1, 2. a) Ida liña lóunabuni Hesusu Féduru dan le lariñagunbei lun lun gudemegua lan lungua? (Ariha huméi dibuhu le lídanbei lagumeseha arütíkulu). b) Ka uagu lóunabei Hesusu Féduru ítara?

MAFIÑETIÑA meha lani Hesusu disipulugu lun le haganbubei. Saminatiña yebe ladügüba lan Hesusu lunya ñein lan arúeihani Ísüraeli, gama lumoun, aba lariñagun houn lasufuriruba lan meha hilá ligía. Ariñagati apostolu Féduru lun: “Gudemeguabá bungua, Nabureme! Masuseredunbei le bun”. Ábati lariñagun Hesusu lun: “Disebá nuéi, Mafia! Babusenrúña berederuni ladügǘniwa lugundan Bungiu. Masaminaruntibu kei Bungiu, basaminarun kei wügüri” (Mat. 16:21, 22, TNM, 23; Adü. 1:6).

² Ítara liña larufuduni Hesusu amu lan saminaü le ñǘbuinbei lúmagiñe Bungiu luéi le ñǘbuinbei lúmagiñe ubóu le lábugiñebei lubafu Satanási (1 Huan 5:19). Arufuda lumuti Féduru lau le lariñagubei, igaburi le ubouagubei luagu hawouguounrügüñein lan hasaminara  gürigia. Lau sun lira, subudi lumuti meha Hesusu mítaran lan ligaburi lasaminarun Lúguchi. Subudi lumuti meha busén lan Heowá lun laranserun lubá lasufurirun luma lounwen. Arufuda lumuti le lariñagubei Hesusu mánharun lan ni murusunraü lun ligaburi lasaminarun ubóu ladüga ariha lumuti meha katei kei larihini Lúguchi.

3. Ka uagu hénrengu lubéi lun mánharun wamá lun ligaburi lasaminarun ubóu luma lun warihini katei kei Heowá?

³ Ágiati wagía? Ítara liña san ligaburi wasaminarun kei Bungiu o kei ubóu le? Chóuruti winwan wamá úaragua luma lilurudun Heowá. Ágiati ligaburi wasaminarun? Áfaaguatiwa san lun warihini katei kei larihini Bungiu? Lun ítara lan, lunti wasigirun áfaagua. Ánheinti lun wafalaruni ligaburi lisaminan ubóu, memegeirunti saragu áfaaguni lugundun anihein saminaü le lidan sun fulasu (Efe. 2:2). Ani gayaraati hínsiñebei lan ligaburi lasaminarun ubóu woun ladüga ínchaha lumutiwa lun wasaminarun wawouguounrügü. Le linarün katei, hénrenguti lun wasaminarun kei Heowá, ánheinti lun wasaminarun kei ubóu, ménrenguti.

4. a) Kaba asusereda ánhawa ígira lun ladundehani ubóu ligaburi wasaminan? b) Ida luba líderaguniwa arütíkulu le?

⁴ Ánhawa ígira lun ladundehani ubóu le wasaminan, wagumeseruba asaminara wawouguoun ani busenbadiwa lun wagíaba lan guánarügü anúadirei le buídubei o le wuribabei woun (Mar. 7:21, 22). Ligía súdini lubéi lun wafurendeirun asaminara kei Heowá, mama kei gürigia. Líderagubadiwa arütíkulu le lun wadügüni. Wakutihabei ka lan uagu gayara lubéi wachoururuni dan le lan warihini katei kei larihini Bungiu marihin wabéi lilurudun kei aban lúrudu deregüdayati, lubaragiñe lira, huubei woun. Wakutihaba giñe luagu le lunbei wadügüni lun mígirun wamá lun ladundehani ligaburi lasaminarun ubóu le wasaminan. Lidan leweñegua arütíkulu, warihubei le lunbei wadügüni lun ítara lan wasaminan kei ligaburi lisaminan Bungiu luagu ámuñegueinarügü katei.

