1, 2. a) Katei san katei le gebegitimabei le wámabei? b) Ka burí arufudahani gebegibei woun, ani ka uagu? (Ariha humoun iyawaü burí to lídanboun lagumeseha arütíkulu).

KATEI san katei gebegitimati le húmabei? Hasansirubei hamuga san luagu amu katei le maweirinti lebegi? Ménrenguti lóunabagüle álügüdahani burí le houn lubúeingu Bungiu. Wamadagua luma Heowá ligía katei létima gebegitimabei woun ani masansirun wabéi luagu ni kata. Gebegiti giñe inarüni le tídanbei Bíbülia woun, lugundun ligía adügübei lun gayara lan gamadagua wamá luma Wáguchi le siélubei (Kol. 1:9, 10).

² Samina wamá luagu sun le larufudahabei Wamaisturun le Buídutimabei woun tidan Lererun. Ariñaga lumuti liri woun luma le mini lubéi, arufudaléi lubuidun burí ligaburi woun. Afuranguagüda lumuti lubuidun idewesei le líchugubei woun luáguti lafayeiruni lebegi asalbaruni lau líchuguni Hesukrístu le Liráü lun lounwen wawagu. Ayanuhati giñe woun luagu Larúeihan Mesíasi ani ru lumuti emenigini houn kristiánugu anuadirúaaña lun hawinwandun sielu ani houn “amu mudún”, lun hawinwandun lidan Paraísu ubouagu (Huan 10:16). Arufudahati giñe Heowá woun ida luba lan wabagaridun  luma wóuserun. Wéiriti lebegi sun arufudahani le woun ladüga adügati lun wayarafadun lun Le adügübaliwa luma lun gasuuni lan wabagari.

3. Ka katei uágubei mama lan layanuhóuña lau lariñawagún “agañeihabei inarüni”?

³ Aban Bungiu gíchigaditi Heowá. Mángiti hawéi ha áluahabalin inarüni. Wéiriti líchigadi darí lun líchuguni libagari Liráü le hínsiñebei lun maguburahanga. Mamuriahanbei hamuga Bungiu seinsu wama luagu inarüni. Le linarün katei, dan le láluahanbei aban wügüri gíriti Simón líchugun seinsu lun Féduru lun líchugun Féduru ubafu lun lun gayara lan líchugun sífiri sandu houn amu, aba ladeinhan Féduru lun ariñageina: “Hilabá lau sun biseinsun, ladüga haritaguatibu luagu gayara lan bibihini katei le ledewehan Bungiu lau seinsu” (Adü. 8:18-20, TNM). Kati mini lubéi dimurei: “Agañeihabei inarüni”?

4. Kaba wafurendeira luagu inarüni lidan arütíkulu le?

⁴ (Aliiha huméi Ariñawagúni 23:23). Mosu wáfaagun lun gayaraabei lan wibihini inarüni le tídanbei Lererun Bungiu. Lunti aranseñu wamá lun wadügün furumiñeguarügü sákürifisiu le mégeiwabei lun wibihini inarüni. Ítara kei lariñaguni le abürühabalin Ariñawagúni, dan le wagañeihani o wibihini inarüni, lunti duari wamá luéi waluguruni o weferidiruni. Akutiha wamá luagu le mini lubéi wagañeihani inarüni luma le lunbei gayara lan mosu lan wafayeihan luagu. Líderagubadiwa katei le lúntima gebegitima lan woun ani lúntima mabusenrun wamá waluguruni. Ítara kei le lunbei warihini, gebegiti furumiñeguarügü sákürifisiu le lunbei wadügüni lun wagañeihani inarüni.

5, 6. a) Ida luba wagañeihani inarüni mafayeihanga luagu? Ru humá aban hénpulu. b) Ka burí buiti wibihibei lau wagañeihani inarüni?

⁵ Íbini dan le lichugún somu katei woun mafayeihanga, másiñati mosu lan wíchugun o wadügün somu katei leweñegua. Dimurei ebüréu le ásügürawagüdübei kei “agañeiha” lidan Ariñawagúni 23:23 gayaraati giñe mini lan “libihín”. Arufudati bián dimurei le lunti lan láfaagun gürigia o líchugun somu katei luagu amu le gebegitimabei. Samina wamá aba lan hariñagun hedewehaña lan bímina funaaru tidan aban mágidu. Tasaliraguba san bímina to luagu wadabulan ítaraguarügü? Uá. Íbini mafayeihanbadiwa lan tuagu, lunti wasagarun dan, áfaagua wagíame lun woudin mágidurugu lun wibihinu. Ítarameme, memegeiruntiwa seinsu lun wagañeihani inarüni. Lau sun lira, mosu wáfaagun lun wibihini.

