1. Kei aubei larufudúa lidan Éfesuna 6:10-13, ka ábanbei lídangiñe igaburi súdinitimati le ídanbei larufudei Heowá berese lan wau ani hínsiñe wamá lun?

ABAN lídangiñe igaburi súdinitimati le ídanbei larufudei Heowá berese lan wau ani hínsiñe wamá lun lau líderaguniwa agagibudagua hama wáganigu. Satanásitima hama lumafianu wáganiñubaña. Wéridi lumutiwa Heowá luagu dencha hamá ani ru lumuti le wemegeirubei woun lun wagagibudagun hama (aliiha huméi Éfesuna 6:10-13). Ánhawa ánhara lun lídehan, afiñe wagíame luagu sunsuinagubei, gayaraabei wagagibudagun luma Mafia. Gayaraabei wasandiragun woungua lau ichouruni libe le meha lasandirubei apostolu Pábulu, le abürühabei: “Anhein luéigiñeñein lubéi wafulesein Bungiu, kábagia habafu wáganiñu wawagu?” (Rom. 8:31).

2. Kaba wakutiha lidan arütíkulu le?

² Keisi kristiánugu inarünitiña, metenitiwa saragu lun Satanási hama lumafianu. Lubaragiñe lira, tenitimatiwa lun wafurendeirun luagu Heowá luma lun weseriwidun lun (Sal. 25:5). Lau sun lira, mosu wasubudiruni le burí ladügübei Satanási lun mígirun wamá lun leyeeduniwa (2 Ko. 2:11). Lidan arütíkulu le, wakutihaba luagu aban lídangiñe katei létima layusurubei Satanási hama lumafianu lun leyeeduniña gürigia. Wakutihaba giñe luagu ida luba lan wagañeiruniña dan le wagagibudagun hama.

3, 4. a) Katei san katei hánibei máfianu? b) Darí halía lébeda laburuchagun luagu katei hani máfianu?

³ Ábantima lídangiñe katei le layusurubei Satanási hama máfianu lun heyeeduniña gürigia lau hayusurun katei le gániti hama. Ha  gánibaña luma burí katei le, ariñagatiña subudi hamá o gabafu hamá luagu burí katei le ibidiñebei houn amu gürigia ani mabafutiña giñe amu gürigia luagu. Kéiburi, añahein ariñagatiña gayara lan hariñaguni le lunbei lasuseredun ámuñegü lau haturiahanu waruguma. Añahein amu adügatiña lun larihín kamá hamuga hayanuhaña hama hilaaña. Ani añahein giñe amu abiñarahatiña o yúsutiña mahia ani másiñati wayaru hamá amu lun hóuserun kei aubei habusenra. *

⁴ Kamanihali katei hani máfianu lidan ubóu. Lidan aban aturiahani le adügǘbei lidan 18 ageiraü le ñein lubéi layanuhóua chumagü luma burí ubouhu libiti barana Karibe, kéiburi darandi ǘrüwa hádangiñe kada san gürigia ha álügüdawagubaña afiñetiña luagu mahia, abiñarahani o luagu awayaruhani. Ani kéiburi giñe darandi ǘrüwa hádangiñe kada san gürigia ha álügüdawagubaña lidan fulasu ligía, afiñetiña gayara lan layanuhóun hama sífirigu. Lidan amu aturiahani le adügǘbei lidan 18 ageiraü Áfürika, kéiburi hóugiñe hamidan ha álügüdawagubaña afiñetiña luagu abiñarahani. Inarüni, meberesenga halía lan weredera, mosu wóunigiragun woungua luéi katei hani máfianu lugundun áfaaguati Satanási lun leyeeduni “sun ubóu” (Aruf. 12:9).

5. Ida liña larihini Heowá katei hani máfianu?

⁵ Heowá ‘Lubungiutebei inarüni’ (Sal. 31:5). Ligía iyereegu lubéi katei hani máfianu lun. Ariñagati houn ísüraelina: “Ualá ni aban hídangiñe adagaragüdüti liráü ni ásügüragüdei lídangiñe watu gemeti, maríaagüdün huguyame, málugun huguyame hariñaguni katei le lunbei lasuseredun, mabiñarahan huguyame, marumaagüdün huguyame hewe, málügüdahan huguyame hama garíaahatiña, ni hama búyeigu, ni hama hilaaña. Lugundun mínsiñetiña ha adügübaña katei líbeina le lun Bungiu” (2 Lur. 18:10-12). Mama mosu gaganbadi hamá kristiánugu lun Lúrudu le líchugubei Heowá houn ísüraelina. Lau sun lira, subudi wamuti masansirungili lan ligaburi larihini Heowá katei hani máfianu (Mal. 3:6).

