1. Ka meha gádanbaliña kristiánugu lidan furumiñeti sígulu?

LABADINAGUA burí irumu 62 luma 64, abürühati apostolu Féduru houn “lánigu Bungiu ha chagagubaña bóugudi luéi hageira lóubawagu Pontu, Galasia, Kapadósia, Asia luma Bitinia” (1 Fe. 1:1). Lídangiñetiña meha ámuñegueinarügü fulasu íbirigu hagía. Mégeitiña meha dǘgüdaguaü luma adundehani lugundun hagagibudaguña meha luma éibaahouni o “lidere óuchawaguni” kei aubei lagúara Féduru lun. Ani hawinwanduña meha lidan aban dan hénrenguti. Abürühati Féduru: “Yarafaali lagumuchun ubóu”. Ítara liña, lagünrinchawaguba meha Herusalén lubaragiñe lásügürün diisi irumu. Kaba meha íderaguaña lidan dan hénrenguti ligía? (1 Fe. 4:4, 7, 12).

2, 3. Ka uagu lariñaga Féduru houn kristiánugu lun heresibiragun houngua buidu? (Ariha huméi dibuhu le lídanbei lagumeseha arütíkulu).

² Laganagua katei le lariñagubei Féduru houn kristiánugu ariñagati giñe: “Resibigua humá hungua” (1 Fe. 4:9). Dan le layusurún dimurei “resibigua humá hungua” lidan güriegu, layanuhóuña luagu “larufudúniwa ínsiñehabuni luma areini houn gürigia ha ibidiñetiña woun”. Gama lumoun, ariha waméi dan le lan lariñagunbei Féduru houn kristiánugu líledi lun heresibiruniña amu buidu, ariñagati houn “resibigua humá hungua”, mini lan lira mosu lan heresibiruniña gürigia ha subudibaña houn ani ha harihubaña súnwandan. Kaba meha buiti lanüga lira houn?

 ³ Líderagubaña meha lun lídantima hamá aban. Samina wamá wawouguoun. Ma inarüni mabulieidun wamani lubuidun dan le wásügürübei dan le lamisurahanbaliwa somu íbiri lúbiñoun? Agia dan le wagía lan agunbirahabei somu íbiri wábiñoun, ma inarüni ídeha lan lira lun buídutima lan wanaagun woungua luma? Ídehati buidu lan weresibiruniña amu lun wasubudiruniña wíbirigu buidu. Lidan meha dan le ídanbei lawinwanda Féduru, súdiniti meha houn kristiánugu lun lídantima hamá aban eibu lásügürün dan. Ligiaméme asuseredubei woun lidan “lagumuhóun dan” le (2 Tim. 3:1).

4. Kaba burí álügüdahani ounabúa lidan arütíkulu le?

⁴ Ka burí chansi wámabei lun weresibiragun woungua buidu? Kaba íderaguawa asansira anhein hénrengu lubéi woun weresibiruniña amu wábiñe? Ani kaba íderaguawa lun idewenegu wamá ha buítiña?

5. Ida luba weresibiruniña gürigia buidu lidan adamuridaguni?

⁵ Dan le lídanñadiwa lan adamuridaguni. Agunbiraha lumutiwa Heowá tau sun lóundarun lun wadamuridagun. Ani busentiwa lun buidu lan hasandiragun houngua sun ha achülürübaña tidoun Luban Wadamuridagun (Rom. 15:7). Súdiniti katei le dántima le luagu lan furumiñeti wéiyaasu lachülüra gürigia. Agunbiraha laali giñe Heowá ani lunti wáfaagun lun lasandirun gürigia ligía lungua buidu, meberesenga ida liña lan laríawagun o ligaburi lasansiragun (Sant. 2:1-4). Ánhawa ariha uá lan ni aban íbiri etenira lun, gayaraati wagunbirahani lun lañuurun wama. Chóuruti leteingirubadiwa lan anhein wíderagua adarirei bérusu tídangiñeti Bíbülia le aliihóubei, wafuredeihanun o wíchugunu agumeiraguagüdüni to aturiahóuboun lun luma katei líbeina lira. Anhein wadüga ítara, gaganbadibadiwa lun adundehani le: “Resibi humaña gaweiyasuntiña lau ugundani” (Rom. 12:13).

