1. Ka wabusenrubei wadügün sun wagía le lubúeingu Bungiu ani ka uagu? (Ariha huméi dibuhu le luágubei tidáü garüdia to).

RU LUMUTI Hesusu gumadi le houn lani disipulugu: “Heiba lubeiti habügürü gürigia ha lílana sun fulasu, adüga humaña nánime disipulugu” (Mat. 28:19). Sun wagía ha lubúeingu Bungiu, busentiwa wafurendeirun ida luba lan wagunfulirun sunsuinagubei lau dasi le rúaalibei woun (2 Tim. 4:5). Le linarün katei, anihán dasi le súdinitimabei, le gebegitimabei ani létima lunbei letenirún lun guentó. Lau sun lira, gayaraati hénrengu lan woun wetenirun lun dasi le kei yebe wabusenrun.

2. Ka burí katei gayaraabei ladügün lun hénrengu lan woun lun wagunfulirun lau wani ministeriu?

² Anihein amu burí katei súdiniti le agidaruti saragu lídangiñe wadaani luma were. Másiñati mosu lan wawadigimaridun saragu oura sagü weyu lun wanuriahaniña waduheñu. O másiñati gani wamá amu burí buligasion hadan waduheñu o sándiñadiwa lan o anihein lan lanarime íruni wawagu o wagagibudaguña lan luma burí lénrengunga luma gáriti le lanügübei aweiyaduni. Ida luba wagagibudagun luma burí katei le, gúnfuli wagíame lau wani ministeriu sunsuinagubei?

3. Ka larufudubei dimurei le lariñagubei Hesusu lidan Matéu 13:23 woun?

³ Moun lumuti lábürühan warüna anhein siñá lubéi wásügürüni sun yebe dan le wabusenrubei etenira lun weseriwidun lun Heowá ladüga le gádanbaliwa. Subudi lumuti meha Hesusu siñabei lan wadügüni súngubei wagía ligiaméme lidan apurichihani (aliiha huméi Matéu 13:23). Wéiriti lebegi sun áfaaguni le wadügübei lun Heowá lidan weseriwidun dan le wáfaagun lun wíchuguni le buídutimabei lun súnwandan (Ebü. 6:10-12). Luagu amu oubaü, gayaraati wasaminarun gayara lan wadügün lanwoun lira anhein gayara lubéi. Lidan arütíkulu le, wakutihaba luagu le gayaraabei wadügüni lun wíchuguni wani ministeriu furumiñe lidan wabagari,  lun mibe lan wámati lidan wabagari luma lun buídutima wamá lidan apurichihani luma lidan warufudahan. Lubaragiñeti lira, ariha waméi le mini lubéi wagunfulirun lau wani ministeriu sunsuinagubei.

4. Ka mini lubéi wagunfulirun lau wani ministeriu sunsuinagubei?

⁴ Lidan murusun dimurei, wagunfulirun lau wani ministeriu sunsuinagubei mini lan mosu lan wapurichihan ani arufudaha wagíame houn amu lau sun wayaraati. Lau sun lira, mámarügüñein átiriñein lan dan wásügürün etenira lun weseriwidun súdinibei lun Heowá, súdiniti giñe lun, ka lan ínchahabaliwa lun wadügüni. Anhein ínsiñeni lubéi le wasandirubei luagu luma hawagu gürigia wáledigu ínchahabaliwa, wáfaaguba tau sun wanigi lun wagunfulirun lau wani ministeriu keisi kristiánugu * (Mar. 12:30, 31; Kol. 3:23, TNM). Lun lira, mosu wayusuruni sun were. Anhein ariha wabalin apurichihani kei aban lubuidun chansi, wáfaaguba lun wanügüni uganu buiti houn sun gürigia ha wayara.

5, 6. Afuranguagüda huméi lau aban hénpulu ida luba lan ladüga aban gürigia lun líchuguni lani ministeriu furumiñe lidan libagari lau sun siñá lan letenirun lun sun dan le labusenrunbei.

⁵ Samina wamá luagun aban nibureinti le hínsiñeti lun lun larufudahan. Gúndaati lau larufudahan sagü gayara lan. Lau lásügürün dan, aba ladarirun aban wadagimanu, arufudaha tidan aban leskuela bián weyu luagu dimaasu. Gama lumoun, magañeirunti saragu lun gayaraabei lan lanuriagun lungua. Ábati lawadigimaridun keisi aguburahati tidan aban chapu lúmagiñe leindi darí wándaradi. Lau sun tídantima lan chapu lásügürei liibe-agei lídangiñe lidaani, arufudahani hínsiñetimabei lun. Busenti lúntima buidu lan lidan ligaburi larufudahan lun lawadigimaridun keisi aban máisturu. Ligíati, sagü ladarirun chansi lun larufudahan aba ladügüni, íbini murusun lan oura.