6. a) Ida liña layusuruni Satanási katei hani máfianu lun ladügün wuribani houn gürigia? b) Según Apurichihati 9:5, ka asuseredubei houn hilaaña?

⁶ Ariñagati Heowá woun lun mánharun wamá lun katei hani máfianu lugundun subudi lumuti yusu lani Satanási katei le lun ladügün wuribani houn gürigia. Kéiburi, yusu lumuti Satanási katei le lun laburuchaguagüdün iyeeni, kéiburi wínwangiña lan hilaaña lidan amu fulasu (aliiha huméi Apurichihati 9:5). Yusu lumuti giñe Satanási katei le lun lanufudedaguagüdüniña gürigia luma lun ladisedaguagüdüniña luéi Bungiu. Busenti lun híchuguni gürigia hafiñen hawagu sífirigu wuribatiña, mama luagu Heowá.

7. Ka lariñagubei Heowá woun?

⁷ Kei buga lariñawagún lidan lagumeseha arütíkulu le, ariñaga lumuti Heowá woun le lunbei wasubudiruni lun meyeedun lániwa Satanási hama lumafianu. Ariha wamá fiu katei le gayaraabei wadügüni lun wagagibudagun hama.

8. a) Kátima katei súdinitimati lunbei wadügüni lun wagagibudagun hama sífirigu salufuritiña? b) Ida liña larufuduni Sálumu 146:4 iyeeni le lariñagubei Satanási hawagu hilaaña?

⁸ Aliiha wamoun Lererun Bungiu ráramagua wagíame asaminara luagu le waliihabei. Anihántima katei súdinitimati le lunbei wadügüni lun wamahadun lun iyeeni le haburuchaguagüdübei sífirigu salufuritiña. Ítara tiña Lererun Bungiu kei aban eféin hamanatu to arufudubalin  liyeeni Satanási (Efe. 6:17). Kéiburi, arufudahatu Lererun Bungiu siñá lan hayanuhan hilaaña hama gürigia ha wínwangiñabaña ( aliiha huméi Sálumu 146:4). Haritaguagüda tumutiwa giñe Heowarügüñein lan gayara lariñaguni le lunbei lasuseredun ámuñegü keisi lubudu (Isa. 45:21; 46:10). Ánhawa aliihoun sagü weyu ráramagua wagíame asaminara luagu le waliihabei, aranseñubadiwa lun wamahadun luma lun liyereegudun iyeeni burí le hámagiñeti sífirigu salufuritiña woun.

9. Ka igaburi le gániti hama máfianu ídanbei mádaragun wamá woungua?

⁹ Madüga wamá ni kata le gániti luma katei hani máfianu. Wagía kristiánugu inarünitiña, mádaraguntiwa woungua hamoun búyeigu, málugun wagía wayanuhan hama hilaaña. Kei aubei warihei lidan arütíkulu le lubaragiñebei le, mádaraguntiwa woungua lidan ligaburi hariwachaguagüdüniña gürigia hegeburi luma ligaburi hábunahan, le lídangiñeti afiñeni luagu habagariduña lan hilaaña lidan somu fulasu. Máluahantiwa giñe wasubudiruni le lunbei lasuseredun ámuñegü lau waturiahanu waruguma o wálügüdahan hama garíaahatiña (Isa. 8:19, TNM). Mabuseruntiwa lun gadan lániwa ni aban lídangiñe katei burí le o amu libe le. Subudi wamuti dencha lan burí katei le ani gayaraati ladügün lun wádaragun woungua lumoun Satanási luma hama lumafianu.

10, 11. a) Ka hadügübei fiu éfesuna ha lánina furumiñeti sígulu dan le hafurendeirubalin inarüni? b) Según 1 Korintuna 10:21, ka uagu lunti lubéi wáyeihani hagaburi éfesuna ani ida luba wadügüni?

