1. Ka habusenrunbei agübürigu Gefentiña hachoururuni lubaragiñe habadiseirun hasaanigu?

“SÜGÜTI meha saragu hati nau ariñagei ligiaméme houn nagübürigu luagu busén nan nabadiseirun ani ayanuhatiña numa saragu wéiyaasu libügürü katei le. Busentiña meha hachoururuni anhein gunfuranda nubalin le nabuserunbei nadügün. Weyu 31 lidan duusu-hati, irumu 1934 ligía lagunfulirun le súdinitimabei nun lidan nibagari: luéyuri nabadiseirun”. Tabahüdahan aban íbiri gíritu Blossom Brandt luagu le asuseredubei tun dan le tabusenrubei tabadiseirun. Uguñe weyu, busentiña giñe agübürigu Gefentiña híderaguniña hasaanigu lun desidírü hamá buidu. Ánhaña ígirahei habadiseirun hasaanigu lubá amu dan mébunouga gayaraabei lanügün turobuli lidan hamadagua luma Heowá (Sant. 4:17). Gama lumoun, busentiña agübürigu hachoururuni lubaragiñe lan habadiseirun hasaanigu lunti lan aranseñu hamá lubá buligasion le lanügübei lani hamá Kristu disipulugu.

2. a) Ka turobuli harihubei fiu óunigirutiña sirkuitu? b) Kaba wariha lidan arütíkulu le?

² Añahein óunigirutiña sirkuitu nidiheritiña ladüga subudi hamá  nibureintiña ha gúnfulihaña kéiburi 20 irumu, hadan iduheñu gefentiña luagu Heowá haweinamuda ani mabadiseirungiña. Hiibe-agei ñǘdüntiña adamuridagua, apurichihatiña ani sandiguatiña houngua gefentiña lan luagu Heowá hagía. Másiñati ladüga lan somu katei mabusenrun habéi hederegeruni habagari lun Heowá ni lun habadiseirun. Ka funa san lébunabei? Anihein dan, hagübürigu ariñagubaña houn lun hagurabahan. Ka ínchahabaliña fiu agübürigu Gefentiña lun heredehaniña hasaanigu luéi hawanserun luma habadiseirun? Lidan arütíkulu le, warihuba gádürü katei le adügübei lun hadiheridun.

3. Ka meha adiheridagüdübaliña tagübürigu Blossom?

³ Gunfurandawati ka lan uéigiñe hadiherida tagübürigu Blossom lugundun saminatiña ñǘraügiru lan meha lun gunfuranda tani lisudinin badisei luma le mini lubéi. Ida luba hasubudiruni agübürigu anhein aranseeli lubéi hasaani lun lederegeruni libagari lun Heowá?

4. Ida liña líderaguniña agübürigu gumadi le líchugubei Hesusu lidan Matéu 28:19, 20?

⁴ (Aliiha huméi Matéu 28:19, 20). Kei warihini lidan arütíkulu le lubaragiñebei le, mariñaguntu Bíbülia átiribei lan irumu lau gürigia lun gayaraabei lan labadiseirun. Íbini ítara, buídubei lun hararamagun agübürigu asaminara luagu le mini lubéi ladügǘn disipulugu. Arufudati dimurei güriegu le ásügürawagüdübei lidan Matéu 28:19 kei “adüga humaña nánime disipulugu” lunti lan larufudahóun houn gürigia lun lani hamá somu gürigia disipulugu. Disipulu gürigia le afurendeirubei, gunfurandalei larufudahan Hesusu ani aranseñu liña lun gaganbadi lan lun. Ligíati, lunti harufudahan agübürigu gefentiña luagu Heowá houn hasaanigu lúmagiñe figigiña lun híderaguniña lun habadiseirun luma lun lani hamá Kristu disipulugu. Inarüni siñá lan labadiseirun aban irahü le figigili. Gama lumoun, ariñagatu Bíbülia íbini lan aban irahü le ñǘraügili gayaraati gunfuranda lani inarüni le tídanbei Bíbülia gebegi ligía lun.

5, 6. a) Ka wasaminarubei luagu badisei lárigiñe wakutihani le tariñagubei Bíbülia luagu Timotéu? b) Ida luba híderaguniña agübürigu hasaanigu?

