KEI wawinwanduña lan lidan aban ubóu buin lau turobuli, hénrenguti lun wawinwandun lidan darangilaü. Íbini gunda wamá lau murusun darangilaü mama súnwandan gayaraabei lan wakipuruni. Ka adundehani tíchugubei Lererun Bungiu le gayaraabei líderaguniwa lun wibihin darangilaü inarüniti ani le magumuchaditi? Ani ida luba wíderagun amu lun giñe hibihini?

Lun wagundaarun lau darangilaü inarüniti, lunti buidu lan wasandiragun woungua ani lau ichouruni. Ani mosu gamadagu wamá ha buítiña. Le súdinitimabei, lun wibihin darangilaü magumuchaditi lunti buidu lan wamadagua luma Bungiu. Ariha waméi ida luba lan wadügüni le.

Dan le gaganbadi wamá lun lilurudun Heowá luma le larufudahabei woun tidan Lererun warufuduñein ru wamuti lan wemenigin luagu ani busén wamá lun darangilu lan wamadagua luma (Her. 17:7, 8; Sant. 2:22, 23). Ítara, aba layarafadun woun ani aba labiniruniwa lau ladügün lun wasandirun darangilaü. Ariñagati Isaíasi 32:17: “Lanügüba irichaü, darangilaü luma emenigini súnwandan”. Gayaraati wibihin darangilaü dan le gaganbadi wamá lun Heowá tau sun wanigi (Isa. 48:18, 19).

Lun wagundaarun lau darangilaü magumuchaditi, ruti giñe Heowá aban lubuidun idewesei woun: lani sífiri sandu (Adü. 9:31).

Dan le layanuhanbei apostolu Pábulu luagu ‘igaburi le líchugubei sífiri’ írida lumuti darangilaü keisi lǘrüwan lidan igaburi le (Gal. 5:22, 23). Ligíati, anhein busén wabéi wibihin darangilaü inarüniti mosu wígirun lun ladundehaniwa sífiri sandu. Ariha wamá bián katei le gayaraabei wadügüni lun gayara lan líderaguniwa lani Bungiu sífiri.

Furumiñe, mosu wéchudun aliihoun Lererun Bungiu sagü weyu (Sal. 1:2, 3). Dan le wararamagun  asaminara luagu uganu le tídanbei Bíbülia íderagua lumutiwa sífiri sandu lun gunfuranda wamani ka lan lasaminarubei Heowá luagu ámuñegueinarügü katei. Kei hénpulu, furendeitiwa ka lan ladügübei lun lakipuruni darangilaü ani ka lan uagu súdiniti lubéi darangilaü lun. Dan le wawinwanduni le wafurendeirubei tídangiñe Lererun darangilu timabadiwa (Ari. 3:1, 2, TNM).

Libiaman, mosu wafurieidun lun Heowá amuriaha lun líchugun sífiri sandu woun (Luk. 11:13). Füramaseti Heowá houn ha áluahabalin lídehan: “Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan, ladüga lídanñadün aban luma Kristu Hesusu” (Fili. 4:6, 7). Dan le wamuriahan sagü dan luma Heowá lun líchuguni lani sífiri sandu woun buíngüda lumutiwa lau darangilaü, aban katei le líchugubei hóunrügü ha buídubei hamadagua luma (Rom. 15:13).

Ídehaali adundehani le tídanbei Bíbülia lun hasansiruni saragu gürigia habagari luma lun hagundaarun lau darangilaü magumuchaditi lidan hamadagua luma Heowá, hama ha geyegubaña hau luma lun darangilu lan lasandiragun gürigia lungua. Ariha wamá fiu hénpulu.

Uguñe weyu, lidan damuriguaü kristiánu, añahein gürigia ha meha “gañi gáñibaña”, ánheinti guentó, buíduhali hagaburi, saminatiña hawagun amu furumiñe, gaguraasuntiña ani darangiluhaña * (Ari. 29:22). Ariha waméi le asuseredubei houn bián Gefentiña ha eresibirubaña ídemuei lun hafurendeirun árügüdagua houngua luma lun darangilu hamá hama amu.

Adügati meha luriban ligaburi David lun ladimurehan katei wuribati. Lubaragiñe lasubudiruni inarüni, héchuti meha ayanuha wuriba hawagu amu ani óusera lumutiña liduheñu lau menebenehabuni. Aban weyu, aba líchugun fe lunti lan lasansiruni ligaburi luma lun darangilu lan. Ka íderagubalin? Ariñagati: “Aba nagumeserun afalarei adundehani méiniti le tídanbei Bíbülia. Ítara liña nafurendeirun óuseraña niduheñu lau inebesei ani ligiaméme hadügübei numa”.

Adügati ligaburi tagüriarún Rachel lun wuriba lan tóuserun. Ariñagatu: “Anahagua ageindagua  luma nigañi ladüga súnwandan meha hageindaguña lan niduheñu”. Ida liña gürigiaharu lan to darangilatu? Ariñagamémetu: “Súnwandan namuriahan luma Heowá lidan furíei lun líderagunina”.

