1, 2. a) Ka hadügübei fiu agübürigu Gefentiña dan le hariñagun hasaanigu houn busén hamá habadiseirun? b) Ka uagu hálügüdüwa ha lúnbaña habadiseirun anhein derege hamaali lubéi habagari lun Heowá? (Ariha humoun iyawaü to lídanboun lagumeseha arütíkulu).

ABA tararamun María úara hama ha lúnbaña habadiseirun. Haríaguñoun tagübürigu óunabei bián álügüdahani le ladügübei íchuguti yanu. Murusun dan lárigiñe aba tabadiseirun nibureintu to.

² Ma hagundan tagübürigu lau derege taali lan tibagari lun Heowá ani badisei tuguya. Gama lumoun, málügili lúmagiñe tasandirun túguchu murusun idiheri. Ani álügüdaguatu tungua: “Nibureingiru yebe lun tabadiseirun, gunfuranda tumuti san buidu le lunbei tadügüni? Buídubei hamuga san lun tagurabahan?”. Adüga hamuti burí agübürigu álügüdahani le houngua dan le hariñagun hasaanigu houn busén hamá habadiseirun (Apu. 5:5). Kamaniti lasuseredun le lugundun ederegeraguni unguaü luma badisei ligíatima bián katei súdiniti le lunbei  ladügüni aban kristiánu (ariha huméi rekuáduru “Derege humaali san hibagari lun Heowá?”).

3, 4. a) Ka hénpulu layusurubei apostolu Féduru lun lafuranguagüdüni súdini lan badisei? b) Ka idan genegegua lan badisei luma tadügǘn árüka?

³ Adimurehati apostolu Féduru luagu tadügǘn árüka ani ariñagati: “Dúnati ligía, ítara liña hamuga kei lidunarina badisei guentó, le ídangiñebei wanügǘwa lun wasalbarun” (aliiha huméi 1 Féduru 3:20, 21). Seriwitu meha árüka lun harihini sun gürigia derege laali lan Noé libagari lun ladügüni lugundan Bungiu. Afiñeti meha Noé luagu Heowá ani adüga lumuti le lariñagubei lun. Ligía lásügürünbei lau ibagari lídangiñe Guran hama liduheñu. Ka labuserunbei Féduru larufudahan woun?

⁴ Dan le harihinbarun gürigia árüka aba hasubudiruni afiñe lan meha Noé luagu Bungiu. Ligiaméme asuseredubei dan le harihin gürigia somu gürigia abadiseira, subudi hamuti ábanhali lan disipulu kristiánu ani derege laali lan libagari lun Heowá ladüga lafiñerun luagu lani Kristu sákürifisiu luma águyugua lan lídangiñe óunweni. Ítara kei Noé, gaganbaditiña gürigia ha deregeguaaña houngua lun Bungiu ani gúnfulitiña lau dasi le líchugubei houn. Sefu lumuti Heowá Noé dan le ladagarunbei Guran. Ítarameme, danme le lagumuchun lau ubóu wuribati le lesefurubaña lubúeingu ha badiseihaña ani úaraguatiña lun (Mar. 13:10; Aruf. 7:9, 10). Ligía súdini lubéi ederegeraguni unguaü luma badisei. Ha adarasahabaña lun habadiseirun híchuguñein hemenigin lun hawinwandun lun súnwandan lidan denchaü.

5. Kaba wakutiha lidan arütíkulu le?

⁵ Kei le súdini lubéi badisei, buídubei lun wóunabun ǘrüwa álügüdahani. Furumiñe, ka tarufudahabei Bíbülia luagu badisei? Libiaman, ka burí katei lunbei ladügüni gürigia  lubaragiñe labadiseirun? Ani lǘrüwan, ka uagu lunti lubéi gabaroun wamani súdini lan badisei dan le wíchuguña lan aturiahani tídangiñeti Bíbülia houn wasaanigu o houn amu gürigia?

6, 7. a) Afuranguagüda huméi le mini lubéi labadiseiha Huan. b) Ka badisei móubati ladügübei Huan?

