SUN wagía buiti wasandiragun woungua dan le harufudun amu berese hamá wau luma lun hóuseruniwa buidu. Ligíati, ka gayaraabei wadügüni lun wóuseruniña gürigia buidu?

Yusu tumuti Bíbülia dimurei lubuidun igaburi lun tayanuhan luagu larufudun gürigia berese lan hau amu tau sun lanigi ani arufudúati igaburi le lau dimurei buiti luma lau katei buiti le adügǘbei. Mámarügü luagu galeskuelan wamá o buidu lan wamene larufudúa lubuidun igaburi. Ínchaha lumutiwa ínsiñeni le hanarimebei luma wíchaagun woungua lidoun halugaarun gürigia lun warufudun lubuidun igaburi. Lanwoun lira, igaburi le, ligía aban lídangiñe igaburi le líchugubei lani Bungiu sífiri sandu, le lunbei gagaburi wamani keisi kristiánugu (Gal. 5:22, 23). Ligíati, ariha wamá ida liña lan larufuduni Heowá luma Hesusu igaburi le ani ida luba lan giñe wáyeihaniña.

Genegeguati lubuidun igaburi luma areiduni. * Arufuda lumuti Heowá igaburi le houn sun gürigia, íbini “houn ha meteingiradibaña luma houn ha wuribabaña” (Luk. 6:35). Kéiburi, óunahati Heowá “weyu houn buítiña hama wuribatiña, óunahalei huya dandu houn múarantiña keisi houn úaratiña” (Mat. 5:45). Íbini ha míchugubaña uéiriguni lun Heowá luagu ligía lan adügübaliña, ibihatiña buiti lídangiñe sun le líchugubei lun wabagaridun ani gúndaatiña burí lau katei le.

Ariha waméi lubuidun katei le ladügübei Heowá lau ligaburi lóuseruni Adán tuma Ewa. Murusun dan lárigiñe lafigouhan Adán tuma Ewa, aba “háfadaguagüdün tubana igu lun hadouragun haugua tau”. Lau sun lira, subudi lumuti meha Heowá hemegeiruba lan daüguaü buídutimatu lun hawinwandun bóugudi luéi fuluri-agei Edén lugundun íñaragua meha múa ani buin liña meha lau “hiiyu”. Gabaroun lumuti meha Heowá le hemegeirubei, ábati ladügün “hadaüragun lau hara animaalu” (Agu. 3:7, 17, 18, 21).

Lau sun óusera lumutiña lan Heowá “buítiña hama wuribatiña” buidu, buséntimati lóuseruniña lubúeingu úaraguatiña buidu. Lidan meha lidaani profeta Sakaríasi, nidiheriti meha aban ánheli lau larihin ráramagua lan meha tábunawagunya ténpulu to Herusalénboun. Aganba lumuti Heowá ánheli ligía ani óunaba lumuti “lau burí dimurei buiti” (Sak. 1:12, 13). Susereti aban katei ítarati lun profeta Elíasi. Chülüti aban dan lun lasandirun saragu íruni darí lun lamuriahan luma Heowá lun lígirun lun lounwen. Gabaroun lumuti meha Bungiu le lasandirubei Elíasi, ligía aba lubéi lóunahan aban ánheli lun líchugun erei lun. Ani chóurugüda lumuti Heowá lun mama lan lábuguarügüñein. Lárigiñe laganbuni Elíasi lubuidun burí dimurei le luma ídemuei le leresibirubei, gayaraahali meha lasigirun agunfulira lau lidasin (1 Uru. 19:1-18). Hádanti sun lubúeingu Bungiu, kátima áyeihabalin buidu lau lóuseruniña amu buidu?

Dan le leseriwidunbei Hesusu ya Ubouagu, subudiwati meha kei aban gürigia le buiti ligaburi ani buiti lóuseruniña amu. Méredunti meha hawagun gürigia ani móuserun lumutiña giñe wuriba. Kei meha gunfuranda lumutiña lan amu, ariñagati: “Higougu numoun, sun huguya ha buchaañabaña uagu lárigi huádigimari luma lihürü hanügün, emeraaguagüda náamugaün” (Mat. 11:28-30). Ligía meha hafalarunbalin gürigia ñein lumuti lidin. Ábati hagudemedagun lun ani ligía aba lubéi léigagüdüniña, lareidaguagüdüniña sánditiña, arufudaha ligía “saragu katei houn” luagu Lúguchi (Mar. 6:34; Mat. 14:14; 15:32-38).

