Gudemehabu wamá houn sun hawuyeri gürigia
DAN le larufudahabei Hesusu houn lani disipulugu lun hapurichihani uganu buiti subudi lumuti meha mánharubaña lan sun gürigia lun uganu ligía (Luk. 10:3, 5, 6). Anihein dan, daritiwa gürigia ha óuserubaliwa wuriba lidan wani ministeriu o ha furundetiña. Subudi wamuti adüga lan katei le lun hénrengu lan woun lun gudemehabuméme wamá houn gürigia.
Gürigia le gudemehabubei ariha lumuti le hemegeirubei amu luma haturóbulin ani busenti líderaguniña. Anhein marufudun wabéi gudemehabu houn amu eferidireina wabéi ubebeni le warufudubei lidan wani ministeriu ani mabuidun halime ligaburi wapurichihan. Ánhawati áfaagua lun gudemehabu wamá meferidirun wabéi ubebeni ligía. Ítara luba kei hamuga wínchaguni watu luéi léñeguchun (1 Tes. 5:19).
Ida luba gudemehabu wamá íbini dan le hénrengu lan woun wadügüni? Wakutihaba ǘrüwa hénpulu le gayaraabei wafalaruni: lani Heowá, Hesusu luma apostolu Pábulu.
ÁYEIHA WAMÉI LUGUDEMEHABU HEOWÁ
Awandaali Heowá luagu saragu milu irumu layanuhóun iyeeni luagu. Lau sun lira, “fuleseihabúti giñe houn ha meteingiradibaña luma houn ha wuribabaña” (Luk. 6:35). Ani arufuda lumuti katei le lau gaguraasun lan. Busenti “lun hasalbarun sun gürigia” (1 Tim. 2:3, 4). Íbini iyereegu lan wuribani lun, gebegitiña gürigia lun ani mabusenrunti lun leferidiruni ni aban libagari (2 Fe. 3:9).
Subudi lumuti Heowá daruguaali lan Satanási lau hasaminan ha mafiñenbaña (2 Ko. 4:3, 4). Arufudahóuaali iyeeni houn saragu gürigia luagu Bungiu lúmagiñe hañüraü. Ligíati, adügati ligaburi hasaminarun luma le hasandirubei lun hénrengu lan houn hánharun lun inarüni le tídangiñeti Bíbülia. Lau sun lira, busenti Heowá líderaguniña. Ida liña wasubudiruni?
Ariha waméi le asuseredubei houn níniwena. Lau sun meha furunde hamá, ariñagati Heowá lun Honasi: “Lúntimati gudemehabu nan lun Níniwe, óunwenbu uburugu le ñein habéi sügǘ hau san-wein-milu irahüñü ha machuugili hau” (Hon. 4:11). Aba líchugun Heowá fe ibidiñe lan meha Heowá houn níniwena. Ligía larufudunbei gudemehabu houn, óunahalei Honasi eweridiraña luagu le lasaminarubei ladügün.
Ítara kei Heowá, gebegitiña giñe gürigia woun. Gayaraati wáyeihani tau sun wanigi anhein busén wabéi wíderaguniña ha aganbubalin uganu le wapurichihabei íbini genege lan mánharubaña lan lun inarüni.
ÁYEIHA WAMÉI LUGUDEMEHABU HESUSU
Ítara kei Lúguchi, gudemehabuti meha Hesusu houn gürigia ha meha mégeibaña ídemuei lidan hamadagua luma Bungiu. “Dan larihiniña gürigia, aba hagudemedagun lun, ladüga nidiheri hamá, maguraasun hagía, kamá mudún ha móuniritiña” (Mat. 9:36). Subudi lumuti meha Hesusu kátima lan hemegeirubei gürigia. Subudi lumuti meha wuriba lan hóuseruniña lábutigu relihión gürigia ha ñǘdünbaña aganbei ani arufudahaaña meha iyeeni houn. Lau sun subudi lani hígiruba lan saragu hádangiñe lun ladügün lénrengunga lun mafalarun hamani, aba “larufudahan saragu katei houn” (Mar. 4:1-9).