¹⁰ Fui waméi o günringua waméi furumiñeguarügü katei le wámabei le gániti hama máfianu. Lidan furumiñeti sígulu, añahein meha lílana uburugu Éfesu ha adügübaña mahia. Gama lumoun, dan le hafurendeirubalin inarüni, aba hígiruni katei le sunsuinagubei. Ariñagatu Bíbülia saragu lan hádangiñe ha meha adügübalin katei le, “aba hanügünu burí haliburun, aba hágudunu hagibugiñe súngubei” (Adü. 19:19). Adüga hamuti sun le hayaraati lun madan lániña katei le hani sífirigu wuribatiña. Lau sun seru tan meha líburu lánina mahia tuguya, aba hágudunu, medewehan hamutu ani malugurun hamutu giñe. Súdinitimati  meha houn hagundaaragüdüni Heowá sügǘ luéi tebegi líburu burí tuguya.

¹¹ Ida luba wáyeihani hagaburi kristiánugu lánina furumiñeti sígulu ha? Anhein anihein lubéi somu katei wama le gániti luma katei le hani máfianu, kéiburi lúyawa uraü, gagaburi wamani wíchugun lai hábulugu irahüñü, wadaüraguagüdüniña irahüñü tau daüguaü funatu lubá harumugun luma wíchugun mafu funati luagu harüna luma amu burí katei le ayusurúbei lun nege hóunigiragun gürigia houngua luéi denchaü luma hawéi sífirigu wuribatiña, buídubei hamuga lun wáguruni katei burí le o wagünrinchaguni (aliiha huméi 1 Korintuna 10:21).

12. Ka álügüdahani lunbei wadügüni wóuniwagua luagu wisebáhari?

¹² Akutiha waméi buidu buidu ka lan lídanbei wisebáhari. Álügüdagua wamá woungua: “Aliihatina san líburu, garüdia o arütíkulu lidan Internet le gániti luma katei hani máfianu? Ágiati músika le naganbahabei, pelikula luma programa tidan bigibigitu le narihibei luma huraraü le náhurerubei tidan bigibigitu, konputadora, gágamuru o katei líbeina lira? Gániti san nisebáhari luma katei hani máfianu? Anihein san katei hawaguti hasaliragun gürigia animaalume o achúhei hata amu laganagua o hawagu gürigia hilaaña o katei líbeina lira lidan nisebáhari? Arufuda lumuti san mahia, awayaruhani luma abiñarahani kei aban isebáhari le maribanti?”. Inarüni mama lan sun abahüdaguni o sügǘ burí le mama inarüniti lun gagana lan katei hani máfianu. Danme le wakutihani wisebáhari, chouru waméi le lan lunbei wadügüni lun mani lan ni kata luma le iyereegubei lun Bungiu. Busentiwa wadügüni sun wayaraati lun buidu lan wasaminan ligibugiñe Heowá (Adü. 24:16). *

13. Ka katei mabusenrun wabéi wadügün?

 ¹³ Mabahüdagua wamá abahüdaguni hawaguti máfianu. Lidan katei le, mosu wafalaruni ligaburi Hesusu (1 Fe. 2:21). Sun dan le laubei Hesusu sielu, subuditi meha saragu katei lun luagu Satanási luma hawagu máfianu. Lau sun lira, dan le liábinbei Ubouagun, merederunti abahüdagua hawagu. Busenti meha layanuhan luagu Heowá, mama lun lerederun ayanuha luagu Satanási. Ítara kei Hesusu, merederuntiwa ayanuha hawagu máfianu. Lubaragiñe lira, arufudatiwa lau le wariñagubei gúndaañu tiña lan wanigi “lau dimurei buídumeraüti”, mini lan lira, lau inarüni (Sal. 45:1).

14, 15. a) Ka uagu moun lumuti lubéi wanufudedun saragu hawéi sífirigu salufuritiña? b) Ka arufudubalin furangu góunigi lumutiña lan Heowá lumutuniña uguñe weyu?

¹⁴ Manufudeda wamá saragu hawéi sífirigu salufuritiña. Lidan ubóu le, gayaraati lasuseredun katei wuribati woun sun wagía. Dan le magurabun wamani, gayaraati lasuseredun somu katei wuribati woun sódini, wasandirun o íbini wóunwegun. Lau sun lira, moun lumuti wasaminarun hadüga lan máfianu. Afuranguagüdatu Bíbülia gayara lan lasuseredun somu katei wuribati woun dan le magurabun wamani (Apur. 9:11, TNM). Luéigiñe amu oubaü, arufudaali Heowá gabafutima lan hawéi máfianu. Kéiburi, mígirunti lun láfaruni Satanási Hobu hilagubei (Hob. 2:6). Ani lidan lidaani Moisesi, arufuda lumuti wéiritima lan lubafu hawéi fádirigu ha adügübaña mahia Ehiptu (Afu. 8:18; 9:11). Saragu dan lárigiñe, ibihati Hesusu ubafu lúmagiñe Heowá ani aba láguruni Hesusu Satanási hama lumafianu siélugiñe Ubouagun. Ani yarafa madise, lágurubaña lidoun fusu le mébehabei, ñein lubéi siñabei lan hadügün wuribani ni ka un (Aruf. 12:9; 20:2, 3).

