1, 2. a) Ka uagu hagañeiruñein lubéi nibureintiña kristiánugu Mafia hau sun lumafianu lidan wuribu le wawuribuhabei hama? (Arihabei dibuhu le lídanbei lagumeseha arütíkulu). b) Kaba wakutiha lidan arütíkulu le?

ARIÑAGATI apostolu Pábulu ítara haña lan kristiánugu kei aban súdara le awuribuhabei. Mama hama gürigia wageindagua, hama sífirigu. Satanási hama lumafianu wáganigubaña. Íbini siñá lan warihiniña, inarünitiña. Gawuribuhatiña ani barühaña saragu dan awuribuha. Másiñati samina wamá siñabei lan wagañeiruniña. Ani gayaraati genege lan nibureintiña lan mabafutimabaña lidan wuribu le. Gayaraati funa san hagañeiruniña nibureintiña sífirigu wuribatiña ha? Chóuruti gayara lan, ani ligía hadügübei. Ida liña hadügüni? Ibihatiña erei lúmagiñe Wabureme Heowá. Ani kei súdara hamá ha arufudahóuati houn buidu, daü hamutu “sun daüguaü to líchuguboun Bungiu houn sun lánigu” (aliihabei Éfesuna 6:10-12).

² Dan le layanuhanbei Pábulu tuagu daüguaü to háfuga lasaminaruña meha tuagu hadaüragun súdara rómana (Adü. 28:16). Lídanme awahán lan akutihei le lariñagubei Pábulu tuagu ladaüragun súdara rómana, teni wamá lun le hariñagubei fiu nibureintiña luagu le úmabei hagagibudagun luma buiti le lanügübei ladaürüni gürigia kada aban tídangiñe  daüguaü to líchuguboun Bungiu houn sun lánigu.

3, 4. Ida liña genegegua lan inarüni le tídanbei Lererun Bungiu luma béliti le meha hadaürubei súdara rómana?

³ (Aliihabei Éfesuna 6:14). Dan le lariñagubei Pábulu lunti lan daügu wamá lau inarüni keisi lau aban béliti le güragubei buidu luagu waranaagua, layanuhaña meha luagu béliti le hadaürubei súdara rómana. Anihein meha gürabu luagu béliti le lun lóunigiruni liranaagua súdara ani seriwiti lun lágüdahani lihürü lidáü laniguagu. Anihein meha ganchu luagu béliti le le seriwibéi lun lágüdahanu tagei lefeinte súdara luma tagei daga. Lau lagüraguni súdara libelitin buidu, chóuruti meha lasandiragun lungua lubá lidin awuribuha.

⁴ Ítarameme, góunigi lumutiwa inarüni le wafurendeirubei tídangiñe Lererun Bungiu luéi wuribani le lanügübei arufudahani mama inarüniti (Huan 8:31, 32; 1 Huan 4:1). Ánheintima hínsiñe lubéi inarüni woun ménrenguntimabei woun wawinwandun úara luma lilurudun Bungiu le richati (Sal. 111:7, 8; 1 Huan 5:3). Ani anhein gunfuranda wabalin inarüni le tídanbei Lererun Bungiu buidu buídubei wasandiragun woungua danme le wayanuhan luagu houn ha mínsiñehabutiña lun (1 Fe. 3:15).

