LIDAN uburugu Graz (Austria) naweirida. Dan meha sedü lubéi irumu nau, aba nounahóun tidan aban leskuela lun larufudahóun katei lánina relihión nun. Wéiritu nanigi luagu narihini liwiye hóuserun fádirigu hama monha. Ligía aba lubéi namuriahan tuma núguchu lun tasagarunina ñéingiñe, ani ligía asuseredubei lubaragiñebei nagunfulirun aban irumu ñein.

Lárigiñe, aba nounahóun aturiaha tidan aban leskuela le ñein lubéi heredera aturiahatiña. Aban guñoun, aba lachülürün núguchi anügana lun woudin lidoun aban fulasu chóuruti ladüga tachüühóuña lan meha bonba luagun uburugu Graz. Ábati woudin aramudagua lidan aban aüdü gíriti Schladming. Dan le wachülürünbei, aba wánhiñuragunu burichi ani murusun oura lárigiñe aba tagünrinchawagun sunsuinagubei. Aban weyu, aba haduuhan balu nuagun luma tuagun nagütü tídangiñe fiu awión to ǘnabuti táhamahan dan meha le awanha lubéi lidan tufulurin-agei waban. Dan lagumuchubei wuribu sanditiwa charaaña lan dandu gumadimatiña kei tábutigu burí ligilisi woun.

Gumesetu aban Gefentu ayanuha tuagu Bíbülia tuma núguchu lidan irumu 1950. Aganbaha numuti meha le hayanuhabei ani ñǘdüntina lidan fiu adamuridaguni úara tuma núguchu. Chouru tumuti meha núguchu anihein lan inarüni hama gefentiña luagu Heowá, ligía tabadiseirunbei lidan irumu 1952.

Genegeti aban lan meha sétanu hani hiñaruñu wéinamugaaña damuriguaü le ñein lubéi woudin. Gama lumoun, lárigiñe, ñǘdüntiwa lidan aban damuriguaü le ñein habéi saragu nibureintiña. Anati lira, menege lumuti meha aban sétanu hani hiñaruñu wéinamugaaña! Dan le wagiribudunbei uburugun Graz, aba nagumeserun abasiha lidoun sun adamuridaguni, ani murusun dan lárigiñe, aba nachoururuni nungua nafurendeiruñein lan inarüni. Aba giñe níchugun fe aban lan Bungiu le macharati houn lubúeingu Heowá. Mígirun lumutiwa íbini wasandirun wábuguarügüñadiwa lan dan le wásügürün lídangiñe lénrengunga (Sal. 3:5, 6).

Busentina meha nabahüdaguni le nafurendeirubei houn amu, ábati nagumeserun hámagiñe níbirigu. Máisturugu meha gádürü níbugañanu ha hiñaruñu ani mawinwandunhaña meha wábiñe. Aba nidin lidan  aüdü le ñein lubéi hawinwanda ani aba nínchahaniña lun haturiahanu Bíbülia. Lau lásügürün dan, gefenhaña meha luagu Heowá sun níbirigu.

Dan meha barühadina kéiburi bián dimaasu apurichiha tidan burí muna, aba nayanuhan tuma aban hiñaru to meha gúnfuliharu lóugiñe darandi irumu ani gumesetiwa aturiahoun Bíbülia úara. Aba tawanserun ani badiseitu. Adüga lumuti giñe tani weiriei hama bián tisaanigu ligiaméme. Ídehati naturiahan tuma lun lederebugudun nafiñen. Ka uagu? Ladüga michugúnwati meha aturiahani tídangiñeti Bíbülia nun, ligía mosu lubéi meha naranserun buidu. Mosu meha gunfurandanani ariñahani furumiñe lubaragiñe narufudahan tun. Adügati naturiahan saragu lúntima gunfuranda nani inarüni buidu. Aba nederegeragun nungua lun Heowá ani badiseitina lidan irumu 1954.