⁵ Anúadirati Timotéu leseriwidun lun Heowá lau sun meha nibureingili lan. Ariñagati meha apostolu Pábulu luagu subudi lani Timotéu le tarufudahabei Lererun Bungiu ‘lúmagiñe liñüraü’. Huríu meha lúguchu tuma lagütü ani hagía meha arufudahabaña lun lun hínsiñe tan Lererun Bungiu lun, ánheinti lúguchi meseriwidunti lun Heowá. Adügati ligaburi hagüriaruni lun derebugu lan lafiñen (2 Tim. 1:5; 3:14, 15). Dan le lagunfulirunbei kéiburi 20 irumu, afiñewaali meha luagu lun lichugún buligasion espechaliti lun lidan damuriguaü (Adü. 16:1-3).

⁶ Inarüni ua hamá bián irahüñü lun genegegua lan hagaburi. Ámuñegueinarügüti irumudiri le ídanbei larufudei kada irahü derebuguhali lan lisaminan. Añahein hagía ñǘbürigiña dan le ederebugudeina liña lan hasaminan luma ligaburi hasandiragun houngua ani aba hariñagun busén hamá habadiseirun. Añahein amu mégeitiña dan lun gayaraabei lan habadiseirun. Agübürigu ha gunfurandabalin le madügüdaruntiña hawagu hasaanigu lun habadiseirun, íderaguarügü hamutiña lun hawanserun según hemegeiruni. Sanditiña aban lanarime ugundani dan le gaganbadi hamá hasaanigu lun dimurei le lídanbei Ariñawagúni 27:11 (aliiha huméi). Gama lumoun, agübürigu, mabulieida huméi le lan habusenrunbei hibihin lun lani hamá Kristu disipulugu hisaanigu. Lau saminaü le hichügüwagu buídubei lun hálügüdagun hungua: “Gíbeti san lisubudin nisaani tuagu Bíbülia lun gayaraabei lan lederegeruni libagari lun Bungiu badisei ligíame?”.

7. Mosu san lafurendeiruni gürigia arufudahani le tídanbei Bíbülia buidu buidu lun gayara lan labadiseirun? Afuranguagüda huméi.

⁷ Arufudaha hamuti agübürigu inarüni houn hasaanigu ladüga busén hamá lun hasubudiruni buidu. Ladügüba subudi le lun habusenrun hasaanigu hederegeruni habagari lun Heowá. Mini lan san le mosu lan hasubudiruni arufudahani le tídanbei Bíbülia buidu buidu lubaragiñe hederegeruni habagari lun Heowá ani badisei hagía? Uá. Le linarün katei, sun ha abadiseirúbaña lunti hasigirun afurendeira luagu Heowá (aliiha huméi Kolosana 1:9, 10). Átiribeiti lisubudin gürigia lubaragiñe labadiseirun?

8, 9. Ka wafurendeirubei luagu Pábulu luma luagu óunigiruti?

⁸ Líderagubadiwa wakutihani hakesin aban iduheñu ha lánina furumiñeti sígulu lun wóunabuni álügüdahani le (Adü. 16:25-33). Kéiburi lidan irumu 50, aba labisidahani Pábulu uburugu Filipu lidan libiaman luéiyasun kei misioneru. Aba larügüdǘn ligía luma Sílasi, le lupaaná, ábati hadaürǘn ladüga ladimurehóun iyeeni hawagu. Guñoun ligía, aba ladagarun aban hárabaganali, hingí lumutu furisun ani aba ladararun sun tubenari. Saminati yebe le óunigirubaliña adaürǘtiña luagu anurahaaña lan adaürǘtiña, láfaragua yebe lungua. Gama lumoun, mígirunti Pábulu lun ladügüni. Aba lapurichihan ligía luma Sílasi lun óunigiruti ligía luma houn liduheñu. Kei weiri lubéi línsiñe le hafurendeirubei luagu Hesusu houn aba habadiseirun sin hadarasahan. Ka larufudahabei abahüdaguni le woun?

⁹ Másiñati aban lan meha súdara rómana le mawadigimaridunhali óunigiruti ligía, ani ibidiñeti tuáguti Lererun Bungiu lun. Ligíati, lun meha ladügagun lungua kristiánume lan mosu meha lafurendeiruni inarüni méiniti le tídanbei Lererun Bungiu, gunfurandaleime le mini lubéi lun aban lan lubúein Heowá gürigia, aranseñu ligíame lun lafalaruni larufudahan Hesusu. Lidan murusun dan, aba lafurendeiruni inarüni méiniti le tídanbei Bíbülia sandí ligía ínsiñeni luagu inarüni, ligía ínchahabalin lun labadiseirun. Chóuruti sigí lan afurendeira lárigiñe labadiseirun. Ligíati, ka lunbei hadügüni agübürigu anhein ariñaga hasaani houn busén lan labadiseirun ladüga hínsiñe lan Heowá lun ani busén lan gaganbadi lan lun? Gayaraati hariñagun lun lun ladimurehan hama wéiyaaña lidan afiñeni lun harihini anhein gayaraahali lubéi labadiseirun. * Ítara kei ha híbiri disipulugu ha abadiseirúbaña lasigiruba afurendeira luagu lisuuni Bungiu lidan sun libagari (Rom. 11:33, 34).