5. Ka uagu maha habéi fiu gürigia lun hariñaguni amu houn kaba lan hasaminara?

⁵ Añahein gürigia máhatiña lun hariñaguni amu houn ida luba lan hasaminarun o lun hadundehani hasaminan. Ariñagatiña burí: “Mabusenruntina lun lariñaguni ni aban nun le lunbei nasaminaruni”. Másiñati le lan habusenrunbei hariñagun gayara lan hadügüni le haritagun lidan habagari ani mariban lan lira. Mabusenruntiña hasandiragun houngua kamá hagumadiruña o lun heferidiruni le adügübei lun amu hamá hawéi amu gürigia. *

6. a) Ka burí katei lígirubei Heowá lun wadügüni? b) Gayaraati san wadügüni sun le wabusenrun?

⁶ Lau sun lira, gayaraati wachoururuni ánhawa lan afurendeira asaminara kei Heowá úati mini lan siñá hali lan wadügüni le wasaminarubei o wasansirubei lan wagaburi. Ítara kei lariñawagún lidan 2 Korintuna 3:17, TNM, “le ñein lumuti lani Heowá sífiri, anihein esefuruni ñein”. Gayaraati wanúadirun ida luba lan wagaburi luma le lunbei línsiñedun woun. Ítara liña ladügüniwa Heowá. Le siñabei wadügüni, wóuserun kamá gayaraati wadügüni sun le wabusenrun (aliiha huméi 1 Féduru 2:16). Dan le lunti lan wanúadirun anhein buidu lubéi o wuriba lubéi somu katei, busenti Heowá lun wafalaruni adundehani le líchugubei woun tidan Lererun. Deregüdayati san katei le woun o huuti?

7, 8. Ka uagu wariñaga madügün lan wasaminarun ítara kei Heowá lun siñá lan wadügüni le wabusenrun? Ru humá aban hénpulu.

⁷ Samina wamá luagu aban katei. Áfaaguatiña agübürigu lun harufudahan katei buiti houn  hasaanigu, kéiburi lun haruma lan hóuserun, benefa hamá luma lun hasaminarun hawagu amu. Deregüdayati san arufudahani le? Uá. Híderaguñanu hasaanigu lun buídubei lan lidin houn lidan habagari. Danme le haweinamudun ñüdün hagíame hábiñegiñe hagübürigu, gayaraabei hanúadiruni le habusenrunbei hadügün. Ánhaña awinwanda úara luma le harufudahabei hagübürigu houn, masakürihanbaña luagu le hanúadirubei hadügün ani hadireiruba luéi saragu turobuli luma idiheri.

⁸ Kei aban lubéi úguchili buiti Heowá, busenti lun buidu lan lidin houn lirahüñü lidan habagari (Isa. 48:17, 18). Ligía arufudaha lubéi adundehani méiniti woun luagu ida luba lan wóuserun luma ida luba lan wóuseruniña amu. Lidan burí katei kei le, amuriahati Heowá wama lun wasaminarun kei ligía luma lun ítara lan wagaburi kei ligaburi. Adügati san le lun siñá lan wadügüni le wabusenrun? Úa, adügarügüti lun chútima lan wau luma lun buídutima lan le wanúadirubei wadügün (Sal. 92:5; Ari. 2:1-5; Isa. 55:9). Íderagua lumutiwa lun wadügün katei le lunbei ladügün lun wagundaarun ani gayaraamémegili wanúadiruni le hínsiñebei woun (Sal. 1:2, 3). Chóuruti hu lan woun lun wasaminarun kei Heowá.

9, 10. Ka uagu wariñaga íñutima lan ligaburi lisaminan Heowá luéi ligaburi lisaminan ubóu le?

