1, 2. a) Ka uagu ibiha wabéi gurasu hámagiñe ha apurichihabaña lau úaraguni lidan burí fulasu le ñein lubéi maha hamá hiibe-agei gürigia haganbuniwa? (Ariha humoun iyawaü to lídanboun lagumeseha arütíkulu). b) Ka lariñagubei Hesusu luagu lapurichiha lidan lageira? (Ariha huméi abürüdǘni).

SERGIO TUMA OLINDA aban feru maríeitiña prekursorugu, ha barühaña lóugiñe 80 irumu ani Meriga hawinwanda. Kei gari garihali lubéi hagachürügü, hénrenguti houn lun héibugun. Íbini ítara, lada ǘn sedü binaafin, éibugatiña lidoun aban párüke le uburugubei, ñéingiñe lubéi hásügüra saragu gürigia. Aba hafidiragun houngua lubadu fulasu le ñein lubéi tararama busu ani aba hapurichihan houn ha ásügürübaña. Barühaña saragu irumu adügei lira. Besafu hádangiñe gürigia, meberesegúntiña hau, lau sun lira, redeimémetiña ñein, áhayacha hawagun sun ha arihibaña hawagun. Dan le amidihali, aba hagiribudun hamarugueina hábiñoun. Larugan binaafin, ábaya hagiribudun. Apurichiha hamuti íbirigu ha uganu luáguti Larúeihan Bungiu sisi weyu lidan dimaasu lidan ligiaméme fulasu lidan sun irumu.

² Ítara kei Sergio tuma Olinda, barühaña saragu íbirigu úaraguatiña ha lídangiñetiña sun ubóu saragu irumu awinwanda lidan burí fulasu  le ñein lubéi maha hamá hiibe-agei gürigia haganbuniwa. Anhein ligiaméme lubéi asuseredubei hun, gúndaatiwa lau sigí humá awanda. * Ruti hani hénpulu gurasu houn amu lubúeingu Bungiu, íbini ha barühañabaña saragu irumu eseriwida lun Heowá. Ariha huméi san le hariñagubei fiu óunigirutiña sirkuitu: “Dan le napurichihan hama íbirigu úaraguatiña ha, derebugüda lumuti nafiñen”, “adügati úaraguni le harufudubei lun nawandun luma lun napurichihan lau ganigi” ani “chülüti sun le hadügübei tidoun nanigi”.

3. Kaba ǘrüwa álügüdahani wakutiha, ani ka uagu?

³ Lidan arütíkulu le, wakutihaba ǘrüwa álügüdahani: Ka gayaraabei ladügün lun lábürühan warüna? Ida luba walubahan katei buiti? Kaba íderaguawa lun wasigirun alubaha katei buiti ani awanda wagíame lidan wani ministeriu? Línchahabadiwa óunabagülei lun wagumuchuni dasi le líchugubei Hesusu woun lun wadügüni.

4. a) Ida liña lasandiragun Pábulu lungua lau ligaburi hóunabun huríu lun uganu le lapurichihabei? b) Ka uagu lasandiragua lungua ítara?

⁴ Dan le wapurichihan lidan aban fulasu le ñein lubéi maha hamá hiibe-agei gürigia haganbuniwa gayaraati ladügün le lun lábürühan warüna. Anhein susereeli lubéi le hun, chóuruti gunfuranda humani le meha lasandirubei Pábulu. Lidan lani ministeriu, le adurarubei kéiburi darandi irumu, íderaguati saragu gürigia lun hadügagun houngua lánime Kristu disipulugu (Adü. 14:21; 2 Kor. 3:2, 3). Lau sun lira, mibihinti lun hadügagun saragu huríu houngua kristiánume. Hiibe-agei hádangiñe, mánharutiña lun uganu le lapurichihabei Pábulu darí lun héibaahani fiu hádangiñe (Adü 14:19; 17:1, 4, 5, 13). Ida liña ladügün katei le lun lasandiragun Pábulu lungua? Ariñagati: “Inarüni le lunbei nariñaguni guentó, au keisi aban afiñeti luagu Kristu [...] wéiriti nirun, ani súnwandan anihein lan gáriti tidan nanigi” (Rom. 9:1-3). Ka uagu lasandiragua Pábulu lungua ítara? Ladüga hínsiñe lan meha apurichihani lun ani hínsiñe hagía gürigia lun. Bereseti meha saragu hawagu huríu, ligía gari lubéi meha lun larihin hamaharun lun lugudemehabu Bungiu.