6. Kátima lúnbaña wamisurahaniña wábiñe?

⁶ Dan le wagunbirahaniña amu eiga o ata somu katei. Lidan meha tidaani Bíbülia, héchutiña meha gürigia amisuraha amu hábiñoun lun harufuduni houn busén hamá lun gamadagua hamá luma lun ñein lan darangilaü hadan (Agu. 18:1-8; Ali. 13:15; Luk. 24:28-30). Kátima lúnbaña wamisurahaniña? Wíbirigu ha lílana damuriguaü le ñein wabéi, hagía yarafatimabaña woun. Mégeitiwa umadagu ha úaraguatiña ani lunti giñe wanaagun woungua buidu hama súngubei, lugundun wemegeirubaña lidan lidaani lénrengunga. Súdiniti aba lan lasansiruni Sétanu le Arihibei lau Hawadigimari Gefentiña luagu Heowá lóurate taturiahóun Garüdia Awisahatu hama íbirigu ha eseriwidubaña tidan Beteli to Merigaboun lidan irumu 2011 lun latatirun ladáün 6:15 rábounweyu lubaragiñe latatirun ladáün 6:45. Ka uagu ladügǘwa lira? Lun gayara lan hásügürün íbirigu ha dan hámagua. Ídehati lira lúntima lidan hamá aban.

7, 8. Ka lunbei wadügüni lun buidu lan weresibiruniña íbirigu ha achülürübaña íchiga yanu?

⁷ Dan le hachülürün íbirigu íchiga yanu lidan damuriguaü le ñein wabéi, kéiburi íbirigu ha lídangiñetiña amu damuriguaü, óunigiruti sirkuitu, ani anihein dan, lachülürün somu íbiri le tóunahan Beteli, ruti chansi woun lun weresibiruniña buidu (aliiha huméi 3 Huan 5-8). Gayaraati wamisurahaniña eiga o ata somu katei. Ka uagu mamisurahan hubaliña dánmeya le hachülürün?

⁸ Abahüdaguatu aban íbiri merigana: “Barühadina saragu irumu luma nani weiriei agunbiraha íbirigu ha achülürübaña íchiga yanu úara tuma hani weiriou wábiñe. Buiti wásügürüni súnwandan ani héregüda lumuti lira wamadagua luma Bungiu. Masakürihantiwa luagu wadügüni”.

9, 10. a) Kátaña gayaraabei hemegeirun lun wamisurahaniña eredera wábiñe luagu saragu dan? b) Gayaraati san hamisurahan íbirigu amu eredera hábiñe lau sun gudeme hamá ani ñüraü tuguya haban? Abahüdagua humá aban sügǘ.

⁹ Dan le lǘbaña lan wadewenegu. Lidan meha binadu dan, añahein meha saragu gürigia ígiratiña lun harumugun gürigia ha uágutiña hafiñera hábiñe (Hob. 31:32; Fil. 22). Mégeiwati giñe lun ladügǘn ligiaméme uguñe weyu, kéiburi dan le liabin óunigiruti sirkuitu abisidahei damuriguaü, liibe-agei dan,  mégeiti lun híchugun lílana damuriguaü halíaba lan larumuga. Anihein giñe dan, megei hamá ha aturiahabaña tidan burí Leskuela to tíchuguboun lóundarun Heowá hama íbirigu ha ídehabaña lidan tábunawagun Luban Adamuridaguni halíaba lan heredera. Ani dan le lasuseredun hárabaganali, herigini o katei líbeina lira, añahein iduheñu mégeitiña lun lichugún houn halíaba lan heredera darime taranserún haban. Moun lumuti wasaminarun hárügüñanu lan wéinamubaña uban gayara lan heresibirun íbirigu hábiñe. Másiñati giñe gíbeeli lan wéiyaasu hadügüni. Gayaraati san wagunbirahaniña íbirigu lun harumugun wábiñe lau sun gudeme wamá, ñüraü tuguya waban?

¹⁰ Ayanuhati aban íbiri koreana buidu luagu meha lánharun lun burí harumugun íbirigu lúbiñe ha aturiahabaña tidan burí Leskuela to tíchuguboun lóundarun Heowá. Abürühati: “Furumiñe, ásuhatina yebe lun nadügüni ladüga sun liña meha namarieidun ani ñǘraütu meha waban. Íbini ítara, buiti wasandiragun woungua lau weresibiruniña aturiahatiña wábiñe. Ídehati lun warihini weiri lan hagundan maríeitiña dan le heseriwidun lun Heowá, nadagimein hagía úara lun habihini le uágubei háfaagua lidan heseriwidun lun”.