5. Ka uagu mosu lubéi wariñaguni inarüni súnwandan?

⁵ Anhein “daügu” waña lubéi lau inarüni tídangiñeti Bíbülia gaganbadibadiwa lun le tarufudahabei ani wariñagubei inarüni súnwandan. Ka uagu mariñagunbadiwa lubéi iyeeni? Ladüga iyeeni aban tídangiñe áruma to layusuruboun Satanási ani adügaali lun hábürühan saragu tau. Barüti iyeeni wuribani dandu lun le ariñagubalin kei houn ha híbiri (Huan 8:44). Ligíati, íbini gafigoun wamá, áfaaguatiwa lun meyeehan wamá (Efe. 4:25). Anihein dan hénrengu lan lun meyeehanbei lan aban kristiánu. Ariñagatu Abigail, aban nibureintu to 18 irumu tau: “Háfuga genegeti mama lan súnwandan buidu lan lun lariñawagún inarüni, dántima le líderagubadibu lan beyeehan lun báfuridun lídangiñe ítaga katei”. Kati uagu táfaagua lun tariñaguni inarüni súnwandan? Ariñagatu: “Dan le nariñaguni inarüni darangilati nisaminan ani buíduti nasandiragun nungua ligibugiñe Heowá. Gayaraati giñe hafiñerun nagübürigu hama numadagu nuagu”. Ariñagatu Victoria, aban nibureintu to 23 irumu tau: “Dan le bariñaguni inarüni ani ayanuha buguya luagu bafiñen gayaraati hañawarihan amu bun. Lau sun lira, ibihatibu saragu katei buiti: buídutimati basandiragun bungua, ábatima bayarafadun lun Heowá ani inebebadibu houn ha hínsiñehabubaña bun”. Chóuruti buidu lan lun bariñaguni inarüni súnwandan.

6, 7. Ka idan genegegua lan irichaü luma lidáü haniguagu súdaragu rómana?

⁶ Lidan furumiñeti sígulu, adügǘwati meha aban luwuyeri lidáü laniguagu súdara le lauti gürabu. Afidihóuati gürabu burí le lúmagiñe laniguagu darí liranaagua súdara, ani le aban, fidiwati meha luagu lege. Güragua hamuti meha gürabu burí le lúmagua lau aban agürügaü le gueru ani aba habudünaguni lau ganchu. Íbini adüga lan meha lidáü laniguagu súdara lun mánhingichun lan kei auti labusenra, ídehati meha lun madagarun tan eféin o gimara tuagun lanigi o luagu amu katei luagu lúgubu. Ligía súdini lubéi lun meha lechekürüni sagü dan anhein gürawagua liña lubéi lidáü laniguagu buidu ani anhein lídanñein lubéi lubara.

⁷ Arufuda lumuti lidáü laniguagu súdara buidu ligaburi lóunigirunu lilurudun Bungiu wanigi (Ari. 4:23). Ítara kei masansirun lubéi lan aban súdara lidáü laniguagu le laubei gürabu luagu amu le mama gürabu o le meseriwínti, ítara liña giñe, masansirun wabéi ladundehan Heowá luagu wasaminan guánarügü. Gébehati le wasubudirubei ani siñati lóunigiruniwa kei aubei wemegeiruni (Ari. 3:5, 6). Ligía súdini lubéi lun wecheküruni sun dan anhein barǘ wamuti lubéi lilurudun Heowá le richabei güragu tidan wanigi.

8. Ka uagu buidu lubéi gaganbadi ban lun lilurudun Heowá?

⁸ Sandiguatibu san bungua ítara liña lan lilurudun Bungiu kei aban ihürügu o adügati lun siñá lan  badügüni le babusenrun? Ariñagati Daniel, aban nibureinti le 21 irumu lau: “Adügatiña numáisturugu hama nupanaagu leskuelarugu bula nau ladüga winwan nan úara lau le tariñagubei Bíbülia. Chülüti aban dan lun neferidiruni ichouruni le nasandirubei ani aba nírudagun saragu”. Ka íderagubalin lunya lasandiragun lungua buidu? Ariñagati: “Lau lásügürün dan, ariha numuti buiti le lanügübei gaganbadi lan gürigia lun lilurudun Heowá. Gumesetiña fiu hádangiñe ha meha nege numadagu ayusura düroga ani ha híbiri aban háfuridun leskuelarugugiñe. Ma lirun ida liña lan hagumuchun. Chouru numuti góunigi lumutiwa lan Heowá”. Ariñagatu Madison, aban nibureintu 15 irumu tau: “Hénrenguti nun lun gaganbadi nan lun Heowá luma lun mígiraguagüdün nan nungua lun le hasaminarubei nupanaagu ligía lan buídubei o lau le aubei hagundaara”. Ka tadügübei lun tagagibudagun luma óuchawaguni le? Ariñagatu: “Aba naritaguni barǘ numuti lan liri Bungiu ani yusu lani Satanási óuchawaguni lun lábürühan nuagun. Dan le méiguadun nan lidoun aban óuchawaguni buídutimati nasandiragun nungua”.