5. a) Ka ínchahabaliwa lun wapurichihan? b) Ka uagu anihein lubéi dan sandiguatiwa woungua lau maguraasuni?

⁵ Ítara kei Pábulu, apurichihatiwa houn gürigia ladüga berese wamá hau tau sun wanigi (Mat. 22:39; 1 Kor. 11:1). Subudi wamuti weseriwidun lan lun Heowá ligía lan katei buídutimati le gayaraabei wadügüni lidan wabagari. Ligía katei le wabusenrubei lun hamuga hasubudiruni gürigia ha awinwandubaña lidan fulasu le ñein lubéi wapurichiha. Ligíati, meredehan wamuti wapurichihan houn luagu inarüni luáguti Heowá luma lisuuni lun ubóu. Ítara liña uganu le kei aban idewesei le wanügübei houn gürigia ani le wabusenrubei lun hánharun lun. Ligíati, ítara kei lasuseredun lun Pábulu, gáriti woun dan le hamahadun lun heresibiruni uganu ligía. Kati uagu wasandiragua woungua ítara? Mama hamugatia ladüga lougua lan wafiñen, sandiguatiwa woungua ítara ladüga hínsiñe lan apurichihani woun ani hínsiñe hagía gürigia woun. Ligía meredehan wabalin wapurichihan, íbini dan le wasandiragun woungua lau maguraasuni. Ariñagatu aban íbiri gíritu Elena, to barüharüboun 25 irumu eseriwida kei prekursora: “Gagibuguatina luma saragu lénrengunga lidan apurichihani. Gama lumoun, subudi numuti ua lan amu dasi buídutimati sügǘ luéi le”. Ma sandiguatiwa woungua ítara kei íbiri to?

6. Kaba álügüdahani wakutiha?

⁶ Ka uagu gayara lubéi wachoururuni meberesenga lan fulasu le ñein lubéi wapurichiha gayara lan walubahan katei buiti? Lun wóunabuni álügüdahani súdiniti le, akutiha waméi bián  hénpulu le uágubei layanuha Hesusu libügürü mosu lan walubahan katei buiti (Mat. 13:23). Le furumiñeti hénpulu ayanuhati luagu tídibu aban beibei.

7. a) Ka mini lubéi ábunaguti nadü, beibei luma limu? b) Ka álügüdahani lunbei wóunabuni?

⁷ (Aliiha huméi Huan 15:1-5, 8). Afuranguagüda lumuti Hesusu ligía lan “beibei le tímatimaatibei”, Lúguchi lan ábunaguti nadü, ani lani disipulugu hagía lan limubei. Lárigiñe, ariñagati houn lani apostolugu: “Ibihati Núguchi uéiriguni dan le gibe lan hin, ani lau lira arufuda humuti luagu nánigu humá disipulu ha tímatimaatiña”. * Ligíati, ka mini lubéi lun walubahan katei buiti? Lidan abahüdaguni le, mafuranguagüdün lumuti Hesusu ka lan mini lubéi in, gama lumoun, ruti ariñahani súdiniti le lunbei líderaguniwa asubudirei.

8. a) Ka uagu subudi wabalin dan le lariñawagún lidan hénpulu le lunti lan walubahan katei buiti mama lan layanuhaña luagu wadügün disipulugu? b) Ida liña larufuduni Heowá ligaburi lau le lamuriahanbei wámagiñe?

