1. Ka uagu gayara lubéi lariñagun Heowá lani lan sun katei? (Ariha humoun iyawaü to lídanboun lagumeseha arütíkulu).

LANI Heowá sun katei: “sielu, luma sun liñun-agei sielu, ubóu, luma sun le lídanbei” (2 Lur. 10:14; Aruf. 4:11). Ani kei ligía lan adügübaliña gürigia, yúutiña giñe lun (Sal. 100:3). Lau sun lira, lidan sun dan le sügühalibei, anúadiraali Heowá gürigia lun lánigu hamá lidan aban igaburi espechaliti.

2. Kátaña san gürigia ha uágubaña tariñaga Bíbülia lánigu hamá Heowá lidan aban igaburi espechaliti?

² Kei hénpulu, ariñawagúati lidan Sálumu 135 lánigu lan meha Bungiu lubúeingu úaraguatiña ha lánina binadu Ísüraeli (Sal. 135:4). Ani ariñagati Oseasi lidan aban profesía ñéinbaña lan fiu gürigia ha mama ísüraelina hadan lumutuniña Heowá (Ose. 2:23). Gúnfuliti profesía le dan le lagumeserunbei Bungiu anúadiraña ha mámabaña huríu lun giñe hádangiñe hamá ha lúnbaña harúeihan luma Hesusu sielu (Adü. 10:45; Rom. 9:23-26). Wáwati houn gürigia ha, ha anúadirubaña lau sífiri sandu “aban rasa anuadahóuatiña”, “lumutuniña Bungiu” (1 Fe. 2:9, 10). Ariha lumutiña giñe Heowá kristiánugu úaraguatiña ha lánina wadaani, ha hemenigibaña hawinwandun Ubouagu keisi lumutuniña (Isa. 65:22).

3. a) Kátaña gamadaguabaña luma Heowá lidan aban igaburi espechaliti uguñe weyu? b) Kaba wakutiha lidan arütíkulu le?

 ³ Uguñe weyu, ha hemenigibaña houdin sielu, ha míbebaña, hama ha hemenigibaña hawinwandun Ubouagu, “amu mudún”, biángubei hagía hádangiñetiña “aban fárüga” ha eseriwidubaña úara lun Heowá (Luk. 12:32; Huan 10:16). Chóuruti busén wamá warufuduni weteingiradi lun Bungiu luagu líchuguni chansi woun lun lumadagu wamá. Lidan arütíkulu le, wakutihaba ámuñegueinarügü igaburi lun warufudun eteingiruni luagu lubuidun chansi le.

4. a) Ka san ábanbei lídangiñe igaburi le ídanbei gayara lan warufuduni weteingiradi lun Heowá luagu lumadagu wamá? b) Ida liña ladügün Hesusu aban katei ítarati?

⁴ Wederegeruni wabagari lun Heowá tau sun wanigi ligía aban igaburi lun warufuduni weteingiradi lun. Dan le wabadiseirun, aba warufudun hagibugiñe súngubei lánigu wamá Heowá ani aranseñu waña lan lun gaganbadi wamá lun (Ebü. 12:9). Genegeguati katei le luma le ladügübei Hesusu dan le labadiseirunbei ladüga ítara liña kei hamuga lariñaguña lan lun Lúguchi: “Hínsiñeti nun lun nadügüni bugundan, barǘ numuti barufudahan tidan nanigi!” (Sal. 40:7, 8). Aba larufudagun lungua lun ladügüni lugundan Bungiu lau sun lúmagiñe lan lágurahoun lídangiñeti lan aban néchani le deregeguaalibei lungua lun Heowá.

5, 6. a) Ida liña meha lasandiragun Heowá lungua dan le labadiserunbei Hesusu? b) Abahüdaha humá aban hénpulu le arufudubalin ida liña lan lasandiragun Heowá lungua dan le wederegeragun woungua lun.