Lidan irumu 1955, ñǘdüntina Yámani, Faransu luma Alundu lidan adamurini burí le ñein lubéi hachülüra íbirigu ha lídangiñetiña ámuñegueinarügü ageiraü. Alundu nasubudirei íbiri Albert Schroeder, le meha arufudahabei tidan Leskuela Galaadü ani lau lásügürün dan aba ligíaali lan aban hádangiñe lílana Sétanu le Arihibei lau Hawadigimari Gefentiña luagu Heowá lidan sun Ubóu. Éibuga wamuti fulasu le ñein lubéi larufudahóua Binadu ílagu Alundu, ábati larufudun íbiri Schroeder fiu lídangiñe binadu abürüdǘni tídangiñe Bíbülia woun. Afuranguagüda lumuti woun anihein lan liri Bungiu lidan létüra ebüréu ñein ani weiri lan tisudini dugumedu tuguya. Hingí lumutu katei lira nanigi ani adügati lun lederebugudun nafiñen. Busentimahadina meha nasubudiragüdüni inarüni le tídanbei Lererun Bungiu houn gürigia.

Gumesetina eseriwida lidan dan dayarüti weyu 1 lidan eneru, irumu 1956. Gádürü hati lárigiñe, aba namisurahóun lun neseriwidun kei prekursora espechalitu Austria lidan aban fulasu gíriti Mistelbach ani úatiña meha gefentiña ñein. Anihein méhati aban turobuli: ámuti meha tigaburi nupaaná nuéi. Disinéfu meha irumu nau, ánheinti tuguya 25. Uburuguna meha nuguya, ánheinti tuguya áüdübüna. Saragiatu meha, ánheinti nuguya tárüti meha násaarun. Dan meha laguñeedun, tárüti meha narumugun, ánheinti tuguya róungiatu. Keiti falá wamani adundehani le tídanbei Bíbülia, ibihatiwa waransehani sun waturobulin ani gúndaatiwa lidan weseriwidun úara.

Le linarün katei, mosu meha giñe wagagibudagun luma amu burí turobuli le hénrengutimati. Gayaraati íbini lariñawagún éibaahoua wamá, gama lumoun, mígirun lumutiwa Heowá wábugua (2 Ko. 4:7-9). Aban weyu, dan le wapurichihaña lubéi lidan aban liraüraü aüdü, aba hígiragüdüniña gürigia halügüniña ounli lun hágüürüniwa. Aba hegeyedaguniwa ounli gáñitiña hagía ani aba háwouhan wau arufudaha haméi hari woun. Aba tárügüdüni nupaaná núhabu, darí lun namuriahan luma Heowá: “Adügabá fulesei woun, lun háfaraguniwa ounli ha hilagubei furesegueina danme le hachubarun wawagun”. Sódini, dan le yarafaaña wawagun, kéiburi aban méturu, aba hararamagun ábati hánhinhani hali ani aba houdin. Sanditiwa aba lan lesefuruniwa Heowá. Lárigiñe lira, apurichihatiwa lidan sun aüdü ligía ani gúndaatiwa ladüga haganbuniwa gürigia. Másiñati aba lan taweiridun hanigi ladüga mágüürün hamaniwa ounli o ladüga wasigirun apurichiha íbini susere lan meha sügǘ wuribati ligía woun. Lau lásügürün dan, aba hadügagun fiu hádangiñe houngua gefentiñame luagu Heowá.

Aban weyu, ábaya wagagibudagun luma amu turobuli. Aba labacharuadun tabureme muna to meha ídanboun wawinwanda ani aba lachülürün ariñageina láfaraguaadiwa lan hilagubei ladüga nege wañawarihan houn gürigia. Áfaaguatu yebe lani weiriou lun tagalumaruni, siñá tumuti. Aganbagu waña meha lun sun le hariñagubei lúmagiñe tídangiñe warumun to íñuboun.  Aba wíchaagun haláü luagu bena lau lóufudagun, ábati wapakühanu wálagu. Dan le wadaarubalin bena, aba warihin lamudeiruñein lan eyeri ligía esütépu tau aban óunwenbu gusiñu lúhaburugu. Ábati wanurahan luéigiñe bena le tanagangiñebei muna, hiñugua waméi lueirin tufulurin-agei muna tuguya tau sun wálagu, chouru wamuti meha magiribudunhadiwa lan ñeinhin.

Ñǘdüntiwa áhayaha aban rumu tidan aban haban chülüdügütiña. Rédeitiwa ñein kéiburi aban irumu ani ídehati lira lidan wapurichihan. Kei meha áüdübuñoun lan haban chülüdügütiña tuguya, añahein meha hádangiñe gürigia ha aturiahabarun Bíbülia wama busentiña haturiahan ñein. Lidan murusun dan, aba wagumeserun adügei adamuridaguni le gíribei Taturiahóun Bíbülia lidan Damuriguaü luma Taturiahóun Garüdia Awisahatu lidan warumun. Óundaraguatiwa meha kéiburi 15 gürigia ñein.

