1, 2. Dan le ederebugudeina liña lan wafiñen, ka wafurendeirubei adüga? Ru humá aban hénpulu.

DAN le libihin aban irahü aban idewesei, ariñagatiña lagübürigu lun: “Kaba bariñaga?”, aba lariñagun irahü: “Seremei”, íbini mama lan tídangiñe sun lanigi lariñagei. Danti le aweirideina liña lan, aba lagumeserun gunfurandei ka lan uagu súdini lubéi houn lagübürigu lun geteingiradi lan. Memegeirunhali lariñawagún lun lun geteingiradi lan lugundun ariñaga lumuti tídangiñe sun lanigi. Ka uagu? Ladüga furendeihali asaminara kei lagübürigu ani geteingiradihali.

² Ítarameme, dan le wafurendeirubalin inarüni, gunfuranda wamuti meha lisudinin gaganbadi wamá lun inarüni méiniti lúmagiñeti Bungiu. Danti ederebugudeina liña lan wafiñen, ábatima wafurendeirun luagu le hínsiñebei lun luma le mínsiñebei lun luma le lasaminarubei luagu ítaga katei. Dan le wafurendeirun asaminara kei Heowá, ígira wagía lun ladundehani lisaminan le wadügübei luma le wanúadirubei wadügün, aba warufudun wígiruña lan lun ítara lan ligaburi wasaminan kei ligaburi lisaminan.

3. Ka uagu hénrengu lubéi lun wafalaruni lisaminan Heowá?

 ³ Íbini gunda wamá lau wafurendeirun asaminara kei Heowá, anihein dan hénrengu lan lugundun gafigoun wamá. Kei hénpulu, gayaraati hénrengu lan woun gunfuranda wamani ligaburi larihini Bungiu fiu katei, kéiburi lun haruma lan wabagari, línsiñegu seinsu, apurichihani luma layusurún hitaü wuriba. Kaba íderaguawa lun wasigirun afalarei lisaminan Bungiu? Ani kaba lani le luma le lunbei wadügüni ámuñegü?

4. Ka mini lubéi wasansiruni wasaminan?

⁴ (Aliiha huméi Rómana 12:2). Afuranguagüda lumuti apostolu Pábulu lidan bérusu le le lunbei wadügüni lun wafurendeirun asaminara kei Heowá. Íderagua lumutiwa arütíkulu le lubaragiñebei le lun warihini lun lan masigi wamá afalarei ligaburi lisaminan “ubóu le”, moun lumuti wánharun lun hasaminan ni hagaburi lílana. Ariñagati giñe Pábulu lunti lan wasansiruni ligaburi wasaminan. Lun lira, mosu waturiahanu Bíbülia lun gayaraabei lan wasubudiruni lisaminan Bungiu, wasaminarun luagu ani gumese wagíame asaminara kei ligía.

5. Ida liña amu lan aturiahani lumoun aliihani?

⁵ Dan le waturiahan wábuguarügü, mámarügüñein lun waliihan ni lun wamakühan lóunabagüle álügüdahani. Lunti wakutihani le lariñagubei ariñahani woun luagu Heowá, ligaburi lisaminan luma le ladügübei. Áfaaguatiwa lun gunfuranda wamani ka lan uagu lariñaga woun lun wadügün somu katei ani ka lan uagu mínsiñe lubéi amu lun. Saminatiwa giñe luagu burí asansiruni le lunbei wadügüni lidan ligaburi wasaminan luma wabagari. Másiñati siñá lan wasaminarun luagu sun le sagü waturiahan. Lau sun lira, buídubei lun wadireirun dan lun wasaminarun luagu ariñahani le waturiahabei, gayaraati wayusuruni lememe dan le wayusurubei lun waturiahan lun ligialá giñe dan wásügürün asaminara luagun le waturiahabei (Sal. 119:97; 1 Tim. 4:15).

6. Ka asuseredubei dan le wasaminarun luagun lisaminan Bungiu?

⁶ Anhein hechu wabéi aturiahoun Lererun Bungiu, susereti aban katei buiti woun. Aba wachoururuni woungua machararun lan lisaminan Heowá. Gumesetiwa arihei katei kei larihini ani ánhatiwa lun. Aba lasansirun wasaminan, ábati iserihali lan ligaburi wasaminarun. Murusun murusun, aba wagumeserun asaminara ítara kei Heowá.

7, 8. a) Ida liña larihini Heowá umegeguni? (Ariha huméi dibuhu burí le lídanbei lagumeseha arütíkulu). b) Ánhawa asaminara kei ligía, kaba un wetenira furumiñe?