Wayanuharügüña luagu bián sügǘ le lani David luma le tani Rachel le arufudubalin buiti le ibihúbei dan le wafalaruni adundehani méiniti le tídanbei Bíbülia luma dan le wáluahani lídehan lani Heowá sífiri sandu. Íbini lidan ubóu wuribati le, gayaraati wasandirun darangilaü le ídehabei lun ñein lan úarani hadan waduheñu luma lidan damuriguaü. Lau sun lira, ariñagati Heowá woun lunti lan wawinwandun “lidan darangilaü hama súngubei” (Rom. 12:18). Ida luba wibihini le? Ani, ka buiti wibihubei dan le wáfaagun lun darangilu wamá?

Dan le wapurichihan, agunbiraha wamutiña gürigia lun haganbuni uganu buiti luáguti Larúeihan Bungiu (Isa. 9:6, 7; Mat. 24:14). Ani gúndaatiwa lau hánharun saragu lun uganu lánina darangilaü le. Ligía madiheridunhaña lubéi saragu magañidun hagía luagu sun le asuseredubei geyegu hau. Aniheinhali aban emenigini inarüniti hama lubá ámuñegü ani gaganbaditiña lun adundehani le: “Áluahabei darangilaü, ábame bafalaruni” (Sal. 34:14).

Mama sun gürigia buídubei hóunabun lun wapurichihan, kei burí dan le wapurichihan houn luagu furumiñeti wéiyaasu (Huan 3:19). Lau sun lira, íderagua lumutiwa lani Bungiu sífiri lun wayanuhan lau darangilaü luma inebesei houn. Ítara, wafalaruñein adundehani le líchugubei Hesusu libügürü apurichihani: “Danme hebelurun tidoun aban muna, ábame habusurun ayumaheina darangilaü houn tílana muna tuguya. Anhaün heresibira tílana muna tuguya, lagunfuliruba hayumahan le lánina darangilaü; anhaün meresibirun hamá, meferidirunbadün ni kata” (Mat. 10:11-13). Dan le wadügüni le lariñagubei Hesusu ídehati lun wáfuridun hábiñegiñe gürigia lau darangilaü hemenigiñu gayaraabei lan wíderaguniña lidan amu dan.

Ídehatiwa giñe lun ñein lan darangilaü dan le wayanuhan houn gumadimatiña lau inebesei, íbini houn ha mínsiñehabutiña lun wapurichihan. Kei hénpulu, lidan aban ageiraü Áfürika, wuribati meha le hasaminarubei gumadimatiña hawagu Gefentiña ani máhatiña meha híchugun üma lun tábunawagun Luban Wadamuridagun. Hemenigiñu lun laranserún turobuli lau darangilaü, aban lounahóun aban íbiri le meha eseriwidubei kei misioneru lidan ageiraü áfürikana ligía lun lidin ayanuha luma lóunagüle lurúeite ageiraü ligía Alundu (Ingülatéra). Mosu meha lafuranguagüdüni lun óunagülei le lau lan darangilaü heseriwida gefentiña luagu Heowá lidan ageiraü áfürikana ligía. Ida liña lidin lun íbiri le?

Ariñagati íbiri: “Dan le nachülürünbei tidoun áfisi, aba narihinu daüguaü to tuáguboun to eresibirubaliña gürigia, aba níchugun fe hádangiñetu lan türibu ha ayanuhabalin iñeñein le meha nafurendeirubei. Ábati nabusuragun tun lidan tiñeñe. Aba taweiridun tanigi, ábati tálügüdünina ka lan lébunabei anaha lan ñein. Lau saragu inebesei, aba nariñagun tun busén nan narihini lóunagüle urúei. Aba tagúarun lun luéigiñe gágamuru, ábati láfuridun ani aba labusuragun nun lidan liñeñe. Lárigiñe, aba lañüürun aganbei le nafuranguagüdübei lun luagu lau lan darangilaü heseriwida gefentiña luagu Heowá lageira”.

Kei aba lan layanuhan íbiri le luma lóunagüle urúei lau inebesei ibihati lun maribantimahali lan lasaminarun hawagu Gefentiña. Dan lárigiñe, aba líchugun lurúeite ageiraü áfürikana ligía üma lun burí tábunawagun Luban Wadamuridagun. Ma hagunda íbirigu! Chóuruti dan le lan wóuseruniña amu lau inebesei ibihatiwa katei buiti ani barüti darangilaü woun.

Uguñe weyu, gúndaatiña lubúeingu Bungiu lau darangilaü inarüniti le haganaguabei. Wídehaba lun meferidirun lan darangilaü le ánhawa áfaagua lun gagaburi wamani igaburi le, le ábanbei lídangiñe igaburi le líchugubei sífiri. Ani le súdinitimabei, labinirubadiwa Heowá ani wagundaaruba lau darangilaü le dayarüti lidan iseri ubóu lun súnwandan (2 Fe. 3:13, 14).