9-11. a) Ka tuwuyeri ‘sabadu’ wadaüruboun keisi kristiánugu? b) Ka gayaraabei líderaguniwa lun buídutima lan wasandiragun woungua dan le wapurichihan?

⁹ (Aliihabei Éfesuna 6:15). Aban súdara rómana le meha madaürun lumutu lisabadun to lánina wuribu maranserunti meha lun lawuribuhan. Adügǘwatu meha sabadu tuguya lau gueru, ǘrüwa wéiyaasu liduru ani buiti meha terederun hawagu. Ani derebuguti meha ligaburi tadügǘniwa ñulú tuguya.

¹⁰ Daü hamutu meha súdara rómana sabadu to lubá hawuribuhan, gama lumoun, ‘sabadu’ to wadaüruboun keisi kristiánugu íderagua tumutiwa lun wapurichihani uganu le lánina darangilaü (Isa. 52:7; Rom. 10:15). Lau sun lira, mégeitiwa ganigi lun wapurichihan dan le wibihin chansi lun wadügüni. Ariñagati Bo, aban nibureinti 20 irumu lau: “Hanufudetina meha lun napurichihan houn nupanaagu leskuelarugu. Ladüga funa nibusigari nan. Le linarün katei, ibidiñeti nun ka lan meha uagu nasandiragua nungua ítara. Guentó, gúndaatina lau napurichihan houn nibureintiña ha niseisin”.

¹¹ Rúhaña saragu nibureintiña fe buídutimati lan hasandiragun houngua lun hapurichihan dan le haranserun buidu lubaragiñe. Ka gayaraabei badügüni lun aranseñu ban? Ariñagatu Julia, aban nibureintu 16 irumu tau: “Súnwandan nanügün agumeiraguagüdüni númagua dan le nidin leskuela, ani aganba numuti le hasaminarubei luma le hafiñerubei nupanaagu. Íderagua lumutina le lun nasaminarun luagu somu katei le gayaraabei líderaguniña. Dan le naranserun buidu, gayaraati nayanuhan hama luagu burí katei le lunbei lahuudun houn”. Ariñagatu Makenzie, aban nibureintu 23 irumu tau: “Anhein buidu lubéi bóuseruniña amu ani rútibu arigei lun le hariñagubei, gayaraabei basubudiruni ka lan gádanbaliña bupanaagu. Aliiha numuti sun ariñahani le adügǘbei houn nibureintiña. Ítara, gayaraati narufudun somu katei houn tídangiñe Bíbülia o lídangiñe wani páhina jw.org le gayaraabei lahuudun houn”. Kei aubei warihei, dan le baranserun buidu lun bapurichihan ítara liña kei hamuga beibuguña tau sabadu to buitu terederun buagu.

12, 13. Ka burí tídangiñe “gimara durunguatu” lachüühaboun Mafia wawagun?

¹² (Aliihabei Éfesuna 6:16). Migifeti meha idaüdinaü le lanügübei aban súdara rómana lun lawuribuhan. Gádürüñein meha oubaü luagu ani wéiriti darí ladouragun lau lúmagiñe lege darí ligachürügü. Seriwiti meha idaüdinaü le lun lóunigiruni súdara luéi tadagarun eféin, gimara tuma amu áruma luagu.

