1, 2. a) Ka uagu layanuha Hesusu hama lani disipulugu murusun dan lubaragiñe lounwen? (Ariha huméi dibuhu le lídanbei lagumeseha arütíkulu). b) Ka uagu lunti lubéi furangu lan woun ka lan uagu wapurichiha? c) Kaba wakutiha lidan arütíkulu le?

GUÑÓUN le lubaragiñebei lounwen Hesusu, adimurehati luagu saragu katei hama lani apostolugu. Aba lachoururagüdüni houn luagu hínsiñe hamá lun. Kei warihini lidan arütíkulu le lubaragiñebei le, ligía guánarügü ariñagubei ítara liña lan kei aban tídibu beibei. Ítara liña línchahaniña lani disipulugu lun hasigirun apurichiha luagu larúeihan Bungiu (Huan 15:8).

² Mámarügü ariñagarügüti houn kaba lan hadüga, ariñagati houn ka lan uéigiñe mosu lubéi hadügüni. Subudigüda lumuti houn ka lan lébunabei lun hasigirun apurichiha. Kati uagu súdini lubéi woun lun wakutihani resun burí le? Lugundun línchahabadiwa lun wasigirun apurichihei “uganu buiti le luáguti larúeihan Bungiu lidan sun ubóu” (Mat. 24:13, 14). Ligíati, akutiha waméi gádürü resun le tíchugubei Bíbülia lun wapurichihan. Wayanuhaba giñe luagu gádürü katei le líchugubei Heowá woun ani le íderagubadiwa lun wasigirun apurichiha.

3. a) Ka resun ariñawagúbei lidan Huan 15:8 libügürü ka lan uagu lunti lubéi wapurichihan? b) Ka mini tubéi tídibu beibei lidan abahüdaguni le labahüdahabei Hesusu, ani ka uagu buidu lubéi hénpulu le?

³ Létima lébunabei wapurichiha ladüga ítara liña lan wíchugun uéiriguni luma inebesei lun liri Heowá (aliiha huméi Huan 15:1, 8). Ariñagati Hesusu ítara liña lan Lúguchi kei aban ábunaguti beibei. Ariñagati giñe luougua ítara liña lan kei aban tídibu beibei ani lani disipulugu kei limu (Huan 15:5). Ligíati, maribanti tayusurún beibei lun layanuhóun luagu wadagimanu lánina apurichihani le hadügübei kristiánugu, le ítarabei kei alubahani lánina Larúeihan Bungiu. Ariñagati Hesusu houn lani apostolugu: “Ibihati Núguchi uéiriguni dan le gibe lan hin”. Ítara kei resibi lan aban ábunaguti uéiriguni dan le gin tan sun linadürigu, rútiwa giñe uéiriguni lun Heowá dan le wapurichihani uganu luáguti Larúeihan lau sun wayaraati (Mat. 25:20-23).

4. a) Ida liña warufudun inebe lan liri Bungiu woun? b) Ida liña hasandiragun hungua luagu lubuidun chansi lun warufudun inebesei lun liri Bungiu?

⁴ Ida liña líchugun wapurichihan uéiriguni lun Heowá? Siñati wadügün lúntima sagüráu lan liri Bungiu ladüga sagüráuhali. Gama lumoun, ariha waméi le lariñagubei profeta Isaíasi: “Wabureme Suntigabafu, ligía lunbei lanügǘn kei sánduti” (Isa. 8:13). Aban lídangiñe igaburi le ídanbei warufuda inebesei lun liri Bungiu dan le mítaran lan wóuseruni kei furumiñeguarügü iri, ani lau wíderaguniña amu lun inebehabu lan liri houn (Mat. 6:9). Kei dan le wayanuhan luagu lubuidun ligaburi Heowá luma luagu füramasei úaraguati le ladügübei houn gürigia wageindaguña luéigiñe liri luéi lumarasualugu Mafia (Agu. 3:1-5). Ani dan le wáfaagun lun wíderaguniña gürigia ha awinwandubaña lidan fulasu le ñein lubéi wapurichiha lun harihini garicha lan Heowá lun leresibiruni “uéiriguni, inebesei, luma ubafu”, warufuduña giñe inebesei lun liri (Aruf. 4:11). Ariñagati Rune, aban íbiri le barühalibei 16 irumu eseriwida kei prekursoru: “Teinki numuti Bungiu luagu líchuguni chansi nun lun lani lan gefenti au. Ínchaha lumutina katei le lun nasigirun apurichiha”.