10, 11. a) Ka hasaminarubei fiu agübürigu? b) Ka lunbei súdinitima lan houn agübürigu?

¹⁰ Añahein agübürigu saminatiña buídutimabei lan lun haturiahan hasaanigu luma lun háluahan aban wadagimanu le buiti lubaragiñe habadiseirun. Gayaraati buidu lan le hasaminarunbei. Gama lumoun, híderaguñanu san hasaanigu lun gunda hamá le tímatimaati? Ligibuagun sun lira, anihán san le tarufudahabei Bíbülia? Ka labuserunbei Heowá lun wadügüni lau wabagari? (Aliiha huméi Apurichihati 12:1).

¹¹ Lunti waritaguni amu lan lisaminan ubóu le luéi lisaminan Heowá luma le labusenrunbei ladügün (Sant. 4:7, 8; 1 Huan 2:15-17; 5:19). Kátima san gayaraabei lóunigiruni aban irahü luéi Satanási, luéi ubóu le lábugiñebei lubafu luma luéi saminaü le lídanbei? Mosu buidu lan lumadagua luma Heowá. Ánhaña hínchahan agübürigu hasaanigu lun háluaha  umegeguni furumiñeti gayaraabei lasaminarun hasaani súdini lan katei le ubouagubei sügǘ lau lumadagua luma Heowá. Chóuruti mabusenrun hamá agübürigu Gefentiña lun gani lan ubóu le lidan le hasaminarunbei hasaanigu hadügün lidan heseriwidun lun Heowá. Le linarün katei, lun gunda lan gürigia le tímatimaati lunti líchuguni Heowá lidan furumiñeti lúgaaru lidan libagari (aliiha huméi Sálumu 1:2, 3).

12. Ka uagu hariñaga fiu agübürigu houn hasaanigu lun lan mabadiseirun hamá darime haweinamudun?

¹² Aba tariñagun aban íbiri tun tisaani lun lan yebe mabadiseirun tan, lun tagurabahan. Ka uagu? Tuguya guánarügü afuranguagüdübalin: “Nibusigaritina nariñaguni kátima lan lébunabei nasaminarun ítara, luéi meha tadügün nisaani aban figóu wéiriti ani luéi tabugún”. Ítara kei íbiri to, añahein agübürigu saminatiña buídubei lan lun mabadiseirun hamá hasaanigu darí haweinamudun, danme le derebuguhali hasaminan (Agu. 8:21; Ari. 22:15). Másiñati samina hamá mabugúnbaña lan hasaanigu ladüga mabadiseirungiña lan. Le linarün katei heyeedaguña agübürigu ha houngua. Ka uagu? (Sant. 1:22).

13. Anhein mabadiseirungili lubéi gürigia mini lan san le maguseragüdün lubéi lan Heowá? Afuranguagüda huméi.

¹³ Gunfurandawati busén hamá agübürigu lun hederegeruni hasaanigu habagari lun Heowá luma lun habadiseirun danme derebuguhali hasaminan. Gama lumoun, aba bulíeiguaü hasaminarun agübürigu mararamunbaña lan hasaanigu ligibugiñe Heowá lun laguseragüdüniña ladügarügü mabadiseirungiña lan. Le linarün katei, lúmagiñe hasubudiruni hisaanigu le buídubei lumoun le wuribabei gayaraahali laguseragüdüniña Heowá (aliiha huméi Santiagu 4:17). Ligíati, lubaragiñe hariñagun houn lun hagurabahan lubá habadiseirun lunti híchugun agübürigu ha chu tau aban lubuidun hénpulu houn hasaanigu. Áfaaguatiña lun harufudahan houn lúmagiñe ñǘbürigiña lun gaganbadi hamá lun lilurudun Heowá luáguti laruman ibagari (Luk. 6:40). Anihán adaüraguagülei le buídutimati houn isaanigu lugundun línchahabaña lun hígirun lun ladundehaniña lúrudu le (Isa. 35:8).