¹³ Fiu tídangiñe “gimara durunguatu” to gayaraaboun lachüühan Mafia buagun iyeeni burí luagu Heowá, kei burí meberesegun lan bau ani mínsiñe ban lun. Ariñagatu Ida, aban nibureintu to 19 irumu tau: “Liibe-agei dan sanditina kamá dise  lan Heowá nuéi, mabusenrun lan lun Numada lan”. Ka tadügübei dan le tasandiragun tungua ítara? Ariñagatu: “Íderagua lumutina adamuridaguni saragu. Luagu meha aban dan, lidan adamuridaguni, miñurun numuti meha núhabu lun níchugun óunabagülei. Genegeti meha nun meberesegun hamá híbiri lau le lunbei nariñaguni. Ánheinti guenlé, aransetina lubá adamuridaguni ani áfaaguatina lun níchugun nóunabagüle bián o ǘrüwa wéiyaasu. Hénrenguti nun, gama lumoun dan le nadügüni, buídutimati nasandiragun nungua. Ani rútiña íbirigu gurasu nun. Sagü náfuridun lídangiñe adamuridaguni chouru numuti hínsiñe nan lun Heowá”.

14. Ka katei súdiniti larufudubei tikesin Ida?

¹⁴ Arufudati tikesin Ida aban katei súdiniti. Ligiaméme meha liseisin lidaüdina aban súdara rómana, ánheinti ‘lidaüdina’ wafiñen gayaraati laweiridun o lañüraüdün. Wagía lunbei desidírü wamani kaba lan liseisin (Mat. 14:31; 2 Tesa. 1:3). Ligía súdini lubéi lun wederebudaguduni wafiñen.

15, 16. Ida liña genegegua lan wemenigin luma aban bunidi le lánina wuribu?

¹⁵ (Aliihabei Éfesuna 6:17). Adügǘwati meha lubunidin súdara rómana lun lóunigiruni lichügü, ligiina luma ligibu luéi labuleseirun. Anihein meha lídangiñe habunidin súdaragu le gárügületi, ítara gayaraati meha hanügüni háhaburugu.

¹⁶ Ítara kei meha lóunigiruni lubunidin súdara lichügü, góunigi lumutiwa giñe wemenigin luagu wasalbarun wasaminan, lidan amu dimurei, lun wasaminarun buidu (1 Tesa. 5:8; Ari. 3:21). Íderagua lumutiwa wemenigin lun wetenirun lun füramasei  le adüga laalibei Bungiu luma lun warihini turobuli keisi lubudubu (Sal. 27:1, 14; Adü. 24:15). Gama lumoun, lun lóunigiruniwa ‘wabunidin’ mosu wadaürüni, mama lun wanügüni wáhaburugu. Mini lan le, lunti lan warihini wemenigin kei aban katei le inarüniti woun.

17, 18. a) Ida liña gayara lan ladügün Satanási lun weferidiruni wemenigin? b) Ida luba warufuduni mígiraguagüdüntiwa lan woungua lun leyeeduniwa Satanási?

¹⁷ Gayaraati ladügün Satanási lun weferidiruni wemenigin. Ida? Samina ban luagu le ladügübei lun Hesusu. Subudi lumuti meha hemenigi lan Hesusu larúeihabei lan sun ubóu ámuñegü. Gama lumoun, lubaragiñe lagunfulirun le, mosu meha lasufurirun hilá ligíame, ani lárigiñe, mosu meha lagurabahan lun lariñagun Heowá lun chülühali lan dan lun larúeihan. Ligía lóuchagubalin Mafia lau chansi lun lagunfulirun le uágubei lemenigida lubaragiñe lidaani. Ariñagati lun láurügü lan láhuduragun lun aban wéiyaasu gayaraabei lan libihini sun le ouraméme ligía (Luk. 4:5-7). Ítarameme, subudi lumuti Satanási füramasehali lan Heowá líchugun saragu umegeguni woun lídanme iseri ubóu. Gama lumoun, mosu wagurabahan ani háfuga wasufuriruba lan lídanme awahán lan agurabaha. Ligía lóuchagubaliwa Mafia lau chansi lun wagundaarun lau aban ibagari buiti lidan ubóu le. Busenti lun wáluahan irisini furumiñe, mama lun wíchuguni Larúeihan Bungiu lidan furumiñeti lúgaaru lidan wabagari (Mat. 6:31-33).