⁹ Ábanya resun le uágubei busén wamá wafurendeirun asaminara ítara kei Bungiu ladüga íñutima lan ligaburi lisaminan luéi ligaburi lisaminan ubóu le. Ruti ubóu le adundehani luagu katei lánina ibagari kéiburi ida luba lan hóuserun gürigia, ida luba lan hóuseragun houngua hadan haduheñu luma ida luba lan hagundaarun lidan hawadigimari. Liibe-agei lídangiñe adundehani burí le, múaranti luma ligaburi lisaminan Heowá. Kei hénpulu, liibe-agei dan, ínchaha lumutiña lílana ubóu gürigia lun híchugun saragu uéiriguni houngua luma lun hánharun lun magíaguni. Anihein dan lariñawagún houn feru maríeitiña lun hafanreinragun o lun hígiragun luágurügü katei masudininti ladüga ligíaba lan adüga lun hagundaarun. Buídutimati san adundehani burí le lun wadaani sügǘ luéi le tíchugubei Bíbülia?

¹⁰ Ariñagati Hesusu: “Arihúati lichú lau gürigia lidan burí katei le ladügübei” (Mat. 11:19, TNM). Lau sun adügaali lan ubóu le saragu iseri katei lau teknolohía, siñagili laransehani turobuli burí le adügübei lun magundan wamá, kéiburi wuribu, mínsiñehabuni luagu aban rasa luma wuribani. Ani gúndaati lau magíaguni. Añahein gürigia ariñagaaña lubaragiñe lan lídehan katei le lun ua lan turobuli hadan iduheñu, sandi luma amu burí turobuli, adügarügüti lúntima laganwoundun. Ánhañati kristiánugu ha asaminarubaña ítara kei Bungiu, gúndaatimatiña haduheñu, madagati sandi le lanügübei magíaguni hawagu ani gúndaatiña lau darangilaü le hádanbei hama hábirigu lidan sun ubóu (Isa. 2:4; Adü. 10:34, 35; 1 Ko. 6:9-11). Ma arufudati katei le íñutima lan ligaburi lisaminan Heowá luéi ligaburi lisaminan ubóu le?

11. Ka meha adundehabalin lisaminan Moisesi, ani ida liña lidin lun?

¹¹ Subudi hamuti meha lubúeingu Heowá ha lánina tidaani Bíbülia, íñutima lan ligaburi lisaminan Heowá luéi ligaburi hasaminan gürigia. Ariha waméi likesin Moisesi. Lau sun meha arufudahóua lan lun lidan “lichú hau Ehiptuna”, amuriahati luma Bungiu lun líchugun lichú aau lun (Adü. 7:22; Sal. 90:12). Ani ayumuraguati lun Bungiu: “Subudigüdabei baransehan nun” (Afu. 33:13). Kei ígiraguagüda lan lungua lun ladundehani Heowá, yusu lumuti Heowá lun ladügün aban wadagimanu súdiniti le gánibei luma lagunfulirun lugundan Heowá. Ani rutu Bíbülia uéiriguni lun lau tariñagun aban lan meha wügüri le wéiribei lafiñen ligía (Ebü. 11:24-27).

12. Ka meha adundehabalin le ladügübei apostolu Pábulu?

 ¹² Aban meha wügüri furendeiti ani le chuti lau apostolu Pábulu (Adü. 5:34; 21:37, 39; 22:2, 3). Íbini ítara, mama meha lichú lau ubóu lafalarubei dan meha lunti lan lanúadirun luagu le lunbei ladügüni, Lererun meha Bungiu lafalarubei (aliiha huméi Adügaü 17:2; 1 Korintuna 2:6, 7, 13). Ligía buidu lubéi lidin lun lidan lani ministeriu ani agurabati meha libihin ibagari magumuchaditi (2 Tim. 4:8).