Gunfuranda lumutiña meha Hesusu gürigia ani subudi lumuti meha ida luba lan lóuseruniña. Súnwandan meha leresibiruniña amu buidu, íbini mama lan meha dan lun leresibiruniña (Luk. 9:10, 11). Luagu aban dan, aba tayarafadun aban würi to meha barǘharuboun duusu irumu lau lésehan hitaü tídangiñe ani aba taguurun tuagu ladaüragun hemenigiñu tareidaguba lan. Mama meha lunti tadügüni katei le ladüga según Lúrudu, wíyetu meha (Fad. 15:25-28). Lau sun lira, madeinhanti Hesusu tun. Lubaragiñe lira, aba lariñagun tun würi tuguya, to meha buinboun lau anufudei: “Niráü, areidaguaadibu ladüga bafiñen. Beiba lau darangilaü, areidaguñu lídangiñe bisandi” (Mar. 5:25-34). Ma lubuidun ligaburi Hesusu!

Arufuda lumuti burí sügǘ le wakutihabei arufudúati lan lubuidun igaburi lau le wadügübei. Lun larufuduni Hesusu lisudinin warufuduni igaburi le lau le wadügübei, aba labahüdahan aban abahüdaguni luagu samariana le buídubei. Lau sun meha wuriba lan hanaagun samariana houngua hama huríu, aba lagudemedagun huríu le, le lídanbei abahüdaguni le, lun samariana. Ragǘ hamuti meha híwerutiña huríu le, bulesei haméi ani ígira haméi hilamémeeli ǘmadarugu. Aba lagaranihan samariana le lun biti le luágubei huríu, barǘ lumuti tidoun haban chülüdügütiña ani fayei lumuti samariana tabureme muna lun lóunigiruni. Aba giñe lariñagun samariana lun tabureme muna lafayeirubei lan le lagastarun anhein meha emegeira huríu le amu katei (Luk. 10:29-37).

Lau sun arufudúa lan lubuidun igaburi lau le wadügübei, arufudúati giñe lau dimurei le ruti gurasu luma dǘgüdaguaü. Ligía ariñaga tubéi Bíbülia íbini ‘hírugüda lumuti lan idiheri gürigia, gúndaaguagüda lumuti dimurei buiti’ (Ari. 12:25). Línchahabadiwa lubuidun igaburi luma areiduni lun wíchugun gurasu houn amu lau dimurei buiti le adügati lun hagundaarun ani le arufudubei berese wamá hau. Líchugubatima katei le erei houn lun hagagibudagun luma lénrengunga le lanügübei ibagari (Ari. 16:24).

Kei adüga lumutiwa lubéi Bungiu lenege guánarügü, sun wagía gayaraati gagaburi wamani igaburi le (Agu. 1:27). Ariha wamá fiu burí hénpulu tídangiñeti Bíbülia. Aweiyasuhati apostolu Pábulu Romoun lau aban gumadan rómana gíriti Huliu, le meha arihibei lau. Buiti meha lóuseruni gumadan le Pábulu ani “ígira lumuti lun bisida lániña lumadagu [uburugu Sidón] lun hetenirun lun” (Adü. 27:3). Dan lárigiñe, óusera hamuti lílana ubouhu Málüta Pábulu buidu hama amu ha meha lúmabaña, lárigiñe tadibiragun hagune hau. Aba háfuragun lílana ubouhu watu lun labacharagun Pábulu hama ha lúmabaña ani adüga hamuti lílana ubouhu ligía sun hayaraati lun híderaguniña (Adü. 28:1, 2). Chóuruti buidu lan le hadügübei. Gama lumoun, lun warufudun lubuidun igaburi, mosu wadügün lóugiñe katei buiti le wadügübei dan luagu dan.

Lun wagundaaragüdüni Bungiu, mosu gagaburi wamani igaburi le, le lúmagiñeti, súnwandan ani lun warufuduni lidan wabagari. Inarüni, aniheinbei lan dan hénrengubei lan wadügün katei  buiti hawagu amu. Ka uagu? Másiñati ladüga haburi wamá ani machourunti wasandiragun woungua o añahein lan gürigia máhatiña lun weseriwidun lun Heowá o ladüga awanhagua lan áfaagua lun mámarügü lan wawouguoun wasaminara. Lau sun lira, gayaraati wagañeiruni katei burí le ánhawa amuriahei lídehan sífiri sandu áyeiha wameime lubuidun ligaburi Heowá (1 Ko. 2:12).