⁵ Ida liña lasandiragun Heowá lungua dan le labadiserunbei Hesusu? Ariñagatu Bíbülia: “Lárigiñe labadiseirún Hesusu, aba láfuridun dúnarugugiñe. Sódini aba lánhunrenchagun sielu, aba larihini Hesusu [s]ífiri [s]andu lararirun kamá aban unhun liabin luagun. Aba laganbún lariñagun aban umalali siélugiñe: ‘Anihán niráü le hínsiñebei nun, le aubei óunwenbu lan nugundan’” (Mat. 3:16, 17). Lau sun seriwihali lan meha Hesusu lun Heowá, gúndaati meha Heowá lau larihin aranseñu liña lan Liráü lun leseriwidun lun. Ítarameme, gúndaati Heowá lau wederegeragun woungua lun ani biní lumutiwa luagu wadügüni (Sal. 149:4).

⁶ Ariha wamá aban hénpulu le lunbei líderaguniwa gunfurandei buidu ida liña lan lasandiragun Heowá lungua dan le wederegeragun woungua lun. Samina wamá aba lan líchugun aban úguchili lídangiñe leigin le semeeti tun liráü. Lárigiñe, aba giñe tíchugun irahü lídangiñe éigini ligía lun. Lau sun leigin lan buga úguchili éigini ligía, gúndaati lau tíchugun liráü lídangiñe teigin lun lun tarufuduni tínsiñehabu lun. Chóuruti lidan lan lisaminan, semeetimati éigini le tíchugubei liráü lun. Ítarameme, wéiriti giñe lugundan Heowá dan le wederegeruni wabagari lun (Afu. 34:14).

7. Ida liña líderaguniwa le lariñagubei Malakíasi lun gunfuranda wamani le lasandirubei Heowá hawagu ha eseriwidubaña lun tau sun hanigi?

⁷ (Aliiha huméi Malakíasi 3:16). Ha mederegerun hamagili habagari lun Heowá mabadiseirun hagía lunti hasaminarun luagu lisudinin ladügǘniwa katei le. Inarüni lúmagiñe turageirugu haadiwa wáguchu lanihadiwa Heowá, ítara kei ha híbiri gürigia. Lau sun lira, samina wamá luagu lueirin ugundani le lasandirubei dan le warufuduni ligía lan Warúeitebei ani ligía lan lébunabei wederegeruni wabagari lun luma wadügüni lugundan (Ari. 23:15). Subudi lumutiña ha eseriwidubaña lun tau sun hanigi ani bürǘ lumuti hiri tidan liliburun “to ídanboun laritawagúa hawagu”.

8, 9. Ka lamuriahabei Heowá hámagiñe ha bürüwaalibei hiri tidan liliburun?

 ⁸ Barüti fiu buligasion labürüdǘniwa wiri tidan liliburun Heowá. Ariñagati Malakíasi lunti lan inebe lan Bungiu woun ráramagua wagíame asaminara luagu liri. Ánhawa áhuduragua lun somu katei o lun somu bungiu le mama Heowá, lagidarubei wiri tídangiñe liliburun (Afu. 32:33; Sal. 69:28).

⁹ Ligíati, dan le wederegeragun woungua lun Heowá mámarügü warufuduña wadügübei lan lugundan ani badisei wagíame. Ábanrügüñein wéiyaasu wederegeragun woungua lun Heowá badisei wagía, ani lau lóufudagun aba lerederun katei le árigi. Ánheinti dan le woudin luéigiñe lóubadina Heowá seriwi wagía lun warufuduña lau le wadügübei sagü weyu gaganbadi wamá lun (1 Fe. 4:1, 2).

10. Ida luba furangu lan larihín kátaña lan eseriwidubaña lun Bungiu hamoun ha meseriwidunbaña lun?

¹⁰ Lidan arütíkulu le lubaragiñebei le, aturiahatiwa luagu abahüdaguni luagu Kaín, Salomón luma hawagu ísüraelina. Sun hagía ariñagatiña meha hudugua hamá lun Bungiu, gama lumoun, míchugun hamuti áhuduraguni le yuubei lun. Afuranguagüda lumuti hénpulu le ha lan ñǘdünbaña luéigiñe lóubadina Heowá lunti hidin luéigiñe lóubadina irichaü luma lun hamahadun lun wuribani (Rom. 12:9). Lárigiñe layanuhan Malakíasi tuagu liliburun Heowá, ayanuhati Heowá luagu gürigia “le buídubei lumoun le wuribabei, le áhuduragubei lun Bungiu lumoun le máhuduragunbei lun” (Mal. 3:18).