¹⁸ Mígiraguaguduntiña saragu nibureintiña kristiánugu lun leyeedaguniña Satanási. Kei hénpulu, ariñagatu Kiana, aban nibureintu 20 irumu tau: “Subudi numuti Larúeihanrügübei lan Bungiu gayara laransehani sun waturobulin”. Ka lánibei emenigini le luma ligaburi tasaminarun luma ligaburi tadügüni katei? Ariñagatu: “Íderagua lumutina emenigini luagu Paraísu lun gabaroun nani le uágubei náfaagua lidan neseriwidun lun Heowá. Máfaagutina lun nayusuruni le gayara nubéi adüga lun nagañeirun seinsu o lun nibihin aban ubaraü íñuti tidan aban kónpeni. Lubaragiñe lira, yusu numuti nidaani luma nere lun naganwoundagüdüni neseriwidun lun Heowá”.

19, 20. Ida luba buídutima lan wahandilihanu Lererun Bungiu?

¹⁹ Dan le labürüdünbarun Pábulu ligaradan houn éfesuna, yúsutiña meha súdaragu rómana aban eféin to 50 sentimeturu (20 incha) timigifen ani yusu hamutu meha lun hagagibudagun hama háganiñu dan le hawuribuhan. Aban lídangiñe resun le uágubei gahandiliheidi hamá meha tun hárumate buidu ladüga sagü lan meha weyu hasayahan tau.

²⁰ Ariñagati Pábulu ítara tiña lan Lererun Bungiu kei aban eféin to líchuguboun Heowá woun. Lunti wayusurunu Lererun Bungiu buidu dan le wayanuhan luagu wafiñen o dan le wáfaaguña lan lun wasansiruni ligaburi wasaminan (2 Ko. 10:4, 5; 2 Tim. 2:15). Ka gayaraabei badügün lun bahandilihanu Lererun Bungiu buidu? Ariñagati Sebastian, aban nibureinti le 21 irumu lau: “Dan le naliihanu Bíbülia nábuguarügü, aba nabürüdün aban bérusu lídangiñe kada kapítulu le naliihabei. Nadügüña aban lísüta lau sun bérusu létima hínsiñetimabei nun. Ítara liña úaratima lan nisaminan luma ligaburi lisaminan Heowá”. Ariñagati Danieli, nibureinti le uágubei wayanuha lidan párafu 8: “Dan le naliihanu Bíbülia aban burí nanúadirun bérusu le gayaraabei líderaguniña gürigia ha lídanbaña fulasu le ñein lubéi napurichiha. Ariha naali buidu lan hóunabun dan le harihin hínsiñe lan le tarufudahabei Bíbülia bun ani adüga bumuti lan sun biyaraati lun bíderaguniña”.

21. Ka uagu moun lumuti lubéi wanufudedun luéi Mafia hama lumafianu?

²¹ Arufuda lumuti le hariñagubei nibureintiña ha iridúañabaña lidan arütíkulu le moun lumuti lan wanufudedun luéi Mafia hama lumafianu. Gabafutiña gama lumoun gayaraati hagañeirúniwa. Gayaraati giñe hafarún hilagubei. Yarafa madise, lídanme Milu Irumu le lunbei ladurarun Larúeihan Kristu, hadaürǘba ani siñabei hadügün ni kata. Lárigiñe, ábame hagünrinchawagun (Aruf. 20:1-3, 7-10). Subudi wamuti wágani, sádara burí to layusuruboun luma le labusenrubei libihin. Lau lídehan Heowá, gayaraati wederebudaguduni wafiñen lun mígiraguagüdün wamá woungua lun leyeeduniwa Mafia.