⁶ (Aliiha huméi Isaíasi 55:1-3). Líderagubadiwa dimurei le lariñagubei Heowá tidan liliburun Isaíasi lun gunfuranda wamani le mini lubéi wagañeihani inarüni. Lidan burí bérusu le, góubaguagüda lumuti Heowá dimurei le lariñagubei luma duna, míligi tuma diwéin. Adügati inarüni le lúmagiñeti Bungiu lun wasandiragun woungua buidu, ítara kei dan le watun duna diliti ani le harumati. Ani ítara kei ladügün míligi lun héretima wamá ídeha ligía lun haweinamudun irahüñü, ítarameme, adügati lererun Heowá lun derebugu wamá, ídeha ligía lun buídutima lan wamadagua luma. Ani ítara liña lererun Heowá kei diwéin. Ida? Tidan Bíbülia, ariñawagúati gani tan diwéin luma ugundani (Sal. 104:15). Ligíati, dan le lariñagun Heowá woun lun wagañeiha diwéin, chóurugüda lumuti woun dan le lan wabagaridun úara luma lilurudun gúndaabadiwa (Sal. 19:8). Lau burí hénpulu le, íderagua lumutiwa Heowá lun gunfuranda wamani buiti le lanügübei wafurendeiruni inarüni luma wawinwandun úara luma le wafurendeirubei. Ligíati, akutiha wamá seingü katei le wígirubei lun wagañeihani inarüni.

7, 8. a) Ka uagu megei wabéi dan lun wagañeihani inarüni? b) Ka sákürifisiu tadügübei aban nibureintu aturiahatu Bíbülia, ani ka tibihibei?

⁷ Dan. Anihán aban lídangiñe katei le mégeiwabei lun wagañeihani inarüni. Mégeitiwa dan  lun waganbuni uganu luáguti Larúeihan Bungiu, waliihanu Bíbülia tuma amu agumeiraguagüdüni to wámaboun, waturiahan wábuguarügü, waranserun lubá adamuridaguni luma lun wadamuridagun. Lunti wasagaruni dan ligía lídangiñe amu katei le maweirinti lisudinin (aliiha huméi Éfesuna 5:15, 16). Átiriñein san dan wemegeirun lun wafurendeiruni arufudahani méiniti le tídanbei Bíbülia? Ámuñegueinarügüti likesin kada gürigia ani ligía lungua lunbei lasubudiruni. Mébehati le gayaraabei wafurendeirun luagu lichú lau Heowá, ligaburi luma le ladügübei (Rom. 11:33). Góubaguagüda tumuti garüdia to, to furumiñetu adügǘtu lidan inglesi, inarüni luma “aban liraüraü fuluri” ani ariñagatu: “Magundaara humá láurügü aban lufulurin inarüni. Lun hamuga buídurügü lan aban fuluri, míchugunti hamuga Bungiu saragu woun. Sigí humá átüha, sigí humá áluaha”. Álügüdagua wamá woungua: “Átiriñein san lufulurin inarüni numa?”. Íbini danme le wawinwandun lun súnwandan, gayaraabei wasigirun afurendeira luagu Heowá. Súdiniti lun wayusuruni wadaani buidu lun gayaraabei lan wagañeihani sun inarüni le wayaraati. Ariha waméi le asuseredubei tun aban nibureintu to meha busenboun tasubudiruni inarüni.

⁸ Águyatu Mariko *, aban nibureintu hapóna, Newayórun (Mériga) lun tidin leskuela. Lidan meha dan ligía, lídanñoun meha aban sétanu tani ligilisi le agumeserubei Hapón lidan irumu 1959. Aba tasubudirunu aban íbiri prekursora Mariko dan le tapurichihaña lan tidan burí muna. Dan le tagumeserunbei Mariko afurendeirei inarüni tídangiñeti Bíbülia, aba tagundaarun saragu darí lun tariñagun tun íbiri lun tíchugun aturiahani tun bián wéiyaasu luagu dimaasu. Lau sun beresegu tiña lan meha Mariko aturiaha leskuelarugu luma awadigimarida, aba tagumeserun adamuridagua. Aba giñe meteniharu lan lun burí fiu katei lánina isebáhari lun gayaraabei lan gadaani tan lun tafurendeiruni inarüni. Ídehati tadügüni sákürifisiu burí le lun furese lan tawanserun lidan tumadagua luma Bungiu. Lídanrügü aban irumu, aba tabadiseirun. Sisi hati lárigiñe, lidan irumu 2006, aba tagumeserun eseriwida kei prekursora ani anuhaguaméme lidan eseriwiduni le.