5. a) Ka resun ariñawagúbei lidan Huan 15:9, 10 libügürü ka lan uagu lunti lubéi wapurichihan? b) Ida liña lafuranguagüdüni Hesusu mégeiwa lan lun lawandun gürigia lidan leseriwidun lun Bungiu?

⁵ (Aliiha huméi Huan 15:9, 10). Ínsiñeni le wasandirubei luagu Heowá tídangiñe sun wanigi luma luagu Hesusu ligía ábanya resun súdiniti luagu ka lan uagu wapurichihei uganu buiti (Mar. 12:30; Huan 14:15). Ariñagati Hesusu houn lani disipulugu lun herederun lidan línsiñehabu. Ka uagu? Ladüga mégeitiwa lun wawandun irumu luagu irumu lun aban wamá kristiánu inarüniti. Le linarün katei, lidan Huan 15:4-10, yusu lumuti Hesusu dimurei asigira luma burí amu dimurei le ayanuhabei luagu ligiaméme katei lun líderaguniña lani disipulugu gunfurandei lunti lan hasigirun apurichiha.

6. Ida liña warufuduni busén wamá werederun lidan línsiñehabu Kristu?

⁶ Ida liña warufuduni busén wamá werederun lidan línsiñehabu Kristu ani adüga wameime le lubeibei? Lau wafalaruni lugumadin. Lidan amu dimurei, amuriahati Hesusu wama lun gaganbadi wamá lun. Mamuriahanti wama lóugiñe le ladügübei ladüga ariñagati: “Ítara kei nidin lau le lubeibei Núguchi, aba hínsiñememe nan lun”. Furanguti ru lani Hesusu hénpulu woun lun wáyeihani (Huan 13:15).

7. Ida liña úara lan gaganbadi luma ínsiñeni?

⁷ Afuranguagüda lumuti Hesusu úara lan gaganbadi luma ínsiñeni lau le lariñagubei houn lani apostolugu: “Ha subudihabútiña lun nugumadin ani úaragua hagía luma, arufuda  hamuti luagu hínsiñe nan houn le tímatimaati” (Huan 14:21). Ani dan le gaganbadi wamá lun lugumadin Hesusu luáguti apurichihani warufuduñein giñe hínsiñe lan Bungiu woun ladüga arufuda lumuti lugumadin Hesusu ligaburi lisaminan Lúguchi (Mat. 17:5; Huan 8:28). Kei hínsiñe lan Heowá luma Hesusu woun, arufuda hamuti giñe woun hínsiñe wamá houn.

8, 9. a) Ka ámuya resun wámabei lun wapurichihan? b) Ka uagu ínchaha lubaliwa dimurei le ariñawagúbei lidan Esekiéli 3:18, 19 luma 18:23 lun wasigirun apurichiha?

⁸ Apurichihatiwa giñe lun weweridiruniña gürigia. Ariñagatu Bíbülia apurichiha lan meha Noé houn gürigia (aliiha huméi 2 Féduru 2:5). Dan le lapurichihanbei houn, wéridi lumutiña meha gürigia luagu ladibiragüdali lan Bungiu ubóu. Ka uagu wariñagei le? Ariha waméi le lariñagubei Hesusu: “Lidan meha dan ligía, lubaragiñe ladibirun ubóu, heredera meha gürigia eiga, ata, amarieidagua, íchaahaña hasaanigu lun maríei, darí weyu le lebelurunbei Noé tidoun ugunei. Mefentiña, darí ladibirun ubóu, aba hañaradagun súngubei. Ítara luba giñe danme niábinya, au le Wügüri Garaüwarügüti ubouagun” (Mat. 24:38, 39). Íbini meberesegúntiña lan meha gürigia lau le lapurichihabei Nóe, gúnfuliti lau wadagimanu le ichugúbei lun lun leweridiruniña.