⁷ Gániti le wasaminarubei mámarügü luagu le wasandirubei, gániti giñe luagu le wadügübei (Mar. 7:21-23; Sant. 2:17). Lun gunfuranda wamani buidu, ariha wamá fiu hénpulu. Furanguti larufuduni Ewanhéliu, le lasaminarubei Heowá luagu burí umegeguni. Anúadirati Heowá lau duari, aban feru maríeitiña ha míbeti hámati lun hagíaba lan meha lagübürigu Liráü, ha meha lúnbaña hagüriaruni Ubouagu (Fad. 12:8; Luk. 2:24). Dan le lagüriahóunbei Hesusu, ‘aba tarounragüdüni María lidan fulasu le héigagüle ibiñanigu ladüga úa lan meha ubaraü houn tidan haban chülüdügütiña’ (Luk. 2:7). Lun hamuga busén lan Heowá, ménrengunbei yebe lun lun líchugun aban fulasu buídutimati lun ñein lan lagüriahóua Liráü. Gama lumoun, létima súdinitimabei meha lun lun laweiridun Hesusu hadan iduheñu ha ru hamuti hamadagua luma Bungiu lidan furumiñeti lúgaaru lidan habagari.

⁸ Lau wakutihani abahüdaguni le, ariha wamuti ligaburi larihini Heowá umegeguni. Añahein agübürigu, áfaaguatiña lun híchuguni le buídutimabei houn hasaanigu, íbini anhein lunti lubéi híchuguni hamadagua hasaanigu luma  Bungiu lidan denchaü. Furanguti larihíniwa le lan súdinitimabei lun Heowá wamadagua luma. Agia wagía? Ítara liña san wasaminan kei Heowá? Ka larufudubei le wadügübei? (Aliiha huméi Ebüréu 13:5).

9, 10. Ida liña warufuduni ítara liña lan wasaminan kei lisaminan Heowá luáguti wadügün lun hachugeragun amu?

⁹ Le libiaman hénpulu, luagu wadügün lun hachugeragun amu, lidan amu dimurei, wadügün lun hafigouhan o lun hígiruni heseriwidun lun Heowá. Ka lasaminarubei Bungiu luagu katei le? Ariñagati Hesusu: “Furumiñeguarügü le afigougüdüti aban hádangiñe ha iserigiñabaña lidan hafiñen nuagu, buítimati hamuga lun lun lagurúniwa baranahoun lau aban óunwenbu dübü le amuligülei gürañu luagu ligiina sügǘ lau ladügüni katei lira” (Mar. 9:42). Furanguti larihíniwa weiri lan luriban katei le lun Hesusu. Ani kei arufuda lani ligaburi Lúguchi machararunga, gayaraati wachoururuni wuriba lan giñe larihini Heowá meberesen lan aban gürigia adüga lan le ladügübei lun lachugeragun aban lani Kristu disipulu (Huan 14:9).

¹⁰ Ítara liña san wasaminan kei Heowá luma Hesusu? Ka larufudubei le wadügübei? Samina wamá hínsiñe lan woun wadáürün daüguaü o waranseragun woungua lidan aban igaburi le mínsiñeti houn fiu íbirigu o gayara lan ladügün lun liábingua saminaü mabuidunti houn amu. Kábati wadüga? Línchahabadiwa san wínsiñehabu hawagu wíbirigu lun wígiruni le hínsiñebei woun? (1 Tim. 2:9, 10).

11, 12. Ida liña lóunigiruniwa luéi figóu warihini wuribani kei larihini Heowá luma wárügüdagun woungua?

¹¹ Ariha waméi lǘrüwan hénpulu: iyereeguti marichaü luma wuribani lun Heowá (Sal. 5:4). Lau sun subudi lani ayumaha wamá burí katei wuribati ladüga gafigoun wamá, ariñagati woun lun iyereegu lan le wuribabei woun, ítara kei iyereegu lan lun (aliiha huméi Amosu 5:15). Líderagubadiwa wasaminarun luagun ka lan uagu iyereegu lubéi wuribani lun Heowá, lun warihini wuribani kei larihini ani ladügüba lúntima wamahadun lun.

¹² Líderagubadiwa giñe warihini wuribani kei larihini Heowá lidan amu igaburi. Gunfuranda wabéi anihein lan katei le wuribabei íbini miridúniwa lan furangu tidan Bíbülia. Kei hénpulu, lidan ubóu le kamanitimahali larihín aban luwuyeri abinahani wíyeti subudiwati kei lap dance. Añahein saminatiña mítaran lan kei agamariduni ani ligía hasaminarubei mariban lan. * Lau sun lira, ítara liña san larihini Heowá? Haritagua waméi iyereegu lan sun luwuyeri wuribani lun. Ligíati, dise wamá luéi figóu lau wárügüdagun woungua, iyereegu ligíame le iyereegubei lun Heowá woun (Rom. 12:9).

