“GÍBETI nadü le lunbei lalubahóuniwa, ani lóuguatiña nadagimeintiña. Ligía lunti lubéi hamuriahan luma Bungiu lun lóunahan nadagimeintiña haganaguóun” (Luk. 10:2). Afuranguagüda lumuti dimurei le, le lariñagubei Hesusu kéiburi 2,000 irumu guentó, le asuseredubei Mianmarü. Ka uagu? Ladüga gádürü milu bián-sanrügüñanu íbirigu Mianmarü apurichihei uganu luáguti Larúeihan Bungiu houn 55 míñunu gürigia.

Lau sun lira, gurú laru Heowá hanigi saragu san íbirigu lídangiñetiña ámuñegueinarügü fulasu lun háguyun lidoun ageiraü le Asiabei lun hídehan lidan apurichihani. Ka ínchahabaliña lun hígiruni hageira? Ka hadügübei lun gayara lan haguyugun? Ka burí abiniruni ibiha hamaalibei? Ariha waméi.

Fiu irumu guentó aba ladagarun óunwehani luagu aban prekursoru hapónna gíriti Kazuhiro, aba ibidiñegua lan lungua ani aba lanügǘn háspitalirugun. Aba lariñagun surusia lun lun lan lerederuni labugahan luagu bián irumu. Hénrenguti meha lun Kazuhiro lafiñeruni ani aba lasaminarun: “Kábati nadüga? Ani le hínsiñebei nun prekursoru nan ani mabuseruntina nígiruni”. Aba lafurieidun lun Heowá tídangiñe sun lanigi lun líderaguni lun lasigirun eseriwida kei prekursoru.

Abahüdahati Kazuhiro: “Aban hati lárigiñe, aba líchugun aban numada le eseriwidubei Mianmarü fe luagu le asuseredubei nun. Aba lagúarun ani aba lariñagun nun: ‘Busutima hayusuruboun gürigia ya Mianmarü. Ánhabu ñǘnbuin, gayaraabei prekursoruméme ban sin bayusurun karü’. Aba nálügüdüni surusia anhein gayara lubéi nidin awinwanda Mianmarü íbini sandi nan. Aba líchugun aban uganu buiti nun: ‘Anihein aban lisurusia ichügü Mianmarü leredera lebeluhaña ya Hapón. Narufudubei bun. Ánhabu lárügüda sandi le ñein, gayaraabei bidin lumoun’. Aban meha óunabagülei lúmagiñeti Heowá lira nun”.

Lau lóufudagun, aba lóunahan Kazuhiro gárada luéigiñe Internet tidoun Beteli to Mianmarüboun lun lariñagun busén lan leseriwidun kei prekursoru lidan ageiraü ligía úara tuma lani weiriou. Séingürügü weyu lárigiñe, aba tóunabuni Beteli, hariñaga lun: “Higougu, mégeitiwa hanwoun apurichihatiña”. Aba lalugurunu Kazuhiro tuma Mari, to lani weiriou, hakarün ani aba houdin áluaha hagaradan ani gañei haméi hapasein lun houdin. Ani guentó gúndaatiña saragu lau heseriwiduña lan lidan aban sétanu lani seini uburugu Mandalai. Ariñagati Kazuhiro: “Derebugüda laali sun le asuseredubei woun wafiñen luagu füramase le lídanbei Sálumu 37:5, le ariñagubei: ‘Rubei bibagari lúhaburugun Aburemei; hemenigibá luagu, ábame liabin lun líderagunibu’”.

Lidan irumu 2014, ibiha hamuti íbirigu ha Mianmarübaña lubuidun chansi lun heresibiruniña íbirigu ha ñǘbuinbaña lídangiñe saragu ageiraü lun adamurini espechaliti le adügǘbei ñein. Gíbetiña íbirigu lídangiñetiña ámuñegueinarügü ageiraü achülürütiña lubá adamurini ligía. Haganagua anuhóun Monique, aban íbiri merigana ani 34 irumu tau. Abahüdaguatu: “Dan le nagiribudunbei lídangiñe adamurini aba nafurieidun lun Heowá libügürü le lunbei nadügüni lau nibagari. Aba giñe nayanuhan hama nagübürigu luagu le nabuserunbei nadügün. Gúndaatiña nagübürigu lau saminaü le lun neseriwidun Mianmarü. Gama lumoun, lubaragiñe nadügüni le nasaminarubei, mosu meha nafurieidun lun Heowá saragu luma lun nígirun lun lásügürün fiu dan”. Abahüdaha tumuti Monique ka lan uagu.