⁸ Ariñagati Hesusu luagu Lúguchi: “Chaün lumuti sun limu le minti”. Lidan amu dimurei, lun gayara lan larihiniwa Heowá keisi lubúeingu, lunti walubahan katei buiti (Mat. 13:23; 21:43). Ligíati, dan le lariñawagún lidan hénpulu le lunti lan walubahan katei buiti mama layanuhaña luagu wadügün disipulugu (Mat. 28:19). Ka uagu? Ladüga anhein hamuga ítara liña lubéi, lariñawagúña hamuga ítara hamá íbirigu úaraguatiña ha apurichihatiña lidan fulasu le ñein lubéi maha hamá hiibe-agei gürigia haganbuniwa keisi limu meseriwidunti le uágubei layanuha Hesusu. Gama lumoun, mítaranti ladüga siñati wafosuruniña gürigia lun hánharun lun uganu le wapurichihabei. Hínsiñetiwa lun Heowá ani maweiyasunbei hamuga amahada woun ladügarügü siñá lan wadügün somu katei. Mamuriahanti katei wama le siñá wabéi adüga (2 Lur. 30:11-14).

9. a) Ka dasi lunbei wadügüni lun gayara lan walubahan katei buiti? b) Kaba abahüdaguni wakutiha, ani ka uagu?

⁹ Ligíati, katei san katei buiti le lunbei walubahani? Chóuruti layanuhaña lan luagu aban katei le gayara wabéi adüga. Ani ka dasi ru laalibei Heowá woun lun wadügüni? Wapurichihani uganu buiti luáguti Larúeihan (Mat. 24:14). * Chóurugüda lumuti katei le abahüdaguni luáguti ábunaguti le uágubei layanuha Hesusu. Akutiha waméi abahüdaguni le.

10. a) Ka mini lubéi ilaü luma múa lidan abahüdaguni luáguti ábunaguti? b) Ida liña san lin türigu?

¹⁰ (Aliiha huméi Lúkasi 8:5-8, 11-15). Lidan abahüdaguni luáguti ábunaguti, “lererun Bungiu” o uganu buiti luáguti Larúeihan Bungiu mini lubéi lila nadü. Hanigi gürigia mini lubéi múa. Ilaü le abürühabei lidoun múa buiti aba labouchun, aba gálagüle lan ani ábanhali iseri nadü, kei hamuga aban lídibu türigu. Lárigiñe, aba líchugun kada ilaü san aguu. Gama lumoun, ida liña san lin türigu? Nadü san le ñǘraütimati? Uá, iseri ilaü líchugubei, ani lau lásügürün dan aba ábanhali lan iseri nadü. Lidan abahüdaguni le, ruti kada ilaü san aguu. Ida liña genegegua lan le luma wani ministeriu?

11. a) Ka idan genegegua lan abahüdaguni luáguti ábunaguti luma wani ministeriu? b) Ida liña wábunaguni ilaü lánina inarüni?

¹¹ Samina wamá luagu lan meha aban dan aba harufudahani wagübürigu inarüni woun o aban íbiri. Ma hagundan dan le harihinbei anha wamá lun uganu luáguti Larúeihan Bungiu. Gayaraati lariñawagún bunagua hamuti lan ilaü lidan múa buiti. Aba labouchun ilaü ani aba laweiridun darí lun lagindun. Ani ítara kei mama lan iseri nadü líchugubei aban nadü, iseri ilaü líchugubei, ítarameme liña wadagimanu le wadügübei, bunagua wamuti ilaü lánina inarüni tidan hanigi gürigia, gama lumoun, mama sun hagía hadügaguba  houngua lánime Kristu disipulugu. * Ida liña wábunaguni ilaü lánina inarüni? Lau wapurichihani uganu luáguti Larúeihan Bungiu. Sagü wapurichihani uganu le, lidan furumiñeguarügü igaburi, ítara liña kamá hamuga wachüühañein ilaüméme le abunúbei tidan wanigi (Luk. 6:45; 8:1). Ligíati, arufudahati abahüdaguni le woun walubahaba lan katei buiti ani awanda wagíame lidan wani ministeriu ánhawa asigira apurichiha.