⁶ Le furumiñeti wéiyaasu tayanuhan Bíbülia luagu badisei tayanuhaña luagu meha labadiseiha Huan le abadiseihabei (Mat. 3:1-6). Gürigia ha meha ñǘdünbaña lun labadiseiruniña Huan adüga hamuti lun harufuduni asakürihaaña lan ladüga maganbadi hamá lun Lilurudun Moisesi. Gama lumoun, lunti wasubudiruni amu lan lébunabei badisei súdinitimati le ladügübei Huan. Ibiha lumuti meha lubuidun chansi lun labadiseiruni Hesusu, le liráü Bungiu (Mat. 3:13-17). Kei mafigoun lubéi Hesusu, memegeirunti meha lasakürihan (1 Fe. 2:22). Le linarün katei, aba labadiseirun lun larufuduni aranseeli lan lun lederegeruni libagari lun ladügüni lugundan Bungiu (Ebü. 10:7).

⁷ Lidan sun dan le lapurichihanbei Hesusu, badiseigüdatiña meha lani disipulugu amu gürigia (Huan 3:22; 4:1, 2). Ítara kei badisei le meha ladügübei Huan, ítara liña meha giñe le hadügübei lani Hesusu disipulugu, arufudati asakürihaaña lan gürigia ladüga magunfulirun hamá lau lilurudun Moisesi. Gama lumoun, lárigiñe lounwen luma láguyugun Hesusu, aba lasansirun le mini lubéi habadiseirun ha busenbaña hafalaruni.

8. a) Ka gumadi líchugubei Hesusu houn lani disipulugu lárigiñe láguyugun? b) Ka uagu lunti lubéi habadiseirun kristiánugu?

⁸ Lidan irumu 33, arufudaguati Hesusu lungua lárigiñe láguyugun houn hóugiñe seingü san wügüriña, würiña ani másiñati añahein lan meha irahüñü haganagua. Háfuga ñein lariñaga: “Heiba lubeiti habügürü gürigia ha lílana sun fulasu, adüga humaña nánime disipulugu; badisei humaña lidan liri Úguchili, luma liri Irahü, luma liri sífiri sandu. Arufudaha huguyame houn lun gaganbadi hamá lun sun le uágubei nariñaga hun” (Mat. 28:19, 20, TNM; 1 Kor. 15:6). Genegeti añahein lan meha saragu lani disipulugu ñein dan le líchugunbalin gumadi le lun hadügün disipulugu. Ariñagati giñe Kristu sun lan le busenbei líchaagun lungua lábugiñe lererehan mosu labadiseirun (Mat. 11:29, 30). Ani ha busenbaña hagundaaragüdüni Bungiu lunti gunfuranda hamani le lunbei lagunfuliruni Hesusu lidan lisuuni Bungiu. Ítararügüñein gayara lan habadiseirun ani ligíarügüñein badisei le aubei lagundaara Heowá. Anihein saragu ariñahani tidan Bíbülia le achoururagüdübalin gunfuranda hamuti lan meha ha afalarubalin Kristu lidan furumiñeti sígulu ka lan mini lubéi badisei ani madarasahantiña lun habadiseirun (Adü. 2:41; 9:18; 16:14, 15, 32, 33).

9, 10. Ka wafurendeirubei luagu badisei lidan likesin etiopíana luma lidan likesin apostolu Pábulu?

⁹ (Aliiha huméi Adügaü 8:35, 36). Ariha waméi likesin aban wügüri etiopíana le meha adügagubei lungua huríume ani lagiribuduña meha lúbiñoun Herusaléngiñe lárigiñe lidin áhuduragua lun Bungiu. Aba lariñagun aban ánheli lun Felipe lun “líchuguni uganu luáguti Hesusu lun”. Ida liña lóunabun etiopíana ligía? Gunfuranda lumuti lisudinin lun lánharun lun Hesusu kei Labureme. Kei aranseñu liña lan meha lun ladügüni le lamuriahabei Heowá hámagiñe kristiánugu, aba labusenrun labadiseirun ouraméme ligía.