13. Ka uagu lunti lubéi wasaminarun furumiñe luagu ida liña lan larihini Heowá ítaga katei?

¹³ Dan le waturiahan wábuguarügü, buídubei lun wasaminarun luagu le lunbei gani lani lisaminan Bungiu luagu le lunbei gayaraabei lan wadügüni ámuñegü. Ítarati, aranseñu waba íbinirügü murusun danme le wadariragun woungua lidan aban sügǘ le ídanti mosu lan wanúadirun lau lóufudagun kaba lan wadüga (Ari. 22:3). Akutiha wamá fiu hénpulu tídangiñeti Bíbülia.

14. Ka wafurendeirubei lídangiñe ligaburi lóunabun Hosé dan le tálugunbei yebe lani Potifárü weiriou tadügün lun larounrun tuma?

¹⁴ Samina wamá luagun le asuseredubei lun Hosé. Álugatu yebe lani Potifárü weiriou lun tadügün lun larounrun Hosé tuma ani masaminarungubei lumuti bián wéiyaasu, máhati tun. Ítara liña larufuduni saminaali lan meha luagu le lasaminarubei Heowá luáguti lunti lan úaragua hamá maríeitiña hámagua (aliiha huméi  Agumesehani 39:8, 9). Haritagua waméi giñe le lariñagubei Hosé tun würi tuguya: “Siñati lubeiti nadügün aban katei wuribati ítara lun nafigouhan ligibugiñe Bungiu”. Arufudati le lariñagubei ítara liña lan meha lisaminan kei lisaminan Heowá. Samina wamá guentó wawougua. Samina wamá aba lan lagumeserun aban wapaaná lidan wadagimanu adarihawa o lounahóun aban abürüdǘni o iyawaü lidoun wagagamurun le furanguti lánina lan agamariduni. * Ménrenguntimabei woun úaragua wamá anhein saminaadiwa lubéi lubaragiñe, ida liña lan larihini Heowá katei burí le, ítarahaali wasaminan kei lisaminan ani aranseediwa lau le lunbei wadügüni.

15. Ítara kei ǘrüwa ebüréugu, ka lunbei wadügüni lun mígiraguagüdün wamá woungua lun múaragun wamá lun Heowá?

¹⁵ Guentó, akutiha waméi le asuseredubei houn ǘrüwa nibureintiña ebüréugu ha subudiwabaña kei Sadürákü, Mesakü luma Awedi-negó. Adügati urúei Nabukodonosoru aban guáriua lautu golu ani óunahati lun háhuduragun lílana ageiraü tun. Lau sun lira, máhatiña ǘrüwa ebüréugu ha hadügüni. Arufudati óunabagülei furanguti le híchugubei lun urúei saminaaña lan meha luagu le mini lubéi úaraguni lun Heowá (Afu. 20:4, 5; Dan. 3:4-6, 12, 16-18). Samina wamá aba lan lamuriahan wayubudiri wama lun wíchugun seinsu lun aban fedu le gániti luma relihión mama inarüniti. Kaba hamuga wadüga? Lubaragiñe wagurabun lasuseredun katei kéiburi le, ka uagu masaminarun wabéi guentó luagu le lasaminarubei Heowá luagu katei le? Ánhawa adügei ítara, ménrenguntimabei woun wadügüni luma wariñaguni le buídubei, ítara kei hadügüni ǘrüwa ebüréugu.

16. Ida liña líderaguniwa gunfuranda wamani buidu le lasaminarubei Heowá, lun waranserun ánhawa asandira sódini?

¹⁶ Gayaraabei líderaguniwa wasaminarun furumiñe luagu lunti lan úaragua wamá lun Bungiu dan le wasandirun sódini. Inarüni maha wamá lun lichugúniwa hitaü wawagu ni lun lichugún gádürü katei méiniti le lídanbei hitaü wawagu (Adü. 15:28, 29). Lau sun lira, anihein amu burí katei le adügǘti lau hitaü le lunti lasaminarun kada aban wádangiñe anhein lánharuba lubéi lun. Lun lira, lunti wakutihani adundehani méiniti le tídanbei Bíbülia, le arufudubalin le lasaminarubei Heowá luagu katei le. Ani dan le tídanñadiwa lan háspitali, másiñati lau gáriti o ladügüdarúña lan wawagu lun wadügün somu katei ouraméme ligía, mámaba ligía dan le buídutimabei lun wasaminarun  luagun katei le. Lunti wakutihan luagu le guentó, wabürüdüni tidan aban dugumedu le wabusenrubei hadügün surusia woun, ayanuha wagíame luma wasurusian. *

17-19. Ka uagu súdini lubéi lun wafurendeirun guentó ida liña lan lisaminan Heowá? Ru humá aban hénpulu luagu somu sügǘ le ídanbei megei wamá waranserun.

