariduntiwa, au tuma Pam, keisi ásügüragüdütiña, lau sun lira, adügati sügǘ ligía lun línsiñedun dasi le woun.

Pam, ida liña san ibagari lidan burí ubouhu, ítara liña san kei Australia?

Ámuti meha ibagari lidan ubouhu luéi Australia. Lidan meha fiu fulasu, añahein meha saragu marín,  mosu meha wawanduni lanarime lárouga, añahein meha giñe garadun, sandi ani anihein meha dan lougua lan weigin. Lau sun lira, dan le adarüdeina lan rábounweyu, aba meha wañuurun aríaguei barana tídangiñe wani fale, ítara liña tiri muna Samoa to lautu murisi to madourawagunti tau. Dan le meha haruni lan hati guñoun, ariha wamuti tiyawadina tídibu fáluma luma ladurangun hati ligibuagun barana. Adügati meha dan espechaliti ligía lun wasaminarun hulili luma lun wafurieidun ani ítara adügati lun wasansiruni saminaü le mabuidunti luagu le buiti.

Hínsiñetiña meha irahüñü ha ñéinbaña woun. Adügatiña meha lun wéherahan ani busentiña meha hasubudirun hawagu gürigia harutiña ha achülürübaña ñein, ha mama lílana fulasu. Lidan aban bisida le wadügübei lidan ubouhu Niue, aba lagumeserun aban irahü aguruhei larüna Winston ani aba lariñagun: “Hínsiñeti liyu barüna nun”. Marihíngili meha irahü le aban gürigia hayu tarüna kei Winston.

Gáriti meha woun warihini gudemei le ídanbei hawinwanda saragu hádangiñe gürigia lidan burí ubouhu ligía. Buíduburiti meha sun le geyegubei hau, gama lumoun, wuribati meha agaranihani ani lóuguati meha duna lídangiñeti peipu. Íbini ítara, genegeti madiheridun hamá meha wíbirigu, anihán meha ibagari le hasubudirubei. Gúndaatiña meha lau añahein lan haduheñu yarafa houn, anihein lan aban fulasu ñein lun háhuduragun lun Heowá luma lau gani hamani lubuidun chansi lun halawahani. Íderagua lumutiwa hagaburi lun wetenirun lun le súdinitimabei luma lun mibe lan wámati.

Pam, anihein meha dan mosu lan badaburagun duna luma lun bábougun lidan aban igaburi le iseriti bun. Ka badügübei lidan burí kesi le?

Teinki numuti núguchi luagu sun katei le larufudahabei nun ani huuti nun. Arufudahati nun ida luba lan náfuragun watu, nábougun lau watu luma ida luba lan nawinwandun láurügü murusun. Lidan aban bisida le wadügübei Kiribatin, aba werederun tidan aban tiraüraü muna lautu murisi ani lautu banbú ani turageirugu lauti lárigirugu rifu. Lun nábougun somu katei ménrengunti, aba nachigi aban huyu lun náfuragun watu ñein ani aba nayusurun lura tagei fáluma nílememe. Lun nadaburun duna, aba nidin fúsurugu ani aba nagurabahan lun hadaburun hiñaruñu ha nubaabaña. Lun hadaburun duna, yúsutiña aban wewe kéiburi 2 méturu (6 ugudi) limigifen lau aban gúrudu luagu lígiri, kei hamuga aban fítaru luagu wewe le lánina óuchahani. Lubaragiñeti híchugun günwi luagu gúrudu, aba hayusurun aban búngidu. Dan latokarun tun aban hiñaru lun tadaburun duna, aba tachüürüni búngidu ani lau tánhinhani búngidu furesegueina, aba tadaburuni duna. Arihúati meha kamá hamuga ménrengunti. Dan latokarun nun, aba nachüüruni búngidu saragu wéiyaasu ani ábarüga ladagarun búngidu ligibuagun duna. Aba héherahan súngubei nau ani lásurun héherahan aba tíderagunina aban hádangiñe. Súnwandan meha híderaguniwa lílana burí ubouhu ani buiti meha hóuseruniwa.

Hínsiñeti eseriwiduni lidan burí ubouhu hun biángubei. Abahüdaha humá woun aban sügǘ espechaliti hun.

Winston: Sügüti fiu dan lubaragiñe gunfuranda wamani fiu échuni. Kéiburi, dan meha le híchugun íbirigu éigini woun, aba meha hadigini sun éigini woun. Ibidiñeti yebe woun mosu lan wígirun habá lun héigin. Ligía aba lubéi meha wéigini sun le hadigibei woun. Gama lumoun, dan le wíchugunbei fe luagu ida liña lan échuni le, aba wagumeserun ígira éigini habá. Lau sun chará wamá meha, gunfuranda hamutiwa meha íbirigu. Ani wéiriti meha hagundan lau harihiniwa kéiburi sagü sisi hati dan le wabisidahani damuriguaü le ñein habéi. Lidan meha dan ligía, amu hawéi íbirigu ha awinwandubaña lidan fulasu le ñein habéi meha ha híbiri, marihintiña meha amu Gefentiña wawéidügü.