¹⁰ Akutiha waméi likesin ábanya wügüri, le meha éibaahabaliña kristiánugu. Huríu  meha ligía ani deregeguaaña meha lílana néchani le houngua lun Bungiu. Gama lumoun, féridi hamaali meha huríu umadaguaü espechaliti le hámabei luma Heowá. Hanarimeti meha líchaagun wügüri ligía lungua lun hechun huríu. Lau sun lira, ruti Hesusu aban uganu lun siélugiñe. Ánhati wügüri ligía lun ídemuei le líchugubei aban kristiánu gíriti Ananíasi lun, “aba lásaarun, aba labadiseirún” (Adü. 9:17, 18; Gal. 1:14). Lárigiñe subudiwati huríu ligía kei apostolu Pábulu. Ariha wamuti aba lan labadiseirun lárigiñe gunfuranda lani le lunbei lagunfuliruni Hesusu lidan lisuuni Bungiu (aliiha huméi Adügaü 22:12-16).

11. a) Ka ínchahabaliña aturiahatiña Bíbülia lun habadiseirun? b) Ida liña wasandiragun woungua dan le warihini habadiseirun ha deregeguaañabaña houngua lun Bungiu?

¹¹ Uguñe weyu, susereti aban katei ítarati houn aturiahatiña Bíbülia, dandu houn ha nibureingiña kei houn ha derebuguhaña. Ha hínsiñehabubaña tun lererun Bungiu lau sun hanarün ani afiñe hagía luagu le tariñagubei busenbaña hederegeragun houngua lun Heowá badisei hagía. Lidan sun adamurini, rúwati aban yanu espechaliti houn ha lúnbaña habadiseirun. Wéiriti hagundan gefentiña luagu Heowá dan labadiseirun aban aturiahati Bíbülia. Gúndaatiña giñe agübürigu kristiánu dan le harihiniña hasaanigu abadiseira. Lidan irumu lánina eseriwiduni 2017, badiseitiña hóugiñe 284.000 gürigia, arufudei derege hamaali lan habagari lun Bungiu (Adü. 13:48). Furanguti gunfuranda hamani badisei lan aban lídangiñe katei le lunbei hadügüni sun kristiánugu. Gama lumoun, ka meha lunbei hadügüni lun gayara lan habadiseirun?

12. Ka lunbei ladügüni aban aturiahati Bíbülia lubaragiñe labadiseirun?

¹² Lubaragiñe badisei, mosu lafurendeiruni aturiahati Bíbülia inarüni luáguti Bungiu, luagu lisuuni luma luagu le ladügübei lun lasalbaruniwa (1 Tim. 2:3-6). Línchahabei lafiñen lun lígirun furumiñeguarügü katei le aubei magundan lan Heowá lau luma lun gaganbadi lan lun ladundehan le richabei (Adu. 3:19). Chóuruti meresibirun lubéi lan Bungiu gürigia le anihaguabei adüga katei mabuidunti (1 Kor. 6:9, 10). Ani úati buídurügü lan gaganbadi lan aturiahati lun lilurudun Bungiu luáguti laruman ibagari. Lunti giñe ladamuridagun, gabügürügua ligíame lapurichihan luma larufudahan houn amu. Ariñagati Hesusu hagunfuliruba lan lani disipulugu lau dasi le (Adü. 1:8). Lárigiñe ladügüni aturiahati sun le, gayaraahalime lafurieidun lun Heowá lábugua lun lederegeruni libagari lun, ani lárigiñe, ábame labadiseirun hagibugiñe súngubei.

13. Dan le wíchugun aturiahani tídangiñeti Bíbülia, ka uagu lunti lubéi gabaroun wamani ha lan busenbaña lun hadügagun houngua kristiánugume mosu lan habadiseirun?

¹³ Dan le awanha lan íderaguaña wasaanigu hama ha aturiahabarun Bíbülia wama lun hadügüni le mégeiwabei lidan heseriwidun lun Heowá, lunti gabaroun wamani súnwandan mosu lan habadiseirun lun gayara lan hafalaruni Kristu. Ítara, ménrengunbei woun wáluahan chansi lun wayanuhan hama luagu lisudinin lederegeragun gürigia lungua lun Bungiu luma lun labadiseirun. Chóuruti busenbadiwa lan lun hawanserun lidan heseriwidun darí lun habadiseirun.