Meferidira waméi waguraasun anhein maha lubéi gürigia laganbuniwa dan le wapurichihan lun furumiñe wéiyaasu
Sánsiti le gádanbaliña gürigia, gayaraati giñe lasansiruni ligaburi hóunabun lun inarüni
Dan le maha hamá gürigia haganbuni uganu le wapurichihabei lunti masaminarun wamá wuriba hawagu ani lunti wálügüdagun woungua ka lan uagu hóunaba ítara. Gayaraati añahein lan hádangiñe máhatiña lun le tariñagubei Bíbülia o lun le harufudahabei kristiánugu ladüga luriban hóuserun ha ariñagubaña kristiánugu hamá. Másiñati añahein lan amu ha ayanuhóuali iyeeni houn luagu wafiñen. Ani másiñati añahein lan ha giñe hanufudebaña lun haganbuniwa luéi hadügün habesinanigu o haduheñu bula hau.
Añahein híbiri, máhatiña haganbuniwa másiñati ladüga gasügürühaña lan lidan habagari ani adügati katei le lun hasufurirun. Ariñagatu aban íbiri misionera gíritu Kim: “Lidan fulasu le ñein lubéi wapurichiha, saragu gürigia ha ñéinbaña súfurihaña ladüga wuribu ani féridi hamuti sun hámati. Memenigitiña lubá ámuñegü. Gáñitiña ani machourutiña hawagu amu. Liibe-agei dan, daritiwa gürigia ha máhatiña lun uganu le wapurichihabei. Lidan aban ókaasion, agayuahatiña nuagu dan le napurichihaña lan”.
Ka tadügübei Kim lun tarufudun gudemehabu? Ariñagatu: “Dan le wuriba lan hóuserunina gürigia, áfaaguatina naritaguni le ariñawagúbei lidan Ariñawagúni 19:11: ‘Ragüguaü unguaü luéi agañiduni ligía lubuidunbei ichügü’. Íderagua lumutina gabaroun nani le gádanbaliña gürigia ha lun gudemehabu nan houn. Ani mama sun gürigia óusera hamutiwa wuriba. Lídanmeme fulasu ligía, añahein gürigia ha aganbubaliwa ani wabisidahañanu”.
Gayaraati giñe wálügüdagun woungua ida luba lan hamuga wóunabun lun uganu luáguti Larúeihan Bungiu lun hamuga lídanñadina lan habara gürigia ha lídanbaña fulasu le ñein lubéi wapurichiha. Kei hénpulu, lun hamuga ariñawagúaali lan iyeeni woun hawagu gefentiña luagu Heowá lóugiñe aban wéiyaasu másiñati wuribabei lan hamuga weresibiruniña ani mégeibadiwa hamuga giñe lun larufudún gudemehabu woun. Línchahabadiwa waritaguni lugumadin Hesusu libügürü wóuseruniña amu kei aubei wabusenra lun hóuseruniwa lun gudemehabu wamá íbini dan le hénrengu lan woun (Mat. 7:12).
ÁYEIHA WAMÉI LUGUDEMEHABU PÁBULU
Gudemehabuti meha Pábulu íbini hama ha óuserubalin wuriba. Ka uagu? Ladüga haritagua lumuti ida liña lan meha ligaburi lubaragiñe lasubudiruni inarüni. Lau sun meha adimureha lan wuriba luagu Hesusu, anabalaña kristiánugu ani éibaahalaña, ariñagati: “Aba nagudemedun lun Bungiu lugundun mámagidina meha afiñeti luagu Hesukrístu ani ibidiñeti meha nun ka lan nadügübei” (1 Tim. 1:13). Subudi lumuti meha arufudaali lan Heowá luma Hesusu gudemehabu lun. Másiñati ariha lani le meha ligaburibei hadan gürigia ha únbaña lapurichiha.