11. Ka uagu gayara lubéi hemegeirun iseri íbirigu ha águyubaña lidoun wani damuriguaü lun weresibiruniña buidu?

¹¹ Dan le háguyun íbirigu lidoun damuriguaü le ñein wabéi. Gayaraati águyarügü hamá awinwanda, hayabiña lan ídeha lidan apurichihani o prekursorugu hamá ha ounahóutiña eseriwida lidan damuriguaü le ñein wabéi. Lidan lagumeseha, güreweiti katei houn súngubei hagía lugundun mosu héchudun luagu aban iseri fulasu luma aban iseri damuriguaü ani háfuga mosu lan hafurendeirun aban iseri iñeñein o igaburi. Ánhaña wamisuraha eiga o ata somu katei o lun houdin asariñaha wama lidan somu fulasu, lídehaba lira lun hadarirun iseri umadagu luma lun héchudun luagu iseri habagari.

12. Ka sügǘ arufudubalin mama lan mosu wadügün saragu katei lun weresibirun amu buidu?

¹² Mama mosu wadügün saragu katei lun wamisurahan amu wábiñoun (aliiha huméi Lúkasi 10:41, 42). Ariñagati aban íbiri nibureingili lan meha tuma lani weiriou dan le hagumeserunbei eseriwida kei misionerugu ani álugatiña luagu le hígirubei hárigiñegua. Abahüdaguati: “Aban rábounweyu, dan le weiri lubéi meha íruni tuagu nani weiriou ladüga áluga tan luagu sun le tígirubei, úati meha ni kata lídangiñe le nariñagubei tun ídehati lun tasandiragun tungua buidu. Kéiburi ladáün 7:30 guñoun, aba waganbun hadaünhan luagu wabenari. Aban meha aturiahatu Bíbülia to ñǘbuinboun íchiga buiti achülürüni woun, ani barüina tiña meha ǘrüwa aransu. Ariñagatiwa tun lun tebelurun, ábati wíchugun tuniñe duna. Lárigiñe, aba wáhuraagüdün ti adüga wagía chuguladi lun watun. Lau sun mariñagadigidiwa lan meha suahili ani tuguya mariñagaditu lun wererun, gama lumoun, lúmagiñe weyu ligía, gumesetiwa adüga umadaguaü hama íbirigu ha lídanbaña ageiraü ligía, ábati gúndaatimahali lan wabagari”.

13. Ka uagu buidu lubéi weresibiruniña amu buidu?

¹³ Hénrenguti san woun weresibiruniña amu? Anhein ítara liña lubéi, másiñati féridihadiwa lan chansi lun wásügürün lubuidun dan hama amu luma lun wadügün umadaguaü le durati. Wagunbirahan amu wábiñoun ábanbei lídangiñe lubuidun igaburi le ídehabei lun masandiragun wamá woungua wábugua. Kati gayaraabei ladügün lun gürewei lan lun somu gürigia lagunbirahan amu lúbiñe? Ariha wamá fiu lídangiñe.

14. Anhein madaani wabéi ani maguraasun wagía lun wamisurahaniña íbirigu wábiñoun o wánharun dan le hamisurahaniwa, ka lunbei wadügüni?

¹⁴ Wadaani luma waguraasun. Gíbeti waberesegun, wagía le lubúeingu Heowá, ani liibe-agei dan, gíbeti wani buligasion. Ligía másiña lubéi añahein lan saminatiña madaani hamá ani maguraasuntiña lun hagunbirahan amu hábiñe. Anhein ítara liña lubéi wasaminarun, háfuga mosu wakutihani ídatima liña lan wayusuruni dan. Gayaraati san wadügün somu asansiruni lidan lóurate wadügüni katei lun gadaani wamá lun wagunbirahaniña íbirigu o  wánharun lun agunbirahani le hadügübei woun? Ariñagatu Bíbülia moun lumuti lan wabulieiduni weresibiruniña amu buidu (Ebü. 13:2). Maribanti wadireirun dan lun wásügürüni hama íbirigu; le linarün katei, ligía lunbei wadügüni. Lun lira, háfuga mosu lanme wadügüni sun wayaraati lun mibe lan dan wawesirun lidan katei burí le maweirinti lisudinin.