11. Ka uagu lunti lubéi furangu lan harihini amu weseriwiduña lan lun Heowá?

¹¹ Ábanya igaburi le ídanbei gayara lan warufuduni weteingiradi lun Heowá luagu lubúeingu wamá lau warufuduni houn amu derebuguhali lan wafiñen (1 Tim. 4:15; Mat. 5:16). Álügüdagua wamá woungua: “Ariha hamuti san amu gürigia úaragua nan lun Bungiu tau sun nanigi? Áluahatina san chansi lun nasubudiragüdüni houn amu aban nan hádangiñe gefentiña luagu Heowá?”. Hírubei hamuga Bungiu saragu lun hamuga hásuhan ha lanúadirubaña keisi lumutuniña lun hariñagun houn amu lánigu hamá (Sal. 119:46; aliiha huméi Márükosu 8:38).

12, 13. Ka uagu hénrengu lubéi hasubudiruniwa fiu hádangiñe Gefentiña kei lubúeingu Heowá?

 ¹² Híruti añahein lan Gefentiña ha áyeihabalin “sífiri le lánina ubóu” ani ligía marihín lubéi furangu amu hamá hawéi ha meseriwidunbaña lun Bungiu (1 Ko. 2:12). Ha burí gagaburibalin ligaburi ubóu lúntima ‘lagübüri haritagun’ hetenira (Efe. 2:3). Kei hénpulu, lau sun rúaali lan saragu eweridihani libügürü ligaburi wadaüragun, añahein hádangiñe aba haranseragun houngua kei ligaburi haranseragun ubouaguna houngua. Dáütiña daüguaü murutu ani to arufudubalin sun hamegegun, íbini dan le houdin adamuridagua. Añahein amu, ámuti hasarúniwa o hanarimeguti harouragúniwa (1 Tim. 2:9, 10). Ligíati, dan le hama hamá amu gürigia hénrenguti lasubudirúniwa kátaña lan lumadagubaña Heowá lumoun kátañanu lan lánigubaña ubóu (Sant. 4:4).

¹³ Añahein Gefentiña arufuda hamuti lidan amu igaburi mígirun hamagili lan igaburi ubouaguna sunsuinagubei. Kei hénpulu, dan le houdin lidan fedu abinahatiña ani óuseratiña lidan aban igaburi le mama hagaburi kristiánugu. Aban burí híchugun iyawaü lidan páhina ñein lubéi hadügǘwa umadagu ani abürüha hagía katei le marufudunti kristiánugu hamá. Másiñati mererehóungili lan houn lidan damuriguaü luagu aban figóu wéiriti, gama lumoun, mabuidunti lun gamadagua hamá íbirigu ha áfaagubaña lun haruma lan habagari hama hibe umadagu ha (aliiha huméi 1 Féduru 2:11, 12).

14. Ka lunbei wadügüni lun wóunigiruni lubuidun wamadagua luma Heowá?

¹⁴ Áfaaguati ubóu lun hafalaruni gürigia “luriban hayumahan [...], háfaagun lun habihini katei le harihibei luma pantaü luagu irisini” (1 Huan 2:16). Gama lumoun, lánigu Heowá wagía ani ligía lariñagubei woun lun wamahadun lun “wuribani luma igaburi lánina ubóu, lun wabagaridun aban ibagari le buiti lidan dan le” (Titu 2:12). Sun le wadügübei lidan wabagari —dandu ligaburi wayanuhan, weigin, watun, wadaüragun, ligaburi waranseragun woungua kei ligaburi wawadigimaridun— lunti larufuduni houn ha aríagubaliwa lúnrügüñein lan Heowá weseriwida (aliiha huméi 1 Korintuna 10:31, 32).

15. Ka uagu lunti lubéi wóuseruniña wábirigu buidu arufuda wagíame ínsiñehabuni houn?

¹⁵ Arihúati seremei wamani Heowá luagu umadagu espechaliti le dan le wóuseruniña wíbirigu buidu. Lánigu giñe Bungiu hagía. Ánhawa aritagua luagu katei le súnwandan, meredebei warufudun ínsiñehabuni houn ani buídubei wóuseruniña (1 Tes. 5:15). Ariñagati Hesusu houn lani disipulugu: “Anhaün hínsiñegua húmagua, hasubudirubei sun gürigia luagu nani humá disipulugu” (Huan 13:35).