⁶ Ítarameme, másiñati siñá lan wásügürüni sun yebe dan le wabusenrubei apurichiha. Lau sun lira, apurichihanitima hínsiñetimabei woun wadügün. Áfaaguatiwa lúntima buidu lan ligaburi wapurichihan sagü dan lun wachülürün tidoun hanigi gürigia lau uganu luáguti Larúeihan Bungiu. Gama lumoun, kei gibe lubéi le lunbei wadügüni, másiñati álügüdagua wamá woungua ida  luba lan wíchuguni wani ministeriu lidan furumiñeti lúgaaru.

7, 8. Ida luba wáyeihani igaburi le larufudubei Hesusu luagu apurichihani?

⁷ Arufudati Hesusu aban lubuidun igaburi luagun apurichihani le gayaraabei wáyeihani. Layanuhan luagu Larúeihan Bungiu ligíatima meha súdinitimabei lun (Huan 4:34, 35). Éibugati saragu san kilometuru lun lapurichihan houn sun gürigia ha liyara. Yusu lumuti sun chansi lun layanuhan hama gürigia hábiñe luma lidan guririguaü. Rúguati meha lungua lun lani ministeriu.

⁸ Gayaraati wáyeihani Hesusu lau wáluahan chansi lun wayanuhan luagu Larúeihan Bungiu houn gürigia lidan furumiñeguarügü oura luma fulasu dan le gayara lan. Aranseñu waña lun wadügün furumiñeguarügü sákürifisiu lun gayaraabei lan wídehan lidan apurichihani (Mar. 6:31-34; 1 Fe. 2:21). Añahein lílana damuriguaü heseriwiduña kei prekursorugu espechalitiña, prekursorugu ha adügübaña 70 oura lidan hati o kei prekursorugu ídehatiña. Añahein amu furendeihaña amu iñeñein o aba háguyun lidoun burí fulasu le ñein lubéi hemegeirua apurichihatiña. Lau sun lira, saragu lídangiñe wadagimanu lánina apurichihani le adügǘbei, adüga hamuti íbirigu ha meseriwidunbaña lidan dan dayarüti ani áfaaguatiña lun hadügüni lau sun hayaraati. Meberesenga ka lan gádanbaliwa, mamuriahanti Heowá wámagiñe lóugiñe le gayara wabéi adüga. Busenti lun wagundaarun lau weseriwidun lun lau wapurichihani “lubuidun uganu buiti luáguti Bungiu le gúndaabei” (1 Tim. 1:11, TNM; 2 Lur. 30:11).

9. a) Ida liña líchuguni Pábulu apurichihani furumiñe lidan libagari íbini dan meha le lunti lan lawadigimaridun? b) Ka larufudubei Adügaü 28:16, 30, 31 luagu ligaburi larihini Pábulu lani ministeriu?

⁹ Arufudati giñe apostolu Pábulu aban lubuidun igaburi luagun apurichihani. Dan meha le lídinbei Korintu lidan libiaman luéiyasun lánina apurichihani, mosu meha lawadigimaridun adaagua kianpu lugundun lóuguaali meha liseinsun. Lau sun lira, marihin lumuti meha luadigimari keisi katei le súdinitimabei lidan libagari. Adüga lumuti wadagimanu le lun lanuriagun lungua lun gayaraabei lan meha lanügüni uganu buiti houn korintuna sin líchugun ihürügu houn (2 Ko. 11:7). Lau sun mosu lan meha lawadigimaridun Pábulu, lúntima meha lani ministeriu letenira ani sagü meha samudi lapurichiha. Dan le labuidurunbei le gádanbalin, gayaraahali meha leteniruntima lun lapurichihan, “aba líchaagun [...] lungua sunsuinagubei apurichihei Lererun Bungiu luma arufudei houn huríu luagu Hesusu lan Krístubei” (Adü. 18:3-5; 2 Ko. 11:9). Dan lárigiñe, dan meha le ladaürǘña lubéi lúbiñe luagu bián irumu uburugu Roma, aba meha lapurichihan houn ha abisidahabalin ani abürüha ligía gárada (aliiha huméi Adügaü 28:16, 30, 31). Mabusenrunti meha lun ñein lan somu katei ebereserei leseriwidun lun Bungiu. Abürühati: “Mábürühala lubeiti warüna, lugundun ru laali Bungiu wadagimanu le labun waríaahan” (2 Ko. 4:1). Ítara kei Pábulu, gayaraati wadügün lun apurichihani lan ligíatima lan katei súdinitimati lidan wabagari íbini anhein mosu lubéi wawadigimaridun.