15. Ka uéigiñe gayara lubéi wasaminarun siñá lan weresibiruniña íbirigu wábiñe?

¹⁵ Le wasaminarubei wawougua. Susereeli san hun busén humá hamisurahan amu húbiñoun ani madügün humuti ladüga sandí humá siñaguabadün lan hungua lun hetenirun houn buidu? Añahein íbirigu, haburitiña ani kei ibidiñe lan houn kaba lan uagu hayanuha háfuga hanufude hamá mésebebaña lan hadewenegu hama. Añahein amu, saminatiña siñabei lan híchuguni le hayaraabei amu lílana damuriguaü íchiga houn hadewenegu ladüga lougua lan haseinsun. Haritagua waméi mama lan mosu hanarime tan waban, le súdinitimabei, lun haruma tan, kipua ligíame sun katei lidan lubara luma lun wadügün lun hasandiragun wadewenegu houngua buidu.

16, 17. Kaba íchiga darangilaü woun anhein ru lubéi gadewene wamá idiheri woun?

¹⁶ Anhein ru lubéi gadewene wamá idiheri woun, mámarügüñein woun lasusereda. Ariñagati aban wéiyaali lidan afiñeni alunduna: “Gayaraati wasandirun murusun idiheri dan le waransehan lubá weresibirun gürigia wábiñe. Íbini ítara, kei lasuseredun lidan burí amu sügǘ lidan weseriwidun lun Heowá, gíbetimati buiti luma ugundani le wasandirubei sügǘ lau wadiheri. Sügühadina lubuidun burí dan ayanuha hama íbirigu luma ata gafe hama”. Mabulieida waméi buidu lan wáluahani le buídubei houn wadewenegu súnwandan (Fili. 2:4). Hínsiñeti houn hiibe-agei gürigia hadimurehan luagu habagari. Wásügürün dan adimureha hama, ábanbei lídangiñe chansi le buídutimabei wama lun waganbuniña. Abürühati amu wéiyaali lidan afiñeni: “Ídehati namisurahaniña íbirigu ha lídanbaña damuriguaü le ñein nubéi núbiñoun lun buídutima lan gunfuranda nániña ani ruti chansi nun lúntima nasubudiruniña, kéiburi ida liña lan hafurendeiruni inarüni”. Gayaraati wachoururuni luagu buídubei lan wásügürüni hama wadewenegu ánhawa eberesera hau.

¹⁷ Ígiratu meha aban prekursora lun harumugun íbirigu túbiñe ha aturiahabaña tidan burí Leskuela to tíchuguboun lóundarun Heowá ani ariñagatu: “Nidiheritina yebe furumiñe ladüga mibe lan katei núbiñe, yúsuaali ílagu le ñeinbei. Lau sun lira, rutu lani aban hádangiñe arufudahatiña weiriou darangilaü nun. Ariñagatu nun hábiñe lan meha íbirigu gudemetiña ha wéiribei hetenirun lun hamadagua luma Heowá, ítara kei hagía, úmabei buídutima lan hásügürüni dimaasu dan habisidahaniña lílana sirkuitu. Adügati lira lun naritaguni le meha tariñagubei núguchu woun dan meha le nǘbürigidiwa: ‘Buítimati lun teigín fagudiya lau ínsiñehabuni’” (Ari. 15:17). Mébunati lun wadiheridun, lugundun warufudun ínsiñehabuni houn wadewenegu súdinitimabei.

18, 19. Ida liña líderaguniwa weresibiruniña amu buidu lun buidu lan wanaagun woungua hama?

¹⁸ Ligaburi warihiniña amu. Anihein san somu íbiri lidan damuriguaü le wuribati hichügü lun? Másiñati mabusenrun wamá wagunbirahan aban íbiri wábiñoun ladüga mínsiñe lan ligaburi woun o adügaali lan somu katei le mínsiñeti woun ani mabulieidun wamagili. Gama lumoun, anhaün madügün ni kata lun haranseruni turobuli le, maranserunbei.