9, 10. a) Ida liña lasansirun ligaburi warihini umegeguni dan le wagañeihani inarüni? b) Ka burí katei tígirubei aban nibureintu, ani ida liña tasandiragun tungua guentó?

⁹ Umegeguni. Lun wagañeihani inarüni, másiñati lunti lan wígirun aban wadagimanu le fáyeiti o le wéiriti línsiñe woun. Dan le lariñagunbei Hesusu lun Féduru luma lun Andürési, ha meha esenihabaña, lun hanaahan gürigia lun lun lánigume, “aba hígirunu hasenin” (Mat. 4:18-20). Inarüni mama lan mosu hígiruni sun ha afurendeirubalin inarüni hawadigimari, lugundun lunti hanuriagun houngua ani lunti giñe hanuriahaniña haduheñu (1 Tim. 5:8). Lau sun lira, másiñati lunti lan hasansiruni ligaburi harihini umegeguni adüga hagíame asansiruni lidan luáguti le súdinitimabei lidan habagari. Arufuda lumuti Hesusu katei le furangu dan le lariñagunbei: “Móundaragua humá irisini ya ubouagu [...]. Óundaragua humá irisini sielu” (Mat. 6:19, 20). Ariha waméi le asuseredubei tun ábanya nibureintu.

¹⁰ Gumesetu María áhurera golf lubaragiñe tagumeserunu tileskuelan. Gáhureratu lun huraraü le darí lun tíchugun kolehiu to ñein lubéi taturiahan aban beka tun lun tidin aturiaha tidan luban furendei íñuti. Hínsiñeti meha golf tun ani busentu meha lun aban tan áhurerutu to buitu luma lun tagañeirun saragu seinsu. Aba tagumeserun aturiahoun Bíbülia. Hínsiñeti meha inarüni le tafurendeirubei tun luma asansiruni le tadügübei lau lídehan inarüni. Ariñagatu: “Dántima le meha núaradagüdüni nigaburi luma ligaburi nabagaridun luma lúrudu le tídanbei Bíbülia, aba gúndaatima nan”. Aba gunfuranda tani María hénrengubei lan meha tun lun anuha lan áfaagua luagu irisini luma áfaagua luagu  tumadagua luma Bungiu (Mat. 6:24). Ligía aranseñu tiña lubéi lun tígiruni létima meha hínsiñetimabei tun, lahurerún golf, tarisidun luma lun subudiwa tan. Guentó, teseriwiduña kei prekursora ani ariñagatu gúndaatima tan ani tawinwanduñein lan ibagari le gasuunitimabei.

11. Ka gayaraabei lasuseredun lun wamadagua hama fiu waduheñu luma hama wamadagu dan le wagañeihani inarüni?

¹¹ Wamadagua hama waduheñu luma hama wamadagu. Dan le wawinwanduni wabagari úaragua luma lúrudu le tídanbei Bíbülia, gayaraati lasansirun wamadagua hama fiu waduheñu luma hama wamadagu. Ka uagu? Amuriahati Hesusu luma Bungiu hawagu lani disipulugu: “Deregeguagüda baña houngua bun, lau lubafu bererun le inarünibei” (Huan 17:17). Gayaraati giñe mini lan “deregeguagüda baña” “fánreingua baña”. Dan le wánharun lun inarüni, aba wafanreinragun luéi ubóu ladüga mítaran háadiwa kei lílana. Ámuhali harihiniwa gürigia ladüga ámuhali lan ligaburi warihini katei hawéi ani ígiratiwa lun ladundehaniwa inarüni le tídanbei Bíbülia. Lau sun mabusenrun wamá wadügün lun ñein lan fánreinguaü hadan amu, gayaraabei hadisedun fiu wamadagu hama waduheñu wawéi o hamahadun lun iseri wafiñen. Maweiridagüdün lumutu katei le wanigi lugundun ariñagati Hesusu: “Lagaganiraguba kada aban hama liduheñu” (Mat. 10:36). Lau sun lira, chóurugüda lumuti woun gíbetimabei lan afayeiruahaü le lunbei wibihini luagu wagañeihani inarüni sügǘ luéi le lunbei wígiruni (aliiha huméi Márükosu 10:28-30).