Adügati meha giñe bisida le wadügübei lun burí damuriguaü lun hasubudirun lílana burí ubouhu ligía tuagu lóundarun Heowá. Saminatiña meha saragu gürigia íbirigu lan ha lílana ubouhu burí ligía adügübalin relihión le. Ligíati, dan meha le harihin habisidahaniña terenchana íbirigu, aba gunfuranda hamani lílana wamá aban relihión le lídanbei saragu ageiraü, ábati taweiridun hanigi.

Pam: Aban lídangiñe katei létima uágubei naritagua, aban sügǘ le asuseredubei Kiribati, ñein lubéi meha aban liraüraü damuriguaü. Adüga lumuti meha íbiri Itinikai Matera, aban wéiyaali lidan  afiñeni lidan damuriguaü, sun liyaraati lun letenirun woun. Aban weyu, aba lachülürün lau aban básigidi táurügü aban gañéin. “Hun to”, liña lariñagun woun. Aban meha katei le wéiriti lubuidun woun weigin gañéin lidan dan ligía. Hingí lumutu ladügüni liraüraü katei le wanigi.

Pam, fiu irumu lárigiñe, aba léiguadun bisaani. Ka íderagubalibu lun basigirun bubaruaguoun?

Aba nadageinadun lidan irumu 1973, dan meha le weseriwiduña lan lidan burí ubouhu le luágunbei barana Pasifiku. Ábati wagiribudun Australioun ani gádürü hati lárigiñe aba nagadeiragun. Wéiriti meha nirun ani Winston giñe sun. Aba maweirinhali lan nigarigu lau lásügürün dan, lau sun lira, magidarungili meha sunsuinagubei darí waliihanu garüdia La Atalaya to lánina 15 lidan gádürü-hati, irumu 2009. Ariñagati seksióun “Preguntas de los lectores”: “Si una criatura muere en el vientre materno, ¿volverá a la vida en la resurrección?”. Ariñagati arütíkulu le, lúhaburuguñein lan Heowá sun katei ani súnwandan lan ladügüni le richabei. Lareidaguagüdübei sun wagarigu, le ru laalibei ubóu wuribati le woun, lugundun ru laali Liráü lun “lagünrinchaguni luadigimari Mafia” (1 Huan 3:8). Íderagua lumutiwa giñe arütíkulu ligía lúntima gebegi lan lubuidun pérüla le wámabei sun wagía ha lubúeingu Heowá. Ida waba hamuga lun hamuga ua lan emenigini luáguti Larúeihan Bungiu wama?

Lárigiñe weferidiruni wasaani, ábaya wagiribudun lidoun eseriwiduni lidan dan dayarüti. Seriwitiwa luagu fiu hati Betelirugu Australia ani dan lárigiñe ábaya wagiribudun lidoun eseriwiduni lidan sirkuitu. Lidan irumu 1981, lárigiñe weseriwidun luagu gádürü irumu lidan burí aüdü Newagálesi le súrubei luma Sydney, aba wagunbirahóun tidoun sukursáli to Australiaboun, ítara liña meha tiri lidan dan ligía ani awanhagua eseriwida ñein.

Winston, afiñetibu san íderagua láadibu lan beseriwidun lidan burí ubouhu le luágunbei barana Pasifiku lidan bidasin keisi lílana Sétanu le Arihibei tau Sukursáli Australasia?

Anha, íderagua láadina saragu. Furumiñe, lábugiñeñein meha taríaahan sukursáli to Australiaboun Samoa luma Samoa Merigana. Lárigiñe, aba lidanharu lan aban sukursáli to Néwaselandaboun tuma to Australiaboun. Ani guentó, lábugiñeñein taríaahan sukursáli Australasia ubouhu Koku, Néwaselanda, Niue, Samoa, Samoa Merigana, Timoru le ñéingiñe lubéi láfuacha weyu, Tokelau luma Tonga. Ibiha naali lubuidun chansi lun nabisidahan saragu lídangiñe fulasu le keisi íbiri le tóunahabei Beteli. Lau neseriwidun úara hama íbirigu úaraguatiña ha lídanbaña ubouhu le, íderagua lumutina buidu ladüga nídehaña hama guentó Beteligiñe.

Lun nagumuchun, busentina nariñagun, ariha wamaali lan, ítara kei lasuseredun woun lidan wabagari, mámarügüñanu lan wéinamugaaña áluahei Bungiu. Busentiña giñe nibureintiña hadariruni ‘pérüla le wéiribei lebegi’, íbini anhein meberesegun habéi haduheñu lau katei le (2 Uru. 5:2, 3; 2 Kro. 34:1-3). Chóuruti aban lan Bungiu hínsiñehabuti Heowá ani busenti lun hasalbarun súngubei, dandu ha nibureingiña kei ha wéinamugaañabaña.

Dan le wagumeserunbei, au tuma Pam, áluahei Bungiu lóugiñe 50 irumu guentó, ibidiñegubeiti yebe woun haliñounba lan lanügawa katei le. Furanguti aban lan pérüla le wéiriti lebegi inarüni luáguti Larúeihan Bungiu. Ani aranseñu waña lun wóunigiruni pérüla le lau sun were.