12. a) Ka wafurendeirubei lídangiñe bián abahüdaguni le luáguti tídibu aban beibei luma ábunaguti? b) Ka hasandirubei luagu hasubudiruni katei le?

¹² Ka wafurendeirubei lídangiñe bián abahüdaguni le luáguti tídibu aban beibei luma ábunaguti? Íderagua lumutiwa lun gunfuranda wamani mama lan iyarani le wawagubei adügübei lun hánharun gürigia lun inarüni, alubahatiwa katei buiti lidan wani ministeriu dan le úaragua wamá. Ayanuhati Pábulu luagu katei le dan le lariñagunbei: “Lafayeirubei [...] Bungiu kada aban según luwuyeri leseriwidun lun” (1 Ko. 3:8). Luagu wadagimanu le wadügübei wibiha afayeiruahaü, mama luagu ida liña lan lidin woun. Ariñagatu aban íbiri gíritu Matilda, to barüharuboun 20 eseriwida kei prekursora: “Gúndaatina lau nasubudiruni ru lan Heowá wafayeiruahaü luagu áfaaguni le wadügübei”.

13, 14. Según Rómana 10:1, 2, ka uagu sigí lubéi Pábulu apurichiha houn ha mánharubaña lun uganu luáguti Larúeihan Bungiu?

¹³ Kaba íderaguawa lun ítarameme wamá ábunaguei ilaü lánina inarüni? Ariha wamaali adüga lan hamahadun hiibe-agei huríu lun uganu le lapurichihabei Pábulu lun leferidiruni luguraasun. Lau sun lira, merede lumuti lapurichihan. Teni wamá lun le lariñagubei saragu dan lárigiñe tidan ligaradan houn kristiánugu ha Rómabaña luagu le lasandirubei hawagu huríu hagía. Ariñagati: “Katei le tayumahabei nanigi, ani le uágubei nayumuragua lun Bungiu hawagu Ísüraelina, lun hasalbaruba lan. Ariñagatina luagu hafulesein luagu anihein lan aban óunwenbu gúnfuli hadan luma Bungiu, gama lumoun mama kei lubudubu” (Rom. 10:1, 2). Ka uagu lasigira Pábulu apurichiha houn?

 ¹⁴ Furumiñe, afuranguagüda lumuti adüga lumuti lan ladüga ligía lan tayumahabei lanigi, lidan amu dimurei, ladüga busén lan meha tídangiñe sun lanigi lun hesefurun íbini fiu hádangiñe huríu (Rom. 11:13, 14). Libiaman, ariñagati ayumuragua lan meha lun Bungiu lun líderaguniña gürigia ha lun hánharun lun uganu luáguti Larúeihan Bungiu. Ani lǘrüwan, ariñagati: “Anihein [...] aban óunwenbu gúnfuli hadan luma Bungiu”. Ariha lumuti meha Pábulu buiti le ladügübei kada gürigia. Ani subudi lumuti meha gayara lan ladügün ínsiñeni le lasandirubei aban gürigia haruma tanigi luagu Bungiu lun aban lan kristiánu le eseriwiduti lun Bungiu lau ubebeni.