Aba tariñagun: “Ariñagati Hesusu houn lani disipulugu lunti lan harihini átiribei lan hagastarun. Ábati nálügüdagun nungua: ‘Anihein funa san seinsu nófuti numa lun nadügüni asansiruni le? Gayaraabei funa san nanuriagun nungua sin nawadigimaridun saragu dan?’”. Ariñagatu giñe: “Aba níchugun fe lau lóufudagun uá lan seinsu nófuti numa lun nidin awinwanda lidan le aban louba ubóu”. Kati tadügübei lun gayara lan táguyun? (Luk. 14:28).

Ábaya tariñagun Monique: “Aban weyu, aba tariñagun nábuti nun busén tan tayanuhan numa. Aba nanufudedun saragu lugundun saminati yebe tabugadina lan lídangiñe wadagimanu. Gama lumoun, mítaranti, aba teteingirunina luagu lubuidun nuadigimari ani ariñagatu nun adügaaru lan aransehani lun nibihini seinsu le tedewehabei kónpeni houn nadagimeintiña. Ani seinsu le nibihibei ligía meha nemegeirubei lun nafayeihani nadueihan”.

Teseriwiduña Monique Mianmarü lúmagiñe lidan duusu-hati, irumu 2014. Ida liña tasandiragun tungua lau teseriwidun lidan aban fulasu le ñein lubéi mégeiwa hamá apurichihatiña? Óunabatu: “Gúndaatina lau ya nan. Níchuguña aturiahani tídangiñeti Bíbülia houn ǘrüwa gürigia. Aban hádangiñe, aban gürigia 67 irumu tau ani súnwandan teresibirunina lau aban áhayachuni luma aban lanarime óuburuni. Dan le tafurendeirubalin Heowá lan líribei Bungiu, aba tayahun. Aba tariñagun nun: ‘Furumiñe wéiyaasu naganbuni liri Bungiu lidan nibagari. Lau sun wéiyaadina lan buéi, arufudahabaali katei súdinitimati le gayaraabei nafurendeiruni’. Aba giñe nayahun. Adügati sügǘ burí le lun gunda nan lau neseriwidun lidan aban fulasu le ñein lubéi mégeiwa hamá apurichihatiña”. Málügili lúmagiñe tagunbirahoun Monique tidoun Leskuela houn Apurichihatiña Larúeihan Bungiu.

Adügati le ariñawagúbei luagu Mianmarü tidan líburu Anuario de los testigos de Jehová to lánina irumu 2013, lun houdin hádangiñe wíbirigu eseriwida lidan ageiraü le. Anuhein aban íbiri 30 irumu tau gíritu Li, Asia teredera ani ñein tawadigimarida lidan dan dayarüti. Adügati le taliihabei tidan Anuario lun tasaminarun teseriwidun Mianmarü. Ariñagatu: “Lidan irumu 2014, dan le nídinbei Yangón lidoun adamurini espechaliti, aba nasubudirun aban feru maríeitiña ha apurichihabaña lidan cheiní Mianmarü. Kei le gariñagadi nubéi cheiní, aba náguyun Mianmarün lun nídehan lidan apurichihani lidan cheiní. Nuguya tuma Monique, aba weseriwidun úara Mandalai. Biní lumutiwa Heowá ani daritiwa wadagimanu lun warufudahan tidan aban leskuela ani ruti chansi woun lun wapurichihan. Daritiwa giñe aban fulasu yarafati lun wawadigimari lun wawinwandun ñein. Íbini anihein lan lirahüñü turobuli luma lárouga gúndaatiwa saragu lau weseriwidun ya. Míbeti hámati gürigia Mianmarü lun hawinwandun, hínsiñehabutiña ani aranseñu haña lun haganbuni uganu tídangiñeti Bíbülia. Ruti ugundani nun narihini ida liña lan labiniruni Heowá apurichihani. Chouru numuti busén lan Heowá lun neseriwidun ya Mandalai”.