Rédeitiwa lidan fulasu le gíribei Mistelbach lóugiñe aban irumu. Lárigiñe, aba nounahóun eseriwida lidan fulasu le gíribei Feldbach labadinagua suru luma fulasu le ñéingiñe lubéi laboucha weyu libiti uburugu Graz. Iseri meha nupaaná lidan apurichihani ani úati meha damuriguaü ñein. Wínwantiwa meha lidan aban liraüraü rumu lidan libiaman túbanana aban muna to adügǘboun lau burí durusu wewe. Agililihati meha garabali labadinaguagiñe durusu wewe ligía ani mosu meha wáchahan periodiku ñeinhin lun wadouruni. Mosu meha giñe wadaburuni duna le wemegeirubei lídangiñe aban welu. Gama lumoun, huuti meha sun áfaaguni le wadügübei lugundun saragu hati lárigiñe, gumeseti aban sétanu ñein. Ani lau lásügürün dan, aba gefentiña hamá luagu Heowá 30 hádangiñe gürigia gaduheñuguatiña ha meha aturiahabarun Bíbülia wama.

Adügati sun sügǘ burí lira lúntima weiri lan eteingiruni le nasandirubei luagu ídemuei le líchugubei Heowá houn sun ha íchugubalin Larúeihan lidan furumiñeti lúgaaru lidan habagari. Súnwandan líderagubadiwa lan Heowá, íbini ua lan somu gürigia le gayaraati líderaguniwa (Sal. 121:1-3).

Lidan irumu 1958, adügǘwati aban adamurini le ñein lubéi burí hachülüra íbirigu ha lídangiñetiña ámuñegueinarügü ageiraü lidan uburugu Newayoru lidan fulasu le ñein lubéi táhurerua bali gíriti Yankees ani le aban Polo Grounds. Aba nabuinchagüdün gárada lun nidin lidan adamurini ligía, ábati nalügüdǘniwa tídangiñe sukursáli anhein hínsiñe lubéi hamuga nun nidin lidan külase 32 tani Leskuela Galaadü. Maweiyasunbadina meha ariñaga uá lan lun aban agunbirahani ítarati! Ábati nariñagun “anha” lau lóufudagun.

Lóubagiñe meha íbiri Martin Poetzinger nañuura lidan külase ligía. Wínwanhali meha íbiri le lirun burí sügǘ lidan fulasu le hayusurubei nasi lun hadaürüniña gürigia. Ani dan lárigiñe, aba ligíaali lan aban hádangiñe lílana Sétanu le Arihibei lau Hawadigimari Gefentiña luagu Heowá lidan sun Ubóu. Kei meha ayanuha  wabéi iñeñein yámani ani lídanñein meha merigen külase, anihein meha dan lagülülühan nun ariñageina: “Erika, ka san mini lubéi le?”.

Lidan lamidangua dan le ladurarubei külase, aba lariñaguni íbiri Nathan Knorr woun haliñounba lan lóunahoua kada aban wádangiñe. Ounahóuatina ageiroun Paraguai, keiti wéinrügügili lan meha irumu nau lidoun dan ligía, mosu meha laseinirun núguchi lun gayara lan nebelurun lidoun ageiraü ligía. Aba laseinirun núguchi ani chülütina ageiroun Paraguai lidan irumu 1959. Nawinwanduba meha lidan uburugu Asunción tidan muna to ñein lubéi meha hawinwanda misionerugu, ani ámuboun meha nupaaná.

Másügürüngili meha saragu dan dan le nasubudirunbalin Walter Bright, aban meha misioneru ligía le lídangiñeti külase 30 tani Leskuela Galaadü. Aba wamarieidun ani úara wagagibudagua luma burí sügǘ hénrenguti lidan wabagari. Sagü meha wagagibudagun luma turobuli, ábaha waliihani Isaíasi 41:10, le ariñagubei: “Manufudedabá, ladüga anahein buma; manufudedabá au Bubungiutebei. Rútina erei bun”. Haritaguagüda lumutiwa füramasei le, maweiyasunbei lan Heowá acharara woun anhein wíchiga Larúeihan lidan furumiñeti lúgaaru lidan wabagari, áfaagua wagíame lun úaragua wamá lun.