10, 11. Ida luba wagunfulirun sunsuinagubei lau wani ministeriu anhein wuriba lubéi wátuadi?

¹⁰ Ka gayaraabei wadügüni anhein adüga lubéi aweiyaduni o luriban átuadi lun siñá lan wáfuridun apurichiha tidan burí muna kei yebe aubei wabusenra? Anihein amu ligaburi apurichihani le gayaraabei wadügüni. Apurichihatiña meha kristiánugu ha lánina furumiñeti sígulu houn gürigia ñein lumuti meha hadariraña. Yusu hamuti meha sun chansi le hadarirun lun hayanuhan luagu inarüni houn gürigia: tidan burí muna, lidan guririguaü luma sagü gachansin hamá (Adü. 17:17; 20:20). Ánheinti siñá lubéi wéibugun saragu? Gayaraati wañuurun lidan aban fulasu ñein lubéi burí hásügüra gürigia lun wayanuhan hama. Gayaraati giñe wapurichihan luéigiñe gágamuru, wabürühan gárada luma wapurichihan  sagü gachansin wamá. Gúndaatiña saragu apurichihatiña ha siñabei hapurichihan saragu tidan burí muna ladüga hátuadi o amu katei, lau burí hapurichihan lidan amu igaburi ani buiti giñe hasandiragun houngua lau hadügüni.

¹¹ Gayaraati wagunfulirun lau wani ministeriu sunsuinagubei íbini anhein wuriba lubéi wátuadi. Saminaya wamá luagu apostolu Pábulu. Ariñagati: “Sun katei gayara numuti lau lídehan le íchugubei erei nun” (Fili. 4:13, TNM). Megei lumuti meha Pábulu erei ligía dan le lasandirubei lidan aban lídangiñe luéiyasun lánina apurichihani. Ariñagati houn galasiana: “Ladüga meha aban sandi le nuágubei gayara lubéi nerederun huma furumiñeti dan lun napurichihani uganu lánina asalbaruni hun” (Gal. 4:13). Ítarameme, gayaraabei ladügün luriban átuadi lun gachansin wamá lun wayanuhan luagu Larúeihan Bungiu houn surusiagu, anosuhatiña hama amu gürigia ha ídehabaña lun hóunigiruniwa. Saragu hádangiñe gürigia ha hawadigimariduña dan le woudin apurichiha hábiñe.

12. Ka mini lubéi lun ‘buidu lan wagu’?

¹² Ariñagati Hesusu: “Agu lilanpunbei úgubu, anhein lubeiti buidu lubéi bagu, harugoungabei giñe lau sun búgubu” (Mat. 6:22). Ka lílabei dimurei burí le? Mosu lan úa lan ni kata eberesehei weseriwidun, lidan amu dimurei, wíchuguni warihin luágunrügü aban katei. Hesusuméme arufudubalin katei le buidu buidu lau letenirun lun lani ministeriu sunsuinagubei ani arufudahati giñe houn lani disipulugu lun hetenirun lun heseriwidun lun Heowá luma lun Larúeihan. Falá wamuti le ladügübei Hesusu lau wíchaagun woungua lun wani ministeriu kristiánu  lau wáluahani “larúeihan luma liricha Bungiu furumiñe” (Mat. 6:33).

13. Ka gayaraabei líderaguniwa lun wetenirun súnwandan lun wani ministeriu?

¹³ Aban igaburi lun gayara lan wetenirun lun wani ministeriu lau mawesirun wamani wadaani lidan katei le maweirinti lisudinin lun gayaraabei lántima wetenirun lun wíderaguniña amu asubudirei Heowá luma lun línsiñedun houn. * Kéiburi, gayaraati san wadügüni asansiruni lidan lóurate wawadigimari lun gayaraabei lántima wapurichihan lidan dimaasu? Gayaraati san másügürün wamá saragu dan lidan isebáhari le másiñati wesi lani saragu lídangiñe wadaani?

14. Ka hadügübei aban feru maríeitiña lúntima hetenirun lun hani ministeriu luma lun gadaanitima hamá lun hetenirunbei lun?