12. Ka katei lígirubei aban wügüri huríu luagu inarüni?

¹² Lúmagiñe liñüraü, furendeiti aban huríu le nadagimeinbei tidan aban bísinisi gíriti Aarón, moun lumuti lan lariñaguni liri Bungiu. Lau sun lira, busenti meha lafurendeiruni inarüni. Aba taweiridun lanigi dan le larufudahabei aban Gefenti lun anhein lan óundaragua fiu létüra luma gádürü létüra ebüréu le ídanbei labürüdǘwa liri Bungiu, gayaraabei lan liridún liri Bungiu “Heowá”. Wéiriti lugundan darí lun aba lan lidin ligilisirugu abahüdaguei lubuidun katei le lafurendeirubei houn tábutigu ligilisi. Gama lumoun, móunabuntiña kei yebe lagurabuni. Lubaragiñe hamuga hagundaarun luma luagu lafurendeiruni inarüni luagu liri Bungiu, aba hásuerun luagun ani aba habuguni ñéingiñe. Aba giñe mamadaguali lan hama liduheñu. Lau sun lira, mígirunti lun ladügün katei burí le lun masigirun lan afurendeira luagu Heowá. Aba labadiseirun ani seriwiti lun Bungiu lau úaraguni lidan sun libagari. Ítara kei Aarón, aranseñu waña lun wánharun lun furumiñeguarügü asansiruni lidan wabara hadan gürigia o lidan wamadagua hama waduheñu lun wawinwandun úaragua luma inarüni.

13, 14. Ka burí asansiruni lidan ligaburi wasaminarun luma wóuserun lunbei wadügüni lun wagañeihani inarüni? Ru humá aban hénpulu.

¹³ Lagübüri saminaü luma luriban igaburi. Lun gayaraabei lan wánharun lun inarüni winwan wagíame úaragua luma lilurudun Bungiu, lunti aranseñu wamá lun wadügün asansiruni lidan ligaburi wasaminarun luma wóuserun. Ariñagati Féduru libügürü katei le: “Keisi isaanigu gaganbaditiña, mabagarida humá kei meha ligaburi habagaridun lubaragiñe hasubudiruni Bungiu. Lubaragiñe lira, abagarida humá aban ibagari sánduti le gumuti” (1 Fe. 1:14, 15). Mosu meha hadügün gürigia ha ánharubaña lun inarüni lidan lagübüri uburugu Korintu ani le buinbei lau magíaguni, saragu asansiruni lidan habagari (1 Ko. 6:9-11). Ítarameme, lun gayaraabei lan hagañeihani saragu gürigia inarüni uguñe weyu, mosu hígiruni luriban hóuserun. Ariñagati giñe Féduru houn kristiánugu ha lídanbaña lidaani: “Buídurügaali dan le abagarida humaalibei adaaguei meha luriban burí katei le hínsiñebei houn ha ibidiñehabúbaña lun Bungiu. Lidan meha dan le sügühalibei, haganóunña meha lidan ibagari nibusigarídünati, falá humuti meha luriban haritagun, abacharuada, adaagua fedu, átagua, luma áhuduragua houn guáriua” (1 Fe. 4:3).

 ¹⁴ Luagu saragu irumu, gátaditi meha Devynn tuma Jasmine. Lau sun meha, buidu lan Devynn lidan luadigimari, ligía meha arihibei lau seinsu le tayusurubei kónpeni to ñein lubéi lawadigimarida, madurati meha lidan luadigimari ladüga látadi. Subudiwatu meha Jasmine luagu gañi gañi tan, fasi tuguya. Aban weyu, dan le téibuguya lan Jasmine bacharuañu ǘmadarugu, aba tadunragun hama aban feru maríeitiña misionerugu. Aba hariñagun misionerugu tun hóudiba lan túbiñe íchiga aturiahani tun. Danti le hachülürünbei misionerugu lúbiñe Devynn dimaasu lárigiñe, bacharuañu liña meha Devynn tuma Jasmine. Magurabuntiña yebe hebereseduba lan misionerugu hau lun hóudiba lan bisidaña. Lidan leweñegua bisida le hadügübei misionerugu houn, sánsihali meha katei. Lúmagiñe lagumeserun Devynn tuma Jasmine aturiaha, aba harihini aturiahani kei aban katei súdiniti ani aba hagumeserun awinwandei le hafurendeirubei. Lídanrügü ǘrüwa hati, aba hígiruni átaguni ani dan lárigiñe, aba hamarieidun. Aba híchugun sun gürigia ha lídanbaña fulasu le ñein lubéi hawinwanda fe luagu burí asansiruni le hadügübei ani ínchaha lumuti katei le lun haturiahanu saragu lílana fulasu ligía Bíbülia.