Dan lárigiñe, aba wounahóun eseriwida lidan aban fulasu le yarafabei lun láfadaragun ageiraü Paraguai luma Bürasíli. Aba hínchahaniña tábutigu ligilisi nibureintiña ha ñéinbaña lun hachamuragun dübü tuagun muna to ñein lubéi meha hawinwanda misionerugu ani wuribaaru meha. Dan le lagumeserunbei Walter aturiahoun Bíbülia luma hábuti súdaragu, aba meha ladügüni ábuti ligía sun liyaraati lun lachoururuni ñéinbaña lan súdaragu óunigiroun waban luagu aban dimaasu. Ani lúmagiñe dan ligía úaali meha ni aban añawarihati woun. Murusun dan lárigiñe, aba hóunahaniwa tidoun aban muna buídutimatu lidan le aban louba láfadaragun ageiraü. Buiti meha katei lira lugundun gayaraati meha ladügǘn adamuridaguni lidan ageiraü Paraguai luma Bürasíli. Aniheinhali meha bián damuriguaü ñein dan le wounahóunbei eseriwida lidan amu fulasu.

Ariñagaaña meha surusiagu nun siñabei lan nagaraüdün, ligía taweiridun wanigi dan le wíchugunbei fe lidan irumu 1962 luagu dageinañadina lan. Aba woudin awinwanda lidan fulasu le gíribei Hollywood, Florida (Meriga) yarafa houn liduheñu Walter. Kei mosu lubéi meha wetenirun houn tílana waban meseriwiduntiwa kei prekursorugu luagu fiu irumu. Lau sun lira, sigitiwa íchigei Larúeihan Bungiu lidan furumiñeti lúgaaru lidan wabagari (Mat. 6:33).

Dan wachülürünbei Florida lidan unsu-hati irumu 1962, aba taweiridun wanigi luagu aban katei le warihubei ñein. Lidan meha ámuñegueinarügü fulasu hapurichiha íbirigu harutiña hawéi íbirigu wuritiña, ani madügün hamuti adamuridaguni lidan aban ladüga fánreinguañu haña lan meha gürigia hawariuagua luagu harasan. Kei ua lubéi himei lan Heowá aban rasa luéi aban, másügürünti saragu dan lubaragiñe hagidaruni igaburi le hawariuagua. Arihúati Heowá lan adügübei lun ladügǘn asansiruni le, lugundun aniheinhali saragu damuriguaü lidan fulasu ligía.

Híruti aba lan ladagarun kánserü lábulugu Walter ani aba lounwen lidan irumu 2015. Buiti meha ligaburi nani weiriei ani wínwantiwa úara luagu 55 irumu, hínsiñeti meha Heowá lun ani íderaguati saragu íbirigu. Ayumahatina narihini danme láguyugun lau átuadi buiti (Adü. 24:15).

Wéiriti eteingiruni le nasandirubei luagu seriwihadina lan lidan dan dayarüti lóugiñe 40 irumu luma luagu resibihadiwa lan saragu abiniruni le íchugubei ugundani dandu nun kei lun Walter. Kéiburi warihini habadiseirun 136 hádangiñe gürigia ha aturiahabarun Bíbülia wama. Inarüni sügütiwa lan lídangiñe lénrengunga, ani marihin wamuti lira kei aban resun lun wígiruni weseriwidun lun Heowá. Lubaragiñe lira, adügarügüti lúntima wayarafadun lun Heowá afiñe wagía luagu laranserubei lan katei lidan dan lau igaburi le buídutimabei. Ani ítara liña ladügüni súnwandan (2 Tim. 4:16, 17).

Lau sun áluga nan saragu luagu Walter, íderagua lumutina neseriwidun kei prekursora lun nárügüdagun nungua. Ariha naali nungua íderagua lánina narufudahani inarüni houn amu dántima le nayanuhan luagu águyuguni. Furanguti machara lan Heowá nun. Óunigira lumutina saragu sügǘ luéi le abahüdagua naalibei. Gúnfuli lumuti le füramase lubéi lugundun íderagua lumutina, ruti erei nun ani ágüdaha lumutina lau lúhabu le gagañeiradibei (Isa. 41:10).