13. Ka lunbei ladügün lun úara lan ligaburi lisaminan luma ligaburi lisaminan Bungiu?

¹³ Furanguti íñutima lan ligaburi lisaminan Bungiu luéi ligaburi lisaminan ubóu. Gúndaabadiwa ani buídubei lidin woun lidan wabagari ánhawa adügei le lariñagubei Bungiu. Lau sun lira, mafosu lumutiwa Heowá lun wasaminarun kei ligía. Ani siñati giñe lafosuruniwa “musu úaraguati” ni wéiyaaña lidan afiñeni (Mat. 24:45; 2 Ko. 1:24). Kada aban wádangiñe, lunti ladügün lun úara lan ligaburi lisaminan luma ligaburi lisaminan Bungiu. Ida luba wadügüni?

14, 15. a) Lun wasaminarun kei Heowá, kaba uagun wararamagua asaminara? b) Según Rómana 12:2, ka uagu moun lumuti lubéi wasigirun afalarei ligaburi hasaminarun lílana ubóu? Ru humá aban hénpulu.

¹⁴ Ariñagati Bungiu woun lidan Rómana 12:2: “Hebé habagaridun keisi lirahüñü ubóu le; lubaragiñe lira, sansi huméi ligaburi hisaminan, sansi láamuga giñe ligaburi habagaridun. Ítara luba hiabin lun hasubudiruni le lugundanbei Bungiu hun —le buídubei, le úaraguabei”. Arufudati dimurei burí le woun gayara lan wafurendeirun asaminara ítara kei Bungiu, meberesenga ka lan meha adundehabalin wasaminan lubaragiñe wafurendeiruni inarüni. Inarüni gani lan igaburi le wanügübei hámagiñe waduheñu luma le winwan wamaalibei lidan wabagari luma ligaburi wasaminarun. Lau sun lira, gayaraati lasigirun ligaburi wasaminarun asansira. Lasansiruba wasaminan según le webelaagüdübei lidoun luma le erederubei ñein. Ánhawa araramagua asaminara luagu le labusenrunbei Bungiu, warihubei woungua buídutima lan ligaburi larihini Heowá katei hawéi gürigia. Ábameti busén wamá wasaminarun kei ligía.

¹⁵ Lunti wasansiruni wasaminan, moun lumuti wígirun lun lasigirun ubóu adundehei. Moun lumuti wígirun lun wasaminarun katei le múaranti luma lisaminan Bungiu. Súdiniti katei le ani gayaraati lafuranguagüdüniwa lau aban hénpulu. Samina wamá aba lan lagumeserun aban gürigia eiga éigini le buiti lun látuadi ladüga busén lan lun buídutima lan látuadi. Líderagubei san katei le anhein anihagua lubéi eiga éigini le mabuidunti lun látuadi? Ítarameme, ánhawa asigira afalarei lagübüri ligaburi hasaminarun lílana ubóu, meseriwidunbei woun wafalaruni ligaburi lisaminan Bungiu.

16. Kaba uéi wóunigiragua woungua?

¹⁶ Siñati wadisedun sunsuinagubei luéi lisaminan ubóu ladüga lidan wawinwanda (1 Ko. 5:9, 10). Lídanmeme apurichihani, aganbatiwa afiñeni burí le mama inarüniti. Danti le siñá lan wadisedun hawéi ha afalarubalin lisaminan ubóu, moun lumuti werederun asaminara luagu saminaü burí le, mánhara wagíame lun. Ítara kei Hesusu, moun lumuti wánharun lun saminaü le labusenrunbei Satanási lun wasaminaruni. Le linarün katei, gayaraati wóunigiragun woungua lun wadisedun luéi lisaminan ubóu le dan le mama lan mosu waganbuni ligaburi hasaminan lílana. Ariha waméi ida luba lan wadügüni (aliiha huméi Ariñawagúni 4:23).

17. Ka burí gayaraabei wadügüni lun wadisedun luéi lisaminan ubóu dan le mama lan mosu waganbuni ligaburi hasaminan lílana?