Ariha hamaali saragu íbirigu ha eseriwidubaña lidan fulasu le ñein lubéi hemegeirua apurichihatiña gabafu  lan furíei. Kei hénpulu, Jumpei tuma Nao, to lani weiriou, biángubei hagía darandi irumu gafadahaya hau, lidan meha aban damuriguaü seini Hapón heseriwida. Ka uagu háguyunbei Mianmarü? Abahüdahati Jumpei: “Au meha tuma nani weiriou saminagunbeitiwa weseriwidun lidan amu ageiraü. Aba meha láguyun aban íbiri le lídangiñeti wani damuriguaü seini Mianmarün. Aba giñe wadügüni ligiaméme lidan seingü-hati, irumu 2010, íbini uá lan saragu seinsu areidati wama. Resibi hamutiwa íbirigu ha Mianmarübaña lau saragu ínsiñeni”. Ka lisaminanbei Jumpei luagu apurichihani Mianmarü? Ariñagati: “Gagasutiña gürigia saragu luagu uganu buiti le wapurichihabei. Dan le harihini ha maganbunbaña bidéu lidan seini aba taweiridun hanigi. Gúndaatiwa lau wayabin eseriwida ya”.

Ka ladügübei Jumpei tuma Nao lun hanuriagun houngua? Ariñagati: “Lidan ǘrüwa irumu, gasta wamaali meha liibe-agei seinsu le wanügübei ani maseinsun haadiwa meha lun wafayeihani warumu leweñegua irumu. Aba wafurieidun saragu lun Heowá. Aba lasuseredun aban katei, aba tagunbirahaniwa Beteli lun weseriwidun kei prekursoru espechalitiña luagu fiu dan. Aba wíchuguni wafiñen luagu Heowá ani mágurun lumutiwa. Súnwandan lóunigiruniwa”. Málügili lúmagiñe lidin Jumpei tuma Nao tidan Leskuela houn Apurichihatiña Larúeihan Bungiu.

Aba láguyun Simone, aban íbiri italiana, 43 irumu lau, tuma lani weiriou to gíriboun Anna, nuewa selandana ani 37 irumu tau, Mianmarün. Ka ínchahabaliña? Ariñagatu Anna: “Anuario to lánina irumu 2013, to ayanuhaboun luagu Mianmarü”. Aba giñe lariñagun Simone: “Aba lubuidun chansi weseriwidun Mianmarü. Míbeti emegeiruti lun wawinwandun ñein ani gayaraati násügürün saragu dan eseriwida lun Heowá. Wéirigüda lumutu wanigi warihin ida liña lan lóunigiruniwa Heowá dan le weseriwidun lun lidan aban fulasu le ñein lubéi mégeiwa hamá apurichihatiña” (Sal. 121:5). Ariñagatu Anna: “Masandigidina yebe aban ugundani ítarati. Ménrengunti wanügüni wabagari ani sügütina saragu dan luma nani weiriei ani buídutimahali wamadagua. Ani gíbetimahaña wamadagu. Masaminaruntiña gürigia wuriba hawagu Gefentiña ani arufudatiña busén hamá hafurendeiruni inarüni le tídanbei Bíbülia”. Ida liña harufuduni?

Ariñagatu Anna: “Aban weyu, aba napurichiha tun aban aturiahatu tidan luban furendei íñuti mágidurugu ani aba nariñagun tun nagiribuduba lan bisidoun. Dan le wadunragubei, barütu aban tumada túmagua. Dan le nidin luagu libiaman wéiyaasu, barütu fiu tumadagu. Lárigiñe, barütu hanwoun. Ani guenlé naturiahaña hama seingü hádangiñe”. Ariñagati Simone: “Hínsiñehabutiña gürigia ha únbaña wapurichiha ani adügatiña saragu álügüdahani. Arufudatiña busén hamá hasigirun afurendeira luagu uganu le wapurichihabei. Le linarün katei, madaanitiwa lun wetenirun houn súngubei”.