¹⁵ Furanguti warihini uguñe weyu góunigi lumutiña lan Heowá lumutuniña. Samina wamá luagun le: wapurichihañein ani warufudahañein inarüni lidan sun Ubóu (Mat. 28:19, 20). Subudigüda wamutiti sun wuribani le ladügübei Mafia. Lun hamuga gayara lan ladügüni, ráramagüda lumuti hamuga wawadigimari. Gama lumoun, siñá lumuti adüga. Ligíati, moun lumuti lubéi wanufudedun saragu hawéi sífirigu salufuritiña. Subudi wamuti ‘aríagu liña lan Heowá lun sun le asuseredubei lidan sun ubóu, lun larufuduni lubafu hawagu ha hemenigibaña luagu le tímatimaati’ (2 Kro. 16:9). Ánhawa úaragua lun Bungiu, siñabei hadügün máfianu wuribani woun le aduraruti lun súnwandan.

16, 17. Abahüdaha humá aban sügǘ le arufudubalin ganigi le emegeirúbei lun wagagibudagun hama sífirigu salufuritiña.

¹⁶ Mégeiwati ganigi lun wagagibudagun hama sífirigu salufuritiña, dántima le hadügüdarun wamadagu o waduheñu ha buiti haritagun wawagu lun gadan lániwa somu échuni. Gama lumoun, biní lumutiña Heowá ha ganigibaña. Ariha waméi le asuseredubei tun aban íbiri gíritu Erica, to awinwanduboun Gana. Wein-aban meha irumu tau dan le tagumeserunbei aturiahoun Bíbülia. Kei liráü lubéi aban gabiñarahati tuguya, agurabatiña meha sun gürigia lun tafalaruni hechun tiduheñu, kei leigín uwi le ladagaragüdün túguchi houn lubungiutegu. Kei maha tubéi tadügüni, aba harihini tiduheñu kei anabawaguni houn habungiutegu. Saminatiña yebe habeichubaña lan habungiutegu lau sandi ani lálülüdüba lan hau.

¹⁷ Áfaaguatiña yebe tiduheñu Erica lun hafosurunu lun tafalaruni échuni ligía, lau sun lira, mígiraguagüdütün tungua houn, lau sun mosu lan meha tidin hábiñegiñe. Gama lumoun, ígiratiña saragu Gefentiña lun terederun hábiñe. Ítara liña labinirunu Heowá hau aban iseri iduheñu, ha tíbirigubaña (Mar. 10:29, 30). Lau sun aba lan hachagarunu tiduheñu Erica ani aba giñe hágudunu tílagu, úaraguamemetu lun Heowá, aba tabadiseirun ani guentó teseriwiduña kei prekursora to adügüboun 70 oura lidan hati. Manufudeduntu saragu hawéi máfianu. Ani ariñagatu hawagu tiduheñu: “Amuriahatina sagü weyu luma Heowá, Wabungiute hínsiñehabuti, lun hamuga hasandiruni niduheñu ugundani le lanügübei wasubudiruni Heowá luma lun hasandiragun houngua buidu eseriwida lun”.

18. Kaba abiniruni wibiha ánhawa afiñera luagu Heowá?

¹⁸ Mama sun wagía lun wagagibudagun luma aban óuchawaguni hénrenguti kei le. Lau sun lira, sun wagía mosu aranseñu wamá lun wagagibudagun hama sífirigu salufuritiña luma lun wafiñerun luagu Heowá. Ánhawa adügei, wibihiba saragu abiniruni ani mígirunbadiwa lun leyeeduniwa Satanási. Ani mígirun wabéi weseriwidun lun Bungiu ladüga anufudei hawéi máfianu. Ani le súdinitimabei, lederebugudubatima wamadagua luma Heowá. Abürühati disipulu Santiagu: “Rugua humá lubeiti hungua lábugiñoun lererehan Bungiu; gagibugua humá luma Mafia, ábame lanurahan huéi. Yarafa humá lun Bungiu, ábame giñe layarafadun hun” (Sant. 4:7, 8).