¹⁷ Kei hénpulu, mosu duari wamá dan le wanúadiruña wamadagu. Wéridi tumutiwa Bíbülia ánhawa lan gamadagua hama ha meseriwidunbaña lun Heowá, ábame ítara lan ligaburi  wasaminan kei hagía (Ari. 13:20; 1 Ko. 15:12, 32, 33). Mosu giñe wanúadiruni isebáhari buidu. Lau wamaharun lun isebáhari le gaganati furundei, magíaguni o saminaü luáguti saliguarügüti lan katei, wadügüña lun magadeirun lani saminaü burí le múaranti luma “linarün Bungiu” wasaminan (2 Ko. 10:5).

18, 19. a) Ka uagu lunti lubéi duari wamá luéi burí fiu saminaü ubouaguna? b) Ka burí álügüdahani lunbei wadügüni woungua, ani ka uagu?

¹⁸ Mosu giñe wasubudiruni saminaü ubouaguna, maha wagíame lun dan le larufudún lidan aban igaburi le aramudaguarügüti. Kéiburi, gayaraati lichugún aban ñunsu lidan aban igaburi le arufudati himei hamani le hariñagubei lánigu aban sétanu lánina polítika luéi amu. Gayaraati giñe layanuhan amu ñunsu le abahüdagubalin libagari somu gürigia, luagu le lasaminarubei ubóu luagu le lunti libihini gürigia lidan libagari luma le uágubei lunti lan láfaagun. Arufudúati tidan burí fiu pelikula tuma líburu, buidu lan ani lunti lan hasaminarun gürigia súdinitima hamá hagía guánarügü o haduheñu luéi furumiñeguarügü katei. Gama lumoun, múaranti saminaü le luma le tarufudahabei Bíbülia luáguti lun lan gunda hamá gürigia luma lun gunda hamá haduheñu lunti lan línsiñedun Heowá houn lubaragiñe furumiñeguarügü katei (Mat. 22:36-39). Anihein giñe abahüdaguni houn burí irahüñü, le genegeti mariban lan, gama lumoun, másiñati belugüda lan saminaü mabuidunti lidoun hasaminan irahüñü le gayaraabei ladügün lun hánharun lun katei lánina magíaguni.

¹⁹ Úati mini lan le wuriba lan lun wásügürün dan lidan isebáhari le buiti. Lau sun lira, buídubei lun wálügüdagun woungua: “Gayaraati san nasubudiruni lisaminan ubóu íbini dan le larufudún lidan aban igaburi le aramudaguarügüti? Adügatina san lun gébeha lan le haríagubei luma le haliihabei nisaanigu? Ligía giñe san nadügübei lau le naríagubei luma le naliihabei? Arufudaha numuti san lisaminan Heowá houn nisaanigu lun harihini wuriba lan lisaminan ubóu?”. Ánhawa arihei furangu amu lan lisaminan Heowá luéi lisaminan ubóu, mígirunbadiwa lun ladundehani ubóu wasaminan.

20. Kaba arufuda ka lan saminaü wafalarubei?

²⁰ Haritagua waméi biámañanu lan íchugutiña ariñahani: Heowá luma ubóu le lábugiñebei lubafu Satanási. Leti wafalarubei ligíaba arufuda ka lan adundehabalin wasaminan. Ánhawa ebelaagüdei lisaminan ubóu lidoun wasaminan, ligíaba adundehawa ani ábame wasaminarun, óusera wagíame kei híbiri gürigia. Ligía súdini lubéi lun duari wamá lau le warihibei, le waliihabei, le waganbubei luma le wasaminarubei.

21. Ka katei súdiniti lunbei wakutihani lidan leweñegua arütíkulu?

²¹ Kei buga wariñaguni, lun wasaminarun ítara kei Heowá, mámarügüti lunti wamahadun lun le agadeirubalin saminaü. Lunti giñe webelaagüdüni lisaminan Bungiu lidoun wasaminan lun wasaminarun kei ligía. Lidan leweñegua arütíkulu, warihuba ida luba lan wadügüni katei le.