⁹ Uguñe weyu, apurichiha wamuti uganu buiti luáguti Larúeihan Bungiu houn gürigia lun hibihini chansi lun hafurendeirun luagu lisuuni Bungiu lun ubóu. Ítara kei Heowá, busentiwa lun haganbuni gürigia uganu le wapurichihabei gayara láamuga hesefurun (Ese. 18:23). Dan le wapurichihan houn gürigia tidan burí muna luma lidan guririguaü, adügati le lun gayara lan wasubudiragüdüni houn saragu gürigia lagumuchuba lan Larúeihan Bungiu lau ubóu wuribati le (Ese. 3:18, 19; Dan. 2:44; Aruf. 14:6, 7).

10. a) Ka resun ariñawagúbei lidan Matéu 22:39 libügürü ka lan uagu lunti lubéi wapurichihan? b) Abahüdaha huméi ida liña lan líderaguni Pábulu luma Sílasi aban óunigiruti furisun uburugu Filipu.

¹⁰ Ábanya resun súdiniti le uágubei wapurichiha ladüga hínsiñe hamá gürigia woun (Mat. 22:39). Subudi wamuti gayara lan hasansiruni gürigia le hasaminarubei dan lasansirun le gádanbaliña. Ínchaha lumutiwa ínsiñeni le wasandirubei hawagu lun wasigirun apurichiha. Samina wamá luagu le asuseredubei lun apostolu Pábulu luma Sílasi, le lupaaná, uburugu Filipu. Aba hádaruniña háganiñu furisunrugun. Sódini, amidi áriebu, aba liabin aban hárabaganali, aba lánhingichunu furisun, ábati ladaarun sun bena. Kei samina lan yebe óunigiruti anurahaaña lan adaürǘtiña láfaragua yebe lungua. Gama lumoun, aba lagúaragun Pábulu lun, lariñaga lun: “Máfaraguaba bungua!”. Lau idiheri, aba lálügüdahan óunigiruti: “Ka katei lunbei nadügüni lun nasalbarun?”. Ábati hariñagun lun: “Afiñebá luagu Wabureme Hesukrístu, ábame basalbarun” (Adü. 16:25-34).

11, 12. a) Ka larufudahabei abahüdaguni luáguti óunigiruti furisun woun luagu apurichihani? b) Ka uagu busén wabéi wasigirun apurichiha?

¹¹ Ka larufudahabei abahüdaguni le woun luagu apurichihani? Samina wamá luagu le: sansi lumuti óunigiruti ligaburi lisaminan ani amuriahati ídemuei lárigiñe hárabaganali.  Ítarameme, gayaraati hánharun gürigia lun inarüni lárigiñe liabin turobuli lidoun habagari, íbini mabusenrun hamá meha haganbuni uganu le wapurichihabei. Kei hénpulu, añahein hagía aba hásiñaragun houngua dan le heferidiruni hawadigimari, dan le hígiragun, ladagarun lanarime sandi hawagu o lounwen somu haduhe. Dan burí lasuseredun katei líbeina lira houn gürigia, aba hálügüdagun houngua ka lan lisuunibei ibagari, aban katei le meha masaminarun hamagili. Másiñati aba lan giñe hálügüdagun houngua: “Ka lunbei nadügüni lun nasalbarun?”. Dan le wadariruniña, gayaraati busenbaña lan haganbuni uganu le wapurichihabei, le íchugubei emenigini.