Anihein meha dan, dariti Pábulu gürigia ha güraguñubei afiñeni mama inarüniti tidan hanigi. Ida liña meha lóunabun lidan kesi burí le? Ariñawagúati lidan Adügaü 17:16 dan le lan lídinbei luagu aban dan Atenasi, “mederaguagüdünti laritagun lau larihini uburugu ligía buin hau bürübünu guáriua”. Yusu lumuti katei le agañidagüdübalin lun gayara lan lapurichihan (Adü. 17:22, 23). Sansi lumuti Pábulu ligaburi lapurichihan según hagaburi gürigia lun ladügüni sun liyaraati lun lesefurun íbini fiu hádangiñe (1 Ko. 9:20-23).
Gayaraati wadügüni le meha ladügübei Pábulu dan le wadarirun gürigia ha máhatiña lun le wapurichihabei o afiñetiña luagu le mámabei inarüniti. Yusu waméi le wasubudirubei hawagu gürigia lun wíderaguniña asubudirei “uganu buiti” luáguti aban katei le buídutimabei (Isa. 52:7). Ariñagatu aban íbiri gíritu Dorothy: “Arufudahóuaali houn saragu gürigia lidan fulasu le ñein lubéi wapurichiha aguseragüda lumutiwa lan Bungiu lau igañi. Ariñagatina houn gürigia ha buidu lan afiñe hamá luagu Bungiu tau sun hanigi, lárigiñe, aba narufuduni houn le tariñagubei Bíbülia luagu línsiñehabu Heowá luma le füramase laalibei lubá ámuñegü”.
“GÁÑEIBEI WURIBANI LAU BUITI”
Éibutima layarafadun lagumuchagüle “lagumuhóun dan” le “haribadatimaba” gürigia ha únbaña wapurichiha (2 Tim. 3:1, 13). Lau sun lira, moun lumuti wígirun lun ladügün katei le lun weferidiruni wagudemehabu ni wagundan. Ru lumuti Heowá erei woun lun wasigirun agañeirei “wuribani lau buiti” (Rom. 12:21). Ariñagatu aban prekursora gíritu Jessica: “Liibe-agei dan, daritina gürigia pántatiña ha mínsiñetiwa houn mínsiñe ligía uganu le wapurichihabei houn. Gayaraati ladügün katei le lun wagañidun. Dan le nagumeserun ayanuha luma aban gürigia, amuriahatina luma Heowá lun líderagunina arihei gürigia ligía kei aubei larihei. Ítara, metenitina saragu lun le nasandirubei ani aba nasaminarun ida luba lan níderaguni”.
Sigitiwa áluahaña ha busenbaña hadariruni inarüni
Lau lásügürün dan, añaheinbaña ánharutiña lun áfaaguni le wadügübei lun wíderaguniña asubudirei Heowá
Lunti giñe wasaminarun luagu ida luba lan wíchugun gurasu houn íbirigu ha úmabaña wapurichiha. Ariñagatu Jessica: “Anhein wuriba lubéi lidin lun aban wádangiñe, áfaaguatina lun masaminarun nan saragu luagu le asuseredubei. Aba nasansiruni yanu ani áfaaguatina lun nayanuhan luagu katei buiti, kei burí buiti le ladügübei apurichihani íbini añahein lan gürigia wuribati hóuseruniwa”.
Subudi lumuti Heowá buidu ka lan lénrengunga úmabei wagagibudagua lidan apurichihani ani chóuruti gunda lan dan le gudemehabu wamá ítara kei ligía (Luk. 6:36). Lau sun lira, marufudunbei Bungiu gudemehabu lun súnwandan. Gayaraati wachoururuni subudi lumuti lan dan le buídutimabei lun lagumuchun lau ubóu le. Lidan awanhagua lan agurabaha, mosu wapurichihan súnwandan (2 Tim. 4:2). Ligíati, sigí wamá apurichiha lau ubebeni, gudemehabu wagíame houn sun hawuyeri gürigia.