14. Ka uagu méredun wabéi hawagu aturiahatiña Bíbülia lun habadiseirun?

¹⁴ Moun lumuti hafosuruni lagübürigu aturiahati lun labadiseirun, ni íbirigu, ni le arufudahabei lun lugundun íbini Heowá, madügün lumuti katei le (1 Huan 4:8). Lubaragiñe lira, dan le warufudahani inarüni  lun lunti wafuranguagüdüni súdini lan gamadagua lan luma Bungiu. Ínsiñeni le lasandirubei luagu inarüni luma labusenrun ladügüni sun le lunbei ladügüni aban kristiánu ligía lunbei línchahani lun labadiseirun (2 Kor. 5:14, 15).

15, 16. a) Anihein san aban irumudiri le uáguti gayara lan lariñawagún ligíarügüñein lan dan lun labadiseirun gürigia? Afuranguagüda huméi. b) Íbini badiseihali lan aturiahati Bíbülia lidan amu relihión, ka uagu mosu lubéi labadiseirun kei gefenti luagu Heowá?

¹⁵ Átiribei san irumu lau aturiahati lun gayara lan labadiseirun? Úati irumudiri le uáguti gayara lan lariñawagún ligíarügüñein lan dan lun labadiseirun gürigia lugundun ámuñegueinarügüti ligaburi lawanserun kada gürigia. Gíbetiña badiseitiña dan le nibureingiña lan ani úaraguatiña lun Heowá lidan sun habagari. Añahein amu furendei hamuti inarüni dan le derebuguhaña lan —añahein hádangiñe kéiburi lóugiñe 100 irumu hau— ani ligíaali gunfuranda hamani súdini lan lun habadiseirun.

¹⁶ Mosu habadiseirun iseri disipulugu íbini badiseihaña lan lidan amu relihión. Ánhati Heowá lun badisei dánrügü hasubudiruni gürigia inarüni luagu lugundan. Ligía asuseredubei tun aban würi to barüharu kéiburi 80 irumu. Kei badisei tubéi lidan ámuñegueinarügü relihión lidan sun tibagari, aba tálügüdünu íbiri to arufudahaboun tun anhein mósuya lubéi tabadiseirun. Aba takutihan íbiri fiu bérusu tídangiñeti Bíbülia tuma. Ábati gunfuranda tani gürigia tuguya le tariñagubei Bíbülia luagu badisei ani murusun dan lárigiñe aba tabadiseirun (aliiha huméi Adügaü 19:3-5).

17. Ka katei uágubei mosu lan lasaminarun gürigia lidan luéyuri labadiseirun?

¹⁷ Aban weyu lánina ugundani luéyuri labadiseirun gürigia. Lau sun lira, lunti lasaminarun luagu sun áfaaguni le lunbei ladügüni lun lagunfulirun lau leseriwidun lun Bungiu. Mámaali houngua habagarida lani Hesusu disipulugu, habagariduña “lun le óunwebei hawagu, sará ligía lídangiñe óunweni” (2 Kor. 5:15; Mat. 16:24).

18. Kaba wakutiha lidan leweñegua arütíkulu?

¹⁸ Luagun burí katei le tasaminara túguchu María dan le tadügübalin álügüdahani le buga iridúbei lidan lagumesehan arütíkulu. Anhein gasaanigu hubéi, másiñati álügüdagua humá hungua: “Aranseeli san nisaani lun labadiseirun? Subudi laali san inarüni buidu lun gayaraahali lan lederegeragun lungua lun Heowá? Lunti funa san laturiahan áluaha ligíame aban wadagimanu lubaragiñe labadiseirun? Anhein san adüga aban figóu wéiriti lárigiñe labadiseirun?”. Wakutihabei álügüdahani le lidan leweñegua arütíkulu. Warihibei giñe ka lan lunbei hadügüni agübürigu lun maweirin lan harabachun luagun aban saminaü libügürü badisei.