¹² Ligíati, ánhawa asigira apurichiha lau úaraguni, gayaraabei wíchugun dǘgüdaguaü houn gürigia danme le busén hamá haganbuniwa (Isa. 61:1). Ariñagatu Charlotte, aban íbiri to barüharuboun 38 irumu eseriwida lidan dan dayarüti: “Uguñe weyu, ibidiñegubeiti houn gürigia kaba lan hadüga lau habagari. Mégeitiña haganbuni uganu buiti”. Ani ariñagatu Ejvor, aban íbiri to barüharuboun 34 irumu eseriwida kei prekursora: “Hanarimeti luriban hasandiragun gürigia houngua uguñe weyu, sügǘ luéi lidan amu dan. Busentina níderaguniña ani ligía ínchahabalina lun napurichihan”. Chóuruti ínsiñeni lan le wasandirubei hawagu gürigia aban lan resun buiti lun wasigirun apurichiha.

13, 14. a) Ka luwuyeri idewesei uágubei layanuhóua lidan Huan 15:11? b) Ida luba wibihini ligiaméme ugundani le lasandirubei Hesusu? c) Ida liña úara lan ugundani le wasandirubei luma wani ministeriu?

¹³ Guñoun le lubaragiñebei lounwen Hesusu, ayanuhati giñe houn lani apostolugu luagu saragu idewesei le meha lunbei líderaguniña lun merederun lan hapurichihan. Katei burí san idewesei le? Ani ida liña lahuudun woun?

¹⁴ Ugundani. Ábanbei san ihürügu woun gaganbadi wamá lun lugumadin Hesusu luáguti apurichihani? Uá. Lárigiñe layanuhan Hesusu tuagu aban tídibu beibei, ariñagati gúndaabadiwa lan, ítara kei ligía, ánhawa apurichiha (aliiha huméi Huan 15:11). Ka uagu? Kei aubei warihei, ariñagati ítara liña lan kei aban tídibu beibei ani lani lan disipulugu hagía lan limubaña. Resibi lumuti limu duna luma sun le lemegeirubei lun labagaridun luéigiñe lugudina nadü lidan anihán lan luagu. Ítarameme, wasandirubei giñe ugundani libe le lasandirubei Hesusu lau ladügüni lugundan Lúguchi, ánhawa eredera lidan aban luma ani falá wameime lani hénpulu (Huan 4:34; 17:13; 1 Fe. 2:21). Ariñagatu Hanne, aban íbiri to barüharuboun lóugiñe 40 irumu eseriwida kei prekursora: “Ínchaha lumutina ugundani le nasandirubei súnwandan lárigiñe napurichihan lun nasigirun eseriwida lun Heowá”. Ruti ugundani le wasandirubei erei woun lun merederun lan wapurichihan, íbini lidan fulasu le ñein lubéi lougua lan haganbuniwa gürigia (Mat. 5:10-12).

15. a) Ka luwuyeri idewesei uágubei layanuhóua lidan Huan 14:27? b) Ida liña líderaguniwa darangilaü lun wasigirun apurichiha?

¹⁵ Darangilaü (aliiha huméi Huan 14:27). Gúñounmeme ligía, ariñagaali meha Hesusu houn lani apostolugu: “Nígiraali nidarangilaü hun, ru numuti darangilaü hun”. Ida liña líderaguniwa lidarangilan lun wapurichihan? Subudi wamuti gunda lan Heowá luma Hesusu wau dan le wawandun lidan wapurichihan. Ani adügati le lun wasandirun aban luwuyeri darangilaü le magumuchaditi (Sal. 149:4; Rom. 5:3, 4; Kol. 3:15). Ariñagati Ulf, aban íbiri le barühali 45 irumu eseriwida lidan dan dayarüti: “Adügati apurichihani lun labuchadun nuagu, lau sun lira, adügati lun nasandirun ugundani inarüniti”. Chóuruti teinki wamuti  lan Heowá luagu líchuguni darangilaü magumuchaditi le woun.