¹⁴ Ariha waméi le ladügübei aban wéiyaali lidan afiñeni gíriti Elías tuma lani weiriou. Abahüdaguati: “Siñati meha weseriwidun kei prekursorugu lidan dan ligía, lau sun lira mosu meha wadügün somu katei. Ábati wadügün liraüraü burí asansiruni lun gíbetima lan dan wásügürün lidan apurichihani. Kéiburi, aba mibetimahali lan wagastarun, másügürünhadiwa meha saragu dan lidan isebáhari, lugundun aba wíchugun fe gidá lan saragu lídangiñe wadaani ani aba giñe wamuriahan hama wábutigu lun lasansirún lóurate wawadigimari lun gayaraabei lántima wapurichihan. Lau wadügüni sun le, gayaraahali meha wáfuridun apurichiha rábounweyu, wíchugun aturiahani tídangiñeti Bíbülia houn saragu gürigia ani íbini lun wapurichihan labadinagua dimaasu bián wéiyaasu lidan hati. Ma meha lueirin wagundan!”.

15, 16. Úara luma le lariñagubei 1 Timotéu 4:13, 15, ida luba buídutima lan ligaburi wapurichihan luma warufudahan? (Ariha huméi giñe rekuáduru “ Le gayaraabei wadügüni lun wagunfulirun sunsuinagubei lau wani ministeriu”).

¹⁵ Ábanya igaburi lúntima wagunfulirun lau wani ministeriu sunsuinagubei, lau buídutima lan ligaburi  warufudahan. Amuriahóuati burí hama fiu gürigia ha subudihabúbaña lun somu wadagimanu lun hasigirun afurendeira lun gayaraabei lan laganwoundun hasubudin luma le gayara habéi adüga. Ítarameme, mosu giñe wasigirun abuiduragüdei ligaburi warufudahan (Ari. 1:5; aliiha huméi 1 Timotéu 4:13, 15).

¹⁶ Ida lubati wadügüni? Lau wetenirun buidu buidu lun le arufudahóubei woun sagü dimaasu lidan adamuridaguni Habagari Kristiánugu luma Heseriwidun. Lidan burí adamuridaguni le, ibihatiwa lubuidun burí arufudahani le íderagubaliwa lun buídutima lan ligaburi wapurichihan eibu dan. Kéiburi, dan le líchugun íbiri le alidihabalin adamuridaguni adundehani houn ha íchugubalin hadasin, teni wamá lun burí adundehani le lunbei líderaguniwa lun buídutima lan wapurichihan luma warufudahan. Adüga wameiti le wafurendeirubei dánmeya le wayanuhan luma somu gürigia luagu inarüni. Gayaraati giñe wamuriahan luma íbiri le arihibei lau sétanu le ñéingiñe lubéi wáfurida apurichiha lun líderaguniwa o lun láfuridun apurichiha wama. Gayaraati giñe wamuriahan hama amu íbirigu ha lǘhañabaña apurichiha, wamuriahan luma aban prekursoru o luma óunigiruti sirkuitu lun háfuridun apurichiha wama. Líderagubadiwa sun le lun buídutima lan wayusurunu agumeiraguagüdüni to tídanboun agumeiraguagüdüni tótima wayusuruboun lun warufudahan. Ítara, gúndaatimabadiwa lidan wapurichihan luma lidan warufudahan.

17. Ka wasandirubei dan le wagunfulirun lau wani ministeriu sunsuinagubei?

¹⁷ Ma lubuidun chansi ígira lan Heowá lun ‘wídehan luma’! (1 Ko. 3:9, TNM). Dan le wetenirun lun katei le súdinitimabei ani teni wagía lun wani ministeriu, seriwitiwa lun Heowá “lau ugundani” (Fili. 1:10; Sal. 100:2). Keisi lubúeingu Bungiu, chouru wamuti líchugubei lan ubafu le wemegeirubei woun lun wagunfulirun lau wani ministeriu meberesenga ka lan waturóbulinbei luma le siñá wabéi adüga (2 Ko. 4:1, 7; 6:4). Dandu anhein gayara lubéi wapurichihan saragu o murusun, según le gádanbaliwa, ruti ugundani woun weseriwidun lun Bungiu tídangiñe sun wanigi (Gal. 6:4). Lau wagunfulirun lau wani ministeriu sunsuinagubei, warufuduñein hínsiñe lan Heowá woun hama gürigia wáledigu. Kábati wibiha? Ariñagatu Bíbülia: “Anhein badüga ítara, basalbaruba, salba hagíame giñe ha aganbubalibu” (1 Tim. 4:16).