16. Ka hénpulu asagarúbei lídangiñe lilurudun Moisesi arufudahabalin woun le lasandirubei Heowá hawagu lubúeingu?

¹⁶ Ariha wamá aban hénpulu le lunbei líderaguniwa gunfurandei ida luba lan wóuseragun woungua lidan damuriguaü. Deregewañu liña meha o direiwaañu liña meha umegeguni le tídanbei litenpulun Heowá lun layusurún lidan áhuduraguni inarüniti. Ariñaga lumuti meha lúrudu le ichugúbei lun Moisesi ida luba lan lounigirún umegeguni le ani lunti meha hafarún ha mafalarunbalin lúrudu ligía hilagubei (1 Lur. 1:50, 51). Anhein óunigira lubalin meha Heowá umegeguni le ayusurúbei lidan láhudurawagun lun gúbume lubúeingu úaraguatiña ha deregeguaañabaña houngua lun! Lidan aban ókaasion, ariñagati Heowá houn lumutuniña: “Furumiñeguarügü le aguuruti hawagu numutuniña, laguuruñein lila nagu” (Sak. 2:8).

17. Ka burí katei unbei letenira Heowá?

¹⁷ Súdiniti ariñaga lan Malakíasi teni lan Heowá houn lubúeingu dan le hásügürün dan hámagua ani aganba lumutiña lan (Mal. 3:16). Chóuruti ‘subudi lumutiña lan Bungiu lánigu’ (2 Tim. 2:19). Bereseti saragu lau sun le wariñagubei luma le wadügübei (Ebü. 4:13). Subudi lumuti Heowá dan le mabuidun lan wóuseruniña wíbirigu. Gama lumoun, gayaraati giñe wachoururuni ariha lumuti lan dan le feruduna wamaniña wíbirigu, dan le weresibiruniña buidu, dan le gíchigadi wamá houn luma dan le buidu lan wóuseruniña (Ebü. 13:16; 1 Fe. 4:8, 9).

18. Ida liña weteingiruni Heowá luagu líchuguni lubuidun chansi woun lun lumutuniña wamá?

¹⁸ Chóuruti busén wamá warufuduni weteingiradi lun Heowá luagu líchuguni lubuidun chansi woun lun lumutuniña wamá. Subudi wamuti anúadira wamuti lan katei le buídutimabei dan le wederegerunbalin wabagari lun. Lau sun wawinwanduña lan “haganagua gürigia wuribatiña ani salufuritiña” mabusenruntiwa lun hadarirun wadurun, “ni mégeiti” wawagu, busentiwa warugoungadagun haganagua “kei waruguma ubouagu” (Fil. 2:15). Dísetiwa luéi wuribani (Sant. 4:7). Hínsiñetiña giñe wíbirigu woun ani inebetiña woun ladüga subudi wamuti lánigu hamá giñe Heowá (Rom. 12:10).

19. Ka afayeiruahaü líchugubei Heowá houn lánigu?

¹⁹ Füramasetu Bíbülia woun: “Mágurun lubaña Aburemei lumutuniña” (Sal. 94:14). Chóuruti lagunfuliruba lan füramasei le meberesenga kaba lan asusereda. Ni óunweni siñabei lafareinraguagüdüniwa luéi línsiñehabu Bungiu (Rom. 8:38, 39). “Ánhawa abagarida, wabagariduña lun wadügüni lugundan Bungiu; ánhawa ounwe, wóunweña según lugundan Bungiu. Ítara liña lubeiti, dandu lidan ibagari keisi lidan óunweni, lani [Heowá] wagía” (Rom. 14:8). Memeniha wanigi lachülürün weyu lun láguyuguagüdüniña Heowá lubúeingu ha úaraguabaña (Mat. 22:32). Íbini guentó, gúndaatiwa lau saragu abiniruni le wibihibei. Kei aubei tariñagei Bíbülia, “fuleseiwatiña néchani ha [Heowábei] Habungiute, gürigia ha anúadira láañabaña kei lánigu” (Sal. 33:12).