16. a) Ka luwuyeri idewesei uágubei layanuhóua lidan Huan 15:15? b) Ka meha lunbei hadügüni apostolugu lun lumadaguméme hamá Hesusu?

¹⁶ Wamadagua luma Hesusu. Lárigiñe lariñagun Hesusu houn lani apostolugu busén lan lun dayarü lan hagundan, aba lafuranguagüdüni houn súdini lan lun harufudun ínsiñeni lau hadügün sákürifisiu hawagu amu (Huan 15:11-13). Lárigiñe, ariñagati houn barǘ lániña keisi lumadagu. Ma lubuidun idewesei le! Ka meha lunbei hadügüni apostolugu lun meferidirun hamani lubuidun umadaguaü ligía? Mosu meha hasigirun apurichiha (aliiha huméi Huan 15:14-16). Bián irumu lubaragiñe, ariñagati Hesusu houn: “Heiba, apurichiheina luagu yarafaali lan larúeihan Bungiu” (Mat. 10:7). Ligíati, guñoun le lubaragiñebei lounwen, ínchaha lumutiña lun hawandun lidan hapurichihan luma lun hasigirun agunfulira lau dasi le (Mat. 24:13; Mar. 3:14). Hénrenguti meha houn hagunfulirun lau gumadi le, gama lumoun, gayaraati meha hadügüni, ítara, hakipurubei meha hamadagua luma Hesusu. Ida? Lau lídehan ábanya idewesei.

17, 18. a) Ka luwuyeri idewesei uágubei layanuhóua lidan Huan 15:16? b) Ida luba meha líderaguniña idewesei le lani Hesusu disipulugu? c) Ka burí idewesei lúmagiñeti Heowá íchugubei erei woun?

¹⁷ Lounabún wafurieidun. Ariñagati Hesusu houn lani apostolugu líchugubei lan Lúguchi sun le hamuriahan luma houn ánhaña amuriahei lidan liri (Huan 15:16). Chóuruti ru lan füramasei le erei houn apostolugu. * Íbini ua lan meha gunfuranda hamani, yarafaméme hali meha dan lun lounwen Hesusu, gama lumoun, merederunbaña meha mibihinga ídemuei. Aranseñu liña meha Heowá lun lóunabuni hafurieidun danme le hamuriahan ídemuei luma lun hapurichihani uganu buiti luáguti Larúeihan. Ani murusun dan lárigiñe, ariha hamuti ligaburi lóunabuniña Heowá (Adü. 4:29, 31).

¹⁸ Ligiaméme asuseredubei uguñe weyu. Ánhawa asigira apurichiha, gundamémebadiwa lau wamadagua luma Hesusu. Ani chouru wabéi lóunabubadiwa lan Heowá danme le wamuriahan ídemuei luma lun wagañeiruni turobuli le úmabei wadunragua lidan apurichihani (Fili. 4:13, TNM). Teinki wamuti Heowá luagu lóunabuni wafurieidun luma luagu gamadagua wamá luma Hesusu. Ruti idewesei burí le erei woun lun merederun lan wapurichihan (Sant. 1:17).

19. a) Ka uagu sigí wabéi apurichiha? b) Kaba íderaguawa lun wagumuchuni wadagimanu le líchugubei Bungiu woun lun wadügüni?

¹⁹ Kei aubei warihei lidan arütíkulu le, sigitiwa apurichiha ladüga busén wamá wíchugun inebesei luma uéiriguni lun liri Heowá, lun warufuduni ínsiñeni le wasandirubei luagu Heowá luma luagu Hesusu, weweridiruniña gürigia luma lun warufuduni hínsiñe hamá woun. Ani ruti idewesei burí le líchugubei Heowá woun —ugundani, darangilaü, wamadagua luma Hesusu luma lóunabuni wafurieidun— erei woun lun wagumuchuni dasi le líchugubei woun lun wadügüni. Gúndaabei Heowá lau larihini sun áfaaguni le wadügübei lun wasigirun apurichiha.