15. Ida luba wáyeihani Pábulu? Ariñaga huméi le hadügübei fiu íbirigu.

¹⁵ Ida luba wáyeihani Pábulu? Furumiñe, áfaagua wamá lun meferidirun wamani ubebeni lun wáluahaniña “ha lúntiñabaña ibagari le magumuchaditi”. Libiaman, ayumuragua wamá lun Heowá lun ladügün lun busén hamá gürigia haruma tanigi hafurendeirun luagu (Adü. 13:48; 16:14). Ariñagatu Silvana, aban íbiri to barüharuboun kéiburi 30 irumu eseriwida kei prekursora: “Lubaragiñe napurichihan tidan aban muna, furíeitina lun Heowá lun líderagunina lun masaminarun nan wuriba hawagu gürigia”. Amuriaha wamá giñe luma Heowá lun hadundehaniwa ánheligu ñein habéi gürigia haruma tanigi (Mat. 10:11-13; Aruf. 14:6). Ariñagati Robert, aban íbiri le barühalibei lóugiñe 30 irumu eseriwida kei prekursoru: “Gúndaatina lau nasubudiruni wawadigimariduña lan úara hama ánheligu ha subudihabutiña lun le asuseredubei lidan habagari gürigia”. Ani le lǘrüwan, áfaagua wamá lun warihini buiti le hadügübei gürigia. Ariñagati aban wéiyaali lidan afiñeni, le barühalibei lóugiñe 50 irumu lúmagiñe labadiseirun: “Áluahatina íbini katei ñǘbüriti le arufudubalin haruma tan hanigi gürigia, kei burí ánhaña áhayacha nuagun o hadügün aban álügüdahani”. Ánhawa adügei le, ítara kei Pábulu, ítaramemebadiwa ábunaguei ilaü lánina inarüni.

16, 17. a) Ka gayaraabei wafurendeiruni lídangiñe le lariñagubei Apurichihati 11:6? b) Abahüdagua humá aban sügǘ luagu ida liña lan harihin gürigia lun le wadügübei.

¹⁶ Íbini anihein lan dan genegeti kamá meberesegun hamá gürigia lau uganu le wapurichihabei, moun lumuti warufudun mebereseni luagu ida luba lan hóunabun lun inarüni (aliiha huméi Apurichihati 11:6). Inarüni gíbetiña lan gürigia maganbun hamutiwa, gama lumoun, ténitiña lun wagaburi. Ariha hamuti buidu lan wasansiragun, buidu lan ligaburi wóuserun ani sun lan dan hayañun waña lan. Lau lásügürün dan, gayaraati ladügün ligaburi wóuserun lun lasansirun le hasaminarubei amu wawagu. Ligía larihibei Sergio tuma Olinda, ha uágubaña wayanuha lidan furumiñeti párafu.

¹⁷ Ariñagati Sergio: “Kei aba lubéi wasandirun ligía midin wabéi luagu fiu dan párükerugu. Dan le wagiribudunbei, álügüda hamutiwa meha gürigia ka lan asuseredubei woun, ariñaga hagía woun áluga hamá wawagu”. Ani ariñagatu Olinda lau aban ahayachuni: “Busugua hamutiwa abugahatiña busu ani añahein hádangiñe ariñagatiña woun: ‘Buiti hadüga!’ Amuriaha hamutu giñe garüdia wama”. Aban weyu, aba lasuseredun aban katei le yebe magurabaha habéi feru maríeitiña ha. Aba lararamun aban wügüri tubadu kareta to tauboun agumeiraguagüdüni to hámaboun, aba líchugun fuluri houn ani aba leteingiruniña luagu dasi le hadügübei.

18. Ka uagu aranseñu hiña lubéi lun halubahan katei buiti ani awanda huguyame lidan hapurichihan?

¹⁸ Ariñagatu Bíbülia: “Bunabei binadüri binaafin, bunabei giñe rábounweyu”. Ligíati, ánhawa ítarameme ábunaguei ilaü lánina inarüni wídehaba lidan wadagimanu lánina lapurichihóun uganu buiti “lidan sun fulasu” (Mat. 24:14). Létima súdinitimabei, wasandirubei lueirin ugundani le lanügübei wasubudiruni gunda lan Heowá wau ladüga hínsiñetiña sun ha alubahabaña katei buiti lun ani awanda hagía lidan hani ministeriu.