14. Ida luba híderaguniña wéiyaaña lidan afiñeni agübürigu?

¹⁴ Gayaraati híderaguniña wéiyaaña lidan afiñeni agübürigu. Ida? Lau hayanuhan buidu luagu le habusenrunbei lun hibihini nibureintiña lidan heseriwidun. Haritagua tágili aba íbiri dan meha le sisi lubéi irumu tau díreiti íbiri Russell keinsi minutu lun layanuhan tuma luagu le tabusenrubei tibihin lidan teseriwidun lun Heowá. Aba teseriwidun kei prekursora lóugiñe 70 irumu. Ariha wamuti buiti le lanügübei lariñawagún dimurei buiti lun aban gürigia luma lichugún dǘgüdaguaü lun (Ari. 25:11). Gayaraati giñe hamuriahan wéiyaaña lidan afiñeni hama agübürigu luma hama nibureintiña lun hídehan lidan somu wadagimanu tidan Luban Wadamuridagun lau híchugun dasi houn irahüñü según harumudiri luma le hayaraabei adüga.

15. Ka gayaraabei hadügüni amu íbirigu lun híchugun gurasu houn nibureintiña?

¹⁵ Ida luba hídehan ha híbiri íbirigu? Lau berese hamá hau nibureintiña. Kéiburi lun hetenirun lun ligaburi hawanserun. Kei hénpulu, ruti san aban nibureinti óunabagülei le buiti lau lererun guánarügü? Ruti san aban yanu lidan damuriguaü le adügǘbei labadinagua dimaasu? Awanda lumuti san lóuchawagun lafiñen? Meferidirunti san chansi lun lapurichihan leskuelarugu? Anhein ítara liña lubéi, ariñaga wamá lun tídangiñe sun taruman wanigi buidu lan ladüga. Adüga waméi sun wayaraati lun wadimurehan hama  nibureintiña lubaragiñe o lárigiñe adamuridaguni. Lau wadügüni le, ladügüba lun hasandiragun nibureintiña houngua kei aban hádangiñe lumutuniña Heowá (Sal. 35:18).

16, 17. a) Ka uagu súdini lubéi lun habadiseirun isaanigu? b) Ka luwuyeri ugundani gayaraabei hasandiruni agübürigu ha eseriwidubaña lun Heowá? (Ariha humóun iyawaü to lídanboun lagumeseha arütíkulu).

¹⁶ Hagüriarúniwa isaanigu “lun gaganbadi hamá” luma lun larufudahóun houn kei labusenruni Heowá ligía aban lídangiñe wadagimanu le súdinitimabei le hadügübei agübürigu ha eseriwidubaña lun Heowá (Efe. 6:4; Sal. 127:3). Lidan meha aban néchani le deregeguaalibei lun Bungiu hágurahoua hasaanigu ísüraelina. Mítaranti lidan hakesin irahüñü ha águrahoutiña hadan iduheñu ha eseriwidubaña lun Heowá. Lanwoun lira, ínsiñeni le asandirúbei luagu Heowá luma luagu inarüni mibihínwati keisi alagan. Lúmagiñe weyu le nasirua lan irahü, lunti háfaagun agübürigu lun híderaguni hasaani lun lani lan Kristu disipulu, lun lederegeruni libagari lun Heowá badisei ligíame. Ligía súdinitimabei. Ka uagu? Ladüga hederegeragun houngua lun Heowá, habadiseirun luma heseriwidun lun lau úaraguni ligíaba adüga lun hesefuruni habagari lídanme óunwenbu asufuriruni le yarafaalibei (Mat. 24:13).

¹⁷ Lidan furumiñeti párafu, ayanuhatiwa tuagu aban íbiri gíritu Blossom Brandt. Dan le meha tariñagunbei houn tagübürigu busén tan tabadiseirun busentiña meha lun hachoururuni aranseru lan lun teseriwidun lun Bungiu, aban katei le lunbei súdini lan lidan tibagari. Dan le chouru hamaali aranseru lan aba híderagunu lun tabadiseirun. Guñoun le lubaragiñebei luéyuri tabadiseirun aba ladügün túguchi aban katei le hanarimeti lubuidun. Abahüdahatu íbiri Blossom: “Aba ladügün lun wáhuduragun sun wagía, lárigiñe aba lafurieidun. Aba lariñagun lun Heowá luagu gunda lan ladüga derege taali lan lisaani tibagari lun teseriwidun Lun”. Lóugiñe 60 irumu lárigiñe, ariñagatu íbiri Blossom: “Gayaraati nachoururuni hun mabulieidun nubéi lan, sun wínwangidina lan, furíei le ladügübei núguchi guñoun ligía”. Ayumahatiwa lun hasandiruni sun agübürigu ugundani le lanügübei harihiniña hasaanigu ederegerei habagari lun Heowá badisei hagía.