Kaba íderaguawa arihei le gayaraabei wadügüni lun buídutima lan wóuseruniña amu? Lunti wálügüdagun woungua: “Arufudatina san gunfuranda numutiña lan amu dan le naganbuniña? Aransetina san lun níderaguniña? Ídabuga san nadüga somu katei buiti luagu aban gürigia le mama niduhe o le mama besi numada?”. Gayaraati giñe wáfaagun lun burí wasubudiruniña amu buidu, íbirigutima lidan damuriguaü. Ítara, wasubudirubeitima le gádanbaliña luma le hemegeirubei. Lárigiñe, áfaagua wamá wadügün katei hawagu amu kei hamuga wabusenrun lun hadügün wawagu (Mat. 7:12). Ani lagumuhóun, amuriaha wamá luma Heowá lun líderaguniwa ani labinirubei wáfaagun (Luk. 11:13).

Ruti apostolu Pábulu aban lubuidun hénpulu lau ladügün katei buiti hawagu amu. Ariñagatu Bíbülia ‘resibi lumutiña lan sun ha ñǘdünbaña arihei’ (Adü. 28:30, 31). Bereseti meha hau gürigia ani arufuda lumuti meha houn lau le lariñagubei luma lau le ladügübei. Ligía meha hínsiñe lubéi houn gürigia lun houdin lumoun. Ítarameme, gayaraati ladügün ligaburi wóuserun lun busén hamá gürigia hasubudiruni inarüni. Ánhawa óuseraña sun gürigia buidu, íbini ha mánharunbaña lun wafiñen, gayaraabei waguurunu hanigi ani adüga wagíame lun lasansirun hagaburi (Rom. 12:20, TNM). Lau lásügürün dan, gayaraabei íbini busén hamá hasubudiruni uganu le tídanbei Bíbülia.

Lídanme Paraísu le anitebei, háguyuguba saragu gürigia ani taweiriduba hanigi danme le houserún lau lubuidun igaburi, másiñati anihánba lan furumiñeti wéiyaasu houserún ítara. Línchahabañameti heteingiradi luagu houserún ítara lun giñe hóuserun amu buidu. Líchuguba Heowá ibagari magumuchaditi hóunme ha hínsiñehabubaña, buidu ligía hagaburi. Ánhañati hame mabusenrunbaña hóuserun ítara, mabaraabaña lábugiñe Larúeihan Bungiu (Sal. 37:9-11). Chóuruti ábanbei lan fulasu chóuruti ani darangiluti ubóu. Lubaragiñeti lachülürün dan ligía, ida liña lahuudun woun warufudun lubuidun igaburi guentó?

Ariñagatu Bíbülia: “Ha gudemehabubaña, adügatiña buiti hóuniwagua” (Ari. 11:17). Hínsiñetiña gürigia ha buiti hagaburi houn amu ani liibe-agei dan, áyeiha hamutiña. Ariñagati Hesusu: “Ladüga kei hadügün houn amu, ítara luba giñe ladügǘn hun” (Luk. 6:38, TNM). Liibe-agei dan, ménrengunti houn gürigia ha buídubei hagaburi hadügün umadagu.

Ru lumuti apostolu Pábulu adundehani le houn kristiánugu ha Éfesubaña: “Buidu humá, gudemehabu huguyame húmagua, ferudunagua humá húmagua” (Efe. 4:32). Barüti saragu buiti lun damuriguaü dan le gunfuranda hamaniña lílana damuriguaü ha híbiri ani áfaaguatiña lun híderagun hámagua. Madügüntiña burí bula le hanarimeti hau amu, mariñaguntiña dimurei le gáriti houn, mayanuhan hagía wuriba hawagu. Lubaragiñe herederun achuraguaña amu, áfaaguatiña lun hariñagun katei le ruti gurasu houn (Ari. 12:18). Ítarati, aba lederebugudun damuriguaü ani seriwitiña sun lílana lun Heowá lau ugundani.

Le linarün katei, arufudúati lubuidun igaburi lau dimurei luma le adügǘbei. Dan le wadügün katei buiti hawagu amu, arufuda wamuti línsiñehabu luma líchigadi Heowá (Efe. 5:1). Ídehatiwa giñe lun lederebugudun damuriguaü, ínchaha wagía gürigia lun busén hamá hasubudiruni inarüni. Ligíati, áfaagua wamá lun subudiwa wamá keisi gürigia ha arufudubaña lubuidun igaburi.