Guñoun le lubaragiñebei lounwen Hesusu, ariñagati houn lani apostolugu lun málugun hamá lun lichugúniwa uéiriguni houn hadan lubúeingu Bungiu. Ariñagati houn: “Lidan arúeihani lánina ubóu le, agumadihatiña ha burí lurúeitegu fulasu, kamá hamuga labureme hagía; ha burí lábutigu fulasu, ariñawagúati hawagu luagu wügüriña hamá ha gadügaditiña fulesei houn gürigia. Gama lumoun mítarala hidan” (Luk. 22:25, 26).

Kátaña meha san wügüriña ha gadügadibaña fulesei houn gürigia ha uágubaña layanuha Hesusu? Según le bürüwañubei lidan fiu abürüdǘni, tidan dugumedu to lánina binadu dan luma lidan abürüdǘni le luágubei gáwanaü, gagaburi hamuti meha güriegu hama rómana lun híchugun uéiriguni houn ítaga gumadimatiña luma houn gürigia ha súdiniti habara lau hagúarun houn wügüriña ha gadügadibaña fulesei houn gürigia (lidan güriegu, euerguétes o ewérgetes). Aba lichugún uéiriguni le houn ladüga hadügün somu katei le buiti o le huuti houn gürigia.

Wáwati meha houn saragu gumadimatiña lau iri le. Hadan gumadimatiña ha, anihein meha urúei ehiptuna le gíribei Tolomeo III Ewérgetes (yarafa lun irumu 247-222 lb.l.K.) luma Tolomeo VIII Ewérgetes II (yarafa lun irumu 147-117 lb.l.K.). Rúati giñe uéiriguni le houn gumadimatiña rómana, kéiburi Huliu Sésarü (48-44 lb.l.K.) luma Augustu (31 lb.l.K.–14 l.K.). Resibi lumuti giñe lurúeite Hudéa, Erodesi le Wéirigubei, uéiriguni le. Másiñati resibi lani Erodesi uéiriguni le ladüga lanügün türigu lageiroun ladüga anihein lan meha aba lanarime ümi ñein luma luagu líchugun daüguaü houn ha mégeibaña.

Según Adolf Deissmann, aban sásaamu yámanina, yúsuati meha saragu wéiyaasu iri wügüriña ha gadügadibaña fulesei houn gürigia. Ariñagati: “Manügünbei hamuga saragu dan lun ladarirún lóugiñe san hénpulu luagu burí abürüdǘni [luáguti layusurún iri le]”.

Kati uagu layanuha Hesusu dan le lariñagunbei houn lani disipulugu moun lumuti lan ítara hamá kei gürigia ha? Lariñaguña meha san houn siñá lan hebereserun hau gürigia ha geyegubaña hau? Uá. Genegeti le lan meha uágubei lasaminara Hesusu luagu lébuna híchugun gürigia ha houn amu.

Lidan meha lidaani Hesusu, ídehatiña meha rísitiña lau haseinsun lidan huraraü luma katei le adügǘbei hagibugiñe saragu gürigia luma amu burí katei kei le ani adügatiña meha burí párüke tuma burí ténpulu. Mama meha ladüga gíchigadi hamá hadügei le, hadügünbalin lira lúnrügü híchugun amu uéiriguni houn, lun subudiwa hamá o lun labuduhóun hawagu. Ariñagatu aban líburu: “Íbini anihein lan burí hénpulu hawaguti gürigia ha ha íchugubaña lau sun taruman hanigi, liibe-agei dan, adüga hamuti meha katei le lúnrügü hibihin buiti hóunguarügü”. Igaburi meha le, le lánina labusenrun subudiwa lan gürigia luma lun libihin buiti lúnguarügü, ligía uágubei leweridiraña Hesusu lani disipulugu.

Fiu irumu lárigiñe, ayanuhati apostolu Pábulu tidan aban gárada to labürüdüboun houn kristiánugu ha Korintubaña luagu lisudinin gíchigadi lan gürigia tau sun taruman lanigi. Ariñagati houn: “Lunti líchugun kada aban hídangiñe, keisi lasandiruni tidan lanigi; mama lau magundani ni ladüga lariñawagún hun lun híchugun, lugundun hínsiñehabuti Bungiu lun le íchugubei lau ugundani” (2 Ko. 9:7).