¹⁷ Lagumuhóun, samina wamá luagu óunabagülei le líchugubei Hesusu lun Féduru lau lóufudagun dan le labuliedagunbei Féduru lau lariñagun lun: “Gudemeguabá bungua, Nabureme”. Furanguti larihíniwa saminaali lan meha Hesusu saragu luagun le labusenrunbei Bungiu lun ladügün luma luagun profesía luáguti libagari luma lounwen ya Ubouagu. Ídehati katei le lúntima busén lan Hesusu úaragua lan luma lun líchuguni libagari hawagu gürigia masaminarungaléi bián wéiyaasu (aliiha huméi Matéu 16:21, 22, TNM, 23). *

¹⁸ Uguñe weyu, busenti Heowá lun lumada wamá luma lun wídehan lau sun wayaraati lidan luadigimari (Mat. 6:33; 28:19, 20; Sant. 4:8). Lau sun lira, gayaraati lálugun somu gürigia le yebe buiti laritagun lun wadireirun luéi weseriwidun, ítara kei lasuseredun lun Hesusu. Kéiburi, samina wamá busén lan wayubudiri liñuruni wabara lidan wadagimanu ani gíbetimabei wagañeirun. Gama lumoun, ladügüba iseri ubaraü le lun hénrengu lan lun wetenirun lun weseriwidun lun Heowá. O anhein nibureingidibu lubéi, saminabá aba lan bibihini chansi lun basigiruni baturiahan ani mósume báguyun húbiñegiñe. Anihán ban san dan lun wamuriahani ladundehan Heowá, wáluahan ariñahani tidan wani agumeiraguagüdüni, wayanuhan hama waduheñu luma hama wéiyaaña lidan afiñeni lun wanúadiruni kaba lan wadüga? Ma buídutimabei hamuga lun wakutihani guentó le lasaminarubei Heowá luagu katei le luma lun wáfaagun lun wasaminarun kei ligaburi lisaminan? Ánhawa adügei ítara, ánheinme ichugúa chansi le woun, mámabei aban óuchawaguni woun. Subudi wabéi ka lan wabusenrubei wibihin lidan weseriwidun lun Heowá ani wáfaaguba lun wibihini. Úaalime amu katei lun wadügüni luéidügü le wasubudirubei ligía lan richabei.

¹⁹ Másiñati gayara lan wasaminarun luagu amu katei le gayaraabei liábingua woun sódini. Inarüni siñabei lan waranserun lubá kada sügǘ. Ánhawati ayusurei waturiahan wábuguarügü lun wasaminarun luagu ligaburi lisaminan Heowá, ménrenguntimabei waritaguni le waturiahabei luma lun wafalaruni le wafurendeirubei lidan furumiñeguarügü sügǘ le úmabei wagagibudagua. Ligíati, áfaagua wamá lun wasubudiruni lisaminan Bungiu, wasaminarun kei ligía luma lun wasaminarun luagu le lunbei gani lani lisaminan luagu le wadügübei guentó luma le lunbei wadügüni ámuñegü.

20, 21. a) Ka uagu siñabei lubéi wadügüni sun le wabusenrun lidan iseri ubóu? b) Ida luba gunda wamá íbini guentó?

²⁰ Memeniha wanigi lachülürün iseri ubóu. Hiibe-agei wádangiñe, hemenigitiwa wawinwandun ya Ubouagu lidan aban Paraísu lun súnwandan. Lesefurubadiwa Larúeihan Bungiu luéi igarigu le lanügübei ubóu le. Ani íbinime ñein, gayaraagilime wanúadiruni le wabusenrubei wadügün ani wanúadiruba según le hínsiñebei woun luma le wabusenrubei.

²¹ Lau sun lira, siñabeime wadügüni sun le wabusenrun. Hasubudirubei gürigia ǘnabugutiña ha lúnbaña hawinwandun ámuñegü kaba lan hanúadira, le buídubei o le wuribabei lau hafalaruni lilurudun luma lisaminan Heowá. Ladügüba katei le, lun ñein lan saragu ugundani luma darangilaü (Sal. 37:11). Ani íbini guentó, gayaraati gunda wamá ánhawa áfaagua lun ítara lan wasaminan kei lisaminan Heowá.