¹⁹ Ariñagatu Bíbülia líderagubadiwa lan weresibiruniña amu buidu lun buidu lan wanaagun woungua íbini hama wáganiñu (aliiha huméi Ariñawagúni 25:21, 22). Gayaraati líderaguniwa wamisurahani gürigia ligía lun abulieideina wamani waturobulin luma luma lun wagumeserun anaagua woungua luma buidu. Másiñati giñe wagumeserun arihei lubuidun burí ligaburi le larihibei Heowá luagu le ínchahabalin lun lasubudiruni inarüni (Huan 6:44). Dan le wínsiñehabu lan ínchahabaliwa amisuraha aban íbiri, gayaraati ladügün lira lun lasansirun ligaburi wanaagun woungua luma sunsuinagubei. Ka lunbei wadügüni lun wachoururuni ínsiñeni lan le tímatimaati ínchahabaliwa lun weresibiruniña amu  buidu? Lídehaba wafalaruni adundehani le wadarirubei lidan Filipuna 2:3 le ariñagubei: “Lau [...] ǘnabuguni, [...] buidulá hanügüniña amu gürigia huéi guánarügü”. Le linarün katei, buídutimatiña sun íbirigu wawéi lidan somu katei, lidan lan yebe hafiñen, ganigi o lidan amu lídangiñe igaburi le lunbei harufuduni kristiánugu. Anhein wakutiha ka lan idan buídutima lan somu íbiri wawéi, hínsiñetimabei woun ani ménrenguntimabei giñe woun weresibiruni buidu.

20. Anhein ánharaadiwa lubéi lun somu amisurahani, ka lunbei wadügüni ani ka uagu?

²⁰ Álügüdahati Dawidi, le meha abürühabei Sálumu: “Aburemei, ka gayaraabei laganóun biñuarü [tidan bikianpun, TNM]? Ka gayaraabei laganóun lidan buwübüri le sándubei?” (Sal. 15:1). Ligía guánarügü óunabubalin álügüdahani le lau lafuranguagüdüni igaburi burí le lagurabubei Heowá hámagiñe lidewenegu. Wagunfulirun lau wererun íbini dan le wuriba lan lidin woun ábanbei lídangiñe (Sal. 15:4). Ligíati, anhein ánharaadiwa lubéi lun somu amisurahani, madüraagua waméi luagu amu katei le masudininti. Anhein wadüga, ábame lerederun sun áfaaguni le adüga láalibei íbiri le amisurahabaliwa lidan ni kata (Mat. 5:37). Añahein gürigia, aba mídinhaña lan le ñeinhin lubéi hamisurahóua furumiñe ladüga aba lan hamisurahóun lidoun amu fulasu le uágubei hasaminara buídutima lan. Larufuduña san gürigia le adügübalin lira inebesei luma ínsiñehabuni? Uá. Lunti wánharun lun amisurahani le adügǘbei woun ani teinki wameime áfaaguni le hadügübei íbirigu ha amisurahabaliwa tídangiñe sun wanigi (Luk. 10:7). Ánheinti le lubéi lúgubu siñá lan woudin, wisá waméi le amisurahabaliwa lau lóufudagun. Ítara luba warufuduni hínsiñehabu wamá ani samina wamá hawagun ha híbiri.

21. Ka burí échuni unbei inebehabu hamá idewenegu ha buítiña?

²¹ Súdiniti giñe lun wafalaruni igaburi le uágubei héchuda gürigia ha lídanbaña fulasu le ñein wabéi. Anihein fulasu le ídanti gayara lan lachülürün gürigia hábiñoun amu mawisahanga furumiñe, ánheinti lidan amu burí fulasu siñati ladügǘn lira. Anihein fulasu le ídanti houn lan amisurahóutiña lichugúa éigini létima buídutimabei, ánheinti lidan amu burí fulasu hou hamuti súngubei ligiaméme. Anihein fulasu le ídanbei agurabúati lan lun lanügün le amisurahóubei somu katei, ánheinti lidan burí amu fulasu, magurabúnwati lun lanügün ni kata. Lidan amu burí fulasu, dan le lamisurahóun gürigia luagu furumiñeti o libiaman wéiyaasu agurabúati lun lariñagun mídinbei lan, lárigiñe ligíaali lánharun lun amisurahani; ánheinti lidan burí amu fulasu, anhein ladüga gürigia lira, saminawati meteingiradi lan. Meberesenga ka lan échunibei lidan fulasu le ñein wabéi, adüga waméi sun wayaraati lun gunda hamá ha amisurahabaliwa.

22. Ka uagu weiri lubéi lisudinin weresibiragun woungua buidu?

²² Kei meha lariñaguni Féduru, yarafatimahali lagumuchun ubóu uguñe weyu (1 Fe. 4:7). Chülümémeeli asufuriruni létima wéiribei lídangiñe súngubei. Éibume aribadeinatima lan katei, súdinitimabei lun hínsiñegua wamá wámagua. Ligía mosu lubéi wafalaruni adundehani le líchugubei Féduru dan lariñagubei: “Resibigua humá hungua húbiñe” (1 Fe. 4:9). Le linarün katei, másubei lemegeirúniwa weresibiragun woungua buidu.