Ka san hadügübei fiu hádangiñe lubaragiñe háguyun Mianmarün? Abahüdaguatu Mizuho, aban íbiri haponna: “Nuguya luma Sachio, le nani weiriei, súnwandan  meha busén wamá woudin eseriwida lidan aban ageiraü ñein lubéi mégeiwa hamá apurichihatiña, gama lumoun, halíaba meha san woudin? Chülüti lubuidun burí sügǘ le abahüdawagúbei tidan líburu Anuario to lánina irumu 2013 tidoun wanigi. Ítara liña wagumeserun asaminara weseriwidun Mianmarü”. Ariñagati Sachio: “Aba werederun aban dimaasu Yangón, uburugu le súdinitimabei Mianmarü. Busentiwa meha warihini ageiraü lau wagu guánarügü. Adügati murusun dan le waubei ñein lun busén wamá wáguyun”.

Australiana Rodney tuma Jane, to lani weiriou, ani kei burí 50 irumu hau. Hagía úara hama bián hasaanigu, Jordan tuma Danica heseriwiduña Mianmarü lúmagiñe irumu 2010. Abahüdahati Rodney: “Hingí lumutu wanigi warihin megei hamá gürigia hasubudirun luagu Bungiu. Amuriahatina hama iduheñu lun háfaagun lun heseriwidun lidan aban ageiraü kei Mianmarü”. Ka uagu lariñagei? Ligía guánarügü ariñagubei: “Móubati abiniruni le weresibirubei luagu ya wamá. Saragu nibureintiña nidiheritiña luagu hagagamurun, hakarün, hawadigimari luma katei libe lira. Ánhañati wasaanigu, nidiheritiña lun hafurendeirun iseri dimurei lun hapurichihan. Busentiña hafurendeirun ayanuha hama gürigia ha ibidiñehabúbaña tun Bíbülia luma lun hóunabahan lidan adamuridaguni. Heteniruña lun katei le luma ámuya katei lidan háhuduragun lun Bungiu”.

Oliver, aban íbiri merigana ani 37 irumu lau. Afuranguagüda lumuti ka lan uagu línchaha amu lun háguyun lidoun amu ageiraü lun hídehan lidan eseriwiduni le: “Íderagua laadina saragu neseriwidun lun Heowá lidan aban fulasu bóugudin luéi le meha uágubei néchuda. Lau nawinwandun lidan amu fulasu adügati lun lederebugudun nafiñen luagu Heowá meberesenga ka lan uma nagagibudagua. Neseriwidun úara hama gürigia ha meha ibidiñebaña nun ani aban hafiñen kei au, íderagua laadina lun narihini ua lan ni kata súdiniti luéidügü Larúeihan Bungiu”. Ani aniheingua Oliver tuma Anna, to lani weiriou, apurichiha lau ubebeni houn gürigia ha ayanuhabaña cheiní.

Teseriwiduña aban íbiri australiana gíritu Trazel, to 52 irumu tau, Mianmarü lúmagiñe irumu 2004. Ariñagatu: “Ínchaha numutiña sun ha gayaraabei hadügüni lun heseriwidun lidan aban fulasu le ñein lubéi mégeiwa hamá apurichihatiña. Rúhadina fe biní lani Heowá háfaagun ha busenbaña heseriwidun lun. Masaminarungubeitina meha nawinwanduba lan ítara. Anihán ibagari le buídutimabei”.

Ayumahatiwa líderagubadün lan dimurei le hariñagubei íbirigu ha lun hakutihani anhein gayara lubéi híderaguniña gürigia ha harumabaña anigi ha awinwandubaña lidan fulasu le mapurichihougili. Ítara liña kamá hamuga hariñaguña íbirigu ha hun: “Higougu Mianmarü ani íderagua humawa!”.