15. Ka lídangiñe katei hénrengutimati le lunbei wígiruni lun wagañeihani inarüni, ani ka uagu?

¹⁵ Échuni luma fedu le múaranti luma le tarufudahabei Bíbülia. Gayaraati aban lan lídangiñe katei létima hénrengubei houn fiu gürigia lun hagañeihani inarüni, hígirun fiu échuni luma fedu le múaranti luma le tarufudahabei Bíbülia. Lau sun ménrengun lan houn fiu lun hánharun lun le tarufudahabei Bíbülia luagu burí katei le, añahein amu ásuhatiña lun hígiruni échuni burí le ladüga hadügüdarun haduheñu hawagu, hapanaagu lidan wadagimanu o hamadagu ha úmabaña buídutima lan hanaagun houngua. Gayaraati hénrengutima lan katei le dan le gagana lan échuni burí le, ladügǘn somu burí katei houn iduheñu ha hilaguaañabaña (2 Lur. 14:1). Gayaraati líderaguniwa ganigi le harufudubei amu íbirigu lun wadügüni asansiruni le mégeiwabei. Akutiha waméi le hadügübei fiu lílana uburugu Éfesu lidan furumiñeti sígulu.

16. Ka hadügübei fiu éfesuna lun hagañeihani inarüni?

¹⁶ Subudiwati meha Éfesu ladüga adüga hamá lílana máhia. Ka hadügübei éfesuna ha adügagubaña houngua kristiánugume? Ariñagatu Bíbülia: “Saragu giñe burí hádangiñe ha meha [adügübaña máhia], aba hanügünu burí haliburun, aba hágudunu hagibugiñe súngubei. Dan habahüdünbalin tebegi líburu burí tuguya, gebegitu kei burí dimí-san-milu murusun pülata. Ítara liña aburuchaguéina lan uganu luáguti [Heowá], ani arufudeinaléi lubafu lun lasansiragüdüni hagaburi gürigia” (Adü. 19:19, 20). Aranseñu haña meha kristiánugu úaraguatiña ha lun hágudunu líburu sérutu tuguya ani ibihatiña saragu abiniruni le gebegitimabei sügǘ luéi sákürifisiu le hadügübei.

17. a) Ka burí katei másiñati ígira wamani lun wagañeihani inarüni? b) Kaba burí álügüdahani wóunaba lidan leweñegua arütíkulu?

¹⁷ Ágiati huguya? Ka hígirubei lun hagañeihani inarüni? Sun wagía sügütiwa burí dan átüha “fuluri” lánina inarüni. Añahein fiu ígiraaña umegeguni ani hagagibudaguña luma asansiruni le ñǘbuinbei hámagiñe haduheñu hama hamadagu dan le hasubudiruni inarüni. Añahein saragu ha lunti hasansiruni ligaburi hasaminarun luma ligaburi hóuserun ani mosu hígiruni échuni luma fedu le múaranti luma le tarufudahabei Bíbülia. Ani meberesenga le lunbei wígiruni, chouru wamuti gebegi lan furumiñeguarügü sákürifisiu le lunbei wadügüni luagu inarüni. Ibihatiwa leweñegua, aban katei gebegitimati wamadagua luma Heowá. Dan le wararamagun asaminara luagu abiniruni burí le wibihubei lau wasubudiruni inarüni, hénrenguti lun wasaminarun lalugurubei lan hamuga somu gürigia inarüni. Ida luba hamuga lasuseredun le? Ani ka lunbei wadügüni lun madügün wamani óunwenbu charati le? Wóunabubei álügüdahani burí